دامك بديره ترابيه .. انسى تتزوج سعوديه .. !!

**f a w a z** · 26-02-2010, 10:24 PM

*
*
*
طن طن
سلام عليكمـ
مدري وش جاني وفتحت موضوع جديد بس يقولون ان فيني شهوه كتابه
وان الكتابه تريح المخ والبال وتصفي الاذهان من الشوائب والمخدرات
كان يامكان في قديم الزمان .. هنالك انسان .. يسمى كحيلان خخخخ ( وشو بالتوكه )
كان فيه انسان اسمه متعب قدر الله عليه وتخرج من الجامعه ولقى له هذيك الوظيفه السنعه
طبعا في سلك التعليم وكأي واحد من هاللي تعينوا جدعوه في مكان مايدري وشو
<-- ابد موب كنه انت يوم يجدعونك بديرتك ولا تدري وينهي فيه :d
راح متعب وحزم اغراضه وجلس يودع اهله تسنه موب شايفهم الا بالجنه :p
وخذ ياخمخمه وصياااااح هو واهله وامه تقول ياولدي اترك عنك الدشير وانتبه لعمرك
ترى موب نافعينك هالسرابيت ولا نزل راتبك دز لي دريهمات تراني محتاجه وهو يطأطأ برأسه
بمعنى ابشري يايمه :d
ويمر من عند الاخواااااات وهم مايعطونه وجه ويقولون لاجيتنا بأول اجازه
ترى نبي المطعم الفلاني ولا تنسى تعطينا وشسمه فلوس نبي نكشخ ونصير مثل البنات
ويقول ابشروا بس جاملوني على الاقل وودعوني وكذا .. وهم ماعبروه وساحبين على ابو من جابه خخخخخخ :d
وقبل مايطلع من البيت يجي يودع ابوه ويقول يايبه تامر شئ ولا ماشيات ؟ .. يرررد عليه ابوه بصوت الرجوله " اذلف واخيرا افتكيت منك ومن الصرفيه عليك خلك رجال واحفظ دريهماتك ترى موب مزوجن روحك الا انت ودراهمك "
ويهز رأسه متعب ويقول لعنبوا ذا الاهل كلشششش فلوس فلوس مايودعون بشئ زين ولا شئ يفتح النفس :p
راح متعب وركب الطياره للرحله المتوجهه الى المنطقه القريبه من منطقته النائيه وكان جنبه واحد طعسسسسسسس .. متعب بصوت الخايف .. يالاخو انت من اهل الديره .. ايه وش تبى ؟
قال لا بس ديرتكم زينه وفيها سكن ولا كيف .. متعب وقتها انلخم
تجيه نظرات ترووع تسب ديرتنا بوسط طيارتنا ؟ < دفع له كم قرش وصارت طيارتهم :d
قال الديره تعجبك ونفاهه واهلها وش حليلهم .. بتنبسط وبتوسع صدرك
صدق متعب كلامه واطمئن فؤاده
وصل للديره ولقاها تراب ممسوح لا سكن يسكن فيه ولا مطعم ينوكل منه ..:(
صار رجالن بس من الدوام للبيت ومن البيت للدوام وكل مادقوا عليه اهله قالوا هاه بشر عسى اموركم سمحه وماشيه ؟ رد بنبره حزن وقال تساااااهيل تسسسساهيل وكلش زين
قالوا اجل كز لنا من دراهمك شوي خخخخخ < اوم البجاحه :p
مرت الايام وحس متعب انه طفشش للدرجه انه صار يحط بالطوفريه بيالتين وفنجالين
عشان يحس ان احد جالس معه < ماقد سويتها ترى ابد خخخخخخخخ :d
جت الاجازه السمول ( هالوزاره ودي اعرف وش تحس به هي واجازاتها مايمدي الواحد ينبسط فيها الا مخلصه لعنبوا بليسهم مايمدي الطياره توقع الا هم يقولون اركبوا بنعود خلصت اجازتكم ) .. ايه وصل متعب لأهله واستقبلووه بكل حفاوه وجلسوا جلسه العصر
وجلس متعب يمسمس بشعيراته وياكل اظافره
جلسوا يتسرسون الاب والام يحسبون ولدهم انهبل وجته نفسيه وكذا .. مادروا ان الولد نوى يكمل نصف دينه ويبي العرس .. فاتحهم بالموضوع وانبسسسسسطوا .. ومابقى بنت ماعرضوها عليه .. قام متعب وقال لاتستعجلون شوي شوي .. انا ابي مساعدتكم
ابي دراهم اعرس بها وتحلطموا وردوا عليه بسرعه البرق وكلهم بصوت واحد .. توك بزر على العرس اصبر لين تركد وتمسك وظيفتك ولاحق على العرس
قفلللللللت مع متعب وراح للبنك قال بالله واحد قرض بدون شطه هاهاها .. وخذ ذاك القرض بـ 200 الف ويالله تسد بعد هالزواج .. وقال جبت لكم الفلوس جيبوا لي بنت < طالب شاورما الاخو :d
وترفع السماعه ام متعب وتدق على على خوياتها ام سوسن وام طرفه وام زكيه ... الخ
والولد يتسمع وقطع الفرشه من الحياء والوناسه .. مادرى ان الصدمات ماتجي مره وحده
ام متعب كل مادقت حافظه هالشريط ( والله ياام .... ان حنا شارينكم وودنا نناسبكم .. ولدي متعب وش ملحه ووش زينه ( التبن بعين امه عسكريم ) :d وهو متوظف وفي الديره ... ) طووووووط طوووووط وتصرفها ام متعب تقول والله يابوك ذبحنا يامتعب ماسدد الفاتوره وذا الخط دايم يقطع .. وش رايك تقوم تسددها ويقوم وامره لله ويسددها السبيكه لعل وعسى يمشي حاله :p
ومرت الايام ومابقى على الاجازه الا يووووم .. يقوم متعب من النوم وينزل لأمه
هاه يايمه بشري وش صار على الموضوع .. وترد امه بصوت اصبر تحسب الزواج لعبه .. ويعطيها نظرات متعب بمعنى وش تحسين به ؟ .. قالت ياولدي بصارحك مالقينا لك بنت تقبل بك في ذيك الديره كلهن يبن يجلسن عند اهلهن ومالقيت لك الا بنت عرجاء تنفع
تقففففففل اخلاق متعب وقال وش شايفتني .. مافيني علم(ن) خايب عشان اخذ هالعرجاء
لكن الشرهه مهيب عليهم الشرهه عليتس لو مدور خطابه اصرف منتس ( مشكله متعب لاقفلت اخلاقه مايعرف اهله ) :d:d
من قفله الاخلاق والنفس الشينه راح متعب لأقرب مكتب خطوط .. وحجز له على المغرب .. ;)
وسحب على الدوام خذ له اجازه اسبوعين .. وراح فيذاك سربت له كم يوم ورجع متزوج على مغربيه موووزه فيها من الجمال مايزن دير بقراها ماكلفته ابد شي(ن) يسوى
ورجع وباقي 3 ارباع القرض واستثمره في الاسهم :d
ودددددخل على اهله وقال هذي حرمتي رضيتوا ولا مارضيتوا وخلوا قبيلتكم تنفعكم .. وخلوا الخطوط تتشابك وتشربك بعد لانفعني بنت عم ولا نفعني بنت صديقه يايمـّه ..
وترى علماً ياصلكم ويتعداكم ان ماعقلتوا والله لأتزوج سوريه ولبنانيه وسودانيه < الاخيره خشت غلط بس متعب الله يهديه لاتحمس يجيب العيد :p
ورجع متعب لديرته ومعاه الغزال المغربي وكانوا راكبين بالطياره جنب بعض
قال سبحان الله امس كان جنبي طعس واليوم انتي ياقلبي بكره مايندرى مين :o
مايستفاد من هالقصه /
1/ ان موب كل من توظف يصير راتبه سبيل لأهله .. .. خلوه ينبسط براتبه ويوسع صدره
2/ ان البنات غريبين لو خطبها واحد بيروح لكندا قالت ابيه .. بس لوخطبها واحد بيروح لديره وشسمه قالت وووووع مابي لو مااتزوج ابد
3/ الزواج بعد الوظيفه مايمدحونه ابد .. يقولون العب براتبك لين تمل وعقبها يحلها ربك ( هالشئ من واقع تجارب ناس جربت هالشئ )
4/ يقولون البنت اللي شاريتك تخاويك لو بالمريخ .. وانا اقول تمسوا على خير تبي تفتك من اهلها
*
*
*
منقول

**أبو سارة** · 26-02-2010, 10:45 PM

خوي,, يسعد مساك
انا والله متعين بالبادية,, والحمد لله, بعد ماكنت شايل هم الدنيا, اتضح ان في الغربة سبع فوائد فعلا,, لكن مدري وش هي بالضبط.. المهم انها موجودة..

**ღღ 3eo0oney...ღღ** · 26-02-2010, 10:57 PM

ههههههههه

متعب اكلها

بس ياحبيبي يعني مافيه زواج :(

مالها داعي ياخي هالعالم يترززون عندك واذا جيت بتاخذ منهم مسكوك الدايري وكل شوي طالعين لك بمخرج قولوا ماعندنا بنت لزواج ونصرف نفسنا

سجلها مع قصة متعب وسمها قصة تركي :d