الموضوع: تركيب ازرار التحكم بالصوت من الدركسون ( شرح مصور )

السلام عليكم و رحمة الله و بركاته

هذا الموضوع اللي وعدتكم بتفاصيل تركيب ازرار التحكم بالمسجل من الدركسون

القطع المطلوبة

1- ازرار التحكم :
تجي ازرار مثبت السرعه و ازرار الصوت مدمجه بفيش واحد
تطلبها من الوكاله برقم القطعه
35880-SDB-A01ZA
السعر : 380 ريال .

2- فيش مسجل اكورد مع اسلاكه :
تحتاج الفيش عشان تأخذ منه اسلاك مع دبابيسها ( pins )
تستخدمها لشبك الاسلاك الممدوده بفيش مسجل سيارتك
الفيش موجود بمنتصف الطبلون بمكان المسجل و هو الوحيد بهذا المكان اللي لونه ازرق سماوي
و عشان تتأكد زياده عدد فتحاته 20 فتحه .
السعر : متفاوت لكن انا اخذته من التشليح بـ 50 ريال .

3- اسلاك عاديه :
تستخدمها لتطويل الاسلاك اللي بتمدها .
و تحتاج سلكين فقط طول الواحد على الاقل 40 سم .
تقدر تاخذها من التشليح او من اي محل تصليح الكترونيات .

التركيب

التركيب جزئين :
تركيب الازرار .
و تمديد الاسلاك .

1- تركيب الازرار :
ما انصح اي واحد انه يركبها بنفسه لانها تحتاج لفك الايرباق و هذي يحتاج لها خبير .
بالنسبه للاعضاء بالرياض انا بحثت و سألت و لقيت انه الافضل هو تركيبها
عند محلات التخشيب في الغرابي زي المتميز و الابداع ....
اول شي لان سعر التركيب عندهم مناسب و الشي الثاني ان عندهم خبره بهالشي
من كثر ما يفكون الدركسونات للتخشيب .
انا ركبتها عند المتميز و بسعر 50 ريال بس .
اما الورش ارخص سعر حصلته للتركيب 200 ريال و فوق كذا انهم ما قد فكوا ايرباق اكورد .

2 - تمديد الاسلاك :
اول شي انت تحتاج سلكين من الدركسون للمسجل .
كل سلك يحتوي على :
أ - سلك مع دبوسه مستخرج من فيش ازرار مثبت السرعه القديمه .
و هذا السلك ينشبك بفيش الدركسون الخلفي ( تحت غطاء عمود الدركسون )

ب- سلك التطويل اللي تكلمنا عنه قبل شوي .
هذا السلك يربط بين السلكين أ و ج .. و طوله على الاقل 40 سم .

ج- سلك مع دبوسه مستخرج من فيش المسجل المأخوذ من التشليح .
و هذا السلك ينشبك في بفيش المسجل .
ملاحظه :
فيش المسجل يحتوي على نوعين من الدبابيس :
1- دبابيس كبيره :في الفتحات اللي على الاطراف و عددها 8 .
في الفتحات 1 و 2 و 9 و 10 و 11 و 12 و 19 و 20 .
2- دبابيس صغيره :في الفتحات الوسطى و عددها 12 .
في الفتحات 3 الى 8 و 13 الى 18 .

(الاحمر = دبوس كبير ، الازرق = دبوس صغير )

انت تحتاج سلكين منه .. واحد بدبوس صغير ( لشبكه بالفتحه 3 ).
و الثاني بدبوس كبير ( لشبكه بالفتحه 11 ).

تجهيز الاسلاك :
اول شي خذ سلك مع دبوسه من اسلاك مثبت السرعه القديم
اشبكه بسلك من اسلاك التطويل
و اشبك الطرف الثاني لسلك التطويل بسلك من فيش المسجل دبوسه صغير .
لحم اماكن التقاء الاسلاك و اذا ما عندك لحام ما يحتاج .
السلك الثاني نفس الشي لكن الاختلاف بالاخير ان الدبوس يكون كبير .
اخيرا كل سلك لازم يكون طوله 50 - 60 سم على الاقل.

تركيب الاسلاك :
انت بتمد الاسلاك من فيش الدركسون الخلفي الى فيش المسجل .
من الفتحه 11 بفيش الدركسون الى الفتحه 11 بفيش المسجل ( دبوس كبير )
من الفتحه 12 بفيش الدركسون الى الفتحه 3 بفيش المسجل ( دبوس صغير )

فيش الدركسون فيش المسجل
11 --------------> 11 ( دبوس كبير )
12 --------------> 3 ( دبوس صغير )

هذا فيش الدركسون

و هذا فيش المسجل

قبل ما تبدا بالتركيب يا ليت تجيب ورقه و قلم و تسجل اطراف كل
سلك عشان ما تتلخبط وقت التركيب و تجيب العيد

مثال :
السلك الاول طرف فيش المسجل فيه دبوس كبير و الطرف الثاني لون السلك اصفر .
و السلك الثاني طرف فيش المسجل فيه دبوس صغير و الطرف الثاني لون السلك احمر .
بعدين بعد ما تسجل شكل الاسلاك سجل الفتحات اللي بتركب الاسلاك فيها :

السلك الاول طرف فيش المسجل فيه دبوس كبير و الطرف الثاني لون السلك اصفر .
11 11

و السلك الثاني طرف فيش المسجل فيه دبوس صغير و الطرف الثاني لون السلك احمر .
3 12

و اللي ما فهم طريقة تحديد الفتحات هذا الشرح :
السلك الاول طرفه فيه دبوس كبير >>>> لازم يركب في الفتحه 11 في فيش المسجل
و طرفه الثاني >>>> يركب في الفتحه 11 في فيش الدركسون الخلفي .
السلك الثاني طرفه فيه دبوس صغير >>>> لازم يركب في الفتحه 3 في فيش المسجل
و طرفه الثاني >>>> يركب في الفتحه 12 في فيش الدرسون الخلفي .

التركيب :
1- افصل السلك السالب للبطاريه .
2- فك الغطاء العلوي لعمود الدركسون بالضغط على اطرافه و سحبه لاعلى .
3- فك المسجل . راجع شرح الاخ NEO FOX لفك المسجل و افصل الافياش اللي بالخلف.
ثم افصل فيش الدركسون الخلفي بالضغط عليه من اعلى و سحبه .
لاحظ انه فيه على الفيش اغطية امان لتثبيت الاسلاك مع الجهتين .
فك الغطاء في الجهه اللي بتركب فيها الاسلاك فقط .
ركب الدبابيس في اماكنها .. و تأكد من الاماكن و الوان الاسلاك من الورقه اللي سجلتها .

الحين باقي الاطراف الثانيه عند فيش المسجل
فك غطاء الامان من الجهتين ( لان الفتحه 3 و الفتحه 11 كل وحده بجهه ) .
ركب الدبوس الكبير في الفتحه 11 .
و الدبوس الصغير في الفتحه 3 .

و الحمد لله انتهيت من الشغل

الحين اشبك افياش المسجل و المكيف و ركب سلك البطاريه
ثم شغل السياره و تأكد من ان الازرار شغاله
ثم ركب كل شي بمكانه و الف مبروك عليك تركيب الازرار .

اذا ما اشتغلت الازرار فعندك خطأ بالتركيب ارجع و تأكد من كل شي .

و اخيرا هذا جهد شخصي و انا لست مسؤول عن اي ضرر لسيارتك بسبب الخطأ في التركيب .

و عذرا على الاطاله و التفاصيل الزايده .

جميع الحقوق محفوظه و يمنع نقل الموضوع