Tune It Yourself

[acura RL]

السلام عليكم و رحمة الله و بركاته
لمحبي التعديل والتلغيم

راح ابتدي بالموضوع و انشالله راح امشي عليه شوية شوية و ذلك لضيق الوقت في الفترة الحالية و لأنه ما ابغى ااخر الموضوع كثير

اول حاجة خلونا نعرف ايش هو الـTune مع اني اتوقع انه اغلبكم يعرف؟

التيونينج يا طويل العمر هو اعادة برمجة وحدة التحكم بالمحرك او الـ ECU يعني Engine Controller Unite حتى لتخليه قادر على التعامل مع البيئة الجديدة سواءً كانت N/A او F/I ،، و السبب الي يخلينا نعيد البرمجة انه وحدة التحكم كانت مبرمجة على اشياء معينة و ارقام محددة و انتا لما جيت تزود راح تتغير هالأشياء و راح تتغير الأرقام، فالبتالي الكمبيوتر راح يرسل اوامر خاطئة بالنسبة للبيئة الجديدة.

طيب ويش يصير اذا ارسلت الأوامر الخاطئة ؟



الصورة تتكلم

طبعاً بيجي واحد يتفلسف و يقول هذا الي خرط المحرك ما خرطه عدل او انه البستن خرطي،،، لا يا حبيبي البست هذا من افضل الشركات على الأطلاق و هوWiseco بس انا اقول لك يا شاطر ايش الي صار... هذا راعي البستن الذكي ركب توربو و التوربو معروف انه يشحن هواء بكميات جنونية بينما الكمبيوتر غير مبرمج على محاكاة هذي الكميات فبالتالي وش رايح يصير ؟ راح يكون الخليط فوق البست Extremely lean يعني كميات الهواء كبيييييرة جدا بالنسبة الى كمية الوقود المضخوخة و الي راح يصير شغلتين:

الأولى انه الحرارة فوق البستن راح تتراكم في فترات زمنية قصييييييييييرة جداً و بالتالي راح يتمدد البستن بسرعة و النتيجة يقل الـtolerance و اقصد فيه المسافة المتروكة بين البستن و السلند الي تكون عادة من 0.001-0.003
و النتيجة مثل ما شايفين في الصورة

طبعاً الوقت المقدر عشان يصير مثل الي صار في الصورة هو 15-20 ثانية

يعني تخيل روحك تبني محرك قيمته 40000 و لا تسوي له تيونينج راح تخسر القميص و البتسن. طبعاً اذا انتا مزود الموتر بتربو او بساتن ضغط عالي و لا سويت تيونينج و شفت عندك الزيت قام ينقص فهذا مو معناتها مشنبر و بس ،،،، البساتن و الأقمصة راحو يا بابا


المشكلة الثانية الي تنتج من عدم البرمجة هي الـDetonation و هو انه يحترق الخليط و يوصل الضغط فوق البستن الى اقصاه قبل لا يوصل الكرانك الـ TDC او الـ Top Dead Centre يعني قبل لا يرتفع البستن الى اقصى ارتفاع. و هالمشكلة غنية عن التعريف و الصورة تتكلم




لاحظ كيف انه الحديد يتشلخ


نلخص االي قلناه:

هدفنا من اعادة البرمجة في النهاية عشان المحرك يشتغل بصورة سليمة تحت الظروف البيئية الجديدة <<< احياء هذا مو اعادة برمجة


اوكيه الحين عرفنا وش هدف البرمجة، طيب كيف نبرمج ؟؟؟

اول شي خليني اقول لك انه برمجة نفس كمبيوتر السيارة افضل من اي خيار ثاني و حتى افضل من الـstand alone لكني نسيت الأسباب و راح ادورها لكم لأني انا دائماً ابحث ابحث و اطلع النتيجة و تالي القي بالبحث عرض الحائط

حتى تبرمج تحتاج الى Dyno Load type مو الداينو العادي و طبعاً الي اعرفه انه هالنوع مو متوفر لذلك راح يجي الخيار الثاني و هو street dyno و طبعاً هالنوع مو سيء،،، طبعاً انا رايح اركز على الـStreet Dyno لأنه خيارنا الوحيد

شوف الفيديو هذا حق هوندا برليود قبل لا تتبرمج و بعد ماتبرمجت في الشارع

[ame="http://www.youtube.com/watch?v=3rfVrHNoqs8"]http://www.youtube.com/watch?v=3rfVrHNoqs8[/ame]

طبعاً الـDynoJet يكاد يكون ما ينفع (حسب الي اعرفه) و راح تعرف بعدين ليش لما نجي الى البرمجة بأدق تفاصيلها

و حاول اذا انتا مالك بالبرمجة فلازم تقرأ الي فوق مرة و مرتين و ثلاث و اربع

ولا عليك من الي يتفلسف و يقول فلان في سيارته تربو ولا اعاد برمجتها ولا صار الي تقوله

منقول

[S.M.A.R.T]

يعطيك العافية يا هالو وبنتظار طريقة البرمجة

تحياتي :أمير

[acura RL]

طيب عشانكم خلونا نكمل..
بسم الله

طبعاً انا اتمنى بعد هالمقالة الاقي واحد ينوي يبرمج سيارته بنفسه و لذلك لأسباب عدة:

1) لما تبي ترمج سيارتك عند فلان و علان الشغلة اولاً راح تكون مكلفة.
2) قيمة الأغراض الي تستخدمها حق البرمجة نفس قيمة شغل البرمجة نفسه،، يعني الأغراض موجودة عندك تظل.
3) العملية تستغرق اشهر حتى تكملها بصورة سليمة يعني قول يبي لك شهر-شهرين حسب الفضاوة عشان تعرف السيارة في شتى الظروف. ما اقصد يعني امشي بالسيارة شهرين ورا بعض. لا الي اقصده انك تجرب السيارة في ايام الرطوبة بدون مكيف و بمكيف و ايام الحر بمكيف و بدون مكيف في البرد بمكيف و بدون مكيف و الليل و النهار و ادخل طرق محفرة و طرق سيدة و تالي بعدين الله يعينك عبي السيارة طابوق و خليها تفش في الأرض و اذا تقدر بعد اسحب لك كابرس بكس بقلص و انتا تبرمج ___ بعدين راح اوضح الفكرة ليش تسوي كل هالشي.
4) هذي سيارتك و انتا اعرف فيها و متعود عليها
5) متعة التزويد في الجزء يعني اذا ما تبرمجها بنفسك بتحس روحك بس تشتري قطع

طبعاً هذا ما يعني انه الي يبرمجوا لعابين او ما هو زين بالعكس راح يوفروا عليك جهد و وقت و يريجوا بالك،، يعني اذا انتا من النوع الي ما يحب يسوي شي بنفسه فلا تحوس احسن

__________

انجي الحين الى الزبدة و طبعاً معظم المقالات تبدأ من فوق الى تحت لكن انا بابدأ من تحت الى فوق عشان تكمل قراء عدل

اول شي تأمل معاي هالصورة


.
.
.
.

تأملت زين ؟ طالع فيها لمدة كم دقيقة و حاول تفهم وش صاير

اوكي خليني اوضح هالرسمة

اول شي خليني اتكلم عن البرنامج: هذا البرنامج اسمه Crome و معروف انه مو من اقوى البرامج ،، ولكنه اقوى برنامج لأعادة برمجة كمبيوتر الهوندا و طبعاً انا رايح اشتري الحزمة كاملة تقريباً بـ1000 دولار.

ما علينا من هالكلام نرجع الى الصورة

لاحظ اول عمود على اليسار الي لونه رصاصي،، هذا يشير الى الـRPM
لاحظ الصف الأول فوق الرصاصي: هذا ما علينا منه بس رقم على خرطي
لاحظ لصف الثاني الرصاصي: و هذا يشير الى قراءة الـMAP Sensor _راح اوضحه فيما بعد
لاحظ الصف الثالث الرصاصي: و هذا يشير الى الـVacuum و راح اوضحه الحين

الـVacuum هذا شنهو ؟ هذا يا طوي العمر سنسر موجود بس مو متأكد اذا كان داخل الثلاجة بعد الثروتل بدي او برى الثلاجة قبل الثروتل بدي بس الفكرة العامة له انه يقيس الفراغ ، طيب كيييف ؟ انا اقول لك كيف ياشاطر. انتا لما لما تكون حاط رجلك شوييييييية على الدعسة و ش راح يصير ؟ راح يكون الضغط عالي و الهوا يمر بصعوبة بس لما تحط رجلك على الدعسة كاملة راح ينفتح الثروتل و يقل الضغط و يمر الهوا بسهولة
عشان كذا في صف الـVacuum كل ما اتجهنا يمين يقل الرقم

طبعاً نفس الفكرة حق اي سيارة و اي برنامج برمجة

اوكيه نجي الى الجدول نفسه:

الأرقام هذي وحدة قياسها milli second يعني كم ملي سكند تظل ابرة البخاخ مفتوحة

لو تلاحظ انه كل ما اتجهنا يمين زاد الرقم،، يعني كل ما حطينا رجولنا على الدعسة معناتها في هوا اكثر و يعني لازم الكمبيوتر يزيد البنزين خلال فتح ابرة البخاخ وقت اطول


اوكيه هذا بالنسبة لجدول الوقود طيب نجي الى جدول التايمينج

طبعاً ما لقيت صورة من النت لذلك صورت الصورة من كمبيوتري



في هذا الجدول كل مازاد الرقم يعني الشرارة راح تطلع قبل الـTDC بفترة اكبر و العكس

عشان اقرب الفكرة اكثر: يعني لاحظ اول خلية في الزاوية على اليسار فوق مكتوب 16.50 ( انا مو متأكد من وحدة القياس بس اظاهر انها بعد ملي ثانية) و هذا يعني انه البوجي راح يطلع شرارته قبل لا يوصل البتسن الى اقصى ارتفاع اله

طيب نجي نشوف اول خلية فوق على اليمين مكتوب -1.75 و هذا يعني انه البوجي بيطلع شرارته متأخرة بعد مايوصل البستن الى اقصى ارتفاع بـ1.75 ملي ثانية <<< الي له بالبرمجة يصحح وحدات القياس اذا غلط

قاعدة: High RPM + Low Vacuum + High Load = EASY Detonation

من القاعدة الي فوق الأن ارجو انه توضحت الفكرة ليش يأخرو التايمينج في البوست

نجي الى الجدول الثالث



هذا الجدول ماهو بذاك الأهمية و لكن له اهمية وحدة و هي انه يوضح لينا اش قد قاعدين نستخدم من طاقة البخاخ... لأنه البخاخ اله حد معين اذا تجاوزه راح يخرب و طبعاً يعتبر 85% هو الحد الأمن يعني لما ستخدم اكثر من 85% من طاقة الأبرة فاحتمال راح يصير خراااااااب هيه

المهم انا رايح احط وصلة البرنامج طبعاً البرنامج هذا مجاني لأنه فيه الأدوات الأساسية فقط و انا رايح اشتري البرنامج كامل

ياليت لو تنزلوا البرنامج و تثبتوه لأنه راح يعطيكم فكرة كبيييييييييييييييييييييرة و راح تسهلوا الأمور علي و عشان يكون الشرح اقرب الى الفهم

http://www.tunewithcrome.com/download/crome1.2.zip


منقول

[acura RL]

الحين انتا زودت السيارة و كل حاجة اش لازم تسوي عشان تبرمج الكمبيوتر ؟؟

الخطوة الأولى: تحضير الكبيوتر للـChipping

طبعاً الـchip الي فيها الـmaps (المعلومات الي في الجداول الي شرحتها) ما تقدر تسوي لها برمجة لأنها محمية ضد الكتابة،، فالحل هو انه راح نشيلها و نحط وحدة ثانية قابلة لأعادة البرمجة. طبعاً راح نحتاج الى كمبيوتر ODB I حق اي سيارة طبعاً في هوندا افضل كمبيوتر هو كمبيوتر الـB16 لأنه مدعوم بقوة من قبل البرنامج الي حطيت وصلته مع انه ما عنده القدرة بالتحكم بـsecond runners حق الأنتيك و لكن لما تركب التربو ماراح تحتاجه اصلاً.

طبعاً راح نحتاج الى هذي الأغراض


و بالنسبة للقطعة الي في الوسط الي مثل راس الشوكة هذي عشان نسوي datalogging يعني نلحمها في محل في الكمبيوتر و نقدر نقرأ كل شي يجي للكمبيوتر من السنسرات

بالنسبة للـchips السودة الكبيرة فهذي الي راح نعمل لها برمجة اما السودة الصغيرة فما عندي عنها فكرة




طبعاً هذي جداً مهمة لأنها راح تساعدك في شيلان الـchip و اعادة تركيبها لأنك ما تبي تلحم وتفك اللحام مرة ثانية



طبعاً هوندا مرة طيبين لدرجة انه مخلين محلات في الكمبيوتر عشان تحط فيها الروم القابلة للبرمجة



لاحظ الفتحات الجديدة الي فتحناها عشان نركب الروم الجديدة


الحين الكمبيوتر نوعاً ما جاهز




طبعاً فيه مكثفات ثانية نحتاج انه نركبها بس كلها 5 قطع كهربائية بس ماراح اتطرق ليها لأني ما ابي ادخل بالتفاصيل

اوكيه الحين الكمبيوتر جهز لكن فيه حاجة ما استوت وهي تجهيزه حق الـdatalogging (عشان نقدر نقرا المعلومات الي تجي للكمبيوتر)


هذا الكمبيوتر جاهز حق الداتا لوجينج


طيب شايفين الواير الي راكب في الكمبيوتر

روح شوف صورة الكمبيوتر الي فوق و لاحظ انه القطعة الي مثل راس الشوكة تركب في هالمحل .... ما يحتاج اشرح لأنه الصورة تتكلم

[acura RL]

المهم ما علينا

نستكمل بقية الحديث و لو انه باين على الشباب مو متحمسين و لكن دام بدينا الموضع لازم ننهيه.

الحين خلاص عرفنا ليش نسوي تيوننج و عرفنا كيف نجهز الكمبيوتر للـchipping ،،، يعني الحين باقي ايش ،،، نبرمج !!!

عشان نغير المعلومات في الكمبيوتر لازم نحتاج الى مدخلات عشان على اساسها نغير قيم المخرجات المخزنة في الكمبيوتر...

المدخلات طبعاً راح تكون المعلومات الي ترسلها لينا السنسرات،،،،،،،، باختصار نبي نسوي datalogging

اوكيه ايش نحتاج عشان نسوي داتالوجونج ؟

راح نحتاج هذي الوصلة



طبعاً و راح تحتاج الى وصلة USB-USB كما هو واضح من الصورة

بعد راح تحتاج الى حاجة و هي الـWideband O2 Sensor

طبعاً حساس الأوكسجين مال الشد بلد عيبه انه ما يقيس الفروقات الصغيرة و لكنه يقول لك هل المحرك rich/lean بسسس

بينما الوايدباند راح يقول لك نسبة الهوا للبنزين ... طبعاً 1:14.7 يعني لا هو rich و لا هو Lean طبعاً كل مازاد الرقم عن الـ14.7 يعني الهوا زايد و كل ما قل يعني البنزين زايد

طبعاً راح تستبدل الوايدباند بالأوكسجين سنسر مال الشد البلد وقت البرمجة

اوكيه الحين راح نحتاج الى برنامج LogWorks و تحصله من هالوصلة http://www.innovatemotorsports.com/s...rks2-setup.exe

اوكيه الحاجة الي لازم تكون عندك هي الـburning tools و هي الي راح تكتتب الـmap الجديدة الى الروم الجديدة الي بنحطها في كمبيوتر السيارة




طيب قبل كذا فيه حاجة جداً جداً جداًجداً جداً جداًجداً جداً جداًجداً جداً جداً مهمة و هي الـemulator

هذي مي مهمة <<< قاعد تلعب علينا لا اقصد انه ممكن تبرمج بدونها لكنها راح توفر عليك وقت بشكل ما تتصوره



طبعاً اذا جيت تبرمج السيارة بدونها ايش رايح تسوي ؟ راح تكتب المعلومات الجديدة الى الروم وتحطها في كمبيوتر السيارة مرة ثانية ،، و اذا جيت تغير نفس الشي تسيل الروم و تحط المعلومات الجديدة ،،،،،،، لكن بهذي الأداة راح تقدر انك تشبكها في كمبيوتر السيارة عن طريق كيبل خاص يكن احد اطرافه مثل الـchip الي تنحط في كمبيوتر السيارة و الطرف الأخر يتشبك في الإميولاتور و كايبل ثاني USB عشان نشبكها في الكمبيوتر

طبعاً بهالجهاز راح تقدر تسوي real time programming... طبعاً الـchip مالت الكمبيوتر مفصولة و الكبيوتر يقرأ من الأميولاتر الي قاعدة تعمل عمل الروم الأصلي،،، باختصار قبل لا تلزق الروم الجديدة نستخدم هذي لين نوصل الى افضل النتايج و تالي نكتب المعلومات الجديدة الى الروم و نحطها في الكمبيوتر <<< كأنه شرحي مش و لا بد

ايش بعد تحتاج ؟ لابتوب

الحين نجي للشغل :

1) نغير سنسر الأكسجين مال القزوز و نحط الوايدباند
2) نشبك الكمبيوتر بدون ما نحط الروم حقته
3) نشبك واير الـdatalogging
4) نشبك الـOstrich Emulator
5) نشغل البرنامج
6) ندور لينا على basemap كويسة من المنتديات. كويسة يعني اقرب الى التعديلات الي على سيارتك ،، مثلاً لو كان على سيارتك تيربو حجمه 0.63 و كانت مكينة سيارتك H22A فلازم تدور على map حقت واحد من المنتديات بأقرب التعديلات الي على سيارتك.
7) نودي البيس ماب الى الأميولاتور عن طريق الكمبيوتر
8) نسمي باسم الرحمن و ندق سلف





طبعاً اول شي نبحث عنه هو الأستقرار لما تكون السيارة في وضع الـidle يعني شغالة عند 900 RPM

قبل لا اتكلم شوفوا هذا الفيديو في المرفقات و راح تتسهل عليكم الأمور كثييييير


هذي العملية يسمونها Map Trace و هي جزء من الـDatalogging و هذا اهم جزء يعني احنا سوينا كل الي سيونها عشان نوصل الى هنا

اوكيه الي في الفيديو هذا الشاطر ايش قاعد يسوي ؟؟

اكيد قاعد يبرمج <<<< لووووول

هذا يا حبيبي قاعد يسجل الـAir/Fuel Ration عند ضغوط مختلفة و دعسات مختلفة،،، طبعاً مو بورقة و قلم و لكن برامج الـDatalogging راح تسجل قراءة الوايدباند تماتيك بمجرد تنتقل القراءة من خلية الى اخرى

و بعض برامج الداتالوجينج تقدر تسوي لك Auto Tune يعني هي تقرأ و بناءً على المعطيات الي انتا سجلتها هي راح تغير القيم...

ما علينا ما على الـManual tune

-------

الهدف رقم واحد:
انه نسبة الهواء للبنزين تكون 14.7 اذا كان الضغط نازل يعني من 0-2500
انه نسبة الهوا للبنزين تكون تقريباً 13.5 لما تكون السيارة في ضغوط متوسطة يعني
انه نسبة الهوا للبنزين تكون تقريباً 12.5-11.5 لما تكون السيارة في ضغوط عالية يعني 7000+

الهدف الثاني:
انه نقدر نقرأ جميييييييييييع الخلايا و لهذا السبب انا كتبت في البداية هالكلام لأنه السيارة لما تتعرض الى ظروف خارجية مختلفة راح تتغير المخرجات:اعطيك مثال حق اقرب الفكرة:
في ايام البرد معروف انه الهوا كثيف ،، والهوا الكثيف فيه كميات اكبر ، فأنتا اذا برمجت السيارة في البرد راح تضبط لكن لما يجي الحر و يكون الهوا اقل كثافة راح يحتوي اكسجين اقل و بالتالي راح تكون السيارة في الصيف صايرة Very rich يعني البخاخ قام يضخ بكميات كبيرة جداً فانتا ايش لازم تسوي ؟ كل برامج البرمجة فيها شي اسمه temperature mulitplier و هذي القيمة تصحح الأخطاء الناتجة عن تغير درجة الحرارة في الجو عن طريق سنسر حرارة موجود في الثلاجة. يعني تقدر تقول له في البرنامج لما تصير الحرارة كذا نقص او زيد على البنزين بمقدار %

يعني مثلاً انتا تبي السيارة لما تكون شغالة و هي واقفة نسبة 15.0:1 (نسبة الهوا للبنزين) و برمجت السيارة في الشتا فلما يجي الصيف هذي النسبة ممكن راح تصير 17:1 فأنتا ايش الي تسويه ،،، تغير في الـtemp. multiplier لين ترجع النسبة 15.0:1 بهالطريقة السيارة ماراح تتأثر بالجو

طبعاً السيارة تتأثر حتى بدرجة حرارة الماي في بطن المكينة يعني لما تتغير الحرارة راح يتغير كمية البنزين المضخوخة.

نفس الشي لما تغير البخاخات لازم تحط السعة الجديدة حق البخاخ في البرنامج حتى يرسل اشارات كهربائية تناسب البخاخ الجديد

و نفس الشي بالنسبة لطرمبة البنزين لازم تغير الضغط حقها من البرنامج

وين وصلنا الحين
_______________
اوكي نبدأ القراءة الحين:

ندق الريوس و نسمي باسم الباري الجبار و ناخذ بالسيارة فرة ،،، طبعاًَ لا تدوعس خلك على الراحة عشان لأنه فيه احتمال يكون التايمينج مال الـbasemap الي جبتها مو مناسب لديك الرجة و يصير عندك detonation و يخرب عليك المحرك و انتا تبرمج

اوكيه حطها اول و عشق ثاني و عشق ثالث ودي الضغط حده...

جنب على جنب الشارع و شوف نسب الهوا للبنزين

مثلاً اذا انتا تبي السيارة في الضغوطات العالية تضخ بنزين بزيادة كبيرة و انتا لاحظت انه البخاخ ما يضغط بالكمية الي انتا تبيها ايش تسوي ؟؟؟ ترجع الى برنامج الـCrome الي حطيت وصلته و تروح عند الخلايا الي انتا تبي فيها بنزين زيادة و تزيد الأرقام

قاعد: دائماً عدل قيم الوقود قبل قيم الشرارات

روح و شوف الفيديو مرة ثانية حتى تفهم علي

اوكيه الحين الملف الجديد الي فيه المعلومات الجديدة الي كتبتها ترسله الى الـEmulator من غير ما تطفي الموتر و راح تلاحظ التغيرات جت مباشرة

نفس الشي تعيد الكرة مرتين و ثلاث و اربع لين تكون راضي عن مستوى السيارة

وسامحوني على الاطاله

منقول

[acura RL]

الله يعافيك ياامير واذا فيه اي استفساارت ارجو الرد...

[open window]

يعطيك العافية جهد جبار من عضو مميز الف شكر لك

[ـبطرانـ2005ــ]

يا خي انك جباااار

<<< ماشاء الله عليك الله لا يضرك ولا يحرمك الاجر

[الشمــــالـــي]

الله يعطيك العافية

موضوع جبار من عضو مميز

مشكوووور وما قصرت

[acura RL]

الله يعافيكم..