مراحب حبايبي
حابب أعرض عليكم تجربتي في غسيل سيارتي في مغسلة بستم بالدمام على طريق الدمام الجبيل بعد ترايستار اللي بخضرية الدمام،المغسلة تفتح الساعة السابعة صباحاً ورحت لهم ولقيت فيه 6 حفر بستم كلها تعمل،ولفت نظري أن المغسلة متسخة جداً وهناك زيوت متراكمة على الأرضية لدرجة أن حذائي أكرمكم الله اتسخ ووسخ الدواسة في السيارة،كما أن هناك براغي ومسامير كثيرة على الأرض تجدها هنا وهناك في المغسلة ولازم تنتبه وإلا كفراتك تضررت!! والإدارة من الجنسية اليمنية وأغلب العمال يمنيين وفيه عامل واحد أو اثنين هنود،والغسيل بمبلغ 25 ريال،ولما العامل جاء بيرفع السيارة قلت له ما أبغى ديزل مع علمي أن الغسيل بالديزل ممنوع نهائياً في السعودية من كم سنة،لكن لفت نظري أن مكائن الديزل موجودة وحتى العامل لما قلت له قال :مايبغى غسيل ديزل!! قلت إيه،وجاء العامل يغسل وأغلب شيء يركز على بطانة الرفارف والصدامات وأشوفه يتحاشى يركز على بطن السيارة!!! يا حبيبي!! أجل ليش أنا جاي أغسل بستم؟!! وتصدقوا ما كلمته لأني حسيت المغسلة من أولتها مو شيء وغسيل أي كلام والعمال يشتغلوا أي كلام،وبعد ما خلص العامل فتحت الكبوت وقلت غسلّ ،فاستغرب وتتردد قلت بس هنا(جهة الطرمبة وعلبة الباور لأن كان فيها تهريب) وقام غسل وغسيل أي كلام،وبعدها جاء الكمسري(محصل قيمة الغسيل وأخذ القيمة وهو من الجنسية اليمنية كمان)،وبعدها راح وجاء العامل قال لي :خلاص بابا،وبعدين قال:بابا فتور(فطور)،والله العظيم يوم سمعتها فرحت وقلت شف الدنيا لازالت بخير :والعامل على بساطته وفقره يعزمني على فطور!! فرديت عليه:شكراً ما يبغى،قال :لا أنا يبغى فتور،فاندهشت!!! وعرفت إنه يبي بالعربي بخشيش فأعطيته المقسوم ورحت أركب السيارة بسرعة قبل ما يقول بابا غدا،فقرب مني وقال أنا يبغى يرش السيارة موية من برا ،ورش السيارة من كل جانب من الخارج ونظفها،وبعدين فتحت النافذة وقلت له : موية حلو وإلا مالح ،فقال لي بشويش: لا مالح بابا، فدقيت الريوس وقلت أطلع بس من هالمكان ضاق صدري من مستوى الخدمة المخيسة،والأخ قاعد يأشر لي كأني أبركن بتريلة ههههه ولا وأزيدكم الموية كمان مو حارة موية باردة يعني على الزيوت بتكون برداً وسلاماً،ما أدري ليه ما يستخدموا مويه ساخنة؟!! زي ما شفت في المغسلة حق البستم اللي كانت جنب جامع الفرقان بالدمام على شارع بن خلدون والله هذيك مغسلة بستم من جد تنفض الزيت نفض من بطن السيارة،واللي عنده مغسلة بستم في الدمام أو الخبر ينورنا بوصف دقيق لموقعها ومستوى الخدمة ونوعية المياه المستخدمة مالحة أو حلوة،تشاو يا حبايب قلبي