في مشكله عندي بالبدي

[المهاجر333]

السلام عليكم ورحمة الله وبركاته

أخواني أولاً الله لايحرمنا منكم ومن فزعاتكم اللي ماهي غريبة عليكم
ثانياً عندي في أجزاء من البدي زي الغراء الأبيض وحاولت إني أنظفة مافي فايدة
بعدين قلت بس حليتها ؟ ورحت أقرب مركز تلميع وحاولوا يوخرونها برضوا مافي فايدة :(
قلت مافي إلا أشتري ملمع البدي مع قطن وأسويها بنفسي طبعاً حاولت وحاولت كثييييير بس للأسف مافي نتيجة
والله ياشباب ضاق صدري حيل
وش أسوي

[المباشر]

حاول تجرب على جزء بسيط وتفركها بديزل واذا راحت تعال أقولك وش تسوي بعدها

ومر مغاسل البخار وجرب اذا يروح ولا مايروح والأهم جرب الديزل أول وبعدين نشوف وضعك

[المهاجر333]

طيب أخوي المباشر إن شاءالله راح أسويها
المشكله سويت بدايتها بنزين وزيت فرامل ولا نفع
بس على فكرة مافي تأثير على البدي نهائياً
أخاف تروح البويه ولا يطلع مكانها أسود علماً بأن بويتي لؤلؤي
وشكراً

[الـمـسـافـر]

البنزين وزيت الفرامل قويه على البدي

جرب اول الديزل لانه يروح القار حق الاسفلت من البدي

[المهاجر333]

توكلت على الله وراح أسويها
بس والله متخوف على البويه يروح

[الله يجيبك يا اكورد]

أنت توكل على الله وجرب في جزء بسيط بس تجربه وشوف النتيجه

[المباشر]

حبيب قلبي

سوها وأنت مطمئن

طريق رأس تنورة مليان شاحنات محملة بالقار من مركز تزويد أرامكو رأس تنورة والضحية سياراتنا اذا جينا نعدي منهم تحصل نقط قار صغيرة بكامل السيارة

وأبشرك ترى رشيت سيارتي كامل بديزل 3 مرات على شهور متفاوته وبعدها غسلتها ولمعتها اليوم الثاني وكل شي تمام مع أستخدام ملمعات خاصة لترطيب جلد الأبواب والفتحة سبق ذكرتها في احد المواضيع

والحمدلله اللي يحكم على نظافة سيارتي ماشاء الله تبارك الله هم اللي شافوها من النادي

وانت محتاج تحط ديزل على المكان المطلوب بس مع فركها بشكل جيد وبعدها لمع السيارة اذا راح

[المهاجر333]

الله يعطيك العافية أخوي المباشر
والله ماقصرت
وماقصروا الشباب اللي شاركوا

[المهاجر333]

أهلين شباب
سويت بنزين وسويت زيت فرامل ولمعتها عند مركز التلميع
وطبقت كلام أخوي المباشر بخصوص الديزل
ومافي أي فايدة كل هذي والله أحترت من الشي هذا
الدعوة عناااااد يعني مافي أمل يطلع من البويه :p
وآخر شي الصراحة إستسلمت بالأمر الواقع :(
وشكراً لكم جميعاً

[برينجلز(الآصلي)]

طيب نوع الماده وش

لكل ماده خصائص كيميايه واكيد فيه شي يفككه تاكد من الماده

[المهاجر333]

والله وانا خوك
إني ماأدري وش المادة اللي ماودها تطلع من البدي
حيرتني كثيرمافادها أي شي
غريبة

[اللي تغليه ياشين فرقاه]

أهلين شباب
سويت بنزين وسويت زيت فرامل ولمعتها عند مركز التلميع
وطبقت كلام أخوي المباشر بخصوص الديزل
ومافي أي فايدة كل هذي والله أحترت من الشي هذا
الدعوة عناااااد يعني مافي أمل يطلع من البويه :p
وآخر شي الصراحة إستسلمت بالأمر الواقع :(
وشكراً لكم جميعاً

عطنا صور نشوفها

[المهاجر333]

مشكور أخوي
بس للأسف ماأعرف توني عليمي بتنزيل الصور
ولا كان ودي

[المباشر]

الله يعينك ومالك الا محاولة أخيرة مع أننا أتعبناك بالحلول وماطلعت بنتيجة

تروح مغاسل البخار وتخليه يصك البخار على الغراء لين يلين ويصير سهل الأزالة وهذا الحل النهائي واذا ماطلعت بنتيجة الله يعينك تستلم وترضى بالأمر الواقع

طبعآ البخار راح يكون حار ويمكن ينفع معاك

وش هالغراء اللي مش راضي يروح ؟؟؟ من أي نوع

[الدكتور محمد]

الله يعينك والله مشكلة حقيقية ..

[المهاجر333]

يعطيكم العافية ياشباب
أنا تعبت من الشي هذا
وقلت خلاااااااص أنا إستسلمت