ياشباب تنصحوني بترك تغير الزيت في الوكاله ؟

**H-O-N-D-A_2009** · 01-01-2010, 05:23 PM

الـــســـلام عــليــكــم

عساكم بصحه وعافيه.......

ياشباب حاب اخذ ارائكم في تغير زيت المكينه في الوكاله او خارجها ؟؟؟

علما ان التغيرخارج الوكاله اوفربكثير .... للمعلوميه( سيارتي ماشيه 50 الف كيلو) اكووووورد 2009 سبشل

واللي يفضل التغير عند بنشري او محل خدمات سريعه يعطيني افضل زيت ينفع للاكورد

من ناحيه الكثافه والصناعه والجوده.....

وشــــــــــكـــــراً

**King** · 01-01-2010, 05:32 PM

قبل فترة واحد نزل موضوع مدري رد

كتب فيه انه غير برى الوكالة وجاء صاحب البنشر إلي يغير الزيت

شد على الصره وخربها عليه , جاء راح المخرطة عشان يصلح السنه حقت الصره وكلفت عليه مبلغ وقدرة

(هذه امثلة على المشاكل إلي تصير من اصحاب الورش)

وممكن يزيد كمية الزيت او يقللها وقد يصدف معك انه يعمل عمله بشكل جيد ولا تواجه اي مشاكل !

{صاحب الورشة انسى يعوضك بأي مبلغ مدفوع!}

لذلك الوكالة هي افضل مكان تغير فيه الزيت و 110 ريال << صحيح انها مرتفعه شوي

لكن انت ماراح تغير كل اسبوع ولا كل شهر

كل 5000 كم
او
6000 كم

تغير الزيت والسيفون , القرار يعود لك ..^-^

**عاشق الوعد** · 01-01-2010, 05:34 PM

تغيير الزيت في الوكالة مو مهم بس أهم شي يكون بنشري ممتاااااااز عشان مايعدم عليك الدنيا الله لا يقدر

المهم إنك تشييك على السيارة من ناحية الميكانيكا اللي هي 10.000 و 20.000 و 30.000و .... وانت طالع احسب عشرة آلاف كم عشان الضمان ما يروح عليك

تحياتي

**ACCORD06** · 01-01-2010, 06:57 PM

أنا رأيي انك مستحيل راح تغير الزيت طول عمرك بالوكالة الا مايكون عندك ظروف تكون بمنطقة مافيها فرع خدمة سريعة أنا مغير الزيت 7 مرات برا الوكالة والحمد لله مافيه مشاكل

**Zero Cold** · 02-01-2010, 12:05 AM

أنا من يوم ما أخدت السيارة من الوالد ما غيّرت الزيت في الوكالة لأنه زحمة و مشوار و تكلفة أغلى مع إن تغيير الزيت أتفه من التفاهة و الفلتر كمان
في ناس تقول إن زيت المحرك عند البنشري يمكن يكون مغشوش و الفلتر مدري إيش صناعته
الحل و بكل بساطة أشتري الزيت و الفلتر من الوكالة أو من أي موزع معتمد لقطع غيار هوندا و روح أقرب بنشري

**الهنادي راس مــالــي** · 02-01-2010, 12:11 AM

خذه مني نصيحه وانا اخوك اترك الوكاله وروح غير عند اقرب فرع قلف اكسبرس سابقاً ، وحالياً بيترومين اكسبرس انا اغير عندهم ويفحصون لك السياره من وإلى وماكلفني ١٢٠ ريال ،،

**الهنادي راس مــالــي** · 02-01-2010, 12:14 AM

المشاركة الأصلية كتبت بواسطة عاشق الوعد

تغيير الزيت في الوكالة مو مهم بس أهم شي يكون بنشري ممتاااااااز عشان مايعدم عليك الدنيا الله لا يقدر

المهم إنك تشييك على السيارة من ناحية الميكانيكا اللي هي 10.000 و 20.000 و 30.000و .... وانت طالع احسب عشرة آلاف كم عشان الضمان ما يروح عليك

تحياتي

^^^ من قال لك يالحبيب ان الضمان يروح لو ماتسوي الصيانه الدوريه

،،،؟؟؟؟
ياحبيبي كتيب الضمان يقول لك 100 الف كم او 3 سنوات ايهما اولى ،، ماشرط وقال لازم تسوي الصيانه علشان ماينلغي الضمان :p

**المباشر** · 02-01-2010, 06:00 AM

<<< يغير الزيت عند بنشري .. هندي

الفلتر أصلي من الوكالة ونوع الزيت هوندا من البنشري وياخذ علي 75 ريال 5 علب زيت هوندا و10 ريال قيمة شغله البنشري ابدل عنده زيت سيارتي من سنه ونص الى يومنا هذا أو يمكن أكثر من سنه ونص المهم الوكالة ماعرفتها الا كل 10 الآف وساعات 20 الف والضمان ماراح علي وفي الستين بدلت شغلات على الضمان مع اني سمعت شائعات اللي ماراح يلتزم بالصيانة ولو بال 10 ، 20 ، 30 الخ راح يلغى الضمان ومن بعد الستين الف ودائمآ عند نفس البنشري بخصوص الزيت وماأرتاح الا له

كذا بنشري ثاني زاد الزيت في الماكينة وسحبت عليهم ولكن هالهندي ماشاء الله عليه كأنه شغال بالوكالة وعارف كم يعبي للزيت ومقدار التعبئة كم

والحمدلله الصرة بخير والموتر أطيب من الطيب

**بلال العلمي** · 02-01-2010, 09:56 AM

المشاركة الأصلية كتبت بواسطة عاشق الوعد

تغيير الزيت في الوكالة مو مهم بس أهم شي يكون بنشري ممتاااااااز عشان مايعدم عليك الدنيا الله لا يقدر

المهم إنك تشييك على السيارة من ناحية الميكانيكا اللي هي 10.000 و 20.000 و 30.000و .... وانت طالع احسب عشرة آلاف كم عشان الضمان ما يروح عليك

تحياتي

الانسان يخطي وهل لو اخطأ راعي البنشري راح يشتري لك كارتير جديد؟؟

الوكالة عندهم الجهاز اللي يعبي يحط الكمية مسبقا يعني مثلا 4 لتر يقوم يحطها ويبان عنده كم لتر من الاربعة عباها في السيارة

واذا لا قدر الله ربط على السرة وخربت عليه الوكالة تصرف لك كارتير جديد

فرق بين هندي عايش في الورشة وبين شخص يتدرب كل شهرين من صانع السيارة نفسها

**غصب عنك** · 02-01-2010, 04:47 PM

والله فكرتوني بالمهم
الأكورد كم علبه تاخذ عند تغير الزيت

**MSH3L** · 02-01-2010, 09:39 PM

انا اغير الزيت كل 10,000 كلم , الآن ماشي عليه 8,000 كلم , واللزوجه لسى موجوده

طبعا اسوي صيانة كل 10 آلاف عند الوكاله من وإلى

بالتوفيق لك اخوي

**D.H.o.O.o.M** · 02-01-2010, 09:48 PM

من يوم شريت السيارة ماعمري غيرت الزيت خارج الوكالة

و مرتاح ومطمئن واضمن

تحياتي لكـ

**المباشر** · 03-01-2010, 04:19 PM

باختصار أترك عنك الوكالة وماودي أطول الموضوع ولا أتكلم عن الوكالة احترامآ لهم وللشباب العاملين فيها الله يعطيهم العافية

ولكن توضيح بسيط : موظف في الوكالة اللي يقال عنه خبير يصب لي زيت القير ونص علبه في الأرض بسبب المحقان ماركبه مضبوط وحجم الفتحة أكبر في المحقان << هل هذا خبير ؟؟؟؟ طيب لو ماكنت انا واقف على راسه ومادريت عنه وصرفني أو مازاد الزيت وانا اخذت موتري وطق القير وبعدها يركبوني الغلط هل هذا خبببييييييييييييييييييييير يتدرب كل شهرين ؟؟

**المايسترو77** · 03-01-2010, 05:05 PM

ياعمي توكل على الله وغير عند ابو يمن

ترى هذي نوع من الوسوسة
لكن اكون معك صريح
لو لا قدر الله صار شئ انه مثلا شد ع الصرة او خلافه مالك حق عند ابو يمن
ولكن صعبة اني كل مرة اغير في الوكالة ترى زحمة

**أسير المشاعر** · 08-01-2010, 01:26 PM

ياخوك شكلك فاضي ماشاء الله كل 5000 الاف تروح تداوم عند زحمة الوكاله ههههههه

غيرها عند البنشري وصدقني مايفرق ابد ،،
بس عاد شفلك بنشري نظيف وان شاء الله حتدعيلنا ..

بخصوص الي يقول الضمان يروح اذا ماسويت صيانه !!! انا الصيانه الوحيد الي دخلت السياره فيها هي 40 الف !! ولا غيرولي قطع ب 2000 ريال على الضمان :d
يعني لاتخاف الضمان مابيروح ان شاء الله

**متكرود** · 08-01-2010, 02:22 PM

المره الوحيده الي رحت فيها الصيانه لمن مشت السياره 1000 ك م اخذتلي 5 علب زيت وفلتر وبغير عند اقرب بنشري:d
سألت المهندس الي غيرلي الزيت عن الزيت البديل لو ماقدرت اروح الوكاله وقال زيت كاسترول 10/30 ويتعبى 4.25 لتر بدون فلتر و 4.50 لتر بالفلتر.
أتمنى اكون افدتك...

**B Useful** · 08-01-2010, 03:22 PM

اشوف البعض مقدسين شغل الوكالة ، كنهم ملائكة اللي يشتغلون موب بشر ..!

واذا قلت لكم اني غريت الزيت بالوكالة ، وبعد ما خلص وشيك على موية المساحات وبخ المكينة هوا قال لي سيارتكـ جاهزة ، وادفع وامشي كيلو الا السيارة مرتفعة حرارتها ..!!!

وكالتكم اللي تدافعون عنها واللي تقولون انها تعطي تدريب كل شهرين موظفهم ناسي يعبي زيت بسيارتي ، انا اما ادري وش وظيفتة اذا انة حاطية يغير زيت ولا حط لي زيت !!! وشيك على كل شي الا تبديل الزيت ..!

المختصر : كل الناس تخطي وتصيب ، لا تمدحون الوكالة وتقولون كل البناشر ما يعرفون ، ولا تمدحون كل البناشر وتقولون الوكالة ما يعرفون ..

جربت الوكالة << ولا مانع اني اروح مرة اخرى لكني ما استخدم زيتهم
جربت البناشر << لأني استخدم كاسترول ماجناتيك واجيبة بنفسي هو والفلتر
جربت وغيرتة بنفسي << ولا عاد بغيرة بنفسي طريقتة متعبة اذا مافية حفرة ومكان وعدة مناسبة مثل البناشر

فية بعض المحطات تسوي عروض مثل ماقال الهنادي راس مالي تفحص السيارة من الى مع الكفرات وتشيك على كل المويات والزيوت ولا تتعدى ١٠٠ ريال .

**Honda*2008** · 08-01-2010, 03:56 PM

هلا وغلا
خيو
تبي نصيحتي
خل عنك الوكاله
ورح
بترومين اكسبرس=قلف اكسبرس

**بريق الصحوة** · 09-01-2010, 06:58 AM

شوف تعرف محل بيع الزيوت بالجملة واخذ لك زيت كرتون هوندا وخل البنشري قديم يغييره ويعرف كيف يقيس وكل شئ افضلك وارخص

**ღღ 3eo0oney...ღღ** · 09-01-2010, 11:20 AM

شوووووووووفووووووا

حبايبي غير بتومين لا تدور شغل ممتاز وفلبينيين يعني ارتح بس خلك واقف عليهم وتفرج

**accord 06** · 09-01-2010, 04:01 PM

اربع سنوات و نص ما عمري غيرت الزيت بالوكاله

الا مره وحده مع تشييك الالف كيلو

اغير بمحطه متعامل معه من فتره طويله .. زيت كاسترول ماجنيتك اجيبه معي + سيفون وكاله

يكلف كل تغيير تقريبا 115 ريال .. و يمشي 15 - 20 الف كيلو

بينما الوكاله كل 5 آلاف كيلو تدفع حول 100 ريال

يعني بنفس المسافه بتدفع زياده 200 - 300 ريال اذا بتغير بالوكاله

غير المشاوير و زحمة الوكاله

**gσℓ∂ нєαят** · 11-01-2010, 10:11 AM

أنا ماعمري غيرت عند الوكاله الا وقت الصيانه
والبقيه عند البنشري اللي اتعامل معاه ..
وصدقني ماتفرق

**ACCORD06** · 13-01-2010, 07:05 PM

نسيت أذكر لكم شي أتمنى أنكم تنتبهون له ترى الوكالة ماينتظرون لين يتصفى الزيت القديم كلة شغلهم خبط ولزق أهم شي يخلصون من السيارة بسرعة ويفتكون خصوصا ً أوقات الزحمة والكلام هذا صار لي وقلت له وهو يربط الصرة ترى الزيت القديم ماخلص قالي مايضر

أي مايضر يابو الشباب تخلط لي زيت قديم محروق مع جديد وش الفايده

**أغـار يا هـوندا** · 14-01-2010, 05:00 AM

حبيب قلبي,,,
غير برى مو مشكلهـ ... بس لا زم تكون تعرف شغلهـ...
أنا حصلت معي مشكلتين برى..
مره شد أبو يمن السرهـ حتى بازت وصارت تهرب وكلفتني 220 بالمخرطهـ...
الثانيهـ:وضع لي الشفط داخل الماكينه أو راس الماكينه وشوي طاح وقعدنا نفكفك 7 ساعات..

أما اللي يقول إنتو تقدسون الوكالهـ...لا ياحبيبي
بس ع قول المثل (أعط الخبز لخبازهـ).
يا شيخ يكفيك لو نقصك شي ماتاخذ مسافهـ ولا وقت...
ومع التغيير يحاول يشيك على جميع الفلاتر والزيوت...وبرى أهم شي يمشيك ويجي اللي بعدو...

**الهوندا احلى مركب** · 18-01-2010, 09:14 AM

من يوم طلعت سيارتي من الوكاله ماقد قبلت عليهم وذالك لنصبهم السياره جديده اذا وديتها عندهم والله يخربوها عشان ترجع لهم بالنسبه لي اذا خربت السياره اروح فيها لورشه اعرف فيها واحد والله انه يوقف بس عند السياره يعرف علتها ومتخصص في الهوندا والزيت الله يخلي سوبر جيتي ولا الترا7 بس اني اشتري فلتر زيت من الوكاله ودمتم اخواني