والله ما ادري وش اقولك يا خوي
انت كذا خوفتني منها..
انا الحين قاعد اجمع حقها وناوي اركبها..
اتمنى من الي مركب نفس الشاشة يعطينا رأيه فيها..
بسمهــ تعالى...
السلام عليكم ورحمة الله وبركاته
وبعد :
اليوم سوف اذكر لكم قصتي مع شاشة مهام الجزيرة للأكورد 2008 الخربانه ؟؟؟ والصراحه كنت متردد واجد عشان ما احطم الناس الي ودهم يشترونها لكن هذي الحقيقه..
انا من الأشخاص الي قدر الله علي وخذت شاشة الاكورد من مهام الجزيرة في تاريخ 28/8/1429 هـ بعد تعب وعناء طويل من اجل الحصول على الشاشه وضليت تقريبا حدود الشهر وانا بين سؤال ونصائح واحترت كثير وفي ناس قالوا غاليه لا تأخذها وناس قالو خذها ما في احسن منها وانا الصراحه مقتنع فيها ميه % واي احد يقولي شي ما اسمع له المهم رحت التكنلوجيه المتعددة وقال خلصت وننتضر طلبيه جديده والله تعبني هذا الي اسمه جمال كل مايرد ويستهبل واجد وعصبي ومسوي فيها الي هو يفهم ...
المهم طرحت الموضوع في المنتدى وما قصرو الشباب قالو لي ان في محل اسمه مهام الجزيرة بالخبر وهو اصلن الي يمول حق التكنلوجيه المتعددة
وبالفعل رحت لهم ولقيت الشاشه وكان استقبال محمد مناف ولا اروع انا ازداد حبي للشاشه يوم شفتها في الحقيقه وخلاص عزمت وجمعت الفلوس وكان سعرها 4100 ريال + الكاميرا 350 +300 التركيب=4750 ريال
اااااه ليتني ما دفعتهااااااا
ورحت وشريتها وركبتها بعد يومين لأن كان عندي شغل في الجبيل وكنت انتضر الساعات على اني اشوفها راكبه على سيارتي وبالفعل رحت وركبتها وكان فك الديكور بالكامل يخوووف تشوف سيارتك من داخل مفكوكه بس كنت اقول في قلبي يا رجال كلها كلبسات وبعدين بتستمتع بالمنظر الرهيب وبعد ساعتين تقريباً تم تركيب الشاشة وكان المنظر روووعه ومستانس حدي احس اني راكب روز رايز
الزبدة هنـــا:
ياخي من رجعت البيت لاحضت انها بطيئة وااجد في التنقل بين الراديو والسي دي والخرائط يعني بطيئه في الأستيعاب انا من الوناسه كنت اقول عادي بس في البدايه زي الكمبيوتر
بعدين بعد ثلاثة ايام حسيت ان المسئلة جد اتصلت على محمد مناف وكلمني وقال بس بالبدايه وانت اول واحد يقولي هالمشكله
قالي اصبر اسبوع ولا راحت بالعكس زادت يعني كل يوم لازم اسوي لها rest اربع مرات او خمس لأن بعض الاحيان تعلق ولا تروح ابدا
طبعا للمعلوميه الشاشه عليها ضمان سنه
طيب صبرت صبرت ولا في فايده تواصلت مع اكثر من واحد بالمنتدى مركب شاشه وسئلته يقول شوي تعلق بس مو بالمستوى الي عندي وفي بعضهم يقولون ما عمرهم سوى لها rest وما فيها شي
بعد شهر من تركيبها خلاص قلت لازم احط حل للمسائلة ودقيت عليه وانا معصب لازم تشوف لي حل راسل الشركة في الصين وردو عليه بعد اسبوع وقالو له فك الشاشه وارسلوها لنا عبر شركة DHL وبالفعل رحت وفكوها وكان فك الديكور بالنسبه لي للمره الثانيه صعب صعب لكن شسوي قدر ومكتوب
طبعا كل شي على حسابهم وفك الشاشه ورسلوها الي الصين ورجعو الشاشه الأصليه حقت الوكاله والله ما في احلا منها هادئه وحلوه ما اقول الا يحظكم يالي ما شرى الشاشه
المهم ظلت 14 يوم وبعدين جابوها من الصين وغيرو البورد ورحت خذتها وركبتها والله ما كنت ابغاها كرهتها وفي اثناء التركيب من الي يركب بالغلط الصراحه هو دفش ومستعجل قشر الصبغ الي في الغير وقام يقول اسف وما ادري قلت له تخسي والله راح ادفعك قيمة صبغها قاهرني يعني انضلمت بالشاشه وانفك الديكور 3 مرات وبعد يتقشر الصبغ تخسي قلت له انا راح اشوف الوكاله كم يصبغونها واجي اعطيك الفاتوره طبعا هو ساكت وما يرد انا قلت له مالي شغل انتبه لشغلك مره ثانيه سيارة بقيمة 95الف تقعد تصير دفش عليها
المهم تركونا منه ركب الشاشه وحسيت انها تغيرت وصارت احسن بوااجد وفرحت لكن بعد يوم اويومين رجعت اخس من اول وصارت تعلق كثير وهذا انا الأن اكتب لكم معانتي بعد اتصالي الثاني لمحمد مناف وقلت له انا ما ابغا تصلحونها ابغاكم تغيرونها وهو يقول ان راسل الشركه مره ثاني وهذا صار لي اسبوع انتظر ولا في فايده ما اتصل لكن قالي احتمال ضعيف ان يستبدلونها او مستحيل لكن ايش اسوي يعني ما شغلي الا فك ااااه الله يعين بس
الصراحه انا ما انصحكم فيها لأنها ليست عمليه وسعرها غالي على الفاضي
طبعاً اكبر عيب لها الكل يشتكي منه وهو الأناره حقت الشاشه لونها ازرق وقويه جدا جدا جدا ومزعجه في الخطوط الظلمه
بعكس حقت الوكاله هادئه وألونها جميله جدا
والعيب الكبير الثاني ان معلومات المكيف ما تطلع الا لمن تقصر او تطول المكيف يعني اي شي تظغط في المكيف يطلع ويروح على طول والساعه ما تطلع الا لمن تطفي المسجل
انا بالنسبه لي كرهتا بعكس يوم كنت احبها
وفي الختام ارجو منكم الدعاء لي لأن حتى لو بعتها ما راح تجيب حتى 3000 ريال
ارجو رجاء خاص لكل من دخل الموضوع اضافة ردلأحساسي بأن المنتدى قلوبهم مع بعض ...
واسف على الأطاله يا احبابي.....
والله ما ادري وش اقولك يا خوي
انت كذا خوفتني منها..
انا الحين قاعد اجمع حقها وناوي اركبها..
اتمنى من الي مركب نفس الشاشة يعطينا رأيه فيها..
يؤ يؤ يؤ يؤ يؤ كل هذا جاك من ورى الشاشه
الله يعينك ياشيخ هذا وانا كنت ناوي اركب هههههههه عز الله ماركبت بعد هالموضوع
بس قالوها الشباب غير شاشه sun-lessلاتدور بس سعرها غويلي شي
على العموم الله يعوضك خير منها يارب ونصيحه لاجيت تبيعها مهما كان السعر تقول للي يبي يشتريها المشكله اللي فيها
علشان مايدعي عليك ولا تصير لك لاشريت شي ثاني وبالتوفيق اخوي والله يعوضك مره ثانيه
طيب انت تقول عليها ضمان سنه ... هل الضمان استبدال او صيانه فقط ؟؟
اذا ضمان استبدال والله انشب له واخليه يغيرها بوحده جديدة
جوزيف
أنا عندي نفس الشاشة والحمد لله ما صارت عندي المشكلة اللي تقول عنه
بس عندي الساعة تأخر الوقت وما بعد كلمت محمد بكلمة ان شاء الله وأشوف وش السالفة
أما الضمان أنا قالي ممكن نستبدل لها لك إذا فيه مشكلة
اوووووووووووووووووووووووووووف,,
كل ذا,,,, وانا يابعدي مسوي اقتصادي ابي اجمع قروش عشان اشتريه,,
ع العموم الله يعينك أخوي وماالك الا الدعااء,,
يمكن المشكله من الكاميرا الي ورا هي الي تأخر وتعلق ,,
لان أكثر السباب الي مركبينها ما أذكر واحد ركبها ,,,
^^^^^
أنا مركبها ومضبوطة والحمد لله ما في أي مشكلة
ياخي مو مجامله بس تضايقت :(
بيعها يالخوي
بيعها لو تخسر 1500 ولا تضايق نفسك
الله يعوضك خير
اهم شي لا تزعل نفسك
وخلك مع محمد ابلشه لين يغيرها لك ولا تسكت على حقك
وصراحه كنت ناوي اركب شاشه
والحين متردد
انا من مجربين الشاشة الى يومكم هذا
والصراحه كلامك اشوفه مبالغ شوي اسمحلي انت تبي الصراحة وهذي الصراحة
انا علقت علي صح بس هذا لمن تقعد تلعب فيها يعني التعليق في الراديو فقط لاغير هذا عندي ونادر ماتعلق
في المسجل بين السيدات لمن اكون اقلب بين السيديات والاغاني تعلق بس اذا كثرت تقليب
ويبقا المسجل شغال وتقلب بين الراديو والمسجل وتسمع كل شي
بس الشاشة الي معلقة
اما اضائة الشاشة الزرقاء ساطعه بالفعل لاكن الخشبيه لا
اما البلوتوث والنفيقيتر وباقي الاشياء ماعلقو علي ابد
وسلامتك
التعديل الأخير تم بواسطة البــــــاشا ; 23-01-2009 الساعة 10:35 PM
احد فيكم يخبر شاشه بمبلغ زهيد ومتواضع وفي نفس الوقت
تكون شاشه جميله ولها رونق خاااص ^_^ طماع من جد
والله ياشباب كرهات السياره وكرهت الاكورد والسبب كله من
الشاشه الحقيره (شاشه فئه الاسبيشل) اللي مال امها داعي بالوجود
يعني لامظهر ولا مخبر ولا اي حسنه تذكرلها بس الساعه شي ثاني مافيش
بعدين ماتلاحظون اسعار الشاشات مبالغ فيها وبقوه بعد
يعني شاشات عاديه وبقيمتها تطقلك احلى لاب توب (ماك بوك طبعا )
ولا شو رايكم
وبالنسبه لصاحب الموضوع ابد تراك دافع مبلغ والشاشه عليها ضمان
ولازم يلاقولك حل لها المشكله باسرع وقت ازعجهم ولا تخليهم
ويارب انشاء الله تزبط معك
اللهـ يعينكـ ..
بصراحه شي غريب .. كيف يكون الضمان عليها كذا ومافيه استبدال مع تكرر المشكلهـ ؟؟
والتعليق اللي تقول بعد من دجد غريبه وش يضيق الصدر .. لكن وش تسوي ما باليد حيلهـ ..
صحيح وقتها كانت افضل شاشه هي لكن وقتها صبرت وشفنا وقرينا المميزات حقت سن لس
من ناحيه البورد الداخلي والمعالجين الاثنين بشاشه سن ليس .. .. والحمد لله هي معي
الحين وشغاله تمام .. ماتعلق لا بتقليب ولابفرفره بين الراديو والسيدي
والايبود والاغاني اللي فيها .. والحمد لله يعني
ماقول غير الله يعينك ويخلف عليكـ .. ولا تخليها بخاطرك .. اذا مانفع معه
الكلام رح له وتفاهم معه وخلك جدي معه ولا تترك له مجال يلف ويدور ..
واذا مانفع شي بعها والله يعوض عليك خير .. ماتسوى عليك كل ماتطلع
بموترك يضيق صدرك وتكره الموتر نفسهـ بعد ..
ماقول غير الله يعينك في مصيبتكـ .. ويخلف عليك بأحسن منها ..
والله انا كنت ناوي اركبها عند محمد ( مهام الجزيره ) ورحت تكلمت معاه وقالي ان الاستبدال خلال اسبوع طبعا هو لف ودار معاك على شان تخليها اسبوع عندك ولا يستبدلها ابد المهم حبيبي انا ابقولك شغله لاتسكت عن حقك ابد روحله وانشبله واذا مانفع دق على الشرطه وخلهم ياخذون حقك اهم شيء يكون ( الفاتوره معاك )
خل حكمتك بالحياة كما تدين تدان لاتخليه يلعب عليك ويبربر من الكلام يقولك ابراسل الشركه وماابراسل من الكلام الرخيص هذا
والله اخوي وش اقول لك الواحد المشكله لما يدخل الشي في راسه ومزاجه يجيبه يجيبه مهما قالو له الناس انه مو زين
انت لو مخلي الشاشه الاوليه احسن لانها بلاد واصليه احسن من الفك والتركيب بس يالله على الله العوض وانشالله دافعة بلاء عنك ولا تعتبرها خساره لان الخساره من خسر عمره والله يعوضك اخوي
وشكرا لكتابة موضوعك لكي تكون عبره وماحد يروح يركبها مره ثانيه
وعليكم السلام ورحمةُ الله وبركاته
هلا فيك أخويْ ،،
بصراحة مشكلتك غريبة بالفعل ، !!
أنا مركب هالشاشة وبصراحة ما عليها كلامْ ومن أروع ما يكونْ ،،
وصاير شكل السيارة فخمة من جد وخاصة اللي حولك خآقين عليها ،،
شوف يا بعديْ ،،
أنا ما قد سويت rest ألا مرة وحده وهي أني ضغطت عليه من تحت اللي في درج DVD
وقبل ما أطفي السيارة أضغط على كلمة AUX عشان يطفي الصوت وكل شيءْ ،،
وهذا إلى اللحين ضابطه ما شاء الله ، تبارك اللهْ ،،
طيب دامك تقول لي أنها بطيئةْ ،، أنا أقول لك في أقل من دقيقة تشبك على النفقيشن وتتصل بالأقمار الصناعيةْ ،،
طيب وإذا قلت لك في شاشة أغلى منها ( احتفظ باسمها ) يبي لك قرابة الـ 10 دقايق عشان تشبك معاكْ ،،
نصيحة لك لا تبيعهاْ وخل عنّك الوسوسهْ : )
أنا وسوست في البداية لما شفتها هنـّقـت معاي ، بس قال لي لما تجي تطفي الشاشة اضغط على AUX وانتهى الموضوعْ ،،
بالتوفيق لكْ ^^
لا تسكت على حقك وانا اخوك اهم شي الفاتورة معك انشب له الين يبدلها
قله اشتكيك للشرطة اذااضطريت
ياشباب الي يعرف وصف مهام الجزيره
يسدحه هنا الله لا يهينه <<< بس هالله هالله بالوصف السنع...
مشكورين يا شباب على ردودكم الطيبة التي احسستني بأن اعضاء المنتدى قلوبهم على بعض
وبالنسبه لمهام الجزيرة والله ما راح اتركهم حتى لو ادخل مركز حقوق الأنسان ومجلس الشورى والكونغرس الأمريكي >> شعنده القوي
المهم وبالنسبة للأخوان الي قالو ان شاشتهم ولله الحمد ما فيها شي طبعاً تجي في كل دفعه من الشاشات حبه او حبتين خربانه وانا للأسف نصيبي وحده من الخربانات والله يا بوعليان كلامك صحيح هو لف ودار عشان يمضي اكثر من اسبوع ويلعب علي وما يبدلونها لاكن ما اخليهم
لاكن نصيحه من اخو مجرب لأخوان يحبهم في الله خليكم على شاشة الوكاله والله اصرف بمليون مره هذي الــ 4000 ريال ركب فيها حساسات من الوكاله شغل نظيف والباقي اشتر لك فيها اطلق لابتوب
على العموم انا ما يحق لي اني ابتلي على الشركه لاكن هذي الحقيقه في شاشات الاكورد فقط ضعيفة الجودة وذات سعر غالي..
المهم ما قصرتوا يا شباب والله اسعدتوني بوجودكم واتمنى ماحد يتصل على محمد مناف ويقوله اخاف ما يغيرها لي على العموم ان شاء الله للي عندهم شاشات ما يشوفون منها اي شر والله يوفق الجميع
وننتظر المزيد من الردود...
حاس بمعاناتك خصوصا انك تفك الديكور اكثر من مره غير المشاوير وكل شوي مسير على المحل
لكن مالي الا الدعاء لك بانك تتوفق فيها وباذن الله يبدلونها لك
ومن جد شكلك طحت بالقطعه الخربانه من الطلبيه كلها >>> منحوس
اعتقد قسم الاكترونيات ممكن تكون عندهم حلول عشان كذا يتحول الموضوع لهم على أمل المساعده
الاخطبوط كان هنا
انا بدق اعلمه الحين ههههههههههههههههههههه امزح معك الله يعوضك وان شاء الله تنحل المشكله باقرب فررررصه
المحل بمجمع الحصن اللي بالبايونيه بالخبر(مجمع صغنن للكمبيوترات)
مكتبهم راح يكون فوق وهم موزعين فقط
وانت جاي من الدمام اول ماتدخل الخبر تخلي مجمع الراشد يساك وبعد الاشاره الثانيه خذ يمين
عد اول اشاره وبيجيك ع اليسار بعد 800 مترتقريبا
يارب يكون الوصف مفهوم :dامنيه حياته يعرف يوصف ولو مره
^^^
^^
^
ياخلفهم انت ,,,,
يععني ثاني أشاره من أول مأدخل الخبر ..
يعني الاشاره الي عند ماااك ولالا <<< والله يانا جوعان..:d
اروح يمين بعد أول اشاره القاه ع اليسار بعد 8000 سانتي متر ..:p
السلام عليكم ورحمة الله وبركاتة
والله يا اخوي خوفتني من الشاشة وصرت شايل ليها هم لأني لسه ما ركبتها إلى الآن لأنه السيارة في الشركة من 28/12/1429هـ إلى يومنا هذا بتاريخ 28/1/1430هـ وما أستلمتها بسبب البطئ الشديد بالشركة والمعاملة السيئة من العمالة في الورشة زي الهندي ينفخ عليه ويتفلسف عليه ويزعق بصوته تحس كأنه ديك وقفل بوجهي السماعة خلاني نزلت من مكه على جدة وأنا معصب ومسحت بأمه البلاط .وإلى الآن الشاشة في كرتونها ما فتحتها حتى وش أسوي وش أعمل وطبعاَ هي من مهام الجزيرة يعني زاد البله طينه الله يستر .
مواقع النشر (المفضلة)