السلام عليكم
كيف حال الشباب

عندي افتراح ياشباب ونبغى الادارة توصله بمعرفتها للوكيل عبدالله هاشم
الاقتراح : فتح المجال والسماح ببرمجة الطبلون بميزة مؤشر درجة الحرارة الخارجية وذلك مقابل سعر معقول وصدقوني لو اعلن عنها عبدالله هاشم او بلغ عملاءه فيها راح ينكبون عليه العالم وراح تكون مربحة له خصوصاً ان الموديل 2008 راح تتغير الاكورد يعني المفروض خلاص مايخاف على مبيعات ال V6 ويستغل الفرصة لتلهف الشباب على هذه الميزة خصوصاً لو كانت من الوكالة لان الناس تثق في الوكالة وبكذا راح نكون مستفيدين وراح يكون عبدالله هاشم مستفيد ايضأ وايضاً ابغى اعرف وش ذنبنا اذا كنا مانبغى نشتري V6 ? معقولة نشتري V6 علشان هالميزة ليش ماوفرتوها لنا طيب في ال4 سلندر فل كامل مع ان سعرها وصل حول ال90000 ومع ذلك مافيها هالميزة اللي احسها صارت موجودة حتى بالسياكل .. اتمنى من الادارة ايصال هذا الاقتراح وايضاً ابغى رايكم في الاقتراح ياشباب

اليوم ياشباب رحت للورشة اللي قلت لكم عليها وصرفوني وقالوا تعال بكرة الصبح ورحت للجابري وصرفني وقال تعال بكرة الصبح علشان اقدر افهم السالفة واعلمك وش السالفة
المهم انا ضاق صدري وقلت خلني اروح لواحد من زمان سبق ورحت له وحسيت انه فاهم ورحت له وتبين لي فعلاً انه فاهم صراحة وعلمته السالفة وقال لي ابسويها لك واذا ضبطت خذت منك 400 ريال قلت له مهيب مشكلة بس انت خلها تضبط ومالك الا اللي يرضيك المهم الرجال خذ الطبلونين وبرمج طبلون ال 4 سلندر على طبلون ال V6 واختفى مؤشر الحرارة الخارجية والرجال بعدها تفاءل شوي وقال الحين تطمنت لانه ابسوي العكس وان شاء الله يطلع عندك المؤشر بس خل الزباين يروحون واتفرغ لك .. المهم راحوا الزباين وماقصر الرجال تفرغ لي وسوا العكس برمج طبلون ال V6 على طبلوني المهم طلعت درجة الحرارة الخارجية بس صار فيه مشكلة نكدت الموضوع كله :( والمشكلة طال عمركم ان لمبة ال ABS استمرت معلقة وبرضو الرجال قال لي اصبر خلني اسوي مقارنات بين البرمجة حقت ال V6 وال4 سلندر وجلس الرجال يسوي ويلخبط وصراحة انا كنت عنده وماشاء الله عليه انسان فاهم بس انا كان يتقطع قلبي لانه لازم اذا بغى يبرمج يشيل ال IC من مكانه ويركبه على جهاز ويبرمجه والسالفة صعبة وفيها قلق صراحة .. المهم حاول الرجال منا ومنا وسوا تعديل للبرمجة وكل ماضبط شي خرب شي ثاني يوم ضبط مؤشر الحرارة الخارجية ولعت ال ABS واذا طفت لمبة ال ABS طفى معها مؤشر الحرارة الخارجية المهم الرجال قال لي حاولنا فيها ماراح تضبط معك الا اذا استغنيت عن لمبة ال ABS لكن ماراح تدري لو خرب عليك ال ABS الا اذا فحصت كمبيوتر يعني اللمبة بيشيلها وبيخلي مؤشر الحرارة الخارجية طالع بس انا قلت له كانه ماراح يضبط الا بهالوضع مايحتاج انا ابغى كل شي اوكي .. المهم ابعطيكم الاستنتاجات والاقتراحات وانسب الحلول وان شاء الله تفيدكم

خلاصة الموضوع :
1- بامكانك تشغيل مؤشر الحرارة الخارجية ولكن ستظل لمبة ال ABS معلقة عندك وبامكانك فصلها لكن ماراح تعرف اذا خرب عليك ال ABS وطبعاً لازم تدبر لك طبلون V6 لانه هو الوحيد في السعودية اللي موجود فيه المؤشر ومبرمج جاهز علشان ينقل لك البيانات منه والافضل يكون نفس الموديل لان احتمال لو نفس الموديل ماراح تجيك المشكلة لاني انا استخدمت طبلون V6 موديل 2003 اللي ركبه ن ك د وحط الصور في الموضوع وطبلون سيارتي 2005 فيمكن هذا سبب مشكلة تعليق ال ABS او ان المشكلة لان برمجة الV6 بشكل عام تختلف عن برمجة ال4 سلندر ولذلك تظهر المشكلة
2- يوجد حل ممتاز وبسيط جداً وهذا الظاهر الحل اللي ابتوجه له وهو : شراء طبلون الاكورد EX-L ال4 سلندر من كندا لان كندا يتعاملون بالكيلو والمئوي مثلنا يعني وتسليكاته موجودة عندي وهي نفس اللي عندنا الا بشي بسيط وهو ال DRL وهذي خاصية مو موجودة عندنا ومعناها حتى لو ولعت اللمبة عادي نشيل اللمبة وحنا مرتاحين مو مثل سالفة ال ABS والظاهر بعد فيه مؤشر حق موية المساحات وهذا ايضاً مو عندنا وايضاً عادي لو تشيل اللمبة وبكذا يكون عندك طبلون مبرمج من المصنع وكل اللي عليك انك تشيل اللمبات اللي مالها وظيفة في الاكورد السعودية وتقدر تخليها منظر بعد اذا ولعت عليك بس بتواجه مشكلة ان الطبلون راح يكون اصفار يعني سيارتك كنها توها طالعة من المصنع وهذي تقدر تعدلها عند الوكالة او عند المحل اللي رحت له انا بس انا لاحظت ان المحل يفك ال IC والسالفة تعور القلب خصوصاً اذا كان موترك جديد وماتبغى تلعب فيه لذلك مالك الا الوكالة تضبط لك الكيلوات بس وش الخوف انهم يكشفونك ويمكن يروح ضمان ولا شي .. انا منيب مسؤول وايضاً تخاف انهم يبرمجونها على برمجة الاكورد الفل كامل 4 سلندر اللي عندنا وكذا راح يروح عليك المؤشر :( فما ادري وش رايكم ؟
3- تدور لك طبلون V6 في التشليح او تطلب لك واحد جديد من الوكالة ولازم يكون نفس الموديل وتركبه وتفصل اللمبات حقت ال ABS و ال TCS لكن ماراح تعرف اذا خرب عليك ال ABS الا بفحص كمبيوتر لانك راح تكون فاصل اللمبة وحتى لو كانت شغالة ماراح تعرف لانها معلقة
4- تدبر لك واسطة في الوكالة ويسوون لك برمجة لطبلونك هذا في حال توفر برمجة فيها مؤشر الحرارة الخارجية عند الوكالة مع اني مااظن راح يكون عندهم لان ماعندهم برمجة فيها المؤشر الا للاكورد الV6 وحتى لو كان عندهم مااتوقع راح يضبطونها لك الا بواسطة ولا تشوف لك اكورد V6وتركب طبلونك عليها وتقول للوكالة ان سيارتي V6 وكانت تطلع بس انها راحت فجأة !! .. او تشوف لك حركة او حيلة معينة

هذي ملاحظاتي ولاحظت ان اغلب الحلول فيها تضحيات لكن ارى من وجهة نظري ان انسب حل هو طلب طبلون الاكورد EX-L ال4 سلندر الكندية يعني طبلون كندي .. هذا الحل برأيي هو انسب حل .. بانتظار اراء الشباب

اسف على الاطالة
تحياتي وتقديري للجميع