السلام عليكم ورحمة الله وبركاته . . . .
والله فشلة أول مشاركة في المنتدى وتكون طلب :o
بس الله يجزاكم خير أخوكم في مشكلة دوختني مرررررة . . .
هذا ياطويلين العمر عندي هوندا أكورد 2002 4 سلندر
كنت طالع من الشرقية ماسك خط الرياض في الليل... ليلة الأحد (بعد الاجازة على طوووول) . . .
المهم يوم باقي 195 كيلو على الرياض (يعني في نص الخط)
الا وأنتبه الى مؤشر الحرارة وهو طاااق H. . . انا يوم شفت هالمنظر طاح قلبي عند دوسة البريك . . . وقفت على جنب وقبل لا أطفي السيارة الا وتقوم ترج كأنها خروف العيد و راح ينذبح ألحين
. . . المهم طفيت السيارة فتحت الكبوت أشيك على الدنيا ويش صار فيها . . .
المهم كان فيلم هندي وأنا على الخط . . . وعلى ما جبت سطحة وشلتها وثاني يوم وديتها للورشة ... صارت سوالف وانقلبت السالفة و وصارت مسلسل مكسيكي . . .
المهم ثاني يوم وديتها الى الميكانيكي الي أتعامل معاه في الصناعية القديمة . . . ورشة (الدوسري) إذا تعرفونها . . .
هي مرررة قريبة من ميزان العضيب . .. حولها . . .
المهم يوم شافها الميكانيكي ... اسمه غضنفر . . . ومعاك كهربائي اسمه محمد آصف . . .المهم غضنفر شاف ان راس الراديتر انكسر وقام يتسرب البخار والماي والذي منووو من هالكسر . .
المهم جيت بأغير الراديتر ... قالي الميكانيكي : جيب راديتر اماراتي . . . يقول انه مركبه لناس واجد و ما أحد اشتكى منه . . .
رحت أسأل على هالراديتر الاماراتي ماحد عنده . . . ودوخوني المحلات كلها . . . واحد يقولك التايواني أفضل حاجة . . .واحد يقولك الصيني أفضل حاجة . . . ويرجع واحد يقولك انه التايواني ما تقدر تفرق بينه وبين راديتر الوكالة . . .
و واحد يقولك وكله ثقة: ترى أي راديتر تشوف مكتوب عليه Made In Taiwan ما عليك منه ترى كلام فاضي وكل الراديترات الي في السوق كلها صيني ؟؟!!!
المهم وأنا ما بغيت أجيب وكالة والي سعره تقريبا 1600 ريال
(شكلها قدّامي صرفياااات جااامدة). . . المهم ما ليكم بطولت السيرة . . .
خلصنا مشكلة الراديتر قال الميكانيكي : بغير راس الراديتر وباسوي له تصييخ وما أدري وشو وراح يصير مضبوط . . . المهم أنا بصراحة ما همني الراديتر ألحين . . . ممكن أشوف له حل أفضل بعدين حتى لو غيرته . . . بس المشكلة الآن وهي الي راح تشيب راسي
بعد ما ركب الراديتر وشيك على الحرارة والذي منو . . .اكتشف إن راس الماكينة تعبان . . . فقال :
أنا راح أفكه وأشوف اذا (البستن) مو تعبان راح أخرط الراس وأنظفه ويمشي معاك تمام.. .والا إذا كان (البستن) تعبان مالك حل غير انك تغير الماكينة . . .
قلته طيب شوف واعطيني خبر . . .
بعدين رد عليي وقال : انا شفت (البستن) وهو ترى تعبان شوي . . . يقول فيه فضاوة . .. فإذا باركب لك الراس . . . انت وحظك . . .
ممكن يمشي معاك شهر . .. ممكن ست شهور . .. ممكن سنة
انت وحظك . . . والا غير هذا مالك غير إنك تغير الماكينة . . . .
فالآن المشكلة يا إخوان اني محتار . . . المشكلة السيارة خلالالالاص تعبت من الصرف عليها . . . وانا باقي عليّ شهر وشوي وأخلص من الدراسة في الرياض وراح أشتري لي سيارة ثانية .. . ما أدري ويش الحل . . .
أركب عليها مكينة مستعملة؟؟؟
ولا امشي براس المكينة و (البستن) الي فيه شوي فضاوة على قولته؟؟ لين ما أخلص هالترم وأبيعها بعدين تشليح؟؟
ولا إيش الحل بالضبط مش عارف . . .:(
فأرجو فزعتكم يا شباب (محبي الهوندا):(
رد مع اقتباس
مواقع النشر (المفضلة)