رحت للوكاله وسألت عن الشمعات الأمامية لسيفيك 2008 [ النور كامل ]

الحبه الوحده قيمتها حول 1300 ريال وكسور ،، مع تخفيضهم ابو 15% يصير حول 1200 ريال

كلّمت النعماني وقال الحبه ان ما خاب ظنّي ي 1300 ريال او 1400 ريال

بس اتذكّر السعر اللي عطانيه اعلى من الوكاله

فـ لحد يتحمّس ويشتري كل شيء منهم ،، يسأل بالوكاله ثم يسأل عند النعماني او العكس قبل القدوم على الشراء

بغض النظر ،، 1200 ريال على شمعات سيفيك ،، لا وعواكس مهيب عدسات صراحه سعر جدّا مبالغ فيه

وانا احتاج يمين ويسار ،، فتطلع حول 2400 ريال ،، مع اللمبات عالي وواطي واشاره وسكن ،، وصلت بالضبط 2659 ريال

وييييييين ،، عواكس على موتر مغبّر 2008

الزبده اني طقّيتها من كثر ما طفشت من نور سيارتي الابو كلب

،،

كنت ابي انحاش من انوار الوكاله وسعرهم الخنفشاري ،، رحت للغرابي وطقيت انوار عدسات على لمبات led حركات على زينون بـ 1500 ريال

قسم بالله ندمت اني ركّبت هالخرابيط ،، ماغير منظر قدّام النّاس ،، لكن لا مسكت خط ما غير تندم على الشغل الخربوطي بالسياره

ثم بعدها مرّيت الغرابي ،، ولقيت محل اسمه التمران ،، ما شاء الله شغله واضح انه مضبوط وتمام التمام ،، وتوليف عدسات على اصطبات الوكاله وعدساته ممتازه مو الخربوطيه اللي ركبتها ههههههههه

بس سألته عن الاسعار ،، ما شاء الله ما يلعب الا بالآلاف ،، وشغل يدّه لحال 500 ريال

قلت خلّني على لمباتي الحفله لين ما يفرجها الله

والحمد لله شرينا شمعات الوكاله ونورها افضل من قبل بكثير ،، لكن مقارنه بشغل التوليف ،، التوليف افضل بمراحل

فاللي مثل وضعي انصحه يروح لمحلّات مثل تمران ويولّف له عدسات وراح يرضيه النور باذن الله [ التمران ما جرّبته بس شفت السيارات اللي يشتغل عليها وكان الشغل محترم ] او أي محل معروف بشغله

دفعت 2659 ريال على شمعات الوكاله بس ماني راضي على نوري 100% ،، ممكن 70%

لو مولّف لي عدسات على زينون على شمعاتي التجاريه اصرف لي ،، لكن النور العالي بالشمعات التجاريه مقلع واحد بالسماء والثاني عند خشم السياره ،، عشان كذا اضطريت اشتري نور الوكاله ولا الخساير المتراكمه

ادري مكان هرجي المفروض ما يكون هنا ،، بس تحمّست بالكتابة وان شاء الله احد يستفيد من تجربتي ،، او ممكن احد الاعضاء يقتبس كلامي وينقده بالنّقد البنّاء

ايه صح ،، نسيت اقول ،، امس طلبت انوار زينون للعالي ،، لان النور العالي مهو ذاك الزود ،، فـ طلبتها من موقع ألماني بـ 450 ريال مع الشحن بتوصل حول 800 ريال

الزينون 55واط AC وبتقنية المانية ومن هالخرابيط اللي خقّقوني عليها ،، شكلي انجرّيت بسرعه ههههههههههههههه

انا والنور مع هالسياره للحين ما توالفنا ،، مع ان لو يحرّبها اي شهص بيقول نور موترك طبيعي ولا فيه شيء ابد

ما اقول الا:

النفس راغبة اذا رغبتها *** وإذا تُرد إلى قليل تقنعُ