الموضوع: مشكلة في الدودة

السلام عليكم...

اخوي العزيز.... لازم ترجع للمكان اللي صلحتها فيه ..بما انك ما مشيت عليها كثير... انت صااااحب حق

رح ها الويك اند وشف وش يصير ولا تدفع ولا قرش زياده ...انتبه

اخوي دام ان الوكاله قالو الاصلاح ماينفع اكيد ان في مشكله تانيه غير الي سواها مهندس الصناعيه و انا نصيحتي انك تاخدها من التشليح مثل ماقال الاخ كوكو كورد و تريح بالك بس لاتنسي الظمان اقل شيء اسبوع

مشكورين اخواني على مروركم الكريم
انا اليوم شيكت على الزيت وحصلته تمام ما نقص شي
وشيكت عليها من تحت حصلت اثار زيت مع انه لها الحين تقريباً 10 ايام من وقت ما طلعتها من الورشة كلمت الميكانيكي وقال لي اسوي لها غسيل بستم من تحت واجيبها له عشان يشيك عليها مضبوط
بكرة ان شاء الله بطلع له واشوف ويش يصير
الله يكتب اللي فيه الخير

طلعنا للورشة وشيكنا عليها الحمد لله ما طلع فيه تهريب وصارت السيارة تمام
بعد شهر بالضبط تغيرت علي السيارة صارت الطارة مرة تصير ثقييله شوي لمى احاول الف الدريكسون
رجعت للورشة نفسها قال لي ان المشكلة من طرمبة الزيت انها مع الحرارة يضعف الدفع فيها عشان كذا يصير الدريكسون ثقيل رحت وشريت طرمبة جديدة بس مو اصلية وضبطت السيارة طلعت منهم الظهر بعد العشاء وانا طالع لي مشوار رجعت نفس المشكلة صار الدريكسون يثقل شوي ويرجع يصير طبيعي
والله من جد احترت ما ادري وش اسوي
الطرمبة اخذت عليها ضمان شهر ولسى ما كملت يوم معاي مع العلم انها صينيه الصنع وسعرها 700 ريال مع ضمان شهر
الاصلية سعرها 1850 ريال
ما ادري المشكلة تكون من الطرمبه ولا فيه مشكلة في الدودة نفسها

حدد موقعك لأن ماراح يفيدك الا ميكانيكي يشوف الموتر على الطبيعة ونعطيك كم ورشة شغلهم تمام افضل لك

ولو انك ماخذ لك شي اصلي اريح لك يعني الحين انت اخذت القطعة ب 700 ريال غير سعر التركيب ولو بعد كم شهر اختربت مثلآ راح تاخذ مثلها او تضطر انك تاخذ اصلي وعليك الحسبة كم

لو ماخذ الأصلي من البداية كان ريحت نفسك من هالمشاكل والروحات والجيات

انا من سكان مدينة الرياض
يا ليت احد يفيدني لإني من جد تعبت مع هالمشكلة

فيه ورش بأم الحمام تخصص هوندا مر عليهم

انا معي 2004
ويطلع صوووت مع لفت الدركسون

وفيه ورشه في الصناعية القديمة
اسمها (( الجنوب ))
بعد ما تتعدى اشارة السالم للزجاج وانت جاي من الخرج
يجيك كبري مشاة بعده لفه يمين ادخل معها وتجيك الورشه ع اليسار

انا اقولك الحل لان صار معي نفس المشكله رح محلات قطع الغيار واذا تبي نصيحتي انا مااشتري الا من محل في الشفا اسمه بدر البدر وانت ع راحتك بس رخيص ونا ارتحت له والله شباب الشفا عنده

اشتر اصلاح الدودة وركبة ويضبط معك

المشاركة الأصلية كتبت بواسطة hu1981ss

اللي يقدر يساعدني اكون له من الشاكرين

المشكلة كالتالي
اكتشفت انه عندي تهريب زيت خفيف في دودة الدركسون في السيارة وهي اكورد 2005
مو تهريب كبير يكاد لا يذكر يعني يمكن كل شهر الزيت ينقص نص علبة او اقل
مريت الوكالة قالوا لي انها ما تتصلح لأنو لو غيرت لها أصلاح التهريب يرجع نفسه بعد فترة فلازم تتغير الدودة كاملة وسعرها يكلف اكثر من 3000
طلعت منهم ومريت على الصناعية وحصلت مركز هيدروليك متخصص في الدودة ومشاكلها
طلبوا مني اجيب لهم اقطعة صلاح دودة وعلبة زيت اصلية كلفتني تقريباُ كلها 300 ريال ومن الوكالة
والتركيب خذوا علي 200 ولمى طلعت منهم بعد كم يوم حصلت نفس المشكلة التهريب مثل ما هو
السيارة ما فيها مشاكل لا صوت ولا شي ثاني اللهم تغيرت عندي وزنية الطارة وصار فيها حذفه على اليسار

فــا ما ادري وش رأيكم يا اخوان

نفس المشكلة اللي صارت عندي قبل أيام .

رحت للوكالة فرع ...( خارج الرياض ) وقال لي المهندس المشكلة في الدودة وممكن اصلاحها ، ولازم تصلحها بأسرع وقت .

وأمس رحت للوكلة فرع خريص ، وقال لي المهندس المشكلة في الدودة ولازم تتغير وماينفع الإصلاح ؛ لأنه إذا صلحتها راح ترجع نفس المشكلة . وتغير الدودة راح يكلفك 4000 ريال وكسور وإذا إنت فحصتها عندنا فحص مجاني ( أيام الفحص المجاني ) راح تكلفك 3000 ريال وكسور ( يعطون خصم للي يفحص مجاني عندهم ) وبعد ماشيك عليها سألته : هل استعجل وأغيرها أو أصبر عليها ؟ قال لي : ممكن تصبر وتابع الزيت إذا نقص زيده .

شفتوا تناقض المهندسين ؟!
واحد يقول صلحها والثاني يقول غيرها ؟!!
الأول يقول صلحها بأسرع وقت والثاني يقول عادي أصبر عليها !!!

المشاركة الأصلية كتبت بواسطة كوكو كورد

^^ غريبة مشكلتك ^^

قبل اسبوعين سويت نفس الشي .. شريت القطع بحدود 300 وشغل اليد 300 وللحين ماشية معي تمام ولا اي تهريب ..

المحل اللي صلحت فية عطاك ضمان على شغلة ؟ هل هو خبير في الاصلاح ولا من جنبها ؟؟

سعرها في الوكالة على ما اذكر 4700 ريال

سعرها بالتشليح من 600 الى 800 ريال واحرص لما تاذها تاخذ ضمان اسبوعين اقل شي حق التجربة لا يصير فيها نفس المشكلة .

أخي الكريم كوكو كورد ..

الله لايهينك دلنا على هالورشة ..
وكم قطعة تحتاج الدودة لاصلاها ؟

وشكرا ً لك

أنا على وقت الفحص المجاني قالي المهندس عندك تهريب في الدودة وتحتاج إصلاح وشفت الموتر من تحت ولاحضت إنه فيه تهريب بسيط وإلى يومكم وأنا ساحب عليها ما توقعت إن لها أهمية لاكن الله يستر بس راح أشوف وش علتها حتى ما أبلش بعدين .....

انا والله نفس المشكله سيارتي 2004 عندي الدودوة وربي 4000 ريال غاليه مرة

قلت له في مشكله لو خليتها قال مافي شي بس الزيت يهرب

وربي صار الشارع اللي قدام بيتنا كله نقط من الزيت من سيارتي كل ماارجع رويس واشوفها انقهر

وانا المشكله في تبوك ومااعرف ورش زينه اخاف يخربوها لي :(

المشاركة الأصلية كتبت بواسطة كوكو كورد

طريق العروبة وانت متجة غرب ( جهة مستشفى العيون )

بيجيك تقاطع تركي بن عبد العزيز الاول
اطلع يسار
بتجيك شارة رح سيدة وخلك ماسك اليمين (( على يمينك الان صناعية العروبة وفي رواية اخرى صناعية ام الحمام ))
وانت ماسك اليمين شف ثاني لفة (( للخدمة )) خش معها يمين ،،
وعلى طول بتلاقي ورش هوندا واضحة لك ... رح الورشة رقم (( 20 )) ..

شغل يد رخيص جداً ،، وهاوين الهوندا ،،

الله يجزاك خير ..

مريت عليهم وصلحت الدودة عندهم وغيرت كراسي المكينه .

الدودة القطع كلفتني 200 ريال وإصلاحها 300 ريال ..

والكراسي غيرت 6 كراسي .. القطع كلفتني 1200 ريال وشغل اليد 250 ريال ..

ماشاء الله تبارك الله .. إجمالي شغل اليد ( إصلاح الدودة مع كراسي المكينة ) 550 ريال ومع المكاسرة 500 ريال .

ومهندس الوكالة بطريق خريص يقول غير الدودة وراح تكلفك 4000 ريال !!!
قال 4000 ريال قال ...

نصيحة اللي يبغى الوكالة .. يخليها للفحص فقط .. يعني عندك مشكلة في السيارة خلهم يفحصون السيارة ويطلعون المشكلة وصلحها عند غيرهم .. ويكفي استغلال .

والشكر للأخ كوكو كورد