اغلى خدش سمعت عنه!!

**The Godfather** · 23-01-2007, 02:45 PM

السلام عليكم
قبل كم اسبوع كنت صافط بالجامعه ولما ييت ابي اركب لاحظت انه في على الباب خدوش تقريبا على شكل مربع بحجم 20 سم في 20 سم (خدوش بالطول جنب بعض) اندهشت فتره وقفت اطالع يمين يسار ولا اشوف مجموعة سواقين واقفين بعيد شوي مقابل سيارتي و قبل لا اروح لهم جاني واحد فيهم وقال انه في وحده كانت ترجع لي ورا و حاشت سيارتي و بعد ما جت بنتها من الجامعه و ركبت السياره و مشت (الله يلعن سواقه الحريم) اخذت سيارتي و قلت الحمدالله كله شغل بوليش و احتمال صبغ و انا مسوي تامين شامل .... رحت الوكاله بالكويت و قلت له انا مأمن تامين شامل وقال لي روح للشركة اللي انت مامن فيها و هم يدزون لنا السياره ... رحت التامين وقالي الخدوش نغطي 60 بالميه من التكلفه ((على شنو شامل )) قلت له مو شغلي انا دافع لكم 450 دينار (5400ريال) حق تامين شامل لمدة سنه قالي كلم المسؤول ,, رحت للمسؤول و قالي احنا نغطي الحوادث لمدة سنه مو الخدوش قلت و بعدين قالي روح للوكاله و قله يسوي بوليش و السلام و قلت منو اللي يدفع قالي كلها 10 دنانير (120 ريال ) ما تسوى نفتح ملف و نعاين قلت خلاص مو مشكله اذا كلها 10 دنانير ...طلعت منهم و رحت الوكاله نزل اللي واحد مال الصبغ و البوليش و يوم انه شافه قال هذا يروح نصه بالبوليش و يبقى منه شويه يحتاج صبغ قلت كم يبي يكلفني قالي رقم خيالي (200 دينار) (2400 ريال) قلت ليش بتصبغ الباب كله ؟؟ قال لا بس المربع ال 20 في 20
خليته و طلعت ورحت التامين قلت حق المسؤول المبلغ قالي مستحيل لان سعر الباب كامل 300 دينار (3600 ريال) قلت له مالي شغل تسوونه على حساب الشركه قالي مستحيل ماراح نغطي غير 60 بالميه قلت له لا قال كيفك قلت لو يعني لو انه الباب مخفوس للداخل يعني يحتاج شغل بالحديد قال لي ذيك الساعه الشركه تغطي كل النفقات قلت له يعني لو اروح و ارفس الباب و اعوجه بتصلوحنا قالي اي بس بشرط قلت شنو بعد قال لي جيب ورقه من المخفر !! قلت شلون يعني قالي خل واحد يصدمك و سجل ضد مجهول و احنا نسويها لك

قلت له خلاص بلا صبغ بلا بطيخ خلها بخدوشها و يلعن ام الساعه اللي اصفط في بالجامعه
ما في حل غير اني اصبر عليها يمكن يجد جديد خلال تسع اشهر لين ما يخلص التامين (التامين يخلص شهر 9) اذا لا قدر الله و صار شي بالسياره ذيك الساعه بصلحونها و رجلهم فوق رقبتهم .
للعلم اللي صدمتني عندها كامري ابيض و انا سيارتي سوده
لا حول و لا قوة الا بالله

**r9onaldo9** · 23-01-2007, 04:27 PM

يا ابن الحلال ليش انت معقدها

كلام التأمين صحيح

خل أحد من ربعك يدعمك دعمه خفيفه بس تخفس الباب ودق على الشرطة

وقوله انا متنازل وابي ورقة تصليح

بس خل الطريقة يطلع الحق عليه مثل طالع من لفة ودعم فيك

وبعدين اخذ الورقة وروح التأمين وقولهم شوفوا شغلكم يالله

ومافيها شي انت مدعوم صج بس الي دعمك انحاش

او علشان الحلال والحرام، روح المخفر قوله السيارة اندعمت وانحاش الي دعمني وقالولي انها وحدة ردت علي وانحاشت ، ابي ورقة تصليح لانه السيارة مأمنه وراح يعطيك اياها ضد مجهول

وروح عند الباب وشوته شوته خفيفه وروح التأمين

وبس

تره مسوينها الربع من قبل

تحياتي

**A C C O R D** · 23-01-2007, 08:39 PM

يبن الحلال هونها وتهون

عين من الله خير ودخلها الوكاله وقلهم يرشون الباب كامل وياخذن اللي ياخذون ترا السياره جديده وتستاهل ووكالة هوندا شغلهم موب اي شغل كلها كم يوم وتنسى

انا صدمني واحد مع الصدام وسمكرته ورشه بـ250 ريال
لكن جلست في قلبي السياره جديده والسمكره الله بالخير الله ياخذ الفلوس تهنا بدنياك ودخلتها الوكاله وغيرت الصدام كامل مع الرش بويه ولون سيارتي اسود >>>>يحتك

وريح بالك ولا كل يوم تفكر بابي خربان وبابي خربان ريح بالك ودخلها الوكاله كلها كم يوم وتنسى

>>>>>شعنده المبنك ؟؟؟؟

**الاخطبوط** · 23-01-2007, 09:54 PM

يمكن السالفه يبيلها تلميع بس ومايحتاج صبغ

انا مره كنت واقف وجنبي جيب باترول المهم مادريت الا وهو يفتح الباب بأقوى ماعنده الظاهر كان متخانق مع الباب

وطاااخ بسياراتي اللي توها ماكملت 10000 كلم

يوم نزلت الا القى حكات طويله بالباب عندي يمكن مساحتها 15 سم في 5 سم

رحت لمحل التلميع الساطع ومسكت الهندي قلتله تعال وجيب عدتك ومسح المنطقه وكأن شيئا لم يكن

الطريف: راعي الجيب يوم شافني معصب يقول وش فيك زعلان اللي يشوفك يقول ان سيارتك اكورد, يحسب ان سيارتي هيونداي سوناتا

**هوندا كونكورد** · 23-01-2007, 10:39 PM

خلها على الله يا ريال

انا بعد ما طلعت سيارت باسبوع كنت اموقفنها ويوم رديت لها فالباركن فتها مخدوشة في الصدام الامامي .. كرهت عمري قلت توني امطلعنها وكالة اتلامع

المهم الشدخ اتكرر اكثر من مرة وتراه مب عود يعني يمكن طوله 10 سم لكن يشوّه المنظر خصوصا ان السيارة لونها ابيض والشدخ اسود قاااار ...رحت حق الوكالة وقلت لهم اصبغوا المكان قال للاسف ما نقدر نصبغ لك اياه إلا بــ 500 ريال قلت له ليش السيارة امأمنة قال حتى لو امأمنة لو تدفع 500 ريال قلت له ليش الشدخ بسيط قال لي لا انته بدفع 500 حق شغل صبغ الصدام الجزر الامامي بالكامل يعني من بعد النافذة الامامية إلى الصدام..!

ف قلت السالفة ما تسوى

ولين الحين موجود الشدخ ومال التأمين قال لي نفس الكلام .. قال لي اذا حد دعمك خذ ورقة من المرور وتعال حقنا واحنا بنصلحها...

مشكلة هاي بصراحة لكن امرك لله .. على قولة واحد من الربع يوم شاف الشدخ قال ياخي اتعيش واتشوف غيره باجر تتعوّد يا معوّد

وشكرا

**S c O r P i O n** · 24-01-2007, 01:27 AM

خطاك السو
وترى الموضوع عادي موانت اول واحد وولااخر واحد يصيرلة هالموقف ?
انا قبل يومين صافطها بمجمع ومكاني سليم امية بالامية وارجع واشوف السيارة مصدومة من الخلف والصدمة قوية وحسيت انها متعمدة حركت لاحول ولاقوة رحت البيت دخلتها الكراج جبتلي خرجة وفيها بانزين ومسحتها والحمدللة مالها اثر
((هذي الحسنة الوحيدة للي ماخذين أسود))
واذا فيه الوان على الباب ترى تروح والخدوش بسيطة وماراح تبين وترى اي واحد عندة موتر اسود فيه خدوش بس ماتلاحظها الا اذا دققت عليها

**The Godfather** · 24-01-2007, 04:43 AM

لا حول و لا قوة
انا كنت ناوي اني ارفس الباب بس مو اللحين
قبل لا يخلص التامين بشهر
يمكن من اللحين لين شهر 8 تنخدش او يصير شي فيها (زلقه بطيحه) مره وحده تدخل الوكاله و افتك منها و اذا كان على التامين بخليهم يبدلون النافذه الاماميه معاها بحجة انه في شي طار من الحادث و كسر الجام
(((حاليا قاعد ادبر لي سيناريو حق تبديل الكفرات))) <<< هالكهم

**ن ك د السـعــــوديه 3 5 7** · 24-01-2007, 05:20 AM

المشاركة الأصلية كتبت بواسطة الاخطبوط

يمكن السالفه يبيلها تلميع بس ومايحتاج صبغ

انا مره كنت واقف وجنبي جيب باترول المهم مادريت الا وهو يفتح الباب بأقوى ماعنده الظاهر كان متخانق مع الباب

وطاااخ بسياراتي اللي توها ماكملت 10000 كلم

يوم نزلت الا القى حكات طويله بالباب عندي يمكن مساحتها 15 سم في 5 سم

رحت لمحل التلميع الساطع ومسكت الهندي قلتله تعال وجيب عدتك ومسح المنطقه وكأن شيئا لم يكن

الطريف: راعي الجيب يوم شافني معصب يقول وش فيك زعلان اللي يشوفك يقول ان سيارتك اكورد, يحسب ان سيارتي هيونداي سوناتا

:d

هههههههههههههههههههههههههههههههههههههههههههههاي

يااخي وش الكائنات هذي قسم بالله ترفع الضغط

**نسكافيه** · 25-01-2007, 08:41 PM

حرام والله ترش او تغير باب عشان خدش

واذا كنت ناوي تسوي كذا

دور لك احد تعرفه معه سيارة صدامها قوي

يعني مثل (جمس او شفر سوبربان او تاهو او يوكن ، كابرس قديم ، وانيت )

وانه يكون مأمن

وخله يدعمك مع الباب بحيث انه يكون هو الغلطان

ودق على المرور

سيارته ماجاها شي

سيارتك باب بس

وهو مأمن على رخصته

وتأمينه هو بيصلح لك سيارتك

وافتك من مشكال التأمين الشامل

وشكرا