تجربة البنزين الجديد

**ابو ردينة** · 04-01-2007, 04:11 PM

اللهم زد علينا من نعمك اللتي لاتحصى

الحمد لله فللت السيارة ب25 ريال من بنزين 91

والى الان السيارة طبيعية واذا راح يكون فرق ما راح تحصله الان اصبر فترة حول الشهر تقريبا ومن ثم شوف في فرق

وارجوا من اخواني اعضاء المنتدى الكل يكتب عن تجربته وهل لاحظ مشكلة وشكرا

**BLK** · 04-01-2007, 04:23 PM

أنا بعد كنت راح أكتب موضوع ....

لكن بسيطة :d

عبيتها ب 23 ريال فل .....

مادري ليش حسيت إن السيارة مافيها عزم و تحن للحظة !!!!!!!

بس شكلها طبيعية و انا اوسوس

اقول ابو ردينة ما قالك الهندي الي في المحطة إن البنزين فيه رصاص ؟؟؟

**ميدو مشاكل** · 04-01-2007, 04:51 PM

انا عبيت 91 ومشيت عليه عادي ماشفت فرق ......

انا صفرت عداد المسافه ابي اشوف قد ايش يوصل .....

والى الان التانكي خلص ربعه تقريبا والعداد 180 كلم .....

**هوندا 2007** · 04-01-2007, 11:52 PM

بالعكس احس ان السياره اخف من اول يعني دعستها خفيفه

**اتــشـــــ** · 05-01-2007, 03:02 AM

المشاركة الأصلية كتبت بواسطة BLK

عبيتها ب 23 ريال فل .....

اليوم اول يوم اجرب فيه البنزين الجديد

عبيت 51 لتر بـ 23 ريال
صراحة ماحسيت اي فرق عن البنزين القديم

blk وش قصة الـ 23 معانا ;) ؟؟؟

**bigman** · 05-01-2007, 03:19 AM

انا اليوم يا شباب عبيت السيارة 23 ليتر بـ 10 ريال فرق عن السعر السابق بـ 7ليترات
بس ما تلاحظوا يا شباب انه البنزين صار خفيف ( يعني يخلص بسررررررعة )

تحياتي
BIGMAN

**M///** · 05-01-2007, 09:23 AM

المشاركة الأصلية كتبت بواسطة bigman

انا اليوم يا شباب عبيت السيارة 23 ليتر بـ 10 ريال فرق عن السعر السابق بـ 7ليترات
بس ما تلاحظوا يا شباب انه البنزين صار خفيف ( يعني يخلص بسررررررعة )

تحياتي
BIGMAN

المفروض العكس يطول أكثر... مدري
أنا عبيت فل 24 ريال... الغريب محطه الخنيني ماكان عندهم ال 95 بس 91

**Silver** · 05-01-2007, 12:54 PM

انا امس عبيت
ما اشوف اي فرق

**accord 06** · 05-01-2007, 06:04 PM

انا الحين كملت اسبوع مع البنزين الجديد من 8 \ 12

من محطه بالشرقيه نازل عندهم بدري شوي

و ما حسيت بأي فرق بالعزم

و الصرفيه نفسها و انا طالع من الرياض معبي 95

و انا راجع 91 و مشيت نفس المسافه ما فيه فرق

**الماستر حنوم** · 05-01-2007, 06:16 PM

والله انا عبيت ب23 بعد خخخخخخخ
والله الصرفيه نفسها

**ن ك د السـعــــوديه 3 5 7** · 05-01-2007, 06:16 PM

بصراحه اللي لاحظته ان العزم زاد والماكينه ارتاحت اكثر من اول

يعني تجيب الطبلون بدون ماتحس

**الهادف** · 05-01-2007, 06:23 PM

اهي الأكورد طول عمرها وهي تجيب الطبلون من غير ما تحس :d

أنا لحد الآن ما شرف سيارتي 91 لأني أروح للمكان الفاضي في المحطة وعادة الأماكن الفاضية 95 :d الظاهر الشباب راحو لـ 91 وصار عليه زحمة

**volume** · 07-01-2007, 02:20 AM

انا بصراحة زودتها شوي
وعبيت ب 28 ريال 59.4 لتر

**عاشق الأكورد06** · 07-01-2007, 02:41 AM

يا نيالكم تعالو وشوفو اسعار البنزين عندنا بالامارات والله انتو في نعمة

**ياسر الشمراني** · 07-01-2007, 12:23 PM

لايوجد فرق واضح

بل أن 91 احسه افضل واحسن للسياره .

**accord-se** · 07-01-2007, 12:49 PM

البارحه خلية سيارتي في حالة عطش واللمبه تقول شربة بنزين

أنا ماحب التانكي فول لذلك عبيت ب 15 ريال يعني 33 لتر .. الغريبه شفت كابرس قديم وحتى مرسدس يستخدم 91 (يبي يوفر المسكين)

وكالعاده هذا العدد من اللترات كفيل بإيصار المؤشر لمابعد النص

الحركه طبيعيه وكل مايقال مجرد هوس في هذا الشيئ الجديد

عاد سوالف الشباب وكل واحد عن تجربته .... واحد يقول البنزين يخلص بسرعه والثاني يقول يتبخر والثالث يقول مضر والرابع عامل حاله ذكي ومعبي الكامري من 95 .. أفلام والله

بس كل واحد يكون على ثقه بأنه شاف بالموقع الخاص بأرامكو وبس

في الإمارات تقريباً 3 أنواع بنزين

**accord2003** · 07-01-2007, 10:30 PM

انا عبيت ب 24 ريال واللي لاحظته انه المكينه ارتاحت اكثر من اول خاصة عند ما اشغلها

و الدعسة صارت خفيفة والامبير مهو راضي ينزل عن الf << مخوفني <<شكل العوامه معلقة

واي جديد راح اخبركم به

**أكورداوي** · 08-01-2007, 04:50 PM

الحمد لله مافي أي فرق الا التوفير بس والله يديم النعمه بس لا يرتفع بعد فتره ولا شي خاصة بعد انخفاض سعر البترول حاليا ..

**الهادف** · 08-01-2007, 06:21 PM

بعد التجربة لمدة أسبوع وتعبئة السيارة فل مرتين ببنزين 91 أتضح الآتي >> قاعد في تحقيق :d
1- وجود صوت غريب وليس بقرقعة أشبه بصوت تيربو عند تعبئة السيارة لأول مرة ببنزين 91
2- إختفاء الصوت الغريب بعد تعبئة السيارة للمرة الثانية
3- قلت الصرفية نتيجة لأنخفاض نسبة الأحتراق وذلك لأنخفاض نسبة الأوكتان

طبعاً أنا عبيت السيارة فل قبل ما أطلع الدوام يوم السبت ورحت بها الدوام في راس تنورة وبعدين طلعت من راس تنورة إلى الظهران وبعدين من الظهران إلى البيت ..
المجموع تقريباً 180 كلم .. شوفوا الصورة احسن ..

**WHITE_ACCORD** · 08-01-2007, 11:58 PM

يعني الـ 91 مناسب للاكورد اهم شي ياشباب ولا اخاف يضر المحرك .. تحياتي

**الهادف** · 09-01-2007, 12:42 AM

أخوي الأكورد الأبيض .. بنزين91 مايضر المحرك أبداً .. راجع كتلوج الوكالة بتلاحظ أن البنزين المناسب لسيارتك اهو 91 ... أخذها من عندي ضمان ..عب سيارتك 91 والايجيك في صدري :d

**ق ع م ACCORD** · 09-01-2007, 11:37 AM

أنا كنت خايف في البداية

لكن بعد السؤال تطمنت وعبيت بـ 10 ريال أجرب

أحس ان الصرفيه اقل والسيارة اخف

يمكن اتوهم

الحمدلله على النعمة:d

**منصور أحمد** · 10-01-2007, 01:45 AM

عندي سيفيك 98 بصراحة البنزين الجديد 91 ما يمشيني مسافة مثل القديم

بنزين 95 كنت أمشي فيه مسافة 450-470 كلم

بنزين 91 ما يمشيني أكثر من 390 كلم علما إني عبيت منه مرتين

أيش السبب ؟

**وحيد الجزيرة** · 12-01-2007, 08:33 PM

فللت التانكي من بنزين 91 ..وصفرت العداد
والامبير وصل النص والسياره قطعت مسافة 305كم ..

وحسب ما قريت باحد المنتديات ان الفل من بنزين 91 يمشي الاكورد 600 كم حسب تجربة الكاتب ..