الموضوع: حادث الاكورد 2012

الحمد لله على السلامه اخوي
الي صدمك ما يطلع من الحجز الا بعد ما يدفع مبلغ التصليح
واذا احد كفله ومادفع يجبرو كفيله يدفع لك
وعلى حسب كلامك والله العالم انه يفترض يعطيك سياره جديده وكاله

قبل كل شيء الحمد لله على السلامة ... في الحديد ولا في العبيد

وثاني ما دام التلفيات وصلت إلى أكثر من ( 50.000 ريال ) فمعنى ذلك إن السيارة المفروض تعتبر ( تالف ) ... لأن في نظام المرور و شيوخ المعارض إذا وصلت التلفيات أكثر من حد معين والله ناسيه بس أعتقد ( ثلث أو نصف قيمة السيارة ) فتعتبر تالف ويعوض صاحبها بقيمة سيارة جديدة مع بيع السيارة التالفة وخصم قيمة السيارة الاجمالي منها .

لكن إذا ما فيه تأمين والتصليح على حساب الطرف الثاني فمن الأفضل إصلاحها خارج الوكالة ، وأتوقع بأقل من نصف قيمة إصلاح الوكالة ... باعتبار إن الوكالة أسعارهم باهظه و إنك راح تشتري قطع من التشليح وقطع من الوكالة وإصلاح ما يمكن إصلاحه عن طريق السمكره والتعديل .

أكرر الحمد والشكر لله على سلامتك ... وسلامة الطرف الثاني مهما كان غلطان ... والله يفرج عن ضيقكم على خير .

هذا نظام البنوك للاسف لو سيارتك راحت فيها يصصلحونها ويقلون خذ سيارتك
وكمل الاقصاد الله لا يهنك لاكن اسمع نصيحه ارميها في الوكاله وقل للبنك خذو سيارتكم
او اعطوني وحده جديده واذا ما اعطوك وقف الاقصاد عنهم وروح للتاجير عن طريق شركات
مو عن طريق البنك انت ترا منت دافع واجد وحرام تحمل الاجنبي مبلغ وقدره او ترميه في السجن
لانو العوض مو زين ترا والله يكون في عونك ياخوي :(

بس يا اخوان انا خلاص قد وديتها الوكاله

والبنك ماله دخل رافع يده عن الموضوع يقول لانه اقرضني قرض والوكاله هي الي باعتني السلعه وليس هو .. وفعلا اطلعت على النظام وهذا نظامهم

اما سالفة تشاليح او اصلحها على حسابي انا ما اقدر والله ... يكفي انه ورطني وعطلني معه وسببلي مشاكل .. انا مسيكين مثله راتبي 4 الالف وهو راتبه 10 الاف
انا المسكين الي راحت سيارتي وتعطلت اموري وصار فيني اصابات .. هو الجني ماشاء الله عليه مافيه ولا اصابه ولا خدشة ماشاء الله عليه

انا بجلس شهرين متوهق ابستاجر سيارة على حسابي وبتبهذل مع الوكاله والمرور ومطالبة هالمسكين السوري

عموما الله يعين .. هو غلط علي وضرني وبهذلني معه ... الله يكون بعوني وبعونه
وصاحب الحق اولى به

ان شاء الله تتسهل الامور

بس بليز نصايحكم بخصوص الوكاله ... هل يرجعون السيارة زي ماكانت ولا لا ؟
وهل تنصحوني ببيع السيارة بعد ما تطلع ؟ ولا احسلي احتفظ فيها ؟


ومشكورين كللللللللكم

نصيحة مني يالغالي لا تصلحها ترى بتخسر ع الفاضي و تضيع وقتك مثل واحد من خويي صار له حادث و راح الجنب اليمين كله بعد ما صلحناها وكل شي حسبناها لو باعها تشليح و زود فوقها حق التصليح كان افضل
بيعها تشليح يالغالي و خلي الاجنبي الي راتبه 10 الاف الله لا يهينه يزودك فوقها و طلع وحدة ثانية وكالة و انت اخصم عليه الي تقدر تدفعه من عندك او خلي عليه المبلغ الباقي كله
هذا افضل حل و ريح بالك من الدوخه هذي كلها.

اخي الحمدالله على السلامه

بنسبه لسيارتك ونظام المرور اذا قيمة الاصلاح اكثر من نص قيمة السياره يعني فرضا سيارتك جديده قيمتها 100 الف وبعد الحادث تجاوز اصلاحها نصف المبلغ مثلا 50 الف تحول لتالف ويرسلونك شيخ المعارض يقرر قيمتها قبل الصدمه ويدفع خصمك المبلغ المقرر من شيخ المعارض


النصيحه لاتصلح السياره قبل مايدفع الخصم المبلغ لانك اذا صلحتها راح يطلعونه بكفيل وماعد تشوفه

وانت رايح شيخ المعارض لاتنسى تاخذ ورقه من الوكاله بقيمة الاصلاح عشان يعرف سعر الاصلاح ومايضلمك راح يجبر الخصم على دفع مبلغ السياره قبل الحادث مع خصم قيمتها بعد الحادث
بعدها بعها وزود فلوسك على بعض واشتر سياره والله يكتب لك الخير

الله يعطيكم العافيه ياخوان ... نصايحكم محل تقدير يالغالين....الله يكتب الي فيه الخير


يعني لو سيارتي تكلف اكثر من نص قيمتها ,, والطرف الاخر الي صدمني ماعنده تأمين ,, نظام المرور يحميني ويضمنلي حقي زين ؟ واقدر ابيع السيارة تشليح واخذ الفرق من سعر السيارة قبل الحادث وبعده واجمع وارقعها واشتري سيارة جديده ؟ اقدر اكيد نظام المرور يسمحلي ولا مو اكيد ؟

ومشكورين كلكم الله يجزاكم خير يارب

حاولت ارفع صورتين لسيارتي بعد الحادث بس ماقدرت عندي مشكله في النت من ساعتين احاول ما قدرت .. لكن عموما الاضرار الي انا شفتها هي كالتالي
الباب الخلفي الايمن والشنطه من الداخل مطعوجه
العجلات الخلفيه والدفرنس كلها تكسرت
الشكمان انفك عن المكينه
الشاص من تحت اصابه اضرار كثيرة الله يستر لا ينعوج ويصير مشكله كبيرة
القير صار يهرب زيت الله يستر لا يكون انكسر او راح فيها




ومشكورين كلكم

اول شي الف حمدلله على سلامتك ..
ومن رائيي بيعها تشليح دامها وصلت للـ 50 الف

ياخذونها منك بـ 15 الف

تل العربي من راسه ولا تطلع الا بشيك مصدق مصدق مصدق بقيمة سيارة جديدة + لو تقدر ترفع قضية عليه بالاضرار النفسية والمادية + المطالبة بالحق العام وغرامة عدم القيادة بالرخصة وبدون تأمين

الاجانب كبر راسهم مالك الا تهجد العربي ذا وتكفا تكفا تكفا لا تتنازل واذا ما معاهم فلوس يسددون خلهم يخيسون في السجن

شف حنا اذا رحنا بلدهم شلون يدورون علينا الزله وسجن وضرب وخلافه

لا تتنازل لا تتنازل الا بشيك مصدق ( مصدق وعند الشرطة او المرور يعني يشهدون عليها )

مشكلتنا يالسعوديين طيبين بزيادة

لو الموقف عكس مثلا انت الي صادمه وما معاك تأمين ولا رخصة كان اقسم بالله ما يتنازل عنك

لا تضييع حقك
ولا تبيع الموتر تشليح الا بأمر المرور وبخطاب منه عشان ما يحتج العربي ويقول انك متفق مع راعي تشليح وكذا

حتى لو اعطاك قيمة تصليح السيارة لا توافق قل السيارة ماراح ترجع زي اول وانا ابي قيمة سيارة جديدة + تعويض عن الاضرار المادية والمعنوية إذا ما عطوك خل ولدهم يخيس في السجن

اخواني تكفون محتاج فزعتكم ... ابي واحد شهم ويرد علي رد وافي وكافي ... لأني الى الان ماني فاهم بعض الاشكالات
اليوم المرور بعد ما جبتله التسعيرة وكان مبلغ التسعيرة من الوكاله 79 الف ريال قابله للزيادة في حال فحص القير بعد اصلاح السيارة لو ظهر به خلل اثناء الفحص
والمرور اليوم قالي رح سعر السيارة من مكتب تقدير او تسعيرات المرور بالصناعيات !!! هل هو نفسه شيخ المعارض ؟ و وين الاقيهم هذيلا ؟

والي ابي افهمه الحين .. اش المطلوب ؟ اش يضمنلي حقي ؟

هل يعطوني الفرق بين سعرها قبل الحادث وبعد ؟ على كذا بيبخسوني .. يمكن ما يطلعلي الا 40 الف ومع بيع السيارة تشليح بعشرين الف تطلعلي المجموع ستين الف فقط ,, وانا ما ودي اصلحها لان رايحه فيها تالف راح تكون بلاء علي لو صلحتها !!!
اصير انا خسران كثيييييير ومتضرر وانا مالي ذنب
شيخ المعارض هذا بيعطيني تسعيرة اصلاح ولا فرق سعر ولا كيف ؟ والسيارة 2012
وهل انط بعينه واتهاوش معه ولا اجيه باسلوب وازن عليه لمن ينصفني حقي ؟

ودوامهم هذيلا سواء شيخ المعارض او مكتب تقديرات المرور بالصناعيه .. متى دوامهم ؟ هل الاقيهم العصر ؟ ولا لازم الصباح ؟ لان الصباح دوام وصعبه اطلع او اغيب

والله اني توهقت بهالحادث حسبي الله على هالاجنبي الي صدمني
اشغلني وسببلي مشاكل وبلاوي وهم كبير

لكن قدر الله وماشاء فعل
ولاحول ولا قوة الا بالله

تكفون يا اخوان الي له خبرة او معرفه بهالموضوع لا يبخل علينا

عذرا من صاحب الموضوع ! لكنأي نوع جهل يتميز به بعض الناس لينتقل الحوار من ساحة الحادث الى ساحة الاسائة الى الغير!

لا علاقة لجنسية الطرف الثاني في الموضوع الا لبيان انه غير سعودي لاختلاف الاجرائات فحسب!
اما ان يأتي شخص ويقول هالاجانب وووو!!! والله شيء مخزي!
المشاكل ليس لها علاقة لابجنسية وعرق! واي شخص قد يخطئ مكانه!
أي نوع من الحقد الذي يحمله البعض!؟
تذكر انه لم يأت هنا الا لظروف قهرية اجبرته تحمل الذل والاهانات بانواعها.

بالنسبة للحادث اخي الكريم حاول بداية انهاء اجرائات التكلفة والتصليح بشكل رسمي مع المرور وبقسة الجهات.
بعدها يفضل الاتفاق بينك وبين الطرف الثاني على صيانة سيارتك او تعويضك بحيث ان السيارة جديدة كليا!
لاتظلم نفسك ابدا خذ حقك الشرعي وان وجدت في نفسك قدره على الاستغناء او التنازل عن جزء بسيط فهذا امر يخصك.
في حال عدم الاتفاق قد تضطر الى التعامل بالقانون معه وبالزامه بتسديد كافة الخسائر وذلك بتعهد خطي لدى الجهات الخاصة

وفقك الله واعانك واثابك

اخوي التسعيرات بالورش @

جب ثلاث تسعيرات من ثلاث ورش وليست مراكز

قيمة التسعيرة الوحدة ب 50 ريال يعني 150 ريال

اما اذا كانت السيارة المتضررة اخر موديل

فانه يحسب تكاليف اصلاحها بالوكالة .. فقط

وشكرا

^^
كل تسعيره 30 ريال وهم ثلاث تسعيرات =90 ريال وتنحسب مع القيمه الي بيدفعها لك
الا اذا ارتفع سعر التسعيره بس اخبر انه 30 ريال للتسعيره الواحده

الحمد الله على السلامه ومعوض ان شاء الله
1 تسعيرة شيخ المعارض وحده بس ويعطيك سعر السيارة قبل الحادث وبعده والفرق هو المبلغ اللي بتاخذه . طبعا افيدك بمعلومه ان الموظفين اللي عنده ياخذون رشوة من 500 الى الف !!!
2 رايي انك تبيع السياره تشليح مهما تصلحت ماترجع زي اول وبتجلس توسوس في كل صوت
3 اللي صدمك لا يطلع لما تاخذ حقك كامل
4 قبل لاتبيعها تشليح انصحك شوف الشباب هنا اذا بيشترون منك قطع لان التشليح غابنك غابنك في البيعه

لا تصلحها وطالب بحقك ولا تتنازل عنه لو تدخلوا جماعته وعطوك من الكلام الرخيص

الله يعطيكم العافيه جميعا .... لاهنتم يالنشاما

والله انظمتهم هذي مافهمتها للحين ... وكل واحد يعطيني كلام

لكن عسى الله يعوضني ويستر علينا وعليكم ويجزاكم خير

طيب قيمة السيارة قبل الحادث يحسبونها لي بسعر الوكاله ؟ ولا بسعرها بعد الاستعمال قبل الحادث ؟ يعني كم تقريبا راح يسعرونها لي ؟

ومتى دوام شيخ المعارض هذيلا ؟

والف الف شكر ياشباب