افضل محل قزاز

**عبدالله عبدالعزيز** · 10-09-2008, 03:37 PM

السلام عليكم ،،
انا دايماً كنت متابع للمنتدى ولكني ما أشارك فيه كثير ، واستفدت منه كثير للأمـــانة ، والله يجزى كل الاعضاء فيه خير

واليوم الصباح طلعت ابروح لدوام ولقيت قزازة سيارتي منكسرة ( الله لا يوفق الي كسرها ، ويجعل يدينه لشلل قولوا امين ) وحايسها يدور شي يسرقه بس ما لقى شي عشان كذا كتبت هالموضوع

سؤالي وتكفون ابي جواب بشكل عاجل ، وين اركب قزازة جديدة فيه ، هل أروح للوكالة ، ولا فيه محلات ممكن اعتمد عليها بعد الله وترجعها زي ما كانت ، وكم السعر تقريباً حقها .
انا بالرياض وسيارتي اكورد 2006م

**اتــشـــــ** · 10-09-2008, 04:10 PM

يمدحون السالم اللي بالصناعية القديمة
لو تبي قزاز هلكوبتر بتحصله عنده :d

**الاخطبوط** · 10-09-2008, 04:10 PM

ابومتعب معنا بالمنتدى :d

انا اشوف الوكالة افضل لكن بكل سهولة ممكن يقولك السيارة تقعد عندهم يومين

او ممكن تمر السالم للزجاج بالصناعية القديمة لكن اسأل عن سعر القزاز بالوكالة الاول

على فكره سؤال مهم

اي قزازه اللي انكسرت وبأي مدينة موجود؟؟

**عبدالله عبدالعزيز** · 10-09-2008, 06:59 PM

يعني السالم شغلهم زين ؟ قد جربتهم اتشو قصدي اتش :d؟

اللي انكسرت قزازة السواق والسيارة اكورد 2006 والمدينة الرياض اخوي الاخطبوط ورقم فنيلتي 12 :d

**hmh023** · 11-09-2008, 12:58 AM

حبيت اسئلك
لما انكسر القزاز اشتغل الانذار

**لو بكيت** · 11-09-2008, 01:44 AM

المشاركة الأصلية كتبت بواسطة عبدالله عبدالعزيز

يعني السالم شغلهم زين ؟ قد جربتهم اتشو قصدي اتش :d؟

اللي انكسرت قزازة السواق والسيارة اكورد 2006 والمدينة الرياض اخوي الاخطبوط ورقم فنيلتي 12 :d

بالنسبـة للفانيلـة ( دروش ) والا ( الاصيـل )

**عبدالله عبدالعزيز** · 11-09-2008, 02:05 AM

اخوي hmh023
لا ما اشتغل الانذار للأسف
والانذار ما اذكر اني سمعته الا مرة واحدة ، مرة كانوا حرمية يسرقون الكفرات حقتي وسمعت اصواتهم وفتحت الشباك اشوف وش هالاصوات ، خافوا وجروا العفريته بسرعة وطاحت السيارة على الارض ، بعدين اشتغل الانذار :(

----------------

اخوي لو بكيت
نوعها علاق قطنية :d لك نظر تشتري

**عبدالله عبدالعزيز** · 11-09-2008, 02:37 AM

ابشركم تم تركيت القزازة ، والحمد لله رب العالمين
وللفــــايدة ابقولكم المعلومات هاذي عن تركيب القزازة حفت السواق في الوكالة :
اولاً : سعرها بعد الخصم 756 ريال .
ثانياً : شغل يدهم 250 ريال
ثالثاً : تستلمها بعد يوم .
رابعاً : القزازة خلصت من الوكالة ومافيه ، واللي يبي لازم يحجز

في الورش البرانية :
اولاً : سعرها 600 ريال إلى 650 ريال
ثانياً : شغل اليد من 100 إلى 150 ريال
ثالثاً : تستلمها في نفس اليوم .
وانا انصح بالوكالة صراحة لانها اضمن شغل والقزازة بكرة ما تسوي لك مشاكل .

الغريب في الامر اني يوم رحت للوكالة جو بعدي حوالي 8 أشخاص يسألون عن نفس القزازة وكلهم ساكنين في السويدي والبديعة :d فانتبهوا يا اللي ساكنين في هالمناطق . واقترح ان الوكالة تعطي هالحرامي الله لا يوفقه نسبه على الراس :d، اليوم سرا على تصليح القزاز والله ولا هم ملحقين .