زيت هوندا ...

**lonly style** · 09-01-2011, 11:10 AM

سيارتي مبدل ليها زيت وتعرفو طبعا تبديله بسيفون وتبديله بدون سيفون صح ..

المهم انا اخر تبديله كانت بسيفون ...

ماشي على الزيت 4 الاف كيلو رحت البنشري شيكت على الزيت اشوفه ناقص نص علبه ؟؟؟

:(

وش مشكلة زيت هوندا مع العلم بأنني بدلت بترومين الترا 7 بس واحد نصحني قال لي ارجع لزيت هوندا افضل للسياره ..

طبعا اليوم بدلت زيت وسيفون بترومين الترا 7 ( 20w 50 ) مع العلم ان زيت هوندا لزوجته ( 15w 40 ) يعني الزيت الجديد اقوى من ناحية اللزوجه وانشالله ما ينقص مره ثانيه

فيا شباب احذرو لا تطولو على زيت هوندا اكثر من 3 الاف كيلو مع العلم ان مشاويري كلها داخل المدينه وما اسرع نادرا اطلع طرق سريعه

**هاااوي الاكورد** · 09-01-2011, 12:37 PM

وانا لحضت هذي المشكله واغير الزيت كل 3 الاف

**accord7** · 09-01-2011, 02:32 PM

زيت سوبر جي تي فوكس ((يمشيك خمسة الاف)) وبسس

**lonly style** · 09-01-2011, 03:00 PM

انا بدلت بترومين الترا 7 وانشالله يكون افضل من زيت هوندا لان زيت هوندا غير مناسب ابدا مين الي فاضي كل مابين فتره يبدل زيت

**Solidus 2010** · 09-01-2011, 03:48 PM

معقول انا امشي بالسيآرة 5-7 الآف واروح اوديهآ الشركة اغير زيت هنآك !!! كذآ يصر بالسيآرة يعني ولا كيف !؟

**lonly style** · 10-01-2011, 02:45 AM

احسن لك ادا كنت تستخدم زيت هوندا بدله كل 3 او 4 الاف لانه ينقص

**D.H.o.O.o.M** · 10-01-2011, 02:54 AM

الافضل ان نتبع كلام الكتالوج او الوكالة

كل 5000 كم تغير الزيت والفلتر

والتغيير يكون بالوكالة اضمن من الورش والمراكز

بالتوفيق للجميع

**ابوعليان** · 10-01-2011, 05:58 AM

انا سيارتي هوندا اكورد ماشية 98 الف ماشاء الله عليها وكل خمسة الالف ابدل زيت مع سيفون وامسك خطوط ومشاوير طويله ولله الحمد مانقص علي بس اهم شيء ان الواحد مايقوم يدعس بالسياره واجد ولا يحنحن عليها

**المباشر** · 10-01-2011, 06:30 AM

ترى حتى زيت الترا 7 ينقص <<< أسأل مجرب وينقص اكثر من زيت هوندا طبعآ 6 سلندر عندي واخرتها رجعت لزيت هوندا

كم تمشي على الخطوط 140 - 160 ؟

**lonly style** · 10-01-2011, 06:33 AM

على حسب احيانا 120 احيانا 160 احيانا 180 على حسب فضاوة الطريق ...

بس ماتوقع بنقص زي زيت هوندا احسه فاطس قايم قاعد 3 الاف تمشي عليه

**lonly style** · 10-01-2011, 06:52 AM

بس انا قليل ادا طلعت خطوط يعني 4 الاف كيلو 100 كيلو طرق سريعه والباقي داخل المدينه والجو بارد ورجولي مو حاره ع الدعسه يعني حتى لو سرعت اسرع شوي شوي مو مره وحده

**ا ص و 4 0 4 6** · 10-01-2011, 07:02 AM

مشكوووور على النصيحه ويعطيك العافيه والله , , , هذي اول مشاركه لي في المنتدا وانشالله ما تكون الاخيره ,

**المباشر** · 10-01-2011, 07:16 AM

بخصوص زيت هوندا انا عندي ينقص بعد 3500 كيلومتر

جربت زيت موبيل اكس اتش بي نفس لزوجة زيت هوندا وللأسف نقص نص علبة بعد 3 الآف

جربت زيت الترا 7 ونقص بعد 3 الآف

وتوني الشهر الماضي رجعت لزيت هوندا لأني شفته أفضلهم بالنقصان بعد 3500

طبعآ في الخطوط انا والله دايم 160 وحسب البحث السرعه هي سبب النقصان لأن الزيت يحترق اسرع ويصير فيه نقص

طبعآ بعد ساهر الظاهر ان زيت هوندا راح يمشيني 5 الآف بالراحه

وسبحان الله في ناس ماينقص عندهم ماشاء الله تبارك الله على مواترهم

والمشكلة متأكد من ماكينة السيارة وترى لاحظت النقص من أول ماطلعت الموتر من الوكالة ومشيت عليه 1000 وبعدين 5 الآف ولاحظت النقص وقلت يمكن عيب في الماكينة ورجيت الوكالة وفحوصات وغيره وكل شي تمام

اخوي عنده كامري كان يشتكي من النقص وبدل الزيت من زيت تويوتا الى زيت موبيل علبة حديد ذهبيه

ويقول ممتاز وماشاء الله عليه يوميآ يداوم مجموع الروحه والرجعه 140 كيلو والموتر ماشاء الله ماشي فوق الـ 250 الف ومايشتكي من النقص وينصحني فيه لكني مش مقتنع لأنه يعتبر ثقيل شوي على ماكينة الهوندا

**MA6ANSH** · 10-01-2011, 11:07 AM

معقوله تنقص زيت

بس انا دايم اشيك ما القاه ينقص وهو زيت هوندا واغيره كل 5000كم

المباشر متى تشوف العيار اذا السياره بارده ولا حاره عشان اجرب.

**lonly style** · 10-01-2011, 12:22 PM

ايه تنقص زيت خصوصا زيت هوندا انا لاحظت كثير انها تنقص زيت يعني تمشي 4 الاف تلاقيه ناقص نص علبه ...

انا الحين بجرب الترا 7 وبعطيكم النتايج بعد ما امشي عليه 5 الاف كيلو ...

احس حتى الزيوت ومكاين السيارات صارت مضروبه وفيها عيوب وادا فعلا العيب في مكينة هوندا فالواحد ياخد له هونداي احسن له رخيصه حتى لو كان فيها عيوب برضو رخيصه وتستاهل سعرها ومواصفاتها حلوه احسن من تاخد سياره غاليه وبدون مواصفات وتنقص زيت و تصرف فحمات و قطع استهلاكيه وفيها مشاكل في علبة الباور

**النمرود** · 10-01-2011, 01:04 PM

احسن زيت كاسترول الخفيف من شريت السياره وانا عليه
ينقص بعد 4000 وفوق

**الـمـسـافـر** · 10-01-2011, 01:49 PM

الحين بديتوا سب وشتم بمكينه الهوندا

الزيت يمشيك مايقل عن 5000 كيلو بدون مشاكل

بلاش تشككون الناس الموسوسه

**MA6ANSH** · 10-01-2011, 03:24 PM

^^^^^^^^^^^^^^
:d

**lonly style** · 10-01-2011, 05:38 PM

المسافر بس تنقص زيت سيارات واجد تنقص زيت احنا نقول كلام واقعي ؟

**الـمـسـافـر** · 10-01-2011, 11:46 PM

اعرف قروب الرياض كله وبموديلات مختلفه ولا احد يشتكي من النقص

ومن ضمنهم ناس توصل 10 الاف بزيت هوندا وتوصل 20 الف على زيت كاسترول ماجناتيك

**خيال العليا** · 11-01-2011, 03:40 AM

طيب ونقص نص علبة وش المشكلة

أبي أسئلك سؤال

إنت تقول عقب الثلاثة ينقص نص علبة

طيب جرب وكمل لأربعة آلاف يعني زودها ألف وشوف هل فعلا زاد النقص عن نص علبة أو ظل على حاله

أخوي

المشكلة موبالزيت أو بالماكينة

المشكلة فيك إنت لمن تعبي الزيت ماتدري عن المعيار هل هو مظبوط مية بالمية وإلا زائد

**lonly style** · 11-01-2011, 05:17 AM

الحين احنا نشوف المشكله انا شيكت على الزيت وهو مظبوط 100% وغيرت نوع الزيت الى توعيه لزوجتها اعلى ونشوف ...

**المباشر** · 11-01-2011, 07:36 AM

المشاركة الأصلية كتبت بواسطة ma6ansh

معقوله تنقص زيت

بس انا دايم اشيك ما القاه ينقص وهو زيت هوندا واغيره كل 5000كم

المباشر متى تشوف العيار اذا السياره بارده ولا حاره عشان اجرب.

دق سلف طال عمرك وخل الموتر يحمى

بعدين طفه واحسب له 3 دقايق او دقيقتين لكن الصحيح 3 دقايق وشوف العيار

**الأســـيـــر** · 11-01-2011, 09:28 AM

الله يسهل امركم

**بلال العلمي** · 12-01-2011, 11:57 PM

اي سيارة يصير فيها تبخير للزيت وهذا شي طبيعي وموجود في الكتالوج وهذا جزء من التشغيل الطبيعي للسيارة

ونقصان الزيت لا يعتبر شيء شائع في الهوندا ابدا والزيت اللي يتبخر ينقص عن المؤشر شي خفيف وهذا ما يعتبر خطر على السيارة

لابد انها ما تنزل عن المؤشر الثاني وهو المهم للسيارة