إفادة سريعة

**أبو دلع** · 07-11-2010, 10:46 PM

ياشباب يوم الخميس اللي راح اكلت حفرة ومطب بعدها على طول كنت امشي 120 المشكلة الحين الموتر فيه حذفه يسار وصوت طقطقة من تحت رحت لميزان العضيب بالصناعية القديمة اليوم قالي التالي :
العكوس يبيلها مخرطة
كبس وسحب الكفرات الامامية + ميزان
المساعدات نص عمر فيها تهريب بسيط

ما اقتنعت بكلامه رحت لميزان المجد بعدها وقالي :
كبس وسحب الكفرات الامامية + ميزان
المساعدات تغيير
العكوس يقولي ما اعرف لها

بالنسبة لتغيير المساعدات الاثنين الامامية سعر الواحد وكالة من 940 وفوق
قالي راعي ميزان المجد فيه نوع اسمه kyb ب 190 ريال وعليه ضمان سنة

افيدوني وش اسوي بهالمصيبة

مع العلم انه يطلع صوت قرقعة بالموتر وهو ماشي وحتى على عيون القطط الصوت مايروح ولو انت ماشي وتلف يمين ويسار مايروح واحيانا يجي الصوت من سرعة 40 -90 وبعدها يختفي واحيانا تحس انه مافي شئ

اللي عنده خبرة يقولنا الله يرحم والديه

**جاكي2** · 08-11-2010, 09:13 PM

السلام عليكم
اول شي شيك على جلد المقصات لانها تطلع صوت هربدة في السيارة وسعرها 6 جلد أصلي يمين ويسار 320 ريال بدون شغل يد
اذا كانت سليمه شيك عل كراسي المساعدات الاماميه
اذا كانت سليمه فما لك الا تغيير المساعدات الامامية

ودمتم سالمين

**الـمـسـافـر** · 08-11-2010, 11:58 PM

المساعدات عمرها الافتراضي طويل جدا اذا سواقتك رايقه وماتنعدم من مطبه وحده

والعضيب كل من راح لهم وشاف شوي زيت ع المساعد قال غيره ..

**Accord_2005** · 09-11-2010, 12:29 AM

هلا فيك يالغالي

بخصوص اذا جيت تشتري اي قطعة تتعلق بالكفرات او المكينة و الجير لا تاخذ إلا الاصلي لان هالاشياء ما فيها لعب و يا كثر من وفر فلوس وراحت حياته يعني خذ كل شيء اصلي من الوكالة و التركيب الافضل يكون عند الوكالة ولكن اذا تعرف ميكانيكي ممتاز رح له و عسا الله يوفقك

وسلامتك ،،،

**أغـار يا هـوندا** · 09-11-2010, 05:27 PM

روح الوكالة اعطيهم فلوس يفحصوا وش المشكلة ولمن يعطوك التقرير وش اللي تغيرهـ . اشتر القطع وركب برى
أسلم حل

**هوواكورد** · 11-11-2010, 01:28 AM

الله يعينك

**أبو دلع** · 12-11-2010, 07:30 PM

يعطيكم العافية ياشباب

تم حل المشكلة على دفعات

المرة الاولى :

تغيير هوبات امامية لان الهوب الامامي يمين كان مشعور (بداية كسر) وكذلك الفحمات فيها كسر واضح
تغيير فحمات امامية

المرة الثانية :(لان فيه اصوات باقيه )

تغيير فحمات خلفية مع خرط هوبات لانها طلعت سليمة

ميزان للكفرات الامامية فقط بدون كبس وسحب وخرابيط العضيب والمجد + تبديل الكفرات الامامية عكس بعض مع التأكد انها سليمة 100 بالمية بدون تحبيل ولا شئ

والحمد لله الان الموتر 100 بالمية ماشاء الله

للمعلومية فقط ولجميع الاعضاء

لاتصدق أي كلمة بالصناعية عن موترك لانه يبيك تدفع وبس

لان المساعدات الامامية بداية تهريب وعلى كلام الورشة يقولي يمشيك سنة وزيادة لانه توه بادي يخرب

الشكر موصول لكل اللي شاركوني بالموضوع

وحبيت افيدكم وش صار معي

أخوكم
أبو دلع (رياض)