الموضوع: عندي مشكلة في الأكورد 2007 ارجو منكم المساعدة

أولا مرحبا بك يانظرة عناد في منتداك وان شاء الله تستمر معنا بفعاليه أكثر في الأيام الجايه ..

اما الصوت الي تسمعه أنت ان كان مثل ماتقول ( طق ) لما تمسك بريك ويطلع مره وحده واحيانا ما يطلع وأحيانا يطلع لما تهدي شوي وتلف بالسياره يمين أو يسار .. فهذي مشكله صحيح انها مقلقه ومزعجه لكن بسييييييطه جدا ..

وأنا الآن أحضر تقرير بخصوص هالمشكله وان شاء الله خلال الأيام القريبه راح أنزله ..

لكن باختصار عشان تكون بالصوره .. روح للوكاله ( طبعا السياره على الضمان ) وقول لهم عن المشكله .. هم في الغالب راح يعرفونها من وصفك لها .. لكن ان ماعرفوا في البدايه أو أنك بغيت تنهي السالفه بلا وجع راس او بغيت تروح ورشه غير الوكاله .. فقلهم يفكون القماشات أولا ..ويفصلون القماش نفسه عن الحدايد الي تمسكه .. هي حديدتين صغيرتين تمسك القماش من الأطراف .. هذي هي الي تسبب المشكله ..!!

طيب والحل ؟

أولا المشكله عباره عن فراغ بسييييييط يكون بين الحديدتين والقماش .. فمعناه أن الحل يكون في سد الفراغ .. طيب كيف ممكن نسده ؟

تعرف الشداد الي يشدون فيه كارتون البرتقال مثلا ؟ يجي مثل السير وبلاستيك طبعا لكن خشن .. هذا هو الحل .. والوكاله تستخدمه لعلاج هالمشكله .. يجي مقصوص بأحجام صغيره جدا على حجم كل حديده .. يعني مجموع القطع 4 لأن كل قماش فيه حديدتين ..

وتوضع كل قطعة بلاستيك على كل حديده .. يعني بمعنى ثانيتوضع القطعه بين الحديده والقماش لسد الفراغ وكذا ان شاء الله تنحل المشكله ..

طبعا كلامي كله عشان لوبغيت تصلحها برى الوكاله لكن لو تصلحها بالوكاله راح يعرفون كل شي بنفسهم وفرصه لك انهم ينظفون القماشات مره وحده ..

أتمنى اكون خدمتك بالشغله هذي ان شاء الله