السلام عليكم ..

صار لي فترة ابي اركب كشافات للاكورد , عموما ...

رحت سألت الوكالة عن السعر قالو ب 1042 ريال ...
رحت الصيانة سألت عن التركيب قالو لي ب 350 ريال صراحة انصدمت منها لاني قد قرأت ان التركيب مايحتاج شي .. وحسيت السالفة فيها نصبة .. غير كذا قالو لي السيارة تخلص بعد يومين ...

عموما رحت الاسبوع الماضي وشريت الكشافات ب 886 ريال مع الخصم ( خصم موظف في الصيانة :d ) .. وافتح كتيب الارشادات والقاة شي بسيط ..

رجعت البيت .. وسدحت لي فرشة قلت الا اركبها ... وفعلا فتحت الاغطية السفلية ..
وركبت الكشافات ... أسلاك الكشافات متوصلة جاهزة اللهم اشبكها ..

ومن داخل اجي افتح الدركسون , واغير عصا الاشارة , برضة نفس الشي مجرد فكها وركب الثانية مكانها وبس ... وارجع اركب الدركسون ..

التركيب ماأخذ مني 30 دقيقة وسهل جدا . واشتغلت الكشافات عال العال ... وطلعت لي علامتها في الطبلون .. يعني متوصلة بالظفيرة جاهزة .

عموما حبيت اعلمكم عن هالشي للي يبي يركب ان التركيب سهل جدا , بس فك وركب ولا يحتاج تغيير او تجريح اي اسلاك , حتى لو انت ماتعرف ومالك خلق تركب اي كهربائي ممكن يركبها لك بسعر مااعتقد يعدي 50 او 100 ريال ... لان تركيب التجارية اصعب منها .. وبكذا توفر سعر التركيب الغير منطقي بالوكالة في جيبك ...

ولكم تحياتي ..