عندما تتساوى مع النفط !! ( عنوان بايخ )

[B Useful]

السلام عليكم ورحمة الله وبركاتة ..





اذكر قبل 23 يوم تقريباً اخذت مخالفة سرعة ..! :d

الساعة كانت بحدود 3.10 دقائق فجراً وكان يوم خميس وكنت في طريق خريص ..

وررررررررررر <<< ماشي 160 كيلو متر مربع في الساعة <<< الطريق دايم زحمة ومتوقف وقرف فرصة الواحد يسرع فية ..
والا اشطف الدورية السرية ،، تدرون وش القهر ؟؟؟

القهر ان الساعة 3.10 دقايق .. حتى ابليس مرسل كول مي الساعة 2.45 على جوالي وطنشتة ما دقيت علية .. فأرسل لي رسالة يقول : توصي شي ؟ ابروح ارقد ...

وهذا الدورية السرية صاحي للحين ؟؟؟ وش عندة صاحي ؟؟؟ اخبرهم بالكثير الساعة 1 وهم نايمين ولا فية دوريات ولا اي شي ..!
شطفت الدورية وقلت لا محالة موقفني موقفني ،، على طول رفعت رجلي عن البنزين استعداداً للتوقف ما امداة يشغل البراقات الا انا مشغل الفلشر ومصفط :o

الهم انة كان اطلق عسكري حبيتة ( موب النوع اللي قال عنهم لورنس ابو .... :d ) جا لعندي ،، فتحت الباب ونزلت بعد السلام والابتسامة :
-لو سمحت بس وخر عن الشارع وتعال ع الرصيف عشان السيارات .. وش فيك مسرع ؟؟
- ابد .. مافيني شي ولا اي موضوع .. - رخصة واستمارة ؟ ( مجهزها وكانت بيدي ) تفضل ...
- طيب انا بلغت عنك و قالو حجز السيارة لان سرعتك فوق 150 ومخالفة .. وش رايك ؟؟؟
- والله اللي تشوفة انا خالفت النظام والي تشوفة سوة .. لكن امنعنا من حجز السيارة ، خلها على مخالفة ..
- طيب اركب في السيارة لين اجيك .
شوي .. ونزل وعطاني مخالفة وقال تراني خفضتها لك وحطها 127 كيلو بالساعة ، لكن انتبة من السرعة تراها ما تسوى عليك وعطاني نصيحة اخوية ..
- يعطيك العافية ما قصرت .. سلام ..

بعد اقل من اسبوعين على هالسالفة وفي نفس المكان تقريباً الا ان الوقت على اذا العشاء توي جاي من مكتب ارامكس استلمت برقع اكورد 2008 حق واحد من الشباب ...
وكنت خاش جو مع اغنية عبد المجيد .. الا شوي اناظر في المراية .. الا شمس وقمر ونجوم وبراقات وكل شي وملحم فيني !!
^^ طبعاً مدري كم لة يلحقني ^^

ما امداني اوقف ونزل من السيارة وفتحت الدريشة .. هااا مسوي رابط الحزام بعد ؟ ( الله لا يوفقة عرفت انة ناوي شر ، من عادتي ان حزام الامان اربطة عشان سلامتي موب عشان خشتة )
ومظلل بعد ؟ ( كنت حاط الستاير ومن يوم ما انتبهت للبراقات فكيتها بسرعة قبل لا اوقف ونطلتها ع المرتبة ورا )
قلت لة وين التظليلة اللي تشوفها ؟
قال ارفع الدريشة .. وارفعها لة ورني وينها ،،، قال شفها .. قلت تعال شفها بنفسك وين ؟؟؟ ( حطيت في فمة حجر )
قال الامامية مظلة بعد ...
قلت انت وش ناوي علية ؟؟ شف بنفسك وين التظليلة اللي تقول واشغل لة اللمبتين الداخلية واقل تعال ناظر ( وهذا الحجر الثاني في فمة )
قال انت متهور مسرع ومتجاوز بغيت تصدم اللي قدامك
وش ؟ وش تقول انت ؟؟؟ انا ماشي في طريقي ولا سويت اي شي من اللي تقول !!
قال الا متجاوز واحد مسرع تحت نفق تركي بن عبد العزيز !!
انا خلاص تحطمت ما ابي ارفع صوتي علية عشان تكبر المسألة وتصير فلسفة مالها داعي وموقن كل اليقين اني ماسويت شي من اللي قالة ..

قال دق على واحد من اخوياك يجي ياخذك .. الموتر بيحجز ..
واقعد اراضي فية (يابن الكلب اقولها بيني وبين نفسي ) يرضيك وما يرضيك تراني طالب جامعة واوصل اخواني المدارس ،،
قال هذا القانون وانت مخالفة ،، واحاول فية مرة ثانية (ابن الـ ....) .. وانت متهور وبغيت تقتل ناس وماشي 120 ومتجاوز فيها ( السرعة المحددة 100 ) ..

وصلت لمرحلة ... خلاص قفلت معي الله لا يوقفة .. الواحد اذا طلب رجال يطلبة مرة وحدة تكفي.. اكثر من مرة مذلة .. يخسي ابو .... وعشر من اشكالة يذلوني عشان حجز سيارة ،، قلت وخلاص رفعت صوتي علية الحين انت تعرف التهور ؟؟ شايفني ماشي 180 ولا 160 عشان تقول متهور تراها زايدة 20 كيلو تبي تسوي اللي تسوية سوة راس مالها مخالفة وحجز .. على بالك السيارة بتصير لك ؟؟ 5 ايام 10 ايام وبتطلع ... على بالك المخالفة بتخليني فقير ؟؟ الحمد الواحد تعزة فلوسة وترفع قدرة حط المخالفة اللي تبي .. ويرفع صوتة ويقول شف لك واحد يجي ياخذك .. واركب السيارة واسحب علية ...

شوي نزل ابو .... من سيارتة ،، ومعة مخالفتين ومن وقاحتة كل مخالفة في ورقة !!

دقيت على احد يجي ياخذك ؟ يقولها بكل وقاحة ... قلت بكل برود لا ... قال لية ،،، قلت وقت صلاة اذا انت ما تصلي غيرك يصلون .. قال ترا بتترك السيارة وبتروح تكسي .. قلت اية خل السطحة تجي اول ويشيل السيارة قدامي وبعدين اروح مشي ان شاء الله .. لاقيني انت ؟؟؟ اخلي سيارتي معك واروح تكسي ولا ادري كانك بتجيب سطحة ولا لا ؟؟؟..

قال : شف يا مصعب .. شكلك انت طالب جامعة ومدري ايش من كلامة الفاضي هالمرة بخليها على مخالفة بس و ... ويمد يدة ،، ما امداة يكمل كلمتين الا فية غبار اكورد 2004 عودية ينفضة عن ملابسة .. فاضيلك بعد يا حقير تعلمني وش انا مسوي ووش ما سويت ؟؟؟ يكفي الظلم اللي شفتة ..

وهذي مخالفتين ،،
خذيتهم ولا اذكر اني تجاوزت احد مثل ما قال ابو ... ولا اذكر اني جبت 120 اصلا .. وجاني هالحقير اللي كنة صاحب الشارع ،، حسيت انة هو القانون كله الله لا يوفقة ، يكلمك كنك متهم بقتل 437895 شخص ، يكلمك كنك محكوم عليك بالاعدام ، يكلمك كنة انسان مميز وانت ولاشي ..!

* العسكري الاول :
- حسن التعامل
- التصرف الحسن
- الاخذ والعطاء
- الابتسامة
- النصيحة
- آداء الواجب
- يخليك تدعي لة وتحبة وتقول الله يكثر من امثالة عشان حسن تعاملة ، يعلمك خطاك ويعاقبك علية حسب النظام ولا ضرر ولا ضرار .

* ابو .... الثاني :
- لا اخلاق
- لا تصرف زي الناس .
- ( حط السبة اللي تعجبك )
- عبوس الوجة والتعامل بإزدراء واحتقار
- آداء الواجب بطريقة استفزازية ومحاولة تخليص الدفتر ( ليش ما كتب المخالفتين في ورقة واحدة ؟ )
- حقير سافل منحط الله لا يوقفة ولا يكثر من امثالة << اقل ما يستحقة حتى ما يمديك تدعي لة بالتوفيق او الصلاح.



الحين ،، لو قابلتو العسكري الاول .. اقسم بالله تتمنى المخالفة منة بس عشان اخلاقة العالية ، عشان ابتسامتة ، عشان دورة في المحافظة على امن واستقرار البلد ، عشان آدائة لواجبة على اكمل وجة .

ولو قابلت ابو.... الثاني ،، انت معذور لو تفلتت علية وطقيتة وخليتة يعض الارض لأن اللي مثلة ما يستحق الاحترام ، والله ما يردك عنة الا البدلة اللي لابسها لان الحقير دايم مصدق مدري لية ، من يوم ما تفتك منة وتاخذ المخالفة مظلوم ولا اخذتها بحق بس من اخلاقة الشينة اللي شفتها ودك تروح تسوي شي غلط !! ودك تروح تسرع ودك تروح تتجاوز ، واذا كنت عاطل باطل وعندكم طراطيع في البيت حقت العيد عام 1410هـ ودك تجمعها وتروح اقرب فرع مرور وتسوي حفلة فية من الغبنة اللي فيك ..!

الخلاصة من الاخير ،، كتبت الموضوع عشان اعلمكم ان ثلاث ارباع مكافأتي راحت اليوم !! حسيت انها مصدر دخل للدولة غير النفط !!

عمليات اخرى
خدمات حكومية
ادخل رقم بطاقة الاحوال
(( يوجد مخالفات مرورية ، لا يمكنك تنفيذ اي من الخدمات الحكومية قبل سداد المخالفات ))
ايوة !! يعني الحين اتحداك تسوي اي شي قبل ما تسدد مخالفاتك !!
طلعت لي الـ 3 مخالفات بقيمة 750 ريال !!
ياصبر الارض .. سواءاً سددت الـ 300 حقت المخالفة الاولى قبل لا تتدبل كلها اسبوع ولازم اسدد البقية ..
الشكوى لله ..
تسديد جميع المخالفات ،،، باقي من المكافأة 250 ريال ..

طيب هنا الزبدة ،،

احد يعرف وش حقوقة وش اللي لة ووش اللي علية في حالة ان وقفك مرور سري ؟؟

احد يعرف وش السرعة المحدد اللي بعهدا تاخذ مخالفة ؟ والسرعة اللي اذا عديتها تاخذ مخالفة وتحجز ؟

احد يعرف من هو اللي ينزل ؟ انت ولا العسكري ؟؟

احد يعرف هل لعسكري المرور الحق في التعامل بأحتقار مثل ابو .... الثاني ؟؟

واذا حصل وقابلت مثل الثاني ،، هل فية طريقة تاخذ حقك منة ؟؟؟ او الشكوى علية ؟؟؟ ( المشكلة انة مصدق دائماً ولا فية اي دليل معك )

لييييييييييييييية ؟؟؟ كل عسكري يوقفك كل واحد يطلع نظام من مخة ؟؟؟ <<< اغلبكم مريتوا بهالحالة .

احد يعرف عن كتاب يباع او يوزع يبين فية جميع القرارات والمخالفات والجزاءات ، وحدود رجل المرور .. ؟ والشي اللي لك والشي اللي عليك ؟؟؟


^^ مثل ما نشوف بالافلام ( لك الحق في التزام الصمت ويحق لك توكيل محامي .........الخ ... ) ^^



اللهم اليك المشتكى وانت المستعان وعليك التكلان ولا حول ولا قوة الا بالله .

[اتحادي]

الله يكون في عونك اخوي مصعب

فعلا تطلعلك شوية اشكال غريبه شغالين في المرور السري تكرهك في السواقه

لا اخلاق لا تعامل لا احترام

و بعض الاحيان مثل ما صار معاك ياخذها العسكري تحدي و عناد في المخالف

يعني كأنه يقهرو او حاقد عليه و بالذات اذا السياره شبابيه والله يا يكرهو فيها بسببهم

و يا ريت تبطل سرعه اخوي مصعب انت كمان :d

[ثــلــج مــشــوي]

وش تسوي بس وش تقول وش تخلي

قسم بالله عذاب مع هالعساكر دايم

زي مره كنت بمخطط اول طريق القصيم قادم السدحان

>>> مكان جيد للتجمعات وبعيد عن الحكومه ..

المهم

جلست اتمشى فيه واطخل واطلع منا احتري واحد من اخوياي بيجي وبنتكي

دخلت طريق مظلم كبست العالي علشان اشوف

جا واحد وراي يكبس ماعطيته وجه

شوي طفا النور وكبس

واطفي النور واعطيه اشاره يسار :d

شوي ويشغل السفتي

لحووول

وقفت كني مجرم

جا جمبي موجه نور الي بالسفتي

حسيت اني بالبرنامج هذاك الي با بي سي اكشن :d


وانزل خير


طبعا رخصه واستماره

وش عندك هنا

قلت يعني ممنوع قال لا

قال افتش السياره

قلت فتش

قال اكيد

يلعن ام السؤال البايخ ايه فتش

وينفضون السياره ربع ساعه


شوي ويصرخ


تعااال وشو هذا

انا ياساتر لايكون احد حط معي حشيش ولا شي

جيت قلت خير

قال هذا وشو ويده تنفض


طلع محول كهربا حق السياره

ركب لقا عندي عطر من بودي شوب فانيلا اعطر فيه فلتر المكيف

يقول هذا من معطيكياه وليش حاطه

قلت يعني وش تقصد

قال لا ولا شي

قلت اذا عجبك خذه مايغلا عليك


شو يقول وين يبيعونه

انا لله

المشكله كانوا ينفخون وانا قافله معي

قفلت الاخلاق

طلع من سيراتي هو وخويه

وجا يبفتشني

كان وقتها بررررد وانا مو لابس زين

قال وش فيك ترتجف

قلت يعني وش فيني خايف منك مثلا


برد ماتشوف


الزبده لطعوني فتره ومشوني

الزبده مو هنا


جيت انا مشيت ورحت المكان الي نتكي فيه

ووقفت السياره ونزلت حطيت اغراضي شوي الا جا العسكري من جديد وشغل السفتي


انا هنا قلت خربانه خربانه وشكلي ابرقد بمرور الصحافه لابوهم لابو كلب بكرا خميس


قلت نعم !

وقفتوني وفتشتوني وعطلتوني والحين وش عندك

ماوراي الا انتم

قال وين اخوياك الي يقول بيجون

قلت ماعليك منهم اخوياي هونوا وانا ابتكي لحالي

تبي تنزل تتكي معي تعال

>>قلت ماعطيته فرصه يتكلم

قال وقفت هنا شبهه

انا لله

قلت تبي نروح الحين اقفل موتري واركب معك وودني الحجز خلاص


قال لا مو كذا


قلت اجل وش تبي

!!!!!!!!

قال خلاص

قلت طيب طف السفتي عما عيني

حطه دي ومشا

مايستفاد من القصه :d

ماعندهم اخلاق

مافيه تعامل زي الناس ولا يفقهون وش يسوون

مع اني كنت مكتم الموتر وقتها زيروا 2

يعني كان المفروض يتكلم عن التضليله مو عن اشياء ماتخصه

ومركب زينون ولا كلمني عليه

ولاني رابط الحزام

اشكالهم تدل على الخراب

وغيرها من المواقف الي دايمتصير لي وكلها عبط لكن كثرت كلام

[راعي الحلم]

انت احسن مني

مرة وقفني واحد يوم الجمعه (الاختبارات النهائيه يوم السبت)
يقول انت تمشي على السيارة 142 بالضبط >>> حسيت اني ماشي 241
المهم قال العسكري الله يعينك على الحجز يومين ... يا ادمي عندي اختبارات يمين يسار وصلت الطلبات اني قاعد احب راسه
المهم وقعت الواقعة وقطني بجيب الدوريه ورحنا للحجز
يوم وصلت للحجز قلت خلني اصير ذكي واطلب الضابط المناوب قالي شف مدير المركز
جا مدير المركز الصباح بعد ما رسبت في المادة الاولى رسميا وطلبته في اليوم الثاني وبرضه قالي بكل وقاحه الله يعينك تعيد المواد حقتك الفصل الجاي وفي الاخير مخالفه 900 على سرعة 140 اجل لو امشي 200 وين بيودوني ((سجن الحاير))؟؟
الله لا يوفقهم وسلامتكم

[المباشر]

أذكر انه ممنوع يعطيك أكثر من مخالفة خلال 24 ساعة

[أبوكرم]

أصلا المرور عندنا من جنبها

هنا فائدة الواسطة
لأنه
النظام يمين و بلدنا شمال

(حسبي الله ونعم الوكيل)

[kakashi-san]

وعليكم السلام ورحمة الله ،

خل ندخل للموضوع على طولْ ،

بصراحة النوع الأول قابلتهم وكانوا قليل وخاصة حقين التفتيش بين الأحساء والدمام ، احس اشوي بصفّط بالسيارة وبسولف وياهمْ ، :d

اما النوع الثاني يا كثرهم واللهْ ،

انا الشيء اللي قاهرني يطلعون لك مخالفة من لا مخالفةْ ،

يعني لو وقّفك يدوّر له أي عذر عشان يعطيك مخالفة حتى لو مب موجودة في لوائح المرورْ < ادخل موضوع فقير الحظ عن المخالفات الغريبهْ ،

يا خي أن أذكر واحد من ربعي يقول انه فيه رقم تدق عليه لما أي عسكري يقل أدبه معك أو يتلفظ عليكْ ، تدق علهيم وتعطيهم اسمه ويتصرفون معه ، !!!
لكن أبغى اتذكر اللي قال لي مب متذكرْ ، ( فيس منغبن )

،،،،،

أنا عندي اقتراح لو يسوونه عندنا الدوريات يصيرون كويسيينْ ،

قبل ما يعطونا المخالفة ، يعلمونا الصحْ ، عشان تخف المخالفاتْ ،

الله يعين بسْ ،

[المـــــلكـ اكـــــورد]

المعادله بسيطه

اي طالب فاشل في الثانويه يتجه للعسكريه مباشره <<وش تتوقع منه ؟؟

<<الغالبية وليس الكل

الله المستعان

[ـبطرانـ2005ــ]

يا حبي لكم بس


>>> السوالف واجدهـ بهالامور


لاكن وش نسوي المخالفات تندبل واحنا هنا نتفرج


وغير كذا غبنهـ بحد ذاتها انك تاخذ مخالفهـ على ايش على انك والله رفعت صوتك على العسكري وهو في الاصل مبادلك هالشعور


لاكن شوووف اذا كان العسكري الحين يشوووف ان لهـ سلطه عليك ويقدر يعطيك مخالفهـ على شي ما لك ذنب فيه >>> بكرهـ وبكرهـ مو بعيد لنا رب بيحاسبنا كلنا على ما سوينا <<< وحقوقنا بناخذها بالاخرهـ كافيه ووافيهـ فريح بالك يعني

اشكرك على الموضوع حبيبي

[مجنون اكورد 07]

الله يعينك اجل وش تقول عني واحد من اخوياي التهبت عليه الزايده ورحت وديته المركزي اللي بالدمام المهم وقفت السيارة بالطوارئ ودايم اوقفها ولا يقولون شي المهم طلعت الا في مخالفه على القزاز نزلت عنده قلت خير يابو الشباب وش ذي المخالفه قال ليش توقف هنا قلت خويي كان بيموت قال وبكل وقاحه مالي شغل

حسبي الله ونعم الوكيل

بس بغيت اسأل كم قيمه مخالفة وقوف غير نظامي ؟؟

[Accord_Akkawi]

في اسبانيا كان اخوي مسرع ووقفته الشرطة طبعاً هناك هو يجيك انت لاتنزل من السيارة الا ذا قالك
المهم
جاه الشرطي والدنيا ليـــــــل والوقت متأخر وبرررررررررد ومطر المهم الوضع كان مأساة
يوم وصل الشرطي عند سيارة اخوي قاله
آسف عالإزعاج سيدي (اخوي في عقله هاااه سيدي )
ولكن انت مسرع (:o ابو ام الأدب والأخلااااااق )
وهذا طريق خارجي مظلم وخطير ( خايف عالناس الشرطي .. حبيته )
ومافيه انوار بالشارع ليش مسرع .. هل معك حالة طارئة <<< طالع ترجمة مسلسل مكسيكي :d
المهم
شوفوا الإسلوب يستـفسر قبل ما يقول اي كلمة
قاله اخوي لا
قال الشرطي أعتذر منك ولكن انا مضطر اني اخالفك
ممكن الرخصة وتطفي اسيارة
وقتها اخوي اعطاه رخصه دوليه
هنا الشرطي قاله
انت مو اسباني
قاله اخوي لأ أنا هنا سياحة عاد اخوي عايش هناك هاهاها
وقتها الشرطي اعتذر وقاله ما كنت اعرف تقدر تروح وما بخالفك لانك زائر لكن لا تسرع عشان سلامتك
يعني حتى ما سأله انت من وين ولا كثر كلام هذولي الشرطة ادب وذوق وأخلاق ...
اما هنا
بكل أسف طال ما انهم يستخدمون عبارة
وقف على جنب يا راعي الـددسن
عمرهم ما بيتطورون
وكله كووووووووم وشرطة الأردن كووووووم ثاني
هنا الضحك
ايام الجامعة وانا هناك صدفت معي ان جا وراي دورية مستعجل
وانا رافع المسجل ومو سامع وش في بره سيارتي وقاعد اتمشى علي مهلي
وعلى نهاية الأغنية لمن خلصت واسمع
وووووووب ووووووووب قاااااااااااااااق افتح الطريق يا مــــســـــقــــــع " يعني يابو وجه بارد "
هاهاهاهاهاها وافتح الطريق وينطلق هاهاهاهاهاها اشوى انه ما وقفني :d:d

[k7d5]

يا رجال اقسم بالله اني على الدايري الشمالي قبل مخرج 5 كنت ماشي 190 وشطفت لي سريه ووقفني وانا مكتم الموتر كله 03 لا وبدون لوحه قدام وبدون رخصه بعد

لاكن عطيته من الكلام الحلو لين سجل المخالفه بسرعه 130 بس وماقال لي اي شي عن الموتر

ومره بعد بالدايري امشي 140 وقفني سريه وعلطول بدون تفاهم طف الموتر وجب المفتاح <<<حسيت اني عبد عنهدهـ وقلت بنفسي هي خربانه خربانه قلت له مني عبد عند ابوك انت الي رح جمب المفتاح وعصب وراح اخذ المفتاح وقالي شف لك واحد يرجعك
هالحين وقالها لي بكل حقارهـ

لاكن انا ما اقول الى اصابع يدك مو وحدهـ

[Dodiii78]

ههههههههههههههههههه:d ههههههههه

وووووووب ووووووووب قاااااااااااااااق افتح الطريق يا مــــســـــقــــــع " يعني يابو وجه بارد "

بسيطه حبيبي وكويس ماحكى ايشي تاني
والاهم من ذلك انا من رأي ان ادارة المرور لازم تعطي العساكر اللي بيكونوا بهذه المهمه دورات في مهارات الاتصال مع البشريه والاصل انهم كلهم يكونو من النوع الاول
تقبلو مروري

[محجوب]

ترى من جد المخالفات مصدر دخل كبير للدولة <<< من جد
توني الشهر الماضي دافع 950 ريال مخالفات مضاعفة ... بقى من المكافأة 40 ريال .. 30 بنزين و10 عشا سفري :d

ما اقول الا الله يعيننا على ما ابتلانا ... الوضع مرة مقرف ولا يطاق

الواحد ما له الا انه يسايرهم .. أصحاب الفكر الحجري .. علشان كذا محدثك رفع السيارة خلاص والظليل الأمامي زيرو زيرو وما امشي الا بالكشافات الصفرا علشان لا يوقفوني على الزنون ... وكل ذا ولا تآمن على روحك من المخالفات المفاجِأة !!

خلها على الله بس ..

أشكرك على الطرح المميز ..

سلااااااااام ..

[just ACCORD]

حسيتكم يا شبااب كل واحد فيه كبته في قلبه وطلعها على هل المرور والدوريات والعساكر


على الاقل عندنا مخالفات عندنا عساكر هطقان عندنا ناس ما تعرف الصح من الغلط بس ما توصل انك تتكلبش ولا تنقط في السجن بدون ما تعرف وش مسوي


خصوصا في الدول العربيه

[gray2008]

وكله كووووووووم وشرطة الأردن كووووووم :d

يكفيك انهم لا جاك مسوين رادار وتفتيش يطلع لك في وسط الشارع يأشر لك بلوحه عشان توقف

سلامااااااااااااااااات :d

والله ايام ماكنا هناك ياما سحبنا عليهم ولا نوقف وتروح عوافي ولا احد عندك

الا مره وحده واحد من الشباب سحب عليهم وبعدها بمسافه كان في دباب عسكري واقف عند اشاره وكانوا مبلغينه ووقف خوينا واعطاه المخالفه
بس الاغلب اننا نسحب عليهم مانوقف لهم ولا يجينا شي وخصوصا في خطوط السفر واحنا رايحين على القريات ولا تبوك

[الاخطبوط]

^^^^ اما بالأردن شطفت نقطة تفتيش على سرعتي بمطباتها وهم يأشرون خخخخخخ أصلا ماانتبهتلها الا يوم اكلت المطب واطالع بالمرايه اشوفهم يأشرون وأحلى سحبه :d

اما دورياتنا فلا تعليق كل النوعين مروا علي وشيء طبيعي بتلقى انواع مختلفة من البشر بكل مجال

الحل لازم ادارة المرور تختار الشخص المناسب بالمكان المناسب موب كل من هب ودب تعطيه دوريه ودفتر مخالفات ورح خالف الناس

لانه فيه اشخاص حتى دورات وتدريب بمابتغير عقلياتهم لذلك اخواني الاعضاء عليكم بالصمت والتمسك بالأخلاق السعودية

من جد يامصعب القهر موب اذا كنت مخالف وعطوك مخالفه >> وقتها انت عارف انك مخطيء وتطلب الرحمه

لكن القهر انك نخالف على شيء انت اصلا ماعملته >>> وقتها انت عارف انك مصيب وتطلب العدل

[الاخطبوط]

خاص لأحد الأعضاء

صح انه فيه افراد من المرور جيدين وأفراد سيئين لكن ماتوصل للكلمة اللي قلتها عنهم

لاتنسى انه فيه ناس متهوره بالسواقه وممكن تسوي حوادث وأرواح وعوائل تروح فيها والمرور هو اللي بيوقفهم عند حدهم قبل لايصير مالايحمد عقباه

[MOHAMMED SS]

اخي الكريم

اعجبني قصتك

ولكن سأقولها لك حاول انشارها في احد الصحف

طالما انك على حقك

احنى في البحرين كل سيارة مرور فيها كاميراة تصوير فيديو

يعني اذا فيه شخص متهور بيتوقف واذا احتج فيه اثبات عليه مع انه بلد صغير

والسعوديه بلد الخيرات هذه من المفترض لكل سيارة مرور على الاقل كاميرتان للتصوير

حتى تثبت اتهامات الظابظ