الموضوع: من الالف إلى الياء السيفيك اقوى من الفايبر

من الالف للياء سيفيك اقوى من الفايبر!!
السلام عليكم اعضاء المنتدى المحترمين : )
عسى انكم تستفيدون منه,, وطبعا كل الكلام اللي راح اكتبه هو من واقع تجربه فعليه,,, يعني لا خيال ولا كلام احد ثاني وانا مقتبس منه : )
الموضوع هو كيف تقدر تعدل الهوندا السيفيك الى درجة انك تقدر تقوم على سيارات مثل الفايبر, الكورفت, البورش كاريرا,, ويمكن حتى الفيراري واللمبرغيني!!
وهذا كله بدون استخدام غاز وباحصنه اكثر من 400 حصان وممكن توصل الى اكثر من 600 حصان!!
اولا خليني اعطيكم فكره عن سيارتي السفيك السابقه ((بعتها من قبل ثلاث شهور))
السياره موديل 92 هاتشباك ((EX)) كانت اتوماتك وكاله
بعد التعديل,, قدرت اقوم على سيارات قويه مثل:
1- كمارو اس اس ((قير عادي ست غيارات))
2- بورش بوكستر
3- لومينا اس اس 2002
4- كابرس اس اس 2001
5- اكثر من موستنج وبعض معدلين ((معبوثين))
6- امبريزا 2.2 تربو
7- متشوبيشي ايفوليوشن
8- قولف دفع رباعي
وغيرهم : )
نبدا من الاول ونمشي بالتدريج...
اولا:
طبعا تحتاج الى هوندا سيفيك,, الموديل مو مهم, بالنسبه لي كانت موديل 92 هاتشباك,, وانصح هنا بالهاتشباك لسببين:
1- الوزن اخف من السيدان وهذا مهم كثير في مجال التعديل.
2- الشكل اجمل بكثير وينفع لتعديل ,, يعني تخيلوا سيدان ملغم ما تجي,, والا!
بالنسبه للموديلات من 96 وطالع شكل السيدان حلو وممكن يتعدل وتطلع السياره حلوه.
طبعا السعر!! مممم يتراوح حسب النظافه من 5000 الى 10000 ريال حسب نظافة السياره وانا اتكلم عن الموديل 92 - 95
وممكن تاخذ سياره مخبطه او حتى بدون مكينه ما تفرق لان كلشي راح نغيره فلا يهمك : ) وصدقوني مراح تتحسفون عليهم : )
ثانيا:
مرحلة التعديل الرئيسيه...
هذه طبعا اهم مرحله,, وهي مرحلة تغيير المكينه, القير, العكوس, الكمبيوتر,,, واشياء اخرى.
للتعديل راح تحتاج الى مكينة Vtec DOHC مو الفيتيك العاديه انتبه للفرق,, وطبعا هذه المكينه تجي باحجام مختلفه
وهذه التفاصيل
1- حجم 1.6 ---------- 160 - 165 حصان (( اتحداك تلاقي مكينه ثانيه بهالحجم وبهالاحصنه,, لاحظ انها مثل حجم مكينة السيفيك العاديه))
2- حجم 1.8 ---------- 175 - 180 حصان
3- حجم Typr R 1.8-- القوه 200 - 205 حصان (( المكينه هذه جبببببباره))
4- حجم 2.2 ---------- القوه 200 - 205 حصان
انا بالنسبه لي المكينه اللي كنت مركبها 1.6 مكبره الى 1.8 في اليابان وتعطي 180 حصان.
بالنسبه للمكينه Type R 1.8 يجي شكلها مختلف,, غطا المكينه يكون لونه احمر,, وانتبه مو بس اللون,, يجي مكتوب عليه
Type R مو لصقه لا كتابه حفر,, يعني لا ينصب عليك.. المكينه هذه سعرها غالي كثير وتوفرها قليل,, لكن ان وجدت
النتائج راح تكون افضل وافضل,,, حتى القير اللي يجي معاها مو طبيعي وقوي كثير.
بالنسبه لمكينة ال 2.2 هذه ما تقدر تركبها على السيفيك ابدا للاسف,, ومهما فعلت ورهمت مراح تجي معاك مضبوط,,, تقدر تركبها على الاكورد او البلوريد
تبقى عندنا مكينتين اللي هم 1.6 و 1.8 وهما الاختياران الانسب من ناحية السعر والاداء ,,, السعر راح يكون حوالي 3000 ريال وهذا يشمل
المكينه, القير, العكوس, الكمبيوتر,, الضفيره. وانا خذت مكينتي بهذا السعر وارد اليابان وتركبت عندي على طول
لاني كنت شاري بوز كامل لموديل 95 والمكينه نظيفه مررررره.

بالنسبه للتركيب,, تركيب المكينه صعب مو سهل ويبغاله مكيانيكي وكهربائي شاطرين مره,, وبصراحه مااعرف احد يقدر يركبها بشكل مضبوط في السعوديه وما انصح انكم تركبونها عند واحد ماله خبره في التحويل من عادي الى فيتيك.
انا ركبتها في الاردن وقطع التعديل في بيروت,,,, لكن في كثير يركبونها في البحرين والامارات والكويت وعمان.
تكلفة التركيب حوالي 1500 ريال.
طبعا اول ما تركب المكينه وتجرب السياره راح تشوف شي ماكنت متخيله ابدا
قوه وعزم مو طبيعي.. واول ما تقوم السياره من الصفر على عادتك الاوليه قبل التحويل راح تشوف
دخان الكفرات وانت داخلها : ) وطبعا تسمع صوت المكينه الله ولا احلى فعلا صوت سياره R وطبعا راح تنتبه الى ان الوجهيه تروح يمين وشمال من القوه والسياره يدوب ماسكه نفسها: )
وراح تشوف ان ال RPM صاروخ وسريع ويقفل عند 8400
(((واااااااااااااااااااااااااااااااااااااااااو)))
وفي الاول بس السياره تمشي على ال 80 وفي الثاني 120 : )
وتجيب ال 200 كلم\ساعه اللي يمكن ماتقدر تجيبها بالمكينه القديمه راح تجيبها الحين في ((الغيار الرابع ))
وهذا كله واحنا للحين ما حطينا شي غير المكينه : ) يعني اللي جاي احلى واحلى.
ثانيا:
ايش بعد لازم اغير يافالح؟؟..... الحين اقولك
الاشياء اللي لازم تغيرها غير اللي ذكرنا كثيره,, وبذكرها من الاهم الى الاقل اهميه - لازم يعني لازم تغير تانكي وطربمة البانزين والفلتر,,, هذه العمليه مره ضروريه والا راح تجيك مشاكل تقطيع وضعف بعدين,, سعر التانكي
مع الطرمبه حوالي 1000 ريال,, وطبعا لازم تركب تانكي الفيتيك وهو يجي الكتروني,, والطرمبه والفلتر ممكن تركب حقين الفيتيك او من نوع R واسعارهم مختلفه لاكنها معقوله.
- ضروري جدا تغير الجنبينات الاماميه والخلفيه والبريكات كامله مع الاسلاك,, وتستدلهم بحقون الفيتيك او من نوع R هذه العمليه مره ضروريه, لسلامتك
وسلامة السياره وسلامة غيرك. الاسعار مو غاليه والنتائج روعه روعه وتستاهل التعب.

- البقاي اكسسوارات مثل الصدام الامامي حق الفيتيك : ) يجي فيه غازيات شد بلد شي روعه,, والخمازات الاماميه يجون بيض,, وطبعا ساعات الطبلون : ) رياضيه ولونهم ابيض ولا تفوتكم.
اي صح والجحشه ((الديكور المحيط بعصا القير داخل السياره)) يجي فيه حق ببسي : ) تكبس عليه ويطلع للراكب والسايق : )
الله يخلف على الخليجيه مافيها شي... وياليت تقصلك فتحه بعد اذا كنت بطران عشان تطلع السياره مايحتاج : )
ثالثا:
التعديل الاضافي : )
طيب الحين جينا على الجد,, وهي الاضافات اللي راح نحطها على السياره عشان نوصل لمرحلة نقدر فيها ان نقوم على سيارات من الفئه A وراح اقسم الاضافات حسب اهميتها.
اهم قطعه لازم تتركب هي الشارجر...وممكن نركب بدل عنها التربو وراح اشرحه تحت.
انا عن نفسي كنت مركب شارجر من نوع Jackson Racing وقيمته حوالي 6000 ريال,, وطبعا الكل يعرف ايش دور الشارجر وايش
يسوي ويعطي,, وهذا النوع من افضل الانواع ويعطيك حوالي 100 حصان وتركيبه ما يحتاج لا ترهيم ولا صق وبهدله,, وياخذ حوالي 8 ساعات شغل يد عشان يتركب... وهذه هي الصوره:
الشارجر تقدر تحط له اضافات ثانيه والناتج يكون عدد احصنه اكثر بحوال 20% من مجموع الاحصنه اللي عندك وهذه الاضافات ترفع البوست حق الشارجر وتجي كيت كامل مع البواجي والسير والبكره وجهاز تعديل البوست وغيره.
طبعا تقدر تركب بدل الشارجر التربو كيت (Turbo Kit) وطبعا التربو اقوى بكثير من الشارجر وسعره اعلى,, وسعر حوالي 12000 ريال والكيت الكامل تجي مع اضافات كثيره جدا مثل الهيدرزات والبواجي ومبرد التيربوا والفتلاتر وطربمة البانزين,, وقيجات البوست والبانزين ومعيار البوست.
يعني ب 12000 تشتري كللللللل القطع اللازمه لتعديل المكينه وانا اشوف السعر مررررررره ممتاز ومو غالي.
التربو يجي psi 18
ومع تكبير المكينه يوصل الى psi 40!!
(وااااااااااااااااااااااااااااااااااااااااااااااو)
يعني وينك يالفايبر : )
وعند psi 10 بس يعطيك 160 - 180 حصان (ياحبيبي) يعني تخيل عند البوست 40 كم يعطيك!!
السايره راح تكون صاروخ ارض ارض بكل معنى الكلمه..
على العموم هذه صورة التربو مع اغلب القطع اللي تجي معاه:
في حالة انك فضلت تركب الشارجر عشان فرق السعر(( انصح بقوه تركيب التربو لان القطع تجي معاه كامله)) لازم تركب معاه هيدزات وسعرها يختلف من 800 - 2000 ريال حسب اذا كان تفصيل او مستعمل او جديد واصلي والهيدرز راح يزيدك حوالي 12 - 20 حصان. وطبعا لازم تركب بواجي
وانا البواجي اللي ركبتهم كانوا اربع شمعات بلاتينيوم واستخدمت حقين الامبريزا التربو. وكانت النتيجه جنونيه.
من الاضافات الجيده بعد,, الكلتش الرياضي وهذا يعطيك مرونه اكثر وقومه اقوى ولقش ولا احلى : ) اللي انا ركبته كان من نوع Jackson Racing لونه اصفر وسعر حوالي 1200 ريال.
من الاضافات اللي انصح باضافتها ال MSD Kit واقصد المجموعه الكامله وتجي معاه اسلاك البواجي وغيرها. وطبعا هذه راح تزيد عزم السياره والقوه عندك.
وراح تزداد عدد الاحصنه عندك.
رابعا :
بعض النصائح الاخيره
الهوندا السيفيك سياره جدا جميله فلا تنسى بعض الاضافات الجماليه واللي راح تعطيها مظهر لائق بمحتوياتها.
افضل مقاس للجنطات اللي جربتهم كانوا ال 14 و 15,,, لاتحاول تركب جنطات اكبر من كذا
وممكن تركب جنطات اعرض وتستفيد اكثر.
لازم تختار نوعيه ممتازه من الكفرات عشان تستحمل قوة المكينه وتخفف من التبويش,, وياليت تركب كفرات سليم.
السياره راح تنزل من قدام بفعل الوزن,, ومع هذا انصح بتنزيلها اكثر عشان تحصل على ثبات اكثر في السرعه والقومه, بالنسبه لي كانت المسافه بين الارض واللحيه اللي قدام حوالي 1.5 انش بس
اهم نصيحه,, السياره راح تكون صاروخ ارض ارض بكل معنى الكلمه وراح تحس انك ملك الشارع واغلب السيارات اللي تشوفها مراح تصف معاك شي
وعند الاشاره راح يكون عندك احساس انك الاقوى ومافي احد يقدر على سيارتك,,, احساس جميل,, لكن تذكر ابتعد عن التهور ولا تسرع في اماكن ضيقه ومزدحمه وحافظ على حياتك وحياة غيرك ولا تنسى ان لك اهل ينتظرون رجعتك للبيت..

وقبل ماانهي اهديكم المقطع هذا لفيديو يعطيكم مثال حي : ) للنتائج اللي راح توصولن لها:
http://rebellion7.virtualave.net/St...ic_VS_Viper.mpg
في النهايه اتمنى اني اكون ماغلطت في شي او نسيت شي,, ولو صار وغلطت او نسيت اتمنى انكم تعذروني
لان خبرتي بسيطه,, ومافي حد معصوم من الخطا,, واحنا كلنا هنا نتعلم من بعض. واتمنى منكم النقد وابداء ارائكم بكل حريه.

واخر كلمه اقولها:
هذا درس بسيط للجهلاء والمغفلين اللي يقللون من قيمة الهوندا والياباني بشكل عام,, واللي يضنون انه بحجم مكاينهم وباصوات سياراتهم انهم ملوك الشارع ومحد يقدر عليهم... واللي فعلا استمتعت برؤيه علامات الهزيمه على وجوهم وانا راكب هوندا سيفيك : )
تحياتي للجميع HOHC للامانه الموضوع منقول