(سويت حادث) والحمد لله جات الأمور بخير (قصة قصيرة)

**بستم** · 22-10-2010, 04:59 PM

السلام عليكم ورحمة الله وبركاته

بحمد الله جات الأمور بخير وسلمنا وسلم الله إللي معي زوجتي وأبنائي

القصة كنت ماشي على الدائري الشرقي يوم الربعاء الفايت 11/12 قبل أمس

فتر الظهر رايح صوب مخرج 15

وكان قدامي فورد فكتوريا سواق ومعه راكبين

وخلفي اكسنت عامل مصري يكلم جوال (تفصيل إنما إيه)

فجأه فرمل الفورد والحمد لله لحقت أوقف انفكت الزحمة بعد مخرج 11

فجأة وقف الفورد مرة ثانية لكن الحمد لله وقفت بشنطته

وتوني أصحى للحظة إلا والإكسنت قبع فينا من خلف

صرنا هبمرقر

سلم الله الركاب من كل المتضررين

وما أمدانا ننزل نشيك إلا والمرور مصفط

(وهذه بصراحة يشكرون عليها)

أخذ إثباتاتنا وقال صفطوا قدام قبل إشارة مخرج 12

وسجل الحادث كيف صار وجزاه الله خير مشاني لأن معي عائلة

وقال راجعنا السبت علشان تسدد أضرار الفورد

أما راعي الأكسنت فقد سامحته

لأن خلفية السيارة لم تتضرر إلا مخيشات بسييييطة والحمد لله

إللي صار بسيارتي إني كعيت فرامل وفرامل وفرامل وبرضو فرامل

بس ما رضت تاقف إلى بالفورد

مع إن المسافة لا بأس بها والسرعة متساوية مع الآخرين

لكن السؤال الجاد:

أبي أحسن ورشة سمكرة وبوية والسعر الحلو

أو وش رايكم الوكالة مرة وحدة

لأن الوجهية تضررت صدام على شبك على أول الكبوت

على الرفارف خاصة اليمين رجع على الباب صار يفتح نص يادوب أركب

أو وش تنصحوني فيه الله يعافيكم

مع العلم إن سيارتي أكورد 2006 فل

**معشوق هوندا** · 22-10-2010, 05:36 PM

الحمدلله على السلامتكم
وانا صار لي حادث زيك باضبط بس انا كنت مكان الاكسنت
صدمت على خريص توني نازل الا اشوف المرور موقف

الورشه يفدونك الاعضاء

**abdelslam** · 22-10-2010, 06:39 PM

الحمدلله على السلامه اخوي ماتشوف شر

أنا امس بالليل كنت راح اصدم كوريلا ولكن الحمدلله على السلامه

مع اني كعيت فراااااامل بس الموتر مايبي يوقف لدرجت اني فكرت وضغطت بوري اذكر 4 مرات وكبست عليه مرتين وبعد طول انتظار و الحمدلله بالحضه الأخيره وقفت السياره

الغريب اني كنت امشي تقريبآ 60 وهو يمشي قدامي 60 وبيني وبينه تقريبآ 15 متر

مع ذالك ماوقفت السياره الى والصدام بالصدام { كيف هو وقف بهالسرعه وانا ماامداني اوقف !!}

و الحمدلله على السلامه اخوي ماتشوف شر والله يجعلها اخر الحوادث ان شاء الله لك والمسلمين أجمعين..

**فـــيـــصـــل..607..** · 22-10-2010, 06:57 PM

لما تمشي بالأكورد حط في بالك إن ماعندك بريك

والحمدلله على السلامه

**Mr.Goldy** · 22-10-2010, 07:02 PM

^^^^^^^^^^^
حرااام عليك انا بالعكس احس فرامل الاكورد قووي صراحتن

**الهاجس** · 22-10-2010, 07:09 PM

الحمد لله على السلامه وما تشوفون شر بالنسبه للسمكرهـ ما عندي علم لاني مني من اهل الرياض

**سمو الذات** · 22-10-2010, 07:11 PM

الف حمد لله على السلامة ياغالي

وان شاء الله ماتشوف اي مكروهـ عقبه

وبخصوص التصليح السياراة اذا كنت تقدر على الوكالة يكون ازين لك

والحل الثاني انك تشوف لك ورشه محترمة في الصناعية

وحسب متابعتي للمنتدى اسمع كثير من الشباب يمدحون ورشة في ام الحمام

بس مو فاكر كم رقم الورشة

ان شاء الله يفيدوك الشباب

**Mr.Goldy** · 22-10-2010, 07:21 PM

^^^^^
عزيزي الي يمدجونها ورشة مكانيكا وليست سمكرهـ

**Mahoody** · 22-10-2010, 07:23 PM

الحمد لله ع السلامه

انصحك تروح الوكاله اذا تقدر وبالنسبه للورش ما عندي علم فيها

يمكن يفيدونك الاعضاء

**الوهم الاخير** · 22-10-2010, 07:28 PM

والله انا انصحك في الوكاله فقط لاغير

لانهم يفكوا الرفارف ويركبوا جديده على طول ولو سمكرتها حيبان معاك انها مسمكره بعد فتره ولو طويله هذا بالنسبه لصدمات الرفرف والكبوت وباقي الاسياء عاد هم يتصرفوا برضه شغلهم نضيف ومضمون

والحمدلله على السلامه

**BЯộǾK ❤** · 22-10-2010, 08:28 PM

فيه عندك ورشه الوفاء في صناعيه الجنوب

وفيه ورشه .. وانت على طريق الامام ووجهك رايح للعليا اطلع على تقاطع طريق الامام مع طريق الملك عبدالعزيز وخذ يمين تجيك اول محطه على يدك اليمين تلاقي فيها محل .. انا سويت سيارتي عنده وبصراحه بوويته حلوووووووه ماشاء الله عليهم

وشغل السمكره حلو واذا تعرف احد احسن منه في السمكره يكون احسن لكن بويتهم انصحك فيها بس سعره لك عليه بس حاول فيهم وكاسرهم

والحمد لله على سلامتك

**بستم** · 22-10-2010, 08:29 PM

ألف ألف ألف
1000
شكر وتقدير

لكل من رد ودعى لنا بالسلامة

ياجعل روسكم تسلم بصراحة هونتوا علي المصيبة

**ع ب و 777** · 22-10-2010, 08:54 PM

الحمد لله على السلامة ..

مادري عن الأولات .. لكن خويي معك اكورد 2008 وكان على سرعة عاليه وكان في لفة علي اليمين صدقني مدري كيف وقفة السيارة قبل اللفة .. وربي فراملها معجزززة الاكورد ... اما الاولات مادري عنها ...

وبالتوفيق اخوي

**بستم** · 22-10-2010, 10:38 PM

ياشيخ غــلــوز الهوندا معروفة من زمان بجودتها وقوتها

والموديلات الأخيرة من تغير شكلها يعني من2003 أو 2004 وانت جاي

انتشرت وكثرت وزي الحلاوة

بس ما أدري وش إللي صاير

ولا واحد ولا اثنين كم واحد اشتكوا من الفرامل

**المباشر** · 23-10-2010, 12:27 AM

الف الحمدلله على السلامة

**V I P 9 1 1** · 23-10-2010, 12:45 AM

الحمدلله على السلامتك وسلامة عيالك

ماتشوف شر

اما للورش يفيدونك الاخوان

**EBrA** · 23-10-2010, 01:35 AM

اهم شي سلامتك

**البراك** · 23-10-2010, 02:11 AM

لاحول ولا قوة الا بالله معوض خير ياخوي

نصيحة من واقع تجربة حاول قد ماتقدر انك ماتسمكر روح التشليح و شوف القطع المتضررة عندك و بدلها من التشليح بنظيف

**لعيونها** · 23-10-2010, 02:21 AM

الحمد لله على سلامتك اخوي

**Accord F15** · 23-10-2010, 04:26 AM

الحمد لله عالسلامه وما راح الا الشر والله يعينك

**فهودي 2010** · 23-10-2010, 12:53 PM

الحمدلله على السلامه

**اكورد الامارات** · 23-10-2010, 01:52 PM

الحمدالله على السلامه

**أكــ97ــورد** · 23-10-2010, 02:14 PM

الحمد لله على سلامتك وسلامة العايله ... وماتشوف شر إن شاء الله .

**الاخطبوط** · 23-10-2010, 02:47 PM

الحمد لله عالسلامه

فرامل الاكورد حلوه لكن هي مره وحده اللي خانتني مسكت فرامل من مسافه ولا وقفت الا الصدام بالصدام استغربت لحظتها من ضعف الفرامل حتى اني يوم شفت الموتر يقرب وايقنت الصدمه حطيت القير على d1 نفس موديل موترك 2006 فل

فيه عيب اوضح في فرامل الاكورد هي انه كل كم الف كيلو لازم تمسح الهوبات الخلفيه عشان الرجه