السلام عليكم ورحمة الله وبركاته

أحكي لكم قصتي لشرائي سيارتي الأكورد العروس 2009 التي استلمتها قبل يومين.

في البداية كنت محتار بين ثلاث سيارات

كامري 2009 - اكورد 2009 - التيما 2009

رحت وكالة كانو للتيوتا وجربت الكامري طلبت سياقة تجريبية فذهب بي مندوب المبيعات الى باحة تسليم السيارات الجديدة واعطاني سيارة طبعاً السيارة ليست للتجربة وإنما سيارة أحد العملاء فخفت ان اجربها ولكن لا مانع من أخذ لفة في الباركات (حسيته يطنز عليي كأن يقول هذا وين جاي يبي تجربة السيارة، الظاهر متعودين الناس في البحرين لما يروحون وكالة التويوتا مجرد يحجزون السيارة لأن ماكو سيارات تجارب).

على العموم ما عجبني الديكور الداخلي



رحت وكالة النيسان لتجربة الالتيما، عطاني المفتاح وقال ليي السيارة برا خذ راحتك بالتجربة، للمعلومية فقط فعند كل كونتر مبيعات يطلبون منك تجربة السيارة ، وفي التجربة طبعاً ما خليت مرتفع ما دشيت فيه الف وما خليت شارع ما سقت فيه فوق 160 والسيارة اللي سقتها كانت 4 سلندر، واخترت الاربعة لأنها مناسبة لميزانيتي والشي الثاني اني ابي اقارن صح من جميع الفئات.

الالتيما كانت في السياقة رائعة جداً ومريحة، لكن بعد الديكور الداخلي حسيته جامد ما فيه حركة. صوت السماعات كان فضيع والمميزات لا يعلى عليها. وكانت هذي تجربتي للالتيما.


نجي للعروس، عروستي أكوردتي 2009

هذي السيارة بالذات جربتها في الوكالة 4 مرات. رحت ليها 4 مرات وكل مرة يعطوني المفتاح ويقولون ليي خذ راحتك. وطبعاً ما قصرت فيها نفس اللي عملته في الالتيما عملته فيها.

لقيت فيها>>>>

راحة
مظهر خارجي رزة
مظهر داخلي فخم
جودة تصنيع خارجي وداخلي
مهتمين في كل شي فيها من اصغر حاجة لأكبر حاجة
سيارة بالنسبة لفئتها حسيتها الافضل من المرشحات الثلاث، وتستحق قيمتها.

على العموم ما اطول عليكم اكثر من كذا فحجزت لي اكورد 2009 موديل EX يأتي بنفس مواصفات الفل اوبشن جلد لكن هذي مخمل.

المواصفات:
- اللون فضي
- رنقات مقاس 16
- 2.4 أربعة سلندر
- فتحة سقف.
- مكيف لكل سائق.
- 6 اقراص مدمجة mp3/wma
- طبعاً ريموت.
- مقياس حرارة خارجي.
- سيتات مخمل، مقعد السائق كهرباء بست وضعيات ومقعد المرافق يدوي.

أنا اخذت السيارة وأنا مقتنع في اختياري 100% طبعاً وبعد تجربتي وهذا ذوقي رغم الضغوط اللي كنت احصل عليها عشان آخذ تويوتا لكن ابد معصي آخذ شي مو مقتنع منه. ونصيحتي لكل واحد مقدم لشراء سيارة جديدة جرب قبل ما تحكم عليها.

تقبلوا تحياتي