[ ساعدوني ] في تعديل سيفيك 2008 1.8l احتاج توجيه ونصائح
السلام عليكم
صبّحكم الله بالخير ،، والله يتقبّل منّا ومنكم الصيام والقيام
ناوي ان شاء الله اعدّل على سيارتي من ناحية الآداء فقط ،، الشّكل بعدين ،، والظّاهر ابخلّيها مثل ما هي
قبل كم يوم طلبت فلتر كامل من K&N عبر امازون ،، وان شاء الله اسبوع ويوصل
حسب ما بحثت ان الفلتر هو ارخص وأسهل شيء نعدّل فيه السياره
الميزانية مهيب ذاك الزود ،، ولكن كل فترة نسوي شيء
فـ وش شوركم علي الآن ،، وش اسوّي بالسيّاره بعد ما نحط الفلتر
اقزوست كامل ؟ ما ودّي اغيّره كلّه ،، وش رايكم اغيّر بس الكدناسة او اظن اسمها الدبة ،، الي تجي اقرب شيء للصدّام الخلفي
لقيت بامازون Magnaflow موديل 14815 اعجبني صوته ومقاسه مناسب لفتحة الصدّام ،، فهل لو اغيره بس لحاله راح يعطي آداء ،، ولا مجرّد صوت ؟
أو اسوي تفصيل محلّي اقزوست كامل بالإضافه للماقنافلو؟
افكّر اغيّر الاقزوست لإني بركّب ان شاء الله الفلتر ،، فـ بيدخل هواء كثير للسيّاره ،، منطقيّا بيخرج هواء كثير
وموضوع الـ Back Pressure هذا انا ماني فاهمه ابد
او اترك الاقزوست واغيّر بس الدبّه بالماقنافلو ويكفي؟
ياليت تعطوني تعديلات اسويها ،، واشياء بالمستقبل ،، والسّعر الاجمالي المتوقّع عشان اجهّز نفسيّتي ههههههههههههههههههههه :d
قبل شوي شفت موضوع لراعي كراونفكتوريا شاري دبّه لحالها بدون تغيير الاقزوست كامل وما شاء الله يقول حس بالآداء ،، وفرقت عن قبل << ما ابي اتكلّف بالسيفيك :d
ايه صح ،، بحثت بالنّت ولقيت نوعين من تركيب مواصير عادم السياره ،، النوع الأوّل اللي هو التلحيم ،، والنّوع الثاني اللي هو Bolting معناه انّنا نربط المواصير ببعض بدون تلحيم ،، اظن ان لازم تكون مقاسات المواصير متوافقه مع بعض
الصراحه مني فاهم مرّه بتركيب القزوست ،، ولكن كاتبين انه التلحيم مو أي واحد يسويه لك ،، لان التلحيم احتراف ،، فـ لو بتسويها عند شخص محترف راح ننصح بالتلحيم ،، اما باقي النّاس تسوي الـ Bolting لإنه أأمن واسهل وافضل
بالجهه المقابلة التلحيم ارخص من الـ Bolting
فـ كيف اعرف آخذ مقاس الدبّه تبع ماقنافلو ؟ كاتبين ان منفذ الإدخال [ 2.25 انش ] ومنفذين الخروج [ 3.0 انش ]
والماقنافلو مصنوعه من الستانليس ستيل ،، خوفي ما يقبل التلحيم ،، غير كذا اخاف يلحمه ويصير مشكله ولا تقبلها السياره ويقول خلاص ما ينفع عقب ما لعن ابو الماقنافلو ههههههههههه ،، امازون عندهم سياسة الترجيع ويعطوني مهلة 30 يوم للترجيع ،، فـ لو ما تنفع ارجّعها لهم ويعطوني فلوسي
فـ حاب اسوي تركيب الدبّه عن طريق الـ Bolting اللي ودّي اشوف له صورة لاني ماني فاهم كيف شكله [ هو عبارة عن حلقه نحطّه بالماصورة ونربطها بالماصورة الثانيه ؟ ]
احس محدن بيرد علي ابد ،، القسم ميّت بالحيل ههههههههههههه
حياك ياخويا
بالنسبة للدبة الادخال 2.25 الماصورة اللي بتركب في اقزوز السيارة والاخراج 3 اللي بيكون شكلو من خارج السيارة (اللي جهة الصدام الشكل الخارجي يعني)
التلحيم مانصحك في لانو ممكن مع الوقت تحصل تنسيم ويطيحلك العزم وقروشة
سوي البولتينق اشوف افضل وقت ماحبيت وتفك يكون سهل
بالنسبة للعزم حتلاقي اختلاف لانو السيارة 2008 واكيد الدبة بدات تكتم يعني مو زي الجديدة فهمت قصدي ؟
ادا عندك استفسار عن اي شي اتفضل ضيفني على البلاك 2b17c174
لبّى قلبكالمشاركة الأصلية كتبت بواسطة Bodemmh
والله يحيّيك ويرضى عليك انا عارف مقاسات الدبّه [ مكتوبة بموقع الشركة ] الكلام هل ماصورة الاقزوست تقبل الدبّه اللي ابركّبها؟
وكيف اتأكّد ؟
حلو ،، يعني الدبّه اذا صارت قديمه مع الوقت يضعف الآداء ،، خصوصًا السياره ماشيه حول 145,000 كيلومتر ،، وقريت انّه بعد 100,000 كيلومتر يُنصح بتغيير الدبّة
غير كذا وين تنصحني اركّب الدبّة تبع ماقنافلو ،، ابي ورشة فاهمه بالأمور هذي ويسوون Bolting محترم :d
انا احس ان الموديل اللي اخترته ان شاء الله بيركب ع السياره ،، لإن أصغر انبوبة ادخال للدبّة عند ماقنافلو هي 2.25 انش
بس ابي اتأكّد :(
بانتظاركم ي شباب
من ناحية التركيب لاتاخد هم يركبوها لك عدي على محل شكمانات وخلي يشوف كم حجم الماصورة
انتا في اي مدينة عساس يفيدوك الاعضاء
الحمد لله أن امرها سهل
ساكن في مدينة الرياض تحديدُا شرق الرياض
مرّيت محل اسمه التميز بلا حدود عند الدائري الجنوبي عشان تفصيل الكت باك
قلت له ابجيب الدبّه وانت تركّبها لي على الكت باك
عنده الومنايزد وعنده ستانليس ستيل
للحين قاعد افكّر ،، هل اركّب الدبه لحالها ،، او اسوي كت باك مع الدبه
مابي السياره تصير ازعاج بالحيل ،، لو انها تشارجر srt8 يحق لي اهايط
بس سيفيك 4 سلندر على صوت مزعج ما تركب
اتخيّل نفسي داعس بطريق ،، ويشطفني كامري ولا اكورد فشيله على هالصوت هههههههههههههههههه
فـ السؤال هل بيصير ازعاج مرّه ولا صوت رياضي طرب ورايق
افكّر اشيل الدبّه حقت الوكاله ،، واركب الماقنافلو ،، ثم اجرّبها اسبوع ،، ان جاز لي الصوت كان بها
ولا سوينا الكت باك
بس كذا ابصير خسرت دبّة الوكاله لانهم اكيد راح يقصّون ماصورتها ،، اما لو اسوي كت باك على طول راح يفكّون الاقزوست كامل بدون أي تخريب
الا صح
الفلتر وصل للبريد ،، ابو يومين وان شاء الله واستلمه ،، الله يستر لا يصير مخصّص للسيفيك الامريكيه
شباب عبروني ،، حتى لو تقولون كنسل فكرت الدبه والكتب باك ،، ابي احس ان فيه ناس
شاركة بمنتدى اجنبي وقالو لي ننصحك تشتري دبّة سيفيك Si مستعمله اصرف لك من الماقنافلو ،، وش قولكم
ايه ،، بالنسبة للكت باك ،، الحين المكينة يطلع منها مخرج الاقزوست صح ؟ خوفي اذا ركّبو الكت باك تصير الماصورة ي أكبر او اصغر من مخرج المكينة
قريت انه اذا صار اصغر بيكتم السياره ،، واذا صار اكبر يلعب بضغط السياره
فهموني سالفتها ،، ما ابي ادربي راسي
ابي العلم الوكاد :(
ادري ان محدن حولي ،، ولكن لكي نكتب التاريخ ويقراه شخص آخر ويشوف رأيي بالموضوع والأحداث اللي صارت و حاب اعطيكم الخلاصه:
الفلتر الحمد لله وصل ،، رحت لساكو وشريت العدّة سعر العدّة بـ 146 ريال
قلت نركّب فيها الفلتر ونستفيد من العدّة لاشياء بالمستقبل [ مثًلا خربت علي البطارية ،، اقدر افك البطارية وابدّلها بوحدة ثانيه بالعدّة بدل ما يسوّيها لي عامل !!! ]
المهم حاولت اشتغل بالفلتر انا واخوي ،، وصلني لـ ربع مشوار التركيب ،، وتوهّقنا بكم خطوة ،، والعدّة ما كانت عملية ابدًا صناعتها صينية ،، ولا حبّيت اكمّل زيادة
لان ممكن افك فلتر الوكالة واتوهّق بتركيب الفلتر الجديد ،، رجّعت كل شيء مكانه وقلت مالي الا اروح للورشة اللي دايمًا اصلح السياره عندها
رحنا لخويّنا الميكانيكي ،، وقال لي ساعدني بالخطوات [ يجي معاها ورقة فيها حول 30 خطوة بالصور ] ،، وقمت اقرا له وأأشّر ونتساعد سوى ،، لحد ما تم التركيب بنجاح !!!
بعد شغل وارشادات وحط هذي هنا ،، لا هذا هناك ،، ساعه كامله تركيب
رحت شغّلت السياره عشان اسمع الصوت الجميل
عطيتها بنزين على RPM قليل ،، حول 2000 ،، ما طلع صوت قوي ،، مجرّد صوت السياره العادي ولكن متغيّر على خفيف
دعست زيادة إلى 4000 إلى 5000 RPM ،، ما شاء الله الصوت طرررررررب ،، السيفيك رجعت للحياة !!! ،، وانت تدوس بالسياره تحس ان فيه واحد تحت الكبوت يشجّعك خخخخخخخ
طبعًا فيه كمل شغله ابركبها بالسياره غير الفلتر ،، قلت للميكانيكي اباخذ لفه بالسياره 5 دقايق وراح اجيك
طلعت مع اخوي نجرّب السياره ،، اذا تبون الصدق وبدون مجامله ،، العزم ما فرق كثير ابدًا ،، يعني حسيت السياره لا دعست انشط من قبل بشوي وبشكل بسيط ،، هذا كله كان تجربة 5 دقايق
المهم ما زلت افرفر بالسياره وادعس فيها من وانا واقف ،، وانا ماشي 40 ،، ولا الدورية وراي خخخخخخ ،، شكل الصوت شوي قوي ،، اثباتك استمارتك وينزّل اخوي ،، وبحث عنده بالجهاز ثم قال الله يستر عليكم ومشى
انا لا املك أي خبره في مجال التعديل ،، ولكن اظن ان وضع الفلتر لحاله لا يكفي للآداء ،، لازم تعديلات اخرى تساعد على هالموضوع
ولراعي السيفيك اللي متحمّس على تركيب الفلتر حاب اقول لك ان فيه تجارب سووها باليوتيوب واثبتت عندهم ان الفلتر لحاله لسياره Stock ما يعطيك الآداء المزعوم من قبل شركات الفلتر ،، ممكن آداء بسيط ،، واحتمال ينخفض الآداء بشكل بسيط
وهذا هو الفيديو
Mighty Car Mods - Cold Air Intakes Mythbusted - YouTube
وفيه بعد مواضيع كتابية كثيره ،، لكن الفيديو امتع للإطّلاع
للأسف انا ما اطّلعت بهالشّيء الا بعد طلب الفلتر ،، ولكن الحمد لله فيه نشاط حليل على صوت طرب ،، ومثل ما قلت لكم السياره جرّبتها 5 دقايق فقطططط ،، ولكن كـ تجربة ما انذهلت من عزم السياره بتاتًا
،،
بالنسبة للكت باك ودبه ماقنافلو ،، شكلي هوّنت عنها ،، لو موتري 6 سلندر كـ اقل تقدير راح اتحمّس لتركيب الكت باك على دبه ماقنافلو ،، لكن سياره فيها حول 120 حصان ما اشوفها تستاهل دفع مبلغ حول 2000 ريال فقط عشان صوت ،، واحتمال عزم لن يذهلك
اتذكّر كلّمت عضو هنا اظن اسمه O-K-R او K-o-r ،، الزبده الرجال ما عدّلت على مكينته ،، شرى مكينه ثانيه وركّبها بالسيفيك
،،
اشوف للي يبي يزين بالسيفيك تكون معاه ميزانية ممتازه يعني 5000 ريال وفوق كتعديلات مبدئية للآداء
او يركّز على شكل السياره مثل تبديل الصدامات الامامية والخلفيه بأخرى شكلها رياضي وشرس ،، مع جناح على تعديل فرش السياره وشراء شاشة ومن هالاشياء ،، وهذي ايضا يبيلها ميزانية
لو السياره اللي معي شريتها وكاله ،، ومافيها ضربات وكذا ،، وصدمات سابقة ،، ونظيفه 100% كـ داخلية وخارجية ،، راح اتحمّست للموضوع اكثر
فهي ترجع سواء مهتم بالشّكل او بالآداء ،، ويحط في باله انه بيدفع بالآلاف
،،
هذا يبقى رأيي الشخصي ،، وممكن غيري يخالفني بهالشّيء
،،
النهاية هي ،، راح اوقّف على الفلتر ويكون تعديلي الأوّل والأخير ان شاء الله
واذا ابسوي اشياء اخرى بالمستقبل ممكن تكون تفصيل عدسة للنور الأمامي ،، ممكن اكنسل فكرة التفصيل ،، لإنّهم راح يقصون بلاستيك الشمعه [ او البعض يسميه الاصطب ] اللي ينشبك فيه اللمبة وانا اليوم توني شاري شمعات من الوكالة
صلخوني الوكالة 2659 ريال للأنوار الأمامية كامله مع شمعاتها [ اللمبات العالي والواطي والسكن والإشاره ما تجي معاها ،، انت تشتريها لحال ] المبلغ اصلا حول 3100 ريال
والله غريبه هوندا عندنا ،، سعرهم صلخ بقطع الغيار ،، اخبر اخوي قايل لي قيمة الشمعه الوحده الامامية 900 ريال يعني الثانتين بـ 1800 ريال ،، سيارته الانترا ،، امام السيفيك الوحده قيمتها حول 1200 ريال بعد الخصم يعني الحبتين بـ 2400 ريال ،، يعني فرق 600 ريال يمديك تشتري فيها فلتر مكيف وفلتر مكينة ولمبات الشمعات كامله !!!
ما علينا ،، فـ افكّر استخدم شمعات السياره التجارية واخليهم يفصلون عليها ،، والشمعات الاصلية انزّلها بالبيت
لإن التجارية سعرها حول 200 ريال للوحده ولكن بدون دينمو تحريك اتجاه النور !!!
والشاشه عيني على هذي ،، سعرها جدّا مناسب ،، مع الشحن تطلع حول 850 ريال ،، ومواصفاتها كامله من ناحية بلوتوث و USB و AUX واظن بعد SD Card
Amazon.com : BOSS Audio BV9364B In-Dash Double-Din 6.2-inch Touchscreen DVD/CD/USB/SD/MP4/MP3 Player Receiver Bluetooth Streaming Bluetooth Hands-free with Remote : Car Electronics
لكن فيها عيوب ،، انه ما يمديك تتحكّم باتجّاه الصوت والبوس وكذا
الشاشات اللي داخله مزاجي هي من شركة Pioneer ،، اسعارهم بامازون الامريكي تنبلع لكن ما تدعم الترددات الاوروبية ،، بس امريكية ولا تنفع لي
رحت لامازون اظن البريطاني ،، ولقيتها ،، لكن سعرها مرتفع مره عن سعر امازون الامريكي ،، لحد يقول عشان الضريبه ،، لا ،، سعرها مرتفع حتى بدون حساب الضريبه ،، والضريبه اصلا راح استرجعها بعد وصول الشحنه
يدّي تحكّني اني اخذ بيونير ،، ولكن ما بحثت عنها كـ مقاس شاشه وانها متوافقه مع فتحة الطبلون وكذا ،، يبي لها دراسة :D
،،
ان شاء الله راح اصوّر الفلتر واوريكم شكله على السياره ،، للعلم الفلتر هو للسيفيك الامريكية ،، والحمد لله يركب على السيفيك الآسيوي مدري الياباني
وهنا رابط الفلتر للي يبي يعرف الموديل اللي ركب بالسيفيك اللي معي ،، للعلم لازم تكون السيفيك 1.8 لتر ،، الفل كامل مكينتها اظن تكون ي 2.0 لتر او 2.4 لتر ،، وهذي لها فلتر مختلف !!!
Amazon.com: K&N 69-1013TS Typhoon; Short Ram; Silver: Automotive
ضوابط المشاركة
رد مع اقتباس
مواقع النشر (المفضلة)