الموضوع: الكامري والألتيما اقل اعطال من الاكورد

أكثر شي شدّني للموضوع هو عنوانه ...
الأكورد أخيس من الكامري و الألتيما , أصلا ما في مجال للمقارنة بينهم . حرام تقارن الأكورد بها السيارتين .
يا شباب إللي يتابع منكم مجلة سعودي أوتو . قبل سنتين أو أكثر بشوي أيام شكل الأكورد 2006 , 2007 نزلت مقارنة في هالمجلة بين الأكورد و الباسات . تخيّل يقارنون الأكورد بالباسات !
و في عدد لاحق قارنوا الباسات بالأودي a4 و المرسيدس c200 و الـ bmw 320 . إيش معناه الكلام ذا ؟!

أتفق معاكم كلكم في أن الأكورد مشكلتها في الفرامل , و أكيد من تجربتي للسيارة أنا غيرت الفرامل مرات كثيرة . لدرجة إن الأقمشة مرة وحدة كملت معاي 20.000 كيلومتر .

استخدامي للسيارة على مدى أكثر من 3 سنوات و ماشي 130.000 كلم :
مطبات و حفر براحتي و على هداوة بس أحيانا يجيك مطب و لا حفرة ما تدري من وين طلع فراح تاكله و انت تضحك .
داخل المدينة الـ rpm ما يطلع عن الـ 3 أو الـ 3.5 أغلب الوقت إلا إذا جيت بأتعدى واحد كريه و لا واحد مسوي شارع أبوه عاد وقتها كلام ثاني .
حوادث و لله الحمد سويت مرة وحدة حادث غبي ما صار للسيارة شي إلا رفرف يمين بس و احتياطا غيرت أشياء كثيرة بالسيارة لأنها على التأمين .
من ناحية التعديل و اللعب في المكينة . بأشتغل على خفيف يعني كلها إنتيك و كنداسة رياضية بس .
في الخطوط ما أثبت على سرعة معينة بس ما أنزل على الـ 160 زي طريق مكة - جدة أحيانا أجيب فيه الطبلون 3 أو 4 مرات .

سيارتي ما فيها ولله الحمد مشاكل من هذيك المشاكل حتى بالفحص المجاني يعني الأعطال إللي عندي كانت كراسي مكينة و قير و إصلاح لعلبة الدريكسون فقط . و ما أخفيكم إني للآن ما سويتها .
و عندي كمان القير , ضارب من 70.000 كلم و هذا أنا كل الصيانات إللي قبلها عندهم , و إلى الآن ما صلحته و لا أفكر أصلحه .
من ناحية التريبط و ما التربيط فالسيارة تحتاج تربيط .
الرساوة , صفر على الشمال و بقوة , أبدأ ما فيها رساوة . مرة كانت السيارة حتروح من يدي و أنا ماشي 100 بس .
الكهرباء في السيارة ضعيفة و أنا لاحظت هالشي أكثر من مرة .
بس في النهاية الأكورد سيارة حلوة و كويسة و تقدر تعتمد عليها . يعني سيارة تستاهل إن الواحد يشتريها . بس و الله ما أدفع 99.000 ريال في أكورد 4 سلندر .

نجي للألتيما , إحنا عائلة مرت علينا 3 ألتيمات . 2 منها 2005 و وحدة 2006 .
الأولى , سيارة أخوي الكبير v6 قير عادي و راحت في حادث في البحرين بسبب الرساوة و كانت ماشية 20.000 كلم .
الثانية , سيارتي 2006 قير عادي 4 سلندر و راحت في حادث و هي ماشية 6000 كلم فقط .
الثالثة , رجع أخوي الكبير و أشترى ألتيما v6 بس قير أوتوماتيك و الحمد لله و لا مشاكل مساعدات و لا خرابات و لا أي شي ما شالله تبارك الله , رغم إنو أكثر واحد مهمل بسيارتو ما يدخلها صيانات و لا أي شي و لا يهتم فيها و ما شالله أقمشتها تعيــــش و أخوي استخدامه كله مطارحات و مقاومات و شغل تشطيف و طبلووووون . موديلها 2005 و ماشية للآن 75.000 كلم .

الكامري ...
كانت معاي وحدة موديل 97 قير عادي , أستخدما أخوي الكبير و السواق و أبوي و عمي و ولد عمي , يعني ناس كثير أستخدموها . أخذناها جديدة موديل سنتها 4 سلندر . إلين 2005 و خلال هالـ 8 سنوات السيارة ماشالله عليها كانت توب , ما ربطناها و لا مرة و لا وديناها الوكالة إلا مرتين يمكن بس مرة كانت صيانة حق 60.000 كلم و الثانية القير كان فيها ما يشبك و غيرنا فيه الأسلاك بـ 620 ريال بس و السيارة بعدها زي العسل .
طبعا من الإهمال أنقطع سير المكينة و السيارة كانت ماشية وقتها 160.000 كلم و غيرت المكينة لمكينة سيليكا و أستخدمت السيارة فترة و أشتريت الأكورد و بعت الكامري , رغم إنه ما كان فيها شي و زي العروسة بعتها و الله و جابتلي وقتها 17.00 ريال و كانت سنة 2007 يعني 10 سنوات كرف و ماشالله جابت ذا السعر .
الكامري الجديدة ولد خالتي توه مشتري وحدة se موديل 2009 أخذها بـ 92.000 ريال " و الله حرام " و أقفال الأبواب معلقة و الشباك حق الراكب الأمامي مو راضي ينزل و اللمبات حقت القير طفت و عداد البنزين معلق .

الأكورد هي الأفضل بينهم لكن لو رجعنا بالزمن وقت ما أشتري السيارة يعني سنة 2006 و كانت ميزانيتي 100.000مثل ما هي ريال كان ضبطت الوالد شويتين و أخذت أفالون بـ 109.000 ريال ليمتيد و بس , أصرف و أجمل و أحلى و أضمن من 100 أكورد .

تحياتي لصاحب الموضوع ....