تجربتي مع وكالة الشرقية لصيانة 40000

**أسير المشاعر** · 26-05-2009, 01:40 PM

السلام عليكم ...

شباب بس حبيت اقولكم تجربتي لصيانة الـ 40,000 بالوكالة الي بالدمام

اسردها لكم بنقاط افضل ...

* التعامل مع العميل افضل مافي الوكاله صراحة .

* دخلت السياره موب عشان الاشياء الاساسيه،، انا كان عندي شغلات ابغاها عالضمان مثل ( البوري ) و ( مكينة الشباك الخلفي ) واذا فيه اي شغله ثانيه عالضمان

* فاتورتي طلعت ( 1310 ريال ) ... عساس انه بعد التخفيض وبعد كل شيء..

* مشكلتي اخذت السياره بسرعه لاني كنت مشغول ، واكتشفت باخر الليل انهم حاسبين علي ( حامل الاكواب الاخلفي ) بـ 310 ريال، بعد التخفيض 260 ريال !!! محطوطه بالفاتوره مع العلم ان المهندس قالي انها ( على الضمان )

* راجعته واعتذر وقال ان فيه ( واحد اضافها لك ) بالفاتوره ووراني الكمبيوتر ان هو حاطها عساس ضمان وواحد ثاني حاطها بعده بحساب ...

* طبعا طالبت بالفلوس ورفعوا تقرير بس للحين مااستلمت شيء،، ولااحد اتصل علي،،

* السياره للحين يوم اكبس فرامل اسمع صوت بالكفرات الأماميه !!!

باختصار شديد لما حدث سابقا ::

1. دائما وابدا تاكد من فاتورتك وعن كل صغيره وكبيره انكتبت
2. الوكاله مالها داعي ولا عندهم سالفه والشغله كلها نفسيا انه السياره رجعت عروسه زي اول وهم ماسوو شيء .
3. اذا سيارتك تحت الضمان وفيه شغلات قويه وتتغير عالضمان دخلها الوكاله. اما غيره ماانصحك
4. جيب ورقه واكتب كل صغيره وكبيره وعلم المهندس عليها،، لانه باختصار هم ماراح يدورون على مشاكلك

هذا الي طلعت منه واتمنى ان تعم الفائده للجميع...

**الــــمــــحــــتــــار** · 26-05-2009, 01:51 PM

وعليكم السلام

كلامك صحيح وموترك رجعه لهم وقلهم عن الفرامل واهم شي معك الفاتوره ارجع وطالبهم بحقك ولاتتساهل معهم

والمفروض ان كل شخص يشيك على كل شي من قبل مايستلم السياره ويعرف كل شي غيروه ويتفحص الفاتوره

مشكووور على الموضوع

**أسير المشاعر** · 29-05-2009, 01:06 PM

السلام عليكم..

رجعت لهم ووريتهم الخطا الي بالفاتوره ،، وفعلا هي تسجلت ضمان ورجع واحد سجلها بسعر الله يهديه

بس كانو متفاهمين معاي ،، ورجعوا لي الفلوس ...

والفرامل الاماميه،، الصوت يطلع احيان واحيان يختفي ،، وعلى كلام المهندس يقول بسبب الغبار والحراره ...