آخر أخبار سيارتي .. أقرأ بس لاتنقهر .. وادع لي ,,

**أكورداوي** · 16-10-2006, 07:17 PM

بسم الله الرحمن الرحيم ,,

في ليلة الأحد الماضي 23 /9 ,, وفي حدود الساعه 8 مساء ..

دق الجوال .. وكان الأتصال من شخص عزيز الله يوفقه وياكم وقالي بالحرف الواحد وبدون أي مقدمات وبدون سلام ولا كلام .... (( ورب الكعبه ان سيارتك تمشي قدامي الحين ))

سيارتي ...؟؟؟ !!!

معقول ....؟؟؟ !!!

كان في خاطري ألف سؤال من الفرحه .. حاولت أسأله لكن سرعان ماقفل السماعه بوجهي ..

أن كنت في قمة القهر لأني ما أدري وينهم بالضبط ولا أقدر أسوي أي شي ,,

كان ولازال أملي بالله كبير ثم بالشخص الي كان يلحق الحرامي .. لأن سيارته تشارجر هيمي وحط مئة خط تحت كلمة هيمي ,,

والشخص ماشاء الله تبارك الله فنان في الحركات هذي والطرد والهجوله ,,

كنت أحترق في مكاني وأحوس ولا أدري وش الحل ؟

أتصلت بالشخص مرااات ومراات لكن مايرد على الجوال .. عرفت انه لا زال يطرده ..

بعد ربع ساعه تقريبا ,, كانت المفاجأه ,,:(

الحقير قدر وبحنكه انه يفلت ودخل حي الأتصالات وضاع وسط الزحمه ..

المطارده كانت من شارع بن خلدون وبالتحديدمن اشارة الضغط العالي الى حي الأتصالات ,,

وكان صديقي يتصل بالعمليات وهو يطارد وكان يعطيهم الأخبار والتوجه لكن لاحياة لمن تنادي ,,

بلغنا من جديد وقلنا ان السياره في حي الأتصالات لكن ... ((

)) لاحول ولا قوة الا بالله ,,

السياره في حاله سليمه ,,

لكن صارت وكما توقعنا تغييرات في السياره للتنكير ..

1- اللوحه الأماميه غير موجوده .. ويميزها ان القاعده غير موجوده أيضا ,,

2- اللوحه الخلفيه تحمل حروف ع هـ ن وبأرقام غير معروفه لأن اللوحه في حاله يرثى لها وواضح من التركيب ..

3- لايوجد تضليل ولايوجد استيكر ..

4-مواصفات السارق :

عمره في حدود 21 -22 سنه .. شعره طويل .. لابس ثوب وطاقيه .. عارضين .. حنطي البشره ..

وأحب أضيف ان السياره في حكه بسيطه في الصدام الخلفي من جهة اليسار لونها أسود ..

آآآسف على الأطاله ولكن الي في القلب أكثر ..

والله يكتب الي فيه الخير ,,

**اتــشـــــ** · 16-10-2006, 07:23 PM

اللي كنت خايف منه للأســـف صــــــــاااااااااار :o

**HONDA 888** · 16-10-2006, 07:43 PM

انشاء الله بترجع لك اخوي اكورداوي

وانا زي ما قلت لك لي معارف في الدوريات بخليهم يسون مسح من راس تنوره الى الظهران

وعلى الله

**ن ك د السـعــــوديه 3 5 7** · 16-10-2006, 07:46 PM

طيب زين بدايه حلوه

اهم شي تمسكه ولا يروح يالله تكفى طمننا واذا مسكتوه عطني خبر طيب

**accord 06** · 16-10-2006, 08:29 PM

اخوي اكورادوي عندي لك اقتراح لو تجهز قائمه بارقام اشخاص
مستعدين يطاردون السارق لو يجيهم خبر عنه

بحيث اول ما يجيك خبر عنه ترسلهم المكان و يجتمعون فيه
و بيكون توقيفه اسهل و لو قدر يفلت ينتشرون بالمنطقه بنفس الوقت
و احتمال كبير يلقونه ثانيه

و لو كنت بالشرقيه انا اول واحد اسجل معك
لكن ان شاء الله اعضاء المنتدى بالشرقيه و اخوياك ما يقصرون

**أكورداوي** · 16-10-2006, 09:20 PM

الله يجزاكم كل خير وعافيه يالغالين ..

واحنا الحين منشغلين في اعداد خطة ان شاء الله انها تكون مجيده ..

وانتم ماتقصرون ان شاء الله معنا اذا احتجناكم ,,

***قلبي اكورد*** · 16-10-2006, 10:53 PM

اخوي الشرطة في القطيف مو مقصرة تفتيش في كل مكان كل سيارة هوندا اكورد يفتشوها تفتيش وان شاء الله يمسكوا السارق وبما ان السيارة شافها في شارع ابن خلدون ان شاء الله احاول ان اتواجد في شارع ابن خلدون كثر مااقدر

تحياتي

**accord-se** · 17-10-2006, 12:12 AM

شباب صحيح الوقت غير مناسب للضحك لاكن ...... أكورد يستطيع الإفلات من شارجر ذات محرك هيمي شي مو سهل :(

شمسوي في أكوردك يا أكورداوي هاه

و إنشاء الله بداية الخير وكثرو ياشباب الدعوات والبحث وترجع لك بالسلامه إنشاء الله

ننتظر أخر الأخبار يالغالي

**أبان الطباع** · 17-10-2006, 12:50 AM

إن شاء الله تكون بداية لإيجاد السيارة
الله ييسر لك أمورك أخوي خالد، نسأل الله أن تجد سيارتك على أهون سبب وقبل العيد..
فكرة Accord 06 أراها جيدة أيضاً..

**BLK** · 17-10-2006, 02:42 AM

عندي سؤال مادري وش دخله .....

كيف عرف صاحبك إنها سيارتك ؟؟؟؟؟؟؟

و الله يبليه شر بلية ... و جايه العقاب من الله سبحانه و تعالى .....

الحمدلله على النعمة .... لأنه لو كان عنده مثل هالنعمة ما فكر يسرق صح يا شباب ؟؟؟

**عبووودي** · 17-10-2006, 03:05 AM

ابشر اخوي اكورداوي
انشاء الله كلنا بنجتهد وندور معاك وقريب انشاء الله نصيده هالحرامي هذا
الله لا يوفقه انشاء الله يا رب وحسبي الله ونعم الوكيل عليه

**أبـوسعـود** · 17-10-2006, 03:36 AM

هلا وغلا ..

كيف يفلت طيب منه يقلع ام القهر اخوي حط جائزة عشان الواحد يتحمس صدقني بطريقتك ذي محد متعب عمره حط جائزة لو 500 ريال وصدقني لو انه انا لالعن ام المكس واجيبه ..

والله قهر هالحيوان يتهنى فيها قسم بالله اني مطرطع ودي ابحه ..

الله يصبرك اخوي ..

.

**مجنون اكورد** · 17-10-2006, 05:26 AM

والله انا ببدأ افتر في الدماام وانشاء الله خير

مع ارق تحيه

**خطاف** · 17-10-2006, 05:28 AM

نتمنى لك المزيد من الاخبار الحسنه يا اكورداوي

بس اكورد يفلت من هيمي احم احم صاحبك لك عليه شوي

**الرويال** · 17-10-2006, 06:04 AM

للأسف كان الاولى من صاحبك الاتصال معك وتحديد موقعه والتوجه له بسرعه

سياره وحده ماتسوي شي والله لو جمس 511

اللحين اتوقع الرجال مب طالع بالسياره وانتهت مدت سرقته واتوقع راح تكون في نفس الحي ومركونة صدقني او حتى بنفس المنطقة لانه خاف وترك السيارة واتصل على احد يرجعه لبيتهم بعد مااخذ الي في السيارة من الاغراض الثمينة

واذا تبي تعتمد على الدوريات عز الله منتب لاقي سيارتك

**H 4 EVER** · 17-10-2006, 04:55 PM

يالله يا كريم تبتلي السارق بنفسة

وان شاء الله يا اكورداوي تكتب لنا خبر رجوع سيارتك وبحالة سليمة

**The Black Accord** · 17-10-2006, 05:33 PM

بداية جيدة انكم شفتوه وان السيارة سليمة

وفكرت اخوي Accord 06 مرة ممتازة

وانشاء الله نسمع ان سيارتك رجعت بسلامة

مع تحياتي,,,

**دحوم** · 17-10-2006, 05:53 PM

والله قهر الحرامي خلف اكوردك يااكوردواي والشرطة ماجت وصديقي ماقصر بالإتصالات لكن من جد لاحياة لمن تنادي وشكل اللي سرقها عاشق للأكورد عشان كذا ماراح يهجول بها او يفحطها بلعكس غير اللوحة الخلفية عشان تستمر معه وينبسط بها المهم السيارة إن شاء الله مادام الدعوة كذا ان شاء الله فرجها قريب وشكلها مراهق من يوم قلت شعره طويل وعمر 20 سنة .

الله يرجعك ايها بالسلامة وتفرج كربتك بإذن الله وان شاء الله اللي جالس يصير معك يااكورداوي اختبار وابتلاء في هذا الشهر الفضيل يعني الصبر والحسنات إن شاء الله وبإذن الله مضاعفة لك

واخيرا اقولك تصبر واحتسب الأجر .

تحياتي لك اخوك عبدالرحمن .

**أكورداوي** · 17-10-2006, 10:44 PM

أهلا بكم جميعا .. أدري انه يدور بخاطركم أسئله كثيره عن آخر الأخبار وبعضكم سألني كيف صار الشي الفلاني وكيف قدر يهرب مثلا ..

أنا راح أرد أولا على أسئلتكم وبعدها أعطيكم آخر ماتوصلنا له ..

*قلبي اكورد*

خبر حلو منك والله اني فرحت له كثير والله يفرحك بالجنه ان شاء الله ..

accord-se

انا مثلك ماكنت متوقع انه راح يفلت لكن السبب الأول والأخير مو لقوة السياره (( السياره ستوك مو ملغومه ولاشي )) ولا غشامة خويي لكن هو السارق دخل نفسه في زحمة سير .. كيف قدر يدخل وسط الزحمه ..؟؟
بسيطه جدا ..على كلام خوينا يقول انه كان اذا لقى زحمه يطلع جنب على الرصيف وجنب يبقى على الشارع ويدخل في نصف الزحمه وخوينا توه شاري السياره ولا يقدر يسوي مثله .. وهذا الي رفع ضغطي زياده ..

honda

الله يبارك فيك ان شاء الله يالغالي .. وبالنسبه للخطه أنا معك انها جيده لكن الآن احنا ماشين على خطه معينه وتطبق من قبل أشخاص معينين وان شاء الله في القريب العاجل راح تقرون الخبر الي يفرحكم .. وفي أي وقت أحتاج الشباب .. راح أبلغكم بأذن الله ,,

BLK

سؤالك حلو ,,لأن الأكوردات منتشره انتشار غير طبيعي ,, لكن هذا الرجال خويي دايم يركب معي وهو ولد جارنا الباب بالباب .. يعني يعرف كل حكه بالسياره .. والسياره يمزها نحته صغيره في الصدام الأمامي ولاحظها على يسار اللوحه ..

وحكه في الصدام الخلفي ولايوجد بها قاعده للوحه وكمان اللوحه الي مركبها في فتحات كثيره (( يعني واضح انها تنفك من سياره وتركب في الثانيه )) وهذا المميزات الي تميزها ياغالي ..

عبووودي

الله يعطيك العافيه يالغالي والله اني منحرج منكم .. وأثبتوا بكل صراحه انكم رجال المواقف الصعبه واثبتوا انكم العضد لكل عضو وانكم على قلب واحد وهذا شي يبشر بالخير ان شاء الله ..

أبـوعـابـد

يارجال لو أحد 50000 ريال صدقني لأطلعها من ظهره اذا صدته بس ان شاء الله اننا نصيده قريب جدا .. واحتمال بعد كتابتي للرد هذا ..

(( ان الله على كل شئ قدير ))

مجنون اكورد

وينك ووين أيامك ..؟ ما عاد نشوفك ...؟

على العموم ماتقصر والله .. هذي من طيبتك يالغالي ..

خطاف

ان شاء الله الأخبار الجايه أحلى وأحلى .. وبالنسبه لخويي فهو سواق على مستوى لكن مثل ماقلت هذاك طب بين الزحمه وطلع فوق الرصيف وخويي سيارته جديده وصعبه انه يلحقه فوق الرصيف ..

الرويال

أنا كنت أحاول أتصل فيه لكن مايرد لأنه كان مشغول بالطرد وبالشرطه لأنه كان يتصل عليهم وهم أولى مني بهالشغلات لكن للأسف خيبوا ظننا ..

H 4 EVER

آآآآآآآآآآآآآآآآآآآآمين يارب العالمين وان شاء الله انكم ماتشوفون مكروه ..

The Black Accord

وهذا الي مريحني شوي ان السياره سليمه ولا فكك جنوطها وكفراتها والزينون .. الحمد لله .

دحوم

كلامك مثل الثلج على قلبي والله .. وانا والله راضي بقضاء الله وقدره لأن السياره رزق من الله وهو الي يقدر ياخذها مني .. لكن على العموم تابع موضوعي الجديد وراح تعرف اشياء جديده عن آخر ماتوصلنا له ..

**ابوفهد.** · 18-10-2006, 06:23 AM

الله يكون بعونك
ويرجعلك سيارتك سليمه بإذن الله
دعوتنا لك اخوي

تحياتي
ابوفهد

**A C C O R D** · 18-10-2006, 06:35 AM

والله لو الموضوع راجع لي اخوي اكورداوي السياره بدالها الف سياره

المهم اللي سرقها والله لعلمه ان الله حق

والله لاامسكه واضربه ضرب ((ما اقدر اكمل لاني منقهر ))

يقول المثل (من امن العقوبه اساء الادب )

والله لو في عقاب كان عرف شلون يسرق

**الاخطبوط** · 18-10-2006, 02:51 PM

ممتاز ان السيارة موجوده وبداية حلوهاللوحه (ع هـ ن ؟ ؟ ؟)لو ان خويك لاقط الارقام حقت اللوحه كان ممكن تسوي بحث عنها بكمبيوتر الدوريات وممكن تكون مسجله باسم السارق او احد اقاربه

**أبان الطباع** · 18-10-2006, 08:12 PM

أدخل إلى الموضوع دائماً لأرى إن كان هناك جديد
طمنا عنك، وبإذن الله تجد السيارة بأقرب وقت..

**accord 06** · 18-10-2006, 08:29 PM

المشاركة الأصلية كتبت بواسطة Honda

أدخل إلى الموضوع دائماً لأرى إن كان هناك جديد
طمنا عنك، وبإذن الله تجد السيارة بأقرب وقت..

.

**maleko** · 18-10-2006, 08:59 PM

السلام عليكم ورحمة الله..

في الحقيقة لا أعرفك ولا تعرفني.. ولا أدري ما أقول.. ولكن قلبي معك ومع سيارتك.. :(
مؤسف هو أنه رأى السيارة ولم يستطع اللحاق بها.. :( وهو أمر "يقهر" حقاً.. ولكن.. قدر الله وما شاء فعل..
نتمنى أن ييسر الله لك إيجادها ويبارك لك فيها.. ويسر بها قلبك.. وأن ترجع إليك سالمة كما كانت.. وسنجتهد بالدعاء لك في هذه الليالي المباركة..
وللسارق نقول.. :p

ونحن بانتظار آخر الأخبار..

والسلام..