الحل النهائي لمشكلة مقاعد الأكورد الغير مريحة

السلام على الجميع,,, هذي أول مشاركة لي بالمنتدى

أنا اشتريت هوندا أكورد 2012 قبل حوالي 5 أشهر و خلال أول يومين لاحظت ان المقاعد غير مريحة نهائيا! واستغربت! والسيارة صدق رائعة ماشاء الله لكن يعلم الله اني فكرت ابيعها لهذا السبب هههههههه, بس الحمدلله بعد شوية تدقيق وبحث عرفت أصل المشكلة وين...(مادري اذا أحد لقى لها حل في هالمنتدى ولا لأ لكن بشارككم تجربتي وان شالله تفيدكم)
المشكلة كانت في قطعة اسمها Lumbar Support واللي هي تدعم الظهر وتكون داخل المقعد، في سيارات ثانية يمديك تتحكم بهالقطعة لكن في الاكورد ستاندرد ما تقدر تتحكم فيها, في نفس الوقت التصميم حقها وشدتها جدا سيئة ومؤلمة اذا جلست فترة طويلة... فكان الحل بالنسبة لي "ازالتها"!
والطريقة كالتالي:
- افتح المقعد من ورا بتلاحظ قطعة بيضاء، هالقطعة البيضاء هي ال Lumbar Support وبتلاحظ ان هي اللي مسببة القساوة في اسفل المقعد.
- طالع زين بتلاحظ انك تقدر تشيلها بدون ما تفك اي شي، حاول تحرك الحدايد الين تقدر تطلعها.
- طبعا بعد ما طلعتها اختفى الألم وصارت المقاعد مريحة ماشاء الله وتوني قبل امس جاي من الدمام "انا من الرياض" !
جربو وادعولي! وعلى فكرة يمديك ترجعها في أي وقت لكن ما توقع احد منكم بيرجعها هههههههههههه
دمتم بخير!

مشكور أخوي على هاذي المعلومة بس ياليت لو تنزل صور لطريقة فك وإزالة القطعة بالإضافة إلى صورة القطعة نفسها ليستفيد أعضاء المنتدى وشكراً

تجربة جميلة أخي الكريم

تجربتي انا هي تلبيس المراتب الامامية جاعد مع قطعة صغيرة مسندة لأعلى الظهر والحمد لله البارح وصلت من سفر 1200 كيلو والوضع تمام

انا سيارتي اكورد2012 فل ولم اجد حل لقساوت المراتب
ممكن توضح طريقتك في فك القطعه

اقتباس:

---

المشاركة الأصلية كتبت بواسطة دايم العز36

انا سيارتي اكورد2012 فل ولم اجد حل لقساوت المراتب
ممكن توضح طريقتك في فك القطعه

---

الخطوات:
1- افتح السستة حقت المقعد من ورا ( افتح اليمنى واليسرى ولا تشيل القماشة بالكامل)
2- بتلاحظ قطعة بيضاء واضحة مافيه غيرها مركبة على حدايد وهي سبب قساوة المقعد.
3- القطعة ماهيب مربوطة بمسامير، معلقة بكلبسات على الحدايد.
4- ابدأ فكها من الكلبسات اللي فوق وانزل لين تطلع معك.
5- بعدها بتلاحظ المقعد صار جدا مريح والقساوة بتختفي نهائيا.

صورة:

هذي الهوندا الأمريكي الفل، القطعة السوداء هي اللي انا اقصدها لكن بالستاندرد تجي بيضاء ، لاحظ الكلبسات اللي ماسكة بالحدايد يمديك ترفعها فوق وتفكها، وحرك الحدايد مثل ما تحتاج ما بتنكسر الين تنفك معك.
هالقطعة هي اللي تضغط عالمقعد من اسفل وتسبب القساوة لكن بعد ما تشيلها يصير المقعد مريييييح جدا جدا...

أتمنى المعلومة وصلت واعذروني نظرا للانشغال، وياليت اللي تضبط معه يكتب تجربته في التعليقات عشان الناس تستفيد وشكرا!!


أي أسئلة انا موجود!

http://static.cargurus.com/images/si...452328107.jpeg

بارك الله فيك على المعلومه

يالطيب ما السيارة التي تنافس الاكوود ؟؟؟؟؟

<<<< عميل قديم لتويوتا ........... ابقا فيها ولا احول ع الهوندا ؟؟ ماهمني غلاء قطع الغيار .

هل الكامري ممكن تنافس الاكوورد ... ولا مافيه مقارنه ؟؟؟ انتظرررركم يا أخواني فالله

اقتباس:

---

المشاركة الأصلية كتبت بواسطة خلودي 11

هل الكامري ممكن تنافس الاكوورد ... ولا مافيه مقارنه ؟؟؟ انتظرررركم يا أخواني فالله

---

والله الكامري موب شينة بس هي مسألة ذوق كل واحد يفضل شي...أتمنى تلقي نظرة على فورد فيوجن وفورد تورس قبل لا تقرر والقرار لك

يعطيك العافية
فعلاَ الشكل السابق المقاعد متعبه في السفر
اما الجديدة ولله الحمد مريحه

تسلم الله يرحم والديك اللهم يسر وسهل كل امورك اللهم امين ويجزاك الف خير والله اني ماصدقت انفكيت من هذي المشكله فكرت اني ابيع الموتر بسببها تسلم ياغالي.

أجل ضبطت معك ماشالله! كيف الفرق؟

الله يسعدك ايه نعم ياخوك ضبطت وحسيت فيه فرق للافضل وهذا المشكله بذات لقيتها في اكثر السيارات اليبانيه فيه مره سافرت على اكورد 2013 استاندر لكن والله اول مره اسفر على موتر ياباني ولا اتعب واطفش من الجلسه الطويله على المقعده لدرجة اني رحت ورجعت في نفس اليوم تقريبا 700كيلو من بعدهاوانا الدور مقاعد الستاندر موتري 2012 اسبشل وسلامتك يانايف.