أحب استفتيكم دايما في شؤون أكوردتي

**إنسان** · 24-01-2007, 10:28 PM

السلام عليكم
الله يحيي كل اللي دخل ..
سيارتي هوندا أكورد 2005 ستاندر ..
عندي فيها مشكلتين جننتني ..
قبل أسبوع قلت لازم أغير كفرات الوكالة اللي هي دنلوب ..
لفيت أدور على كفرات سرعة عالية V زي اللي كانت فيها ..
لقيت هانكوك .. وما أبغاها لأني مجربها في أكثر من سيارة كويسة لكن مزعجة ..
لقيت مثل اللي من بلدها دنلوب .. لكن السعر خلاني أشيل فكرة إني أركبها خاصة إنها مزعجة .. والواحد وده يغير ويجرب كفرات ثانية ..
لقيت فالكين .. لكن نصحني أحد الزملاء بأني أبعد عنها بسبب عمرها القصير ..
لقيت بريجستون .. لكن قاسي بشكل لا يطاق .. وسعره مرتفع .. حتى ضمان ما عليه
وأخيرا لقيت كونتينيتال ( عجزت اكتبها ) سايم تايرز .. صناعة ماليزية .. مع ضمان سنة وبسعر مغري جدا 185 ريال للكفر .. استشرت أكثر من محل بنشر .. وكأني ما أبغاها .. ما لقيت أحد إلا ومدحها وقالوا يكفي إنها من كونتينتال .. سألت عن وكالتها .. ورحت لهم .. وأخذت طقم بسعر 190 مع التركيب والترصيص .. بتاريخ الأسبوع 47 من عام 2006 .. يعني جديدة ..
بعد التركيب .. الكفر رائع بمعنى الكلمة لا صوت ولا إزعاج .. لكن اللي قاهرني .. بعد ما خرجت من عند وكالته .. صرت أحس برجه في السرعات اللي فوق الـ 100 .. رجعت لهم .. وسووا ترصيص مرة ثانية .. وصارت الرجه بعد الـ 120 .. رحت لوكالة فايرستون .. وعملت عندهم ترصيص قلت يمكن ترصيص وكالة الكفرات أي كلام .. وخليتهم يبدلوا الكفرات اللي قدام ورا .. ونفس النتيجة فيه رجه .. رجعت لهم مرة ثانية وسويت زحمة ورصصوه مرة ثانية .. وشفت بنفسي إن الكمبيوتر يعطي الوزنية صفر من الداخل والخارج .. يعني شغلهم مية المية .. عملنا وزنية للدريكسون بالكمبيوتر .. والرجه باقي .. قالوا يمكن من الجنوط لأنها ماليزية .. لكن أنا مو مصدق لأنها مركبه لها سنتين وما عمري حسيت برجه مع الكفرات الأولى
طيب من إيش هالرجه ..
المشكلة الثانية ..
رحت أشيك على الفرامل .. لقيت الخلفية للمرة الثانية تحتاج تغيير .. والأمامية ما شاء الله أكثر من النص باقي ..
جيت أبغى أغير القماش الخلفي بالوكالة .. قالوا التركيب بـ 150 ريال قلت تنامون يا حرامية .. الشغلة كلها مسمار في اليمين ومسمار في اليسار ..
أخذت القماش الأصلي بمبلغ 192.80 ريال ورحت لورشة برا .. وغيرته بـ 25 ريال .. وقلت لهم سووا تنظيف للقماش الأمامي .. لقينا القماش الأمامي من النص فيه مثل الكسر .. والمشكلة في الجنبين .. طيب من إيش الكسر قالوا ما ندري .. يكون صناعته كذا .. قالوا إذا فيه رجه لما تدوس الفرملة معناته يحتاج تغيير وإذا ما فيه .. وضعك سليم ..
المشكلة .. هل الشرخ هذا طبيعي خاصة إنه في الجنبين .. بعدين رغم عملية التنظيف لكن طلع لي صوت رهيب من الفرامل الأمامية .. مو دايم لكن أحيانا ..
أبغى رد من الحلوين على هالمشكلتين ..
ونعتذر عن الإطالة ..
شكرا

**922** · 25-01-2007, 12:10 AM

لسلام عليكم

اول مشكلة ...

حلها الترصيص الارضى

يعني يرفع السيارة ويضع جهاز يقوم بعملية فحص اتزان الاطار وهو مركب في السيارة والفني يدوس بنزين
وهو ادق ترصيص من العادي
ماادري انت وين لكن في الرياض في الصناعية القديمة
عندك ميزان الدرع او المجد او العضيب كلهم تخصص ترصيص وميزان وفرامل والتعليق بشكل عام

المشكلة الثانية ..
مايصير تغير الفحمات بدون خرط هوبات
لانه عادة الهوب بعد كل تغير فحمات يكون فيه مشاكل وزن وتاكل غير متساوي ويعدم الفحمات الجديدة
ويرج ويطلع اصوات مزعجة ..

الشرخ هو صناعته كذا موجود فراغ بين الفحمتين لقصد التبريد وهذي بحد ذاتها ميزة رائعة
شكلهم متعودين على فحمات التويوتا تجي قطعة وحدة

واي خدمة انا حاضر

تحياتي
محمد

**إنسان** · 25-01-2007, 01:23 AM

حلها الترصيص الارضى

هو الترصيص اللي يكون بالكمبيوتر ؟؟
لأنهم دلوني على وكالة يوكوهاما .. قالوا تلقى عندها ترصيص بالكمبيوتر .. لكن كنت أظنه الميزان العادي ..

مايصير تغير الفحمات بدون خرط هوبات

المشكلة عمر القماش باقي فيه النص .. بس أقلقوني بسالفة الشرخ اللي فيه ..

لانه عادة الهوب بعد كل تغير فحمات يكون فيه مشاكل وزن وتاكل غير متساوي ويعدم الفحمات الجديدة ويرج ويطلع اصوات مزعجة ..

هم قالوا لي عندك الهوب يحتاج خرط وراح يسبب لك أصوات وممكن هو يكون سبب شرخ القماشات ..

الشرخ هو صناعته كذا موجود فراغ بين الفحمتين لقصد التبريد وهذي بحد ذاتها ميزة رائعة
شكلهم متعودين على فحمات التويوتا تجي قطعة وحدة

المشكلة إن الشرخ ما هو مستوي .. يعني تقول مثل الأنهار اللي تجي بالخرايط .. لكن من نص القماش اللي يركب في الهوب الخارجي ..
أخوي 922
يعطيك العافية

**دكتور هوندا** · 25-01-2007, 11:42 AM

يا اخوي . و الله عندي نفس مشكلتك بس صابر .

انا عندي رجه في الطاره يوم ادوس فرامل شويه ؟؟مدري ايش الحل .

غير الريحه اللي تطلع بعد ما اخذ مشوار كرف .مدري وش ريحته ؟؟؟؟؟:(

**922** · 25-01-2007, 12:03 PM

السلام عليكم

هذي فحمات الاكورد 2003 الى 2007

لاحظت الشرخ
مع الاستعمال يتجمع برادة الفحمة في الشرخ ومايبين منه شى الا خط متعرج ولو حكيته بمفك
يطلع لك خط متساوي زي اللى في الصورة ..

فمعناه شئ طبيعي ولا تشيل هم

الترصيص الارضى او مايسمى بالكمبيوتر يوزن لك الجنط والكفر والهوب واي شى يدور مع الكفر
ويكون دقيق 100 % اكثر من العادي

اذا ماانحلت المشكلة معنها الكفرات فيها خلل تصنيعي او تاريخ تصنيعها قديم اكثر من سنتين

تحياتي
محمد

**إنسان** · 25-01-2007, 01:51 PM

دكتور هوندا ..
الله يعينك ..
الحمد لله لا ريحة ولا يحزنون ..
أشكر مرورك ..
--------------------------
أخوي 922
الله يريحك مثل ما ريحتني ..
شكلي بروح اليوم للورشة اللي قعدت تلف وتدور علي وتقول القماش يحتاج تغيير لأنه مكسور ..
الله يستر لا يكون الكفر فيه خلل تصنيعي .. ونرجع نتضارب معاهم ويخصمون مدة الاستهلاك .. وانت أعرف بالتجار الحرامية .. حقه قبل حقك ..
يعطيك العافية ..

**accord 06** · 25-01-2007, 04:19 PM

ما قصرت و الله يا محمد

الله يعطيك الف عافيه

--------------------

اخوي انسان

بالنسبه لرجه الدركسون انا عندي نفس المشكله
مع ان جنوطي اصليه و الكفرات ميشلان

اول ما استلمت السياره كانت تمام لكن مع اول ترصيص للكفرات
جتني رجه خفيفه مع ان الترصيص مضبوط

ان شاء الله اذا لقيت حل بعطيك خبر

**أنتراوي** · 25-01-2007, 10:39 PM

بالنسبة للترصيص الأرضي

فأفضل محل هو العضيب في الصناعية القديمة في مدينة الرياض

والسعر 80 ريال تطلع السيارة من عندهم وكالة

.............

بالنسبة للفرامل فهذا عيب مصنعي من شركة اكورد
إذا مشيت 140 وضغطت على الفرامل يطلع صوت في الفرامل

ورحت للوكالة وغيروها لي على الضمان لكن يجب دفع 170 ريال شغل يد

وطلعت من عندهم والأمور تمام وبعد أسبوعين رجعت المشكلة

ووديتها عندهم للمرة الثانية وغيروها كمان

الهوبات مع الفحمات

وإلى الآن الأمور ماشية تمام

**إنسان** · 27-01-2007, 12:21 AM

بالنسبه لرجه الدركسون انا عندي نفس المشكله
مع ان جنوطي اصليه و الكفرات ميشلان

طيب ايش رايك ..
بحكم إن عندك فلوس كثيرة وما تبغاها ;) تسوي ترصيص أرضي وتعلمني وش يصير معك ..
يسعد لي مساك أخوي ..
-------------------------------

بالنسبة للترصيص الأرضي
فأفضل محل هو العضيب في الصناعية القديمة في مدينة الرياض
والسعر 80 ريال تطلع السيارة من عندهم وكالة