صيانـة الـ 40 ألـف ..

[Ali_2007]

السلام عليكم

كيف اخباركم وعلومكم ان شاء الله بخير:d

أنا عضو جديد واتمنى انكم ترحبو بي واتمنى اني افيدكم واستفيد منكم.

السؤال: عندي أكورد 2007 .. ماشي 40 الف كيلو متر
دخلتها الوكالة صيانة الـ ألف + صيانة 10000 + تبديل الزيت كل 5000

ناوي ادخلها الوكالة صيانة 40 الف .. بس محتار! (بسبب الغلاء الفاحش+ سبب الفلس الفاحش:d)

835 ريال ==> فلتر هواء + فلتر بنزين + فلتر زيت + زيت مكينة + بواجي !!! وبدون تغير زيت القير بعد لان سألت في الوكالة قالو لي في صيانة الـ 60 !

فـ إيش رايكم ادخلها الوكالة !! واخسر هالمبلغ الي اقدر استثمره في شي يفيدني !

او اني اشتري القطع اصلية وابدلها في ورشة محترمة وكان الله غفور رحيم!

وايش هي القطع الي تحتاج تتغير غير القطع الي ذكرتها؟

ملاحظة:لاحد يقول لي استخدم خاصية البحث لان المواضيع قديمة وما استفدت شي..

وشكــرا ...

[B Useful]

اشتر القطع من الوكالة وركبها في ورشة ،، وتشوف كيف التوفير ،،

الرياض - شارع العروبة وانت متجة غرب (جهة مستشفى العيون ) بيجيك تقاطع تركي بن عبد العزيز الاول
اطلع يسار
تجيك اشاره
رح سيدة وخلك ماسك اليمين
ثاني مدخل خش معة يمين
اقل من 15 متر تلاقي وش هوندا على يمينك ،، رح للورشة رقم 20

^^ اذا انت من اهل الرياض طبعاً ^^

[Ali_2007]

تسلم أخ كوكو كورد على الرد السريع

وانا هذا الي افكر اسويه:d بس القطع المطلوبة = ؟ + ؟ +؟ (ماعرفها بالظبط) فـ ياريت أحد يعلمني اياها بالظبط..

وللأسف انا من اهل الشرقية..

[ملك مملكة جدة]

835 ريال ==> فلتر هواء + فلتر بنزين + فلتر زيت + زيت مكينة + بواجي !!! ؟!

يا صاحبي سيارتي ماشية 80 و ماجابو لي سيرة فلتر البنزين في صيانة 40.000

يا ابو الشباب نصيحة

فلتر الهواء و الزيت و فلتره و زيت المكينة و البواجي ... غيره برا الوكالة ... طباع فلتر الزيت تبع الكينة بيتغير مع تغير الزيت و فلتر الهواء بينظفوه لك في كل صيانة برا الوكالة ... فقول للعامل يحط الفلتر الجديد بدال الفلتر القديم

حتي زيت الجير بوكس .. اذا قدرت تشترية منهم و تغيرة برا ... يا سلام على التوفير

و سلامتك

و بالنسبة فلتر البنزين ... هذه غيرها في الوكالة لانه ما احب احد يفتي لي في سيارتي

[Ali_2007]

:d:d:d


شكلي حاب أخسر نفسي فلتر بنزين..

يعني . أتوكل على الله واشتري فلتر هوا +فلتر زيت + زيت واغيرهم عند اقرب يمني:d

وأشتري بواجي .. وأغيرهم في البيت.. لأن شغلتهم مرة سهلة

وعلى فكرة انا بعد كل مرة اغير زيت اشتري فلتر زيت من الوكالة واعطيه البنشري يغيره واخليه ينظف فلتر الهوا بعد..

[بريق الصحوة]

> فلتر هواء + فلتر بنزين + فلتر زيت + زيت مكينة + بواجي !!! وبدون تغير زيت القير بعد لان سألت في الوكالة قالو لي في صيانة الـ 60 !
هذه هي القطع
وشتري بعد لك كرتون زيت للقير
وعطنى الاخبار بعد الصيانه اخوي

[يحياتوووو]

حبيبي صيانة 40000 بجدة ب 495 متأكد 100% مع القطع والزيت والفلتر بطريق المدينة

[accord.man]

عليكم السلام /
بدون مقدمات خذ التجربه مو النصيحه انا شرحك 2007 يوم مشيت الاربعين الحاجه اللي سويتها زيت القير + بواجي وصادفت معي اني غيرت الفحمات وخرط هوبات الخلفيه . اما اذا كانك تبي النصيحه من اخوك
لا تخلي زيت القير اذا غيرته على الاربعين الف خلاص تدلي تغيره كل عشرين الف هذي نصيحتي عن تجربه

[B Useful]

^^ اسمع الفيلسوف !! ^^

الوكالة صارت تغيرة كل 60 الف كيلو ،، وانت تقول كل 20.000 ... لحالك ،، مرررررة لحالك ،،

[accord.man]

طيب انا لحالي اوكي .......... الانسان خصيم نفسه و انا قلت اللي عندي

ورح اسأل ورشة الجنوب بصناعية الخرج ولا ورشة السبيعي متخصصين في الهوندا اكورد هوندا 2006 _ 2007 أول مره 40000 ومن بعدها 20000
وعلي سبيل المثال زميل لي معه هوندا سته سلندر طوف الاربعين الف ومسكة على سفره والله انه داخل جده السياره على سطه القير خبط عليه بس ربي رحمه بالضمان حملوها الضمان تدري صار الإن مثل الدي يمشي قدام واذا بغي الريوس يعطيه فاضي وانا ما تكلمت الاعن شي شايفه ما جبت الكلام من عندي ولا فراغة حكي

والموضوع كذا من عندي انتهى

[المباشر]

^^^^^

زيت القير يستبدل في 60 الف اذا كان الموتر جديد وبعدها كل 40 الف

60 الف / 100 الف / 140 الف / 180 الف / 220 الف / 260 الف وهكذا ...

[نصر القصيم]

ماشاء الله عليك

2007 و40 ألف

أنا 2009 وقريب من الأربعين

بالتوفيق وأنا أشوف الوكاله أحسن من غيرهم

[المباشر]

^^^^^

اعذرني ماكملت باقي ردك بس لمحت سالفة يروح عليك الضمان ..

دقيقة أطلع أوراق الصيانة ...

المهم انا سويت صيانة 1000 وبعدين 5000 و 10الآف - في الـ 10 الآف طلبت تغيير الدركسون لأنه تقشر وعملوا لي طلبيه ووصل عندهم واتصلوا علي وبدلته - والا كان ماشافوا وجهي اصلآ

وبعدها سحبت عليهم ووديت موتري تشييك 20 الف لاني كنت ابي تلقيط للموتر عندي شوي مخوش بالصدامات وللأسف بعد الصيانة قالوا اللون غير متوفر - وكل اللي صار تنظيف للتكييف وبس وانا طلبت منهم مايبدلون الزيت لأني ابدله في بنشري ودفعت 550 ريال على الفاضي

وكمان سحبة حلوة عليهم ووديت الموتر تشييك 40 الف ( وطلبت خرط للهوبات وكنت متوقع يدفعوني قيمة الخرط ولكن يوم أستلمت الموتر قالي المهندس انها على الضمان << لاحظ على الضمان )

بعدها سألتة بخصوص اذا ماجبت الموتر على التشيكات كل 5 الآف ينلغي الضمان ؟؟؟ قال لااااااااااااااااااااااااا ماينلغي لكن أهم شي لاتتعبث بالموتر

وسلامتك

[م م و السعوديه 5 5 7]

طيب انا لحالي اوكي .......... الانسان خصيم نفسه و انا قلت اللي عندي

ورح اسأل ورشة الجنوب بصناعية الخرج ولا ورشة السبيعي متخصصين في الهوندا اكورد هوندا 2006 _ 2007 أول مره 40000 ومن بعدها 20000

وعلي سبيل المثال زميل لي معه هوندا سته سلندر طوف الاربعين الف ومسكة على سفره والله انه داخل جده السياره على سطه القير خبط عليه بس ربي رحمه بالضمان حملوها الضمان تدري صار الإن مثل الدي يمشي قدام واذا بغي الريوس يعطيه فاضي وانا ما تكلمت الاعن شي شايفه ما جبت الكلام من عندي ولا فراغة حكي

والموضوع كذا من عندي انتهى

طيب انا سيارتي ماشية حوالي 194000

غيرته مرة وحدة على 80 الف
وافكر أغيره المرة الثانية على 200 الف ان شاء الله
وبيني وبينك في ناس يقولون زيت القير ما يتغير!!.