الموضوع: زيت هوندا - فرع كيلو 2

تبي رأيي صراحه زيت الوكالات لايكون مثل زيت شركه متخصصه بالزيوت مثل (فوكس سوبر جي تي ,, كاسترول الخ...)
وصراحه انا مثلك على ايش 15ريال للعلبه

تبي نصيحتي اترك عنك زيت الوكاله تراه
مهما كان لا يرتقي الى مستوى زيوت الشركات المتخصصه
وانت تحسب زيت الوكاله تصنعه نفس الشركه اللي صانعه السياره لا يالغالي
لو زيت الوكاله احسن شي كان نصحتك به

عندك مثلا زيت فوكس سوبر جي تي 20w50 ممتاز جدا ويتحمل وانا مجربه ما أغير الا هو
تقنيه المانيه (فوكس ومعبأ بالسعوديه بترخيص من فوكس المانيا)
مميزاته :
حاصل على علامة الجوده
تقنية المانيه ,, ومعبأ بالسعوديه
ISO-9001
ISO-14001 (هذي عاد مأدري وشي)
واهم شي مجربه وانا اشهد انه ممتاز وقليل جدا ينقص طبعا اذا كانت سيارتك نظيفه وموب قديمه
وانا راعي سرعه عاليه وبعز الحر والزيت ماشاء الله

ما عمري سمعت واحد اشتكى منه
كل اللي جربوه يمدحونه

وكل اللي اعرف يحطون منه من تجربه ويمشيك 5000 الآف بالراحه واللزوجه به
بس انا محافظ ما اتعدى 5000الآف

اما فيه زيوت جان تحذير منه مثل (شل)

فيه انواع ثانيه بس ما جربته :
بترومين الترا 7 20w50
كاسترول 20w50 سمعت اشاعات انه مغشوش ويتبخر بسرعه GTX
الخ...

وكانك تبي زيت الوكاله علشان درجة لزوجته تلقى نفس لزوجته موبيل مثلا

نصيحه :
بالصيف استخدم 20W50 فقط افضل حمايه واعلى لزوجه
بالشتاء 15W40 أو اذا كان برد قوه بامكانك 10W30

سعر العلبه فوكس سوبر جي تي 20W50 ب 13 أو 12 ريال
وجودته عاليه
انا ماتفرق عندي كم ريال اهم شي احط شي مضمون وجودته ممتازه

زيت الوكاله لو هو يستاهل كان انا أول من شريته ولو جودته زينه بعد

الوكالات تبي الربح اهم شي عندهم

واذا بغيت تغير نوع الزيت :

غير الزيت والسيفون والزيت كل يفرغ الى آخر نقطه من القهر
وركب سيفون أصلي وتأكد من الصره والواشر حقه
وعب 4 علب ونص ((مع السيفون طبعا))

جرب انت فوكس سوبر جي تي ماراح يضرك شيئ

المره الأولى راح يعجبك بس برضوا فيه أثر للزيت الأول وتركيبته
المره الثانيه راح يعجبك أكثر
كل تغيره مع سيفون كانك تبي شغل
واسمع صوت المكينه راح ينخفض صوته كثير لانه ثقيل شوي ويملأ الفراغات
وحمايه صح
استعمله للصيف فقط
وبالشتاء القارص لزوجه أقل مثل 10W30 أو ماجناتك 10W40

ان شاء افدتك ولو بشيئ بسيط :d
القرار راجع لكم اعجبك ولا بكيفك انت حر :d لا تشتري غير زيت الوكالات
كلامي من واقع وتجربه

وبعد نسيت انبهك : الزيوت التخليقيه لا تبالغ بالمشي عليه لمسافات طويله جدا
مثلا تمشي عليه 20 ألف أو ان بغيت 30 ألف
الخساره عليك اذا خبطت المكينه موب على الوكاله ولا كاسترول ولا غيره
انت اللي ابتدفع :( ولاتنسى قطع غيار الأكورد غالي
والتوضيب مهما كان مايصير مثل المكينه اللي مافكت وماوضبت ونظيفه
يعني مثلا توفر 100 ريال مثلا على زيت تخسر الآف على المكينه

يعني اتوقع 10 الآف كافيه وبعد أتوقع كثيره وغير السيفون كل تغيره ((الزيوت التخليقيه))
وموب شرط ان التخليقي افضل
مثلا واحد يحط زيت عادي ليس تخليقي ويمشي عليه 5000كم ويغير الزيت
وواحد يحط زيت تخليقي ويمشي عليه 15 ألف ((مع الحراره العاليه))
برأيك ايهم احسن شغل وأضمن وأريح وماتشيل هم الزيت احترق أو نقص أو راحت لزوجته
العادي ولاّ التخليقي
برأيي العادي أفضل اذا كنت تغير كل 5000 كم ولزوجته عاليه

حط عقلك براسك فيه تلقى خلاصك
ولايهمك التخليقي وتتوهق وتمشي عليه 20 ألف
((كلامي عن التخليقي لراعين الزيوت التخليقيه والمتهورين اللي يمشون عليه 15 ألف أو 20 ألف))
صراحه مافيها بطوله ولا شي كلامي والله العظيم مب استهتار ولا تطنز
يضرون انفسهم
وفيه ناس خبره يتابعه أول بأول
خلاصة كلامي
انك لمنك حطيت تخليقي موب معناته خلاص اشخف ام المكينه ولا تغير الا كل 20 ألف
((موب شرط اعضاء المنتدى الغالي وما اظن فيه احد من الأعضاء يسوي مثل الكلام السطر اللي فوق))
قريت في احد المنتديات انه يمشيك 100 ألف
بالعقل والله لو هو وشو ماصار زيت
كل شي له عمر وصلاحيه حتى الأنسان وعمره
انا ما أقول لا تحط تخليقي بالعكس هو متطور وأفضل من العادي
تخيل لو تحط تخليقي وتغيره عند 5000كم أو 7000كم
راح تمشي السياره 400 ألف وهي ماخبطت المكينه
طبعا مع الاستخدام الجيد تحميه والخ...

معليش طولت عليكم
اعذروني وآسف جدا
على الإطاله

المشاركة الأصلية كتبت بواسطة GO AHEAD

أخي / أكورد فضي

أشكرك بعنف على كل الكلام اللي ذكرته لأنك بصراحة زدت حمستني على فكرتي

وإنه فيه زيوت أفضل بكثير من زيت شركة هوندا , وبيني وبينك أنا ما أعرف أحط

زيت في الصيف و زيت ثاني في الشتاء " يابوي زيت واحد وتوكل على الله " !!!

وتبي الصراحة , , من يوم دخلت أنت في سالفة الزيوت التخليقية وأنا حاس إني مافهمت شي !!!

ان شاء الله ابحاول أحط مواضيع تفيد الأعضاء

على العموم . . ماقصرت والله يبيض وجهك

تقبل مروري

العفو يالغالي
اهم شي حاول أنك ترسي على زيت معين (مثلا فوكس)
وانتبه من البناشر (سهله لا تقول صعبه انت ماقلت بس أخاف تقول)
((نصائح من ذهب))
أول شي : ;)
حاول انك تغير عند بنشر أنت واهلك وأصدقائك موب بنفس الوقت بس خله يعرف انك تعرفهم خل لمنه جاء واحد يغير الزيت يقول انا جاي من طرف ((اللي هو أنت))
راح تستفيد ينزلك ويخصم لك وراح يهتم أكثر بك وبسيارتك
قبل ماتغير قله اهم شيئ الشغل مظبوط وكان شغلك زين مانب مغير الا عندك
وراح يضبط شغله
لا تنسى تكاسره :d
ثاني شي :
حاول تشتري السيفون من الوكاله أضمن وأفضل وأرخص بعد بعد الخصم 20% راح يطلع عليك ب 16 ريال ,, بإمكانك تشتري 4 أو 5 حبات وتخليهن عندك وتحفظهن بمكان بعيد عن الحراره والشمس والخ... علشان شغلك يكون
وعند تغيير الزيت خله يزين :
يعبي المساحات ((يمكن من نفسه يعبيهن بدون ماتقول))
ينفخ فلتر الهواء حق المكينه ((لازم ومهم غصب عليه)) ((لايلعب عليك))
ينفخ داخل الكبوت ((لازم ومهم غصب عليه))
فك انت فلتر المكيف (من داخل السياره تراه وخلف الدرج) وخله ينضفه
يفحص مستوى زيت القير ( الأوتوماتيك )
وأوزن انت ضغط الكفرات على 30 ان بغيت (انا على 30 أحطهن)
اهم شي خلك واقف عنده وراقبه وهو يشتغل أو اجلس على كرسي وخلك قريب منه وتشوفه
وبعد كذا غسل السياره بمغسله كويسه واستمتع وفلّه واستانس :d
خل المغسله يحط لك ملمع كفرات

ودربك كذا ان شاء الله

مع تحيات : أكورد فضي