مساااء الخييير وكل عاام وانتم بخير ان شا الله
المهم مالكم بالطويله السالفه ومافيها ان معي اكورد 2009 كملت سنه وشهر بالضبط
امس بالليل نسيت النور الخلفي الداخلي شغال ما انتبت لها الا قبل شوي :d
اللي ابي استفسر عنه ثلاث شغلات ,,
ا >> هل راح شي كثير من البطارية ؟؟
2 >> لو انتهت البطارية مع الايام اقدر اسويلها اشتراك ولا خلاص مافي امل لازم بطارية جديده ؟؟
3 >> لو اشتريت بطارية غير حقت الوكاله هل يلغي الضمان ؟؟
لكم مني جزيل الشكر يا حبااايب أأأألبي :o
هلا عزيزي
* هل راح شي كثير من البطارية ؟؟
لا ما راح الكثير تطمن
* لو انتهت البطارية مع الايام اقدر اسويلها اشتراك ولا خلاص مافي امل لازم بطارية جديده ؟؟
نعم , راح تشتغل بالأشتراك فورا
* لو اشتريت بطارية غير حقت الوكاله هل يلغي الضمان ؟؟
لا طبعا , لكن ليش تشتري على حسابك؟؟
البطارية عليها ضمان 3 سنوات بأي وكالة
اذا شفتها قامت تلعب بذيلها
روح الوكالة و تتغيرا فورا على الضمان دون ما تدفع ريال
السنتين الاوليتين مجانا
السنة الثالثه تدفع نص قيمتها
SAMiR
اخوي اخبر ان النور يطفى مع اغلاق الابواب>>هذي الانوار الخارجية بس اتوقع الداخلية ايضا كذا
المشاركة الأصلية كتبت بواسطة احبك يالاكورد
قصدك ان جيت افتح البااب ,,, معك حق لكن انا حطيتها على on ونسيتها :d يعطيكم العافيه على المرووور
اليخاندرو اي شيء تركبه بالسياره من برى الوكاله داخل مدة الضمان يلغي عليك الصيانه انتبه واثنين من الشباب صارت معهم واحد مركب طقم زينون والثاني مغير اسلاك بواجي غير اللي بالوكاله
يعطيك العافيه على اجاباتك
ولكن على حد علمي انه ضمان البطاريه سنه واحده فقط
اذا كان كلامك صحيح بكره اروح اغيرها عالضمان
^^^^
كلامه مبني على وكاله عبداللطيف جميل
قد تكون لها نفس السياسة لدى عبدالله هاشم
مساء النور
ا >> هل راح شي كثير من البطارية ؟؟
لا اذا أشتغلت السيارة تمام وماعندك مشكلة ولا ودها كهربائي بعشرة ريال يشحنها لك
2 >> لو انتهت البطارية مع الايام اقدر اسويلها اشتراك ولا خلاص مافي امل لازم بطارية جديده ؟؟
بخصوص هالموضوع انت وحظك لكن من خبرتي وخبرة الشباب ان مالك أمل يشغلها الاشتراك ومثل ماقلت لك انت وحظك ممكن يشغلها وممكن لا لكن من ناحيتي سيارتين هوندا اكورد طفت بسبب البطارية وعيت تشتغل باشتراك الا بعد تبديل البطارية وقريت بعد شباب هنا يقولون نفس الكلام عيت تشتغل معهم
3 >> لو اشتريت بطارية غير حقت الوكاله هل يلغي الضمان ؟؟
البطارية ضمانها سنه من شراء السيارة عند الوكالة وضمان البطارية سنة بعد اذا شريتها من الوكيل ولا تلغي الضمان ولا لها خص في الضمان
انا صار لها الاكورد معي سنيتن وشوية .. من حوالي شهرين جيت اشغل السيارة لقيتها ما تشتغل
كشفت على البطارية لقيتها مودعه .. رحت غيرت البطارية من اقرب محل بشنر ولا اتوقع انها تدخل في الضمان
لانها شي استهلاكي .. يعني مثلها مثل الكفرات ومثل الفرامل .. لو غيرت الكفرات مثلا ماراح يروح شس من ضمان السيارة
انا مادري في اسئله بالمنتدي مبنيه ع وشو دلاخه هي ولا اول مره يمعطون موتر وش ذي الاسئله العجيب اني القا لها ردود يعني هل من باب المساعده طيب اسئله خربيطه اجل بطريقه نفس حقت الوكاله تروح الضمان عليها الدبشه مايسئل هالسؤال واتوقع لو انسئل بيجاوب عليه دنيا عجيبه
طيب وراك تهزأ يا قل خيراً او ........
الرجال جاي يشتكي وتشوف الناس جالسين يكسبون اجر ويساعدونه وانت جالس تهزأ وتكسب اثم ... والله عالم عجيبه << يعطيك نفس اسلوبك
وانا قفلت علي البطاريه قبل كم شهر .. وغيرتها من اسي دلكو ... وشوف اذا غيرت البطاريه لا تخلي البطاريه عنده وتروح .. قله ترخص لي بالبطاريه اللي بشتريها منك واعطيك بطاريتي القديمه .. لأنهم يستفيدون منها :o
المنتدى وجد للفائدة و الاستفادة من الجميع و تبادل الخبرات و الاراء
تخيل مافي شي اسمه انترنت .. كيف اسلوبك مع السيارات بيكون ؟ جا ببالك سؤال عن الاكورد شو تسوي ؟ الخ
و الناس درجات من العلم بأمور السيارات يعني لو يجيك واحد نابغه بأمور السيارات و يسألك سؤال عن شي بداخل المكينة
بتلقى لك مخرج ؟ هنا العبرة و فائدة وجود المنتدى
اذا ما ساعدت اخوك و افدته مين يساعده
واتمنى اننا نرتقي شوي اخوي .. المنتدى وجد للجميع
تحياتي لك و رمضانك كريم
ومضة لك (( دخلت ملفك و شفت كم رد لك بس مع الاسف مو بمستوى الرقي اطلاقا ))
هلا شباب
معلوماتي عن البطارية مبنيه على وكالة " تويوتا " و أيضاُ " التوكيلات العالمية " و كيل شفر + " نيسان "
البطارية عليها ضمان عند كل الوكالات السابقة , تبديل مجاني أول سنتين عند " تويوتا " و أول سنه عند شفر و نيسان
ما أعتقد " هوندا " مختلفه عنهم
SAMiR
الله يعطيك العافيه وعلى مروورك العطر ذا مادل فانه يدل على مستوى سطحية تفكيرك واسلوبك في التعامل مع الناس اهنيك من اعماااااااااااااااااااق قلبي ياعزيزي
بعدين تعال علمني مين قالك رد ؟؟؟؟؟؟
اتمنى الموضووع يكون للاستفاده فقط لاااااااااااااااا غير.
الله يزيدك من المعلومات ماشالله ردودك في كذا موضوع تدل انك مثقف
وفاهم .....
ليش انت مسجل في المنتدى ؟
المنتدى لاي استفسار لوكان السؤال اغبى سؤال
فيه ناس ماهي فاهمة
والله يهديك......انت وانا وجميع المسلمين
ضوابط المشاركة
رد مع اقتباس
مواقع النشر (المفضلة)