شبااااااااااب تكفون ابي مساعدتكم والله كرهت موتري 2006 اكورد v6

**faisal_339** · 28-07-2009, 09:03 PM

السلام عليكم رحمته الله وبركاته

شباب انا الصراحه تعبت مع سيارتي وفكرت ابيعها بس قلت افر النت شوي واشوف يمكن القى حل لمشكلتي .
لاني سويت حادث في السياره في الوجه مع انو ماطلعت الارباقات والحادث في البدي يعني ماجاء المكينه شي والا الرديتر حمدالله .

1: عندي صوت اذا دعست بنزين بقوه الصوت هذا في المكينه كاني مركب دبه او شي زي كذا الصوت ضخم وتعبت من جد والعزم نفسه مو ضعيف عادي بس الصوت مشكله .
2: المشكله الثانيه عندي لنبه الارباق مشتغله والارباق ماطلع عندي .

3: والمشكله الثالثه عندي d بعض الاحيان اللمبه d تأشر وانا ماشي واذا حطيته على الn والا على اي وضعيه برضه تكون لنمبه الdتاشر مدري يمكن عشان اذا احتر القير والا مدري وش السالفه واذا طفيت السياره طفت اللنمبه .

4: والمشكله الرابعه اذا غيرت الوضعيه من n الي d يتاخر شوي ثمن تمشي حتى في r .

5: والاخيره عندي النور انا ركبت نور الماني مو حق الوكاله بس اذا جيت على مطب او شارع غير متساوي النور يتحرك وش السبب مع ان الشمعه كلها وكاله ...

واسف على الاطاله وياليت القى حل لمشكلتي لاني من جد تعبت والسياره 6 سرندل

وشكرا

**faisal_339** · 28-07-2009, 09:10 PM

**faisal_339** · 28-07-2009, 10:04 PM

مافيه احد يقدر يساعدني :(

**YuSuF** · 28-07-2009, 10:15 PM

حرف الd
إذا قعد يأشر يعني مشكلة في الجيربوكس بس انت غير زيت الجير بوكس وشوف إذا راح التأشير الحمدلله
إذا ماراح والسيارة ماشية بشكل طبيعي احتمال يحتاج برمجة كمبيوتر وبس روح لأي محل جيربوكس وبيفيدك في البرمجة

**YuSuF** · 28-07-2009, 10:16 PM

النور أعتقد إنه عادي يهز
عندي أكورد 2006 ويهز النور بس مع المطبات القوية شوي يعني لو كان الشارع معدوووم

نسيت أقلك أخوي اصبر شوي لما يرجعوا الشباب بيوتهم بيردوا عليك اللي عنده دوام واللي عنده شغلات ثانية اعذرهم
بس بإذن الله رح تشوف اللي يسرك

**faisal_339** · 28-07-2009, 10:19 PM

الله يعطيك العافيه مشكور على الرد بس انا توني مغير زيت القير

والنور حتى اذا وطيت على عيون القطط اللي على الشارع يهتز

**faisal_339** · 28-07-2009, 10:22 PM

الله يجزاك الف خير وانشاء الله القى حل لمشكلتي معاكم

انا في انتظار البقيه ...

**عبودي 2009** · 28-07-2009, 11:26 PM

وعليكم السلام اخوي فيصل
بالنسبه للصوت الي تسمعه اعتقد انه مو من المكينة لان صارت معاي وطلع الصوت من الدبة الكنداسه الي تحت المكينة وغيرتها وراح الصوت
ولمبة الايرباق اعتقد انه في خلل في نظام التشغيل والخلل انشاء الله بسيط
ولمبة الd صارت معايا في سيارتنا الفورد وغيرنا الزيت والفلتر الجيربوكس والحمدلله انتهت
وبالنسبه للنور اعتقد ان الاسلاك حقته يبالها ربط من جديد
وبالتوفيق اخوي فيصل

**عراقي وافتخر** · 29-07-2009, 12:10 AM

المشكله بلاسلاك الربط جائز غلط جيك عليه

**موسيقار** · 29-07-2009, 08:57 AM

أخوي أطمن سيارتك ما فيها شي

خذها مني والله نفس الحالة صارت معي اللمبة على وضع d أو أي وضعية تولع وتطفي ( تأشر )على طول وكذلك أمبير السرعة يرتفع لحاله حتى لوكانت السيارة واقفة ولما أدعس أحس بصوت المكينة غير شكل مرة يكون عزمها طايح ومرة يكون طبيعي جلست أفكر في السبب مرة أقول يمكن الكنداسة ومرة أقول يمكن القماشات تحك في الهوب .

على العموم الصوت هذا كله بسبب فيش الحساس يمكن مو مركب مضبوط يمكن مع الحادث انفك أو تحرك شوي
أنا صلحت المشكلة 10 ريال والله العظيم ما أكذب عليك والشغلة كلها ما أخذت أكثر من دقيقة .

أنت من وين بالضبط لو بالشرقية راح أدلك على ورشة راح ترتاح منها
طبعاً لو مشكلتك نفس مشكلة سيارتي فاطمن ما راح تتعب .

بالنسبة لاسم الحساس أو الفيش بالضبط ما أذكر اسمه .

على العموم يا أخي أنا عندي احساس ان مشكلتك 90 % مثل مشكلتي

**faisal_339** · 29-07-2009, 10:38 AM

يعطيك العافيه يا شباب

بس انا غير الزيت القير ونفسه بس ماتاشر اللمبه الا بعد مايحتر القير او بعد مالف بسياره كثير

اما العزم نفسه مايضعف بس الصوت في المكينه اذا دعست بقوه يطلع الصوت كانه دبه اومكتوم طبعا وانا ماشي اما اذا واقف ودعست لا طبيعي

والقير اذا حطيته على n ثمن d يتاخر 3 ثواني ثمن تمشي

وطبعا انا من الرياض اذا احد يعرف مهندس او كهربائي ياليت يقولي ويجزاه الف خير

**الـمـسـافـر** · 29-07-2009, 06:29 PM

1: عندي صوت اذا دعست بنزين بقوه الصوت هذا في المكينه كاني مركب دبه او شي زي كذا الصوت ضخم وتعبت من جد والعزم نفسه مو ضعيف عادي بس الصوت مشكله .
شيك على الفلتر وتاكد من تركيبه يمكن يكون منه
2: المشكله الثانيه عندي لنبه الارباق مشتغله والارباق ماطلع عندي .
افصل البطاريه وارجع ركبها واذا ما راحت ممكن تفصل اللمبه من الطبلون نهائي
3: والمشكله الثالثه عندي d بعض الاحيان اللمبه d تأشر وانا ماشي واذا حطيته على الn والا على اي وضعيه برضه تكون لنمبه الdتاشر مدري يمكن عشان اذا احتر القير والا مدري وش السالفه واذا طفيت السياره طفت اللنمبه .
سوي لها فحص كمبيوتر يمكن المشكله بسيطه

4: والمشكله الرابعه اذا غيرت الوضعيه من n الي d يتاخر شوي ثمن تمشي حتى في r .
نفس الشي عند واحد من الشباب بالمنتدى اذا سقت سيارته كذا يصير

5: والاخيره عندي النور انا ركبت نور الماني مو حق الوكاله بس اذا جيت على مطب او شارع غير متساوي النور يتحرك وش السبب مع ان الشمعه كلها وكاله ...
اغلب الاكورد فيها رجه بالنور والسبب من ميزان رفع النور حساس جدا

انا فكيته وركبته من جديد مع الشد عليه وخفت الرجه بالنور

**faisal_339** · 29-07-2009, 09:45 PM

الله يعطيكم الف عافيه ومشكورين على الردود

بس هل هو من فلتر الهواء والا ايش ؟؟

2: فصلت البطاريه نفسها ما تغيرت

واي احد عنده اضافه ياليت يخبرني وجزاكم الف خير