استفسار بخصوص بيع الاكورد وشراء سيارة

**MR.MGMG** · 23-05-2011, 03:29 AM

السلام عليكم ورحمة الله وبركاته

كيفكم ياحلوين عساكم طيبين<<يا زين السماجه:o

يا اخوان باذن الله اني مطلق الاكورد بالثلاث<<

عندي استفساريا اخوان اكورد موديل 2006
امريكيه 6 سرندل السياره ماشيه تقريبا حول 85 -89 الف ميل
والسياره لونها مثل اللون الجديد الي نزل على الاكورد 2010<<تقريبا بني محروق
المهم السياره اشتريتها من فتره تقريبا 7 شهور والحين هيا بالسعوديه وانا ادرس بالاردن
السياره مشاء الله نظيفه لاكن يوم اشتريتها المالك الاول لها قال لي على الفحص في ضربه في خلفية السياره بس مهب قويه طبعا الضربه تقريبا وهيا بامريكا من عند صاحبها الاول
وايضا يوجد شطف في الباب الامامي للراكب والخلفي مع العلم انو التصليح ما يكلف 700 بس انا ما ابي اصلحها وانتو عارفين الشريطي ما يصدق وحصل شي مسمكر
حاب اعرف السياره كم تجيب
لاني حصلت لي كابريس رويال بدون فتحه موديل 2007 نظيف
ومافيه اية سمكره والداخليه نظيفه تقول السياره جديده مع العلم انها ماشيه 89الف
والرجال راعني فيها وعطناي الكابريس ب56 الف
مع العلم انو الحين دفعت له عربون2000 ريال الين ما انزل السعوديه

فهل القرار الي سويته صحيح او متسرع مع العلم انو حلمي من يوم اول ثنوي بكابريس:d
من الشكل ابو اسطب طويل

واتمنى ما اكون طولت عليكم:p

**D.H.o.O.o.M** · 23-05-2011, 05:37 AM

ماعندي خلفيه عن وارد لامريكي بصراحه

اما بخصوص الكابريس بصراحه تعجلت الكابريس من موديل 2000 وفوق (استرالي ) عكس المعروف عن الكابريس القديم بالتمام سواء من ناحيه الجوده والعيوب والمشاكل !!والجير!! .. والخ

وانت بتشتري اعلى فئة بالكابريس "الرويال " يعني الله يعينك على قطع الغيار +واسعار الصيانة :d

نصيحتي استخير والله يعوضكـ خير بالعربون

**ن ع ر السعودية 0005** · 23-05-2011, 12:37 PM

أنا مع كلام الأخ دحوم

وأشوف إذا الأكورد ماشية معك في السليم وما فيها مشاكل أنصحك ما تفرط فيها

والكابرس أشوف سعرها غالي شوي والكابرس معروف في مشاكلة وأعرف واحد معه كابرس رويال خبط القير عنده 4 مرات ومعروف قير الكابرس يحتمي ويبغاله مبرد للقير . وهذا الكلام من عده أشخاص ونادر ما تحصل الكابرس إلي يعيش معك فترة طويلة .

لكن أنا أشوف أنك تستخير وتشاور نفسك ولا تأخذ لا على كلامي ولا على كلام الأعضاء شف أنت وش الأنسب لك .

**Solidus 2010** · 23-05-2011, 01:10 PM

أبععععععععععد عن الأمريكي نصيحة لوجه الله , وخصوصآ الكآبرس ... نعم قوي لكن يعدم عليك بعد مدة من الإستخدآم وعن تجربة ,, أخوي كآن عنده كآبرس ss 2001 وبعد سنتين ضرب عليه القير غير عن الخرآبآت كل شوية سير مآكينة الحرآرة ترتفع رجه وقلة حيآ ,,, الله يقدر لك الخير ...

**alkasr777** · 23-05-2011, 01:16 PM

الأكورد ما فيها شيء بس مو مشكله إذا حبيت تغير غير على راحتـكـ

بس ابعد عن الكابرس و الشفر بكبره ما عدا التاهو و الكومارو

و الكابرس قطعها ناااااااااار دبل الأكورد و الجير ولد عمي موضبه 4 مرات :( و خربات و نسيبي

كانت عنده لومينا 2004 والله ان يقول لي اسبوع عندي و اسبوع في الورشه :p و يسب و يلعن فيه و يغير فحماته

بـ 1000 ريال

يقول لي الحمد لله اني بعتها و أخذت أكورد 2009 ;)

**meshoo** · 23-05-2011, 02:39 PM

وعليكم السلام

بعد وشو تستشير يالغلآ حتى لو بغيت تسحب العربون خلاص راح عليك :d

ع العموم مثل ماقالو لك الشباب الكابريس صحيح سياره قويه وشكلها حلو ولكن مشاكلها كثير على المدى البعيد وراح تتعبك

استخير الله وخل سيارتك عندك والله يكتب لك مافيه الخير

**القايله** · 23-05-2011, 02:53 PM

اخوي لاتاخذ الكابرس نهائي

راح تعرف الكلام هذا بزحمة الدايري

بعض اعطال الكابرس راح اذكرها لك طبعا اكثر الكوابرس فيها العطلات هاذي

مثل
مبرد القير داخل الاديتر مايتحمل الحراره لذالك راح ينسم عليك ويخلط الماء مع زيت القير عموما المبرد رخيص تقريبا 100 ريال لاكن تكلفت توضيب القير غاليه لان الماء يخلي الكلتشات تتاكل ويحرق الحساسات

عندك طبليت الاديتر ضعيفه ومليون بالميه راح تكنسر من الحراره وتهرب الماء

عندك الكمبرسر حق المكيف صناعه كوريه راح يخدمك بس مراح يطول وقيمه كذالك مو غاليه تقريبا 860 ريال
على فكره بعد فترت استخدام راح تلاحض ان المكيف مايبرد الا اذا مشت السياره لاكن واقفه ضعيف تبريده لان الكمبروسر يضعف

عندك اذرعت الكابرس يجي لها شي اسمه كراسي سحب تركيبا سهل ورخيص ولاكن قيمة الواحد تقريبا480ريال وانت تحتاج اثنين والمصيبه انه القطع هاذى لازم اصلي لاتنسا الذراع القصير لازم يتغير

نجي للمراوح بعد فتره راح تلاحظ ان الموتر حرارته تتجاوز النص واذا مشيت تنزل وصعب تحصل الحل لاكن الحل ان المراوح يضعف دفعها ولازم تغيرها وقيمتها تقريبا 1090 ريال

قاعدة الانوار الاماميه تتاكل من الحراره وكذالك حرارت الجو وذالك للمواد الرديئه

وفيمت الشمعه مع القاعده كامله 790 ريال الوحده

بنسبه لرويال بعد فتره تلاحظ انك تشغل السياره تشتغل لاكن بعد دقيقه تطفي لازم تعيد البرمجه لمفتاح التشغيل او تغيره بالاسبير

الفحمات دامك صاحب هوندا مراح يختلف عليك شي نفس المده سعرها 500 ريال ونفس استهلاك الهوندا

^^^^^^
(جميع ماذكر راح يصير معك اذا تجاوزت 100 الف كلم)

انا اعلم ان الكابرس فخم وكبير حجمه ومواصفاته رائعه
وعزمه قوي جدآ

لاكن وانا اخوك انت طلبت النصيحه ابعد قد ماتقدر

((انا اتكلم عن تجربه شخصيه واي استفسار انا حاضر))

عموما بقولك شي اركب الكابرس الرويال حق خويك
وخل احد يقدم شوي ويمسك فرامل فجئه راح تلاحظ الكفر الامامي يرجع ورا مع الفرامل هذا معناته كراسي السحب خربانه هذا عيب بجميع الكوابرس

**MR.MGMG** · 23-05-2011, 10:47 PM

الله يعطيكم العاافيه يا اخوان ما قصرتم
لاكن اراد الله ان تتم البيعه لانو صعبه اتنازل عن العربون وقدره 2000<<وهذا المبلغ مهب سهل تقدر تركب بيه مثلا شاشه <<<خخخخ

والي له نيه بالاكورد يراسلني خاااص
تحياتي لكم