عندي سؤالين الله لايهينكم

[فقير الحظ]

السلام عليكم

كيف حالكم ان شالله طيبين

بختصار عندي سؤالين

السؤال الاول وش رياكم بمساعدات الجبرين (مساعدات غاز) سعر الواحد 75 ريال يركب على جميع السيارات تقريباً


السؤال الثاني اذا شمعت السياره تروح لمعت البويه؟
وشكراً,,,

[عبووودي2009]

السلام عليكم ورحمة الله وبركاته ..

إذا كان على المساعدات ..
فماعندي فكره عنها وانشاالله الأخوان يفيدونك ..

أمّا عن التشميع ...
فهو يساعد على بقاء لمعة السيّاره ... ...



وأنا من اللي يشمعون كامل السياره كل اسبوعين إلى ثلاث أسابيع للحفاظ على لمعة اللون اللؤلؤي ..
وجمال ونعومة البويه ...



الله يوفقك ..

[فقير الحظ]

يعطيك العافيه يالغالي

طيب بكم التشميع كامل السياره وياليت تدلني على محل كويس بالرياض حبذا شرق الرياض:o

طوولت عليك


ننتظر باقي الاخوان

[عبووودي2009]

إذا كنت تبي تشمّع في محل بيكلفك والموضوع بسيط جداً ..

أولاً موترك جديد موديل 2007
فما يحتاج انّك توديه محل وتشمعه
لأن بويته لسى جديده ومافيها شي ..

فاللي ودّي انّك تسويه ..
تروح تشتـري من سايكو تشميعه من شركه ماجينيز .. رقمها 3 .. لون علبتها حمراء .. وبـ 35 ريال تقريباً .. وقطن بـ 5 - 10 ريال .. فقط ..

المهم ..
كيفيّه التشميع ..
:: 1 :: تضع القليل من المستحضر على البودي ..

:: 2 :: تجيب قطعه من القطن اللي شريته وتوزّع على البودي بكميّه معقوله ... (( تنبيه :: للتشميع لا تقوم بفرك المستحضر وهو على البودي .. يعني توزيع فقط بالهداوه .. لأن الفرك للتلمــيعه فقط وليس للتشميع ... ))

:: 3 :: تجيب لك كوب من الشاي :d وتنتظر من 10 - 12 دقيقه حتى يجف المستحضر وهو على البودي ..

:: 4 :: تودّي كوب الشاي المطبخ ولا تنسى تغسله :d ...!!



:: 5 :: تجيب قطعه من القطن .. وتقوم بإزاله المستحضر من البودي بشرط لا تشد على البويه لأن المستحضر يروووح بكل سهوله .. ;)

:: 6 :: من تخلص شيل علبة المستحضر وسكّر علبته .. وشيل القطن وحطه في شنطة سيارتك ... وغسّل ايدينك زين ..

::7 :: إستمتع بلمعة سيارتك وبـ ملمسها الناعم الذي سيعجب الجميع .. ;) ...
وإلتمس النتيجه بنفسك ..

وإنشاالله أكون أفدتك .. :o ..

آسف عالإطاله ...

[فقير الحظ]

الله يعطيك العافيه ماقصرت والله

ومثل ماذكرت على كامل السيارهـ

يعطيك العافيه مره ثانيه

[عبووودي2009]

العفو أخوي فقير الحظ ..

ماسوّيت إلا الواجب ..


دُمتَ بوِدْ ...

[شايل الظبي]

واللهي نصيحة أخو لأخوه
لاتلعب يافقير الحظ في سيارتك نصيحه
تشميع ومني عارف ايش ومساعدات
وعلى العموم كانك صامل تبي محل تشميع فيه واحد في
حي النهظه على طريف النهظه في المحطه الي
يغسلون فيها الهايلوكسات أعتقد معروووفه

[فقير الحظ]

^^^

قصدك المغسله الي بحي الربوه ؟؟

انا ساكن بالنهضه اذا فيه محل تشميع قريب لاتبخل علينا بالوصف يالغالي ؟

طيب شباب بالنسبه للمساعدات ؟؟ مساعداتي اندمرت مقدر امشي عليها تكفون افيدونا بخصوص مساعدات جبرين ؟

ACCORD/2005
يعطيك الف عافيه يالغالي
نورت الصفحهـ

[عـبـادي عـاشـق هـنـادي]

مرحبا



والله وانا اخوك ان كان على المساعدات اذكر قد ركبتها على ددسن اول موديل 2000

علشان مايناقز واجد لانها قويه وحق بر لكن على الهوندا ماقد شفت اغلب الي يركبونها على جيوب ودداسن وهايلوكسات <<كلمه صعبه :p

[فقير الحظ]

^^^^^^^^^^

طيب كويس واذا ركبتها على الاكورد وش بيصير ؟؟