ياشباب اخيراً قابلت مدير صيانة هوندا (خريص) وسلمته الخطاب وتكلمنا انا وياه عن موضوع مؤشر درجة الحرارة الخارجية والرجال ماقصر تجاوب معي وقرأ الخطاب ورحنا لمكتبه فوق الصيانة وشربت الشاهي عنده ونادى واحد يشتغل في الصيانة وهو المسؤول عن حقين الصيانة كلهم وشرح له السالفة وانا خشيت معه وشرحتها وخذ مني موديل سيارتي ونوعها وفئتها وراح له ربع ساعة ورجع ومعه الخبر اللي كلنا عارفينه وهو ان الطبلون يختلف وبالذات في الجزء اللي تظهر فيه القراءة (شاشة العدادات) وان كل شي موصل فعلاً لكن الطبلون مايشغلها وقلت له وش اقتراحك قال : اشتر لك سيارة غير الهوندا يقولها يمزح طبعاً المهم قلت له والحل قال لي عطني وقت خلني اجرب على راحتي لان ماعندي وقت فراغ اجرب فيه واركز فيه لذلك عطني وقت وراح ارد لك خبر ورجع لشغله وكملت السواليف مع مدير الصيانة وقال لي بعد هو انا راح احاول فيها بنفسي بس خل يجي لنا وقت فراغ وتخف الزحمة والشغل وبنحاول نشوف اذا فيه امل .. وايضاً قال حطوا اعلان عن الفحص المجاني موعده متى وعطاني الموعد وماقصر اخوي Honda حط موضوع بموعد الفحص المجاني واتمنى يكون مدير الصيانة شافه لانه يقول ابغى ادخل الموقع واشوفه .. هذه اخر التطورات اللي حبيت ابلغكم فيها
وايضاً نسيت اقول لكم اني مريت القطع ويقول نفس الرقم طبلون ال V6 وطبلون ال 4 سلندر .. المهم قلت لهم هل اقدر اطلب طبلون كندي عن طريقكم وقال لي كلم مدير قطع الغيار .. بس للاسف انه مسافر لجدة وبيرجع بعد يومين .. وابحاول امره واشوف اذا يقدر يطلب لنا من كندا منا ولا منا .. او نوصي تركي التركي يجيب لنا لو على الاقل واحد من التشليح الكندي .. لاتكون تمزح ياتركي تراني مصدق .. وايضاً ماانسى اشكر الاخ تركي التركي اللي جاب لي رقم مدير الصيانة ودلني عليه وكتب صيغة الخطاب لي .. مشكور اخوي تركي والله يعطيك العافية

تحياتي وتقديري للجميع