السلام عليكم ورحمة الله وبركاتة

كان يوم الاحد الظهر طلعت مشوار صغير وقلت خلني أشوف زيت القير لأن خبري فيه ناقص شوي ولي فترة أقول بشتري علبة زيت وكل مره أقول بعدين

المهم شيكت الزيت وأشم ريحته وماعجبتني فشكيت في وضع الزيت وانه محروق وماينفع ويحتاج تغيير

طبعآ الزيت مايتحمل أكثر من 40 الف ( قالها B Unique الله يذكرك بالخير تذكرتك اليوم وتذكرت كلامك في احد المواضيع بخصوص الزيت :d)

نرجع للمفيد : الموتر ماشي للحين 50600 خمسون الف وستمائة كيلو متر

وبعد صلاة العصر ووينك ياطريق الدمام ووينك ياعبدالله هاشم

وصلت الصيانة قبل صلاة المغرب بساعة لأني رحت مشوار صغير وجيتهم

راجعت الصيانة وطلبت منهم يشيكون على زيت القير فجاني سؤال ماشي مليون كم ماشي الموتر - قلت لهم 50600

السؤال الثاني : للأسف ماجاني فبادرت بالجواب حتى تتضح الرؤية للمهندس وقلت له ترى جبت الموتر لكم قبل 3 شهور وماتغير زيت القير - فقال لي معقولة ...!!! وين الفواتير

قلت له يارجال مايحتاج فواتير كل السالفة في صيانة الأربعين طلبت تبديل الفحمات الخلفية مع السعر المعروف للصيانة وكلفتني 1105 ريال فعرف على طول انه مافي أي سعر أضافي لزيت القير وقلت له نعم مافي شي بالفواتير بخصوص زيت القير

المهم طلب اني اجيب السيارة وادخلها الصيانة بالمواقف وبعدها طلع معي وشاف الزيت وقال لي ناقص شوي بس عادي مادام بين النقطتين ومانزل عن النقطة الثانية ( قلت ايه هين أنت وجهك - ناقص الزيت وتبي تصرفني ) فقال لي دقيقة ويشم الزيت وقال لي الزيت مش مضبوط تراه محترق خفيف عندك فقلت له عليك نور وزين ماصرفتني بهذه فجلس يضحك ويقول لي أنت وين تشتغل :d قلت له لا تخاف أنا مش ميكانيكي << يستعبط - عاد ماعليكم من الحفلة اللي صارت بعد كذا من ضحك ووناسة < قول تضبيط :d

جلست أسولف معه بعد ماأستغرب انهم ماغيروا الزيت في الأربعين وقال لي جانا تعميم تغيير الزيت في الـ 60 الف الأولى وبعدها كل 40 الف فقلت له عندي خبر وهذا اللي علمتوني عنه من قبل .

كان باقي على المغرب شوي وفتحنا أمر أصلاح بس قالوا بعد الصلاة فقلت ماعندكم مشكلة

صلينا المغرب وبعد الصلاة السيارة في الخدمة السريعة وماشاء الله واحد سعودي أشتغل عليها وانا عنده ( رجال محترم وحبوب الله يجزاه خير حتى قال لي شايفك من العصر فليش ماكلمتني علشان أمشيك بدري ) << بيض الله وجهك وماقصرت

عاد السالفة كلفت التالي

  • 3 علب زيت للقير الأوتوماتيك بسعر 126 ريال
  • واشر لصرة زيت القير بسعر 6 ريال
  • أجور الأصلح بسعر 48 رال
المجموع : 180 ريال

عداد السيارة عند التغيير : 50600 الف - التغيير القادم 100 الف / 140 الف / 180 الف كل 40 الف أفضل وحسب برنامجهم

مدة العمل : ساعة واحده فقط وسلامتكم

نصيحة : خذ معك فلوس كــــــــــــــــــــاش ترى الماكينة عندهم نكبة ( الشبكة السعودية )

وأخوكم المسكين واحد شلخ علي وقال لي الصراف قريب - الله لا يوريكم رحت مشي وأنهد حيلي نص ساعة رايح ونص ساعة راجع واللي سألته يقولي خمس دقايق بس

ولأي أستفسار فيسعدني جدآ الرد عليكم