تجربتي مع تغيير فلتر الجيربكس للاكورد 2004

**متصفح** · 26-09-2009, 05:58 PM

السلام عليكم ورحمة الله وبركاته

في البداية سعيد لانظمامي لهذا المنتدى الكبير بأعضائه الي ملاحظ جهودهم الرائعه

في كل مايخص سيارات هوندا من كل النواحي... بصراحه المنتدى

الحقيقه من فتره ودي اكتب عن الموضوع بس ماينفع يكون الموضوع منقول لان كثر

النقاش والجدال حول عدم وجود فلترللجيرالاتوماتيكي يمكن تغييره وقلت لازم اقتنع

بالموضوع واغيره بنفسي واشوف النتائج وبعد كذا انقل التجربه عشان تعم الفائدة

اكيد الكل ملاحظ واغلبنا سأل الوكالة عن فلتر الجير وكل الي نسمعه منهم ...يتغير مع

التوضيب ...وانا بصراحه مو مقتنع بفكرة جير اوتوماتيكي بدون فلتر يتغير باستمرار

لان هناك شوائب تطلع في اي جير خاصة الاتوماتيكي

ومن خلال صولاتي وجولاتي في المواقع الاجنبيه اكتشفت ان الاكورد لها فلتر داخلي

ومثل ماقالوا مهندسين عبدالله هاشم يتغير مع التوضيب ( سياسة الشركة المصنعة )

وموضوعه منتهي بالنسبة للجميع وفي فلتر اضافي يكون خارج الجير ....وهذا

موضوعنا اليوم

ملاحظة : هذا الموضوع خاص بسيارات هوندا اكورد (2003-2007) فقط.

في البداية هذي صورة توضح الجير الاتوماتيكي لأكورد 2003 وفيها توضيح لمكان

الفلتر الي اقصده للاربعه سلندر

وهذي صورته للسته سلندر 2003

الى قبل فترة بسيطة كنت غير مقتنع بفكرة تغييره ...( يسمع كلام الوكالة ) وقرأت

نقاشات كثيره في موقع اجنبي حول تغييره وتجاربهم مع تغييره وكانت ايجابية على

الرغم وكالة هوندا في امريكا لا تعتمد تغيير الفلتر في جدول الصيانة وبعض مستخدمي

هوندا بامريكا كان يستبدل فلتر الوكالة بنوع اخر مزود بقطعة مغناطيسية ذو كفاءه عاليه

عشان تمسك الشوائب لأن فلتر الوكالة فكرته بسيطة جدا ويشبه فلتر زيت المكينة من

حيث المواد المصنوعة وحبيت انقل بعض الصور المثيرة للجدل....!!!

هذا فلتر هوندا اكورد 6 سلندر اثناء عملية التغيير لقيتها في احد المواقع الاجنبيه

بعض مستخدمي هوندا في امريكا قرروا استبدال فلتر الوكالة بفلتر بديل يحتوي قطعة

مغناطيسية لكي يكون فعال بصورة كبيره وهذي صورته اثناء تغييره بعد مسافة اقل من

60 الف كيلو ونلاحظ الشوائب موجوده بكثره

اعتذر عن حجم الصورة الصغير لكن سيرفر الموقع الاجنبي معطوب من يومين ونقلت الصورة من قوقل وسوف يتم تغييرها في اقرب وقت

المهم بعد كل الصور قررت اروح للوكالة واسأل عن الفلتر واشوف وش السالفة

وسألت الموظف وشرحت مكان الفلتر وقال هذا فلتر جير خارجي

اشتريت القطعة وهذي الفاتورة...لاحظ اسم القطعة فلتر جير اوتوماتيكي !!

وهذا الفلتر ورقم القطعة

وهذا مكان الفلتر بالنسبة للاربعة سلندر من تصويري

وشرح بسيط لطريقة تغييره

طريقة تغيير الفلتر مو صعبه كل السالفه مسمار مقاس 10 الي يثبت الفلتر عشان مايتحرك من مكانه ولو تلاحظ الاهواز مشبوكه في الفلتر

بواسطة ( قفيز او مشقبيات او Clip ) هذي ترخيها وتبعدها عكس اتجاه الفلتر عشان تقدر تسحب الاهواز ويتحرر الفلتر

الموضوع نقدر نسميه سهل ممتنع ...لان مكان الفلتر ضيق صعب تاخذ راحتك في عملية التغيير

والي يغير الفلتر بنفسه ممكن يفك غطا فلتر الهوا مثل الي بالصورة عشان ياخذ راحته

وهذي صورة من كتيب صيانة هوندا (وليس دليل المالك) فيها شرح لتغيير الهوز ولكن

الفلتر موجود بالصورة (الشركة معترفه ان القطعه فلتر جير

)

هذي طريقة تغيير الفلتر للاربعه سلندر بالنسبه للسته سلندر اصعب شوي لان مكان

الفلتر تحت صندوق فلتر الهوا للسياره وطريقة تغييره مختلفه وهذي صورة توضيحية

فقط لمكان الفلتر للفائدة نقلتها من موقع اجنبي

طبعا انا غيرت الفلتر ومااخذ وقت طبعا بعض ورش هوندا قالوا ياخذ وقت ونحتاج فك

بعض القطع وسالفة طويله وبسعر 150 ريال

لكن شفت الموضوع مو اختراع

وقلت اغيره بنفسي..

الفلتر مقفل وماتقدر تشوف غير الغلاف الخارجي الحديد للأربعه سلندر لكن حبيت

تشوفوا الفلتر ...

( تم قطع الفلتر بالمنشار للتوضيح )

شكل الفلتر مايبشر بالخير :d

الملاحظات بعد تغيير الفلتر :

بعد تغيير الفلتر + زيت الجيربكس لاحظت سلاسه ونعومه في تغيير النمر افضل من

السابق وبشكل ملحوظ

انا مهتم بتغيير زيت الجير وغيرته على الفترات

40 - 80 - 120 - 160 - 180 - 207.000 و 225.000 < اذكروا الله ...

لاحظوا اخر ثلاث تغييرات كنت اغيرها في وقت قليل وكل مااغيره البنشري يقوول

الزيت جديد ليش تغيره وللأسف كنت مفتقد سلاسة الجير المعهودة

لكن بعد تغيير الفلتر عرفت وين الخلل

---

انتهت التجربة لكن خلونا نتناقش عن اسباب ضرورة تغيير الفلتر من وجهة نظري.

ممكن البعض يسأل ويقول اذا شركة هوندا مو معتبره تغيير الفلتر من الصيانة الدورية

(حتى بأمريكا نفس الكلام) يعني اكيد مافي داعي يتغير... في هذي الحالة اجاوبك

في البداية هذي صورة توضح طريقة عمل الفلتر

نلاحظ اذا كان الفلتر ممتلئ بالشوائب بعد فترة طويلة من الاستخدام راح يمررالزيت

بدون فلتره يعني وجود الفلتر في الحالة هذي مثل عدمه وهذا الاجراء (وضع صمام ينفذ

الزيت بدون فلتره) من باب السلامة لكي لا يتوقف مرور الزيت ويسوي مشاكل ويتوقف

مبرد زيت الجير عن العمل و في هذي الحالة يكون تركيز الفلتره على الفلترالداخلي

فقط !!

النقطة هذي هي الي اقنعتني بتغيير الفلتر للمحافظة على اداء الجير وعدم تركيز عملية

الفلتره على الفلتر الداخلي فقط وبنفس الوقت تعتبر صيانة احترازية مثل مايسموها

لاطالة عمر الجيررر لمسافات طويلة بإذن الله

وهذي صورة توضح الصمام المقصود الي يمرر الزيت في حالة امتلاء الفلتر

بالإضافة الى تجارب مستخدمي هوندا الايجابيه بعد تغييره في امريكا وايضا بعد تغييره

وجدت نفس النتائج

ملاحظة : الموضوع عبارة عن وجهة نظر شخصية والهدف هو نقل تجربتي وبحثي

لأعضاء المنتدى لتعم الفائدة للجميع....اقتناعك بالموضوع او عدم اقتناعك لا يعني

ضرورة تغيير الفلتر وكل واحد ادرى بسيارته

الموضوع مفتوح للنقاش والاستفسارات واتمنى من الي سبق وغير الفلتر يكتب تجربته

وملاحظاته بعد التغيير لتعم الفائدة للجميع

تم اضافة استطلاع اتمنى من الجميع المشاركة

بعض الصور منقوله من مواقع اجنبيه

في النهاية اتمنى من الله اني وفقت في كتابة اول موضوع لمتصفح نادي محبي هوندا

فما كان صواب فمن الله وماكان خطأ فمن نفسي ومن الشيطان

والسلام عليكم ورحمة الله وبركاته

**King** · 26-09-2009, 06:12 PM

عمل ممتاز أخي المتصفح

بارك الله فيك

راح اثبته لعيونك ولجهودك

* هذه باقي الملفات بالمرفقات إن لم تظهر لديكم

**mr.lonely147** · 26-09-2009, 10:15 PM

يعطيك الف عافية
الصراحة كلامك مقنع

لكن السوال عن ال2008 وال 2009 :o

وش الحل معهم :(
في احد جرب التغييير؟

**اكووورد مجنونه** · 26-09-2009, 10:45 PM

اخوي متصفح بارك الله فيك وجعل ذلك في ميزان حسناتك وانا فعلا غيرته قبل4شهور بعد توصيه من مهندس في مركز مايز ولاحظت فرق كبير جدا بعد ما كنت اشتكي من رجه بعد التعشيقة الاخير ه واختفت والحمد لله
اكرر شكري العميق لك وعلى التقرير الاكثر من روعه ويستاهل التثبيت

**HONDA HAILL** · 26-09-2009, 11:05 PM

يعطيك العافيه يامتصفح ,,,,,,,

صراحه انا ما غيرته ولا كنت اعرف انه فيه فلترين للقير ,, وسألت المهندس اللي بوكالة حائـل يقول ما يحتاج تغيير لانه ماله اي فايده سواء غيرته او لا >>>>>>> بالله هذا كلام واحد فاهم ومهندس ,,,,,,

لاكن بعد تقريرك صراحه مجنون اذا ما غيرته بكرا ..

(((بعدين لو تلاحضون ان الوكاله تقول ما يحتاج تغيير ومن هالكلام >>>> وهم المستفيد الأول عند ما يخبط القير وتروح لهم تشتري قطع غيار للقير وهذا اذا ما غيرته عندهم )))

**المباشر** · 27-09-2009, 12:15 AM

ماشاء الله تبارك الله عليك

الله يزيدك من علمه وفضله يارب ، وهذه المواضيع المطلوبة لتوضيح الكثير من أسرار الأكورد

بصراحة يعجز اللسان عن ايفائك حقك ولكن لا قول لي الا جزاك الله خير على جهدك ونشاطك وموضوع الحلو

وشكري لمن ثبت الموضوع وان شاء الله نتحمس ونطق الفلتر وأركبه لأن عندي التعشيقات أشوف فيها ملاحظة صايره مش مثل قبل والزيت جديد ، يعني أكيد من هالفلتر النشبة

بيض الله وجهك وان شاء الله تسمعون أني مغير الفلتر بفضل من الله ثم بمجهودك وموضوعك

**accordyon** · 27-09-2009, 01:28 AM

يعطيك العافية مجهود جبار وعمل متقن

بس سؤال بسيط/ اذا فكيت الفلتر بيطلع زيت؟ يعني كمية كبير تحتاج انك تزود الزيت
مرة ثانية مشكور على الموضوع الأكثر من رائع

**TOP MAN** · 27-09-2009, 01:39 AM

^^^^^^^^^^^

جزاك الله خير والله يكتبه في ميزان حسناتك

نفس السؤال لأني ها اليومين إن شاء الله بغييير زيت القير !!

**المباشر** · 27-09-2009, 01:41 AM

أتوقع كمية قليلة لأن واعتقادي ان الزيت يمشي فيه اذا أشتغلت السيارة ويفيدنا

متصفح بالكمية

**متصفح** · 27-09-2009, 03:02 AM

في البداية كل الشكر لمشرفنا King على تنسيق الموضوع وتثبيته

mr.lonely147
اكووورد مجنونه
HONDA 921
المباشر
أأح2024 بيج
TOP MAN

الله يعافيكم ان شاء الله وشاكر مروركم على الموضوع

**متصفح** · 27-09-2009, 03:16 AM

السوال عن ال2008 وال 2009

الى الان ماعندي معلومات للأسف لكن مكان الفلتر مو صعب وممكن تشوف بنفسك وتفيد
باقي اصحاب الموديلات الجديدة

انا فعلا غيرته قبل4شهور بعد توصيه من مهندس في مركز مايز ولاحظت فرق كبير جدا بعد ما كنت اشتكي من رجه بعد التعشيقة الاخير ه واختفت والحمد لله

اشكرك على توضيح التجربه

بس سؤال بسيط/ اذا فكيت الفلتر بيطلع زيت؟ يعني كمية كبير تحتاج انك تزود الزيت مرة ثانية

قبل مااغير الفلتر كانت السياره متوقفه تقريبا 10 ساعات وماطلع غير قطرات بسيطة مااثرت على
مقياس الزيت
بالنسبة لاصحاب السته سلندر اتوقع يطلع كمية زيت ويحتاجوا اضافة زيت للجير بالاضافة الى طريقة تثبيت الفلتر في القاعدة لانه يحتوي على زنبرك صغير يحتاج تثبيت بطريقة معينه عشان كذا انصحهم بتغيير الفلتر عند ورشة مضمونه لان تغييره مو بسهولة الاربعه سلندر بس فك وركب (مما قرأته )

**AliAhmed** · 27-09-2009, 04:38 AM

يعطيك الف عافية ... وان شاء الله رايح الوكالة ومشتري الفلتر ومركبه في البيت بعد

بس ياريت توضح طريقة التركيب بشكل مفصل اكثر ..

والى الامام ...

**assassin_vip** · 27-09-2009, 06:18 AM

ما قول الا الله يجزيك الف خير على التوضيح وفي اعتقادي مافي فلتر في العالم يركب وماله فايدة او ما يتغير زي ما تقول شركة هوندا وغير كذا حتى لو تم تغيره وهوه ما يحتاج زي ما تقول شركة هوندا المبلغ مهو ذاك الي يهز الميزانية !!

بس هل يا ترى كل الهوندات فيها نفس الفلتر الخارجي هذا ؟؟ خصوصا لهوندا السيفك 2008 ؟؟

**بلال العلمي** · 27-09-2009, 08:45 AM

ماشاء الله عليك اخوي ربي يزيدك من علمه ما شاء الله

بالنسبة للفلتر هذا اخوي استغربت من الوسخ اللي شفته بصراحة المفروض ما يكون موجود بس الفلتر الداخلي اخوي فيه مغناطيس

ويشيل الوسخ والامور هذه بس كونه الزيت يمر ويسد الفلتر العلوي هذا معناه ان الزيت نفسه يكون فيه ترسبات بسبب الضغط وهذه تخرب القير

طيب اخوي ما عندك فكرة عن المسافة اللي المفروض اغيرها فيه ؟؟؟

**ي ح ق السـعوديـة 0 0 3** · 27-09-2009, 09:09 AM

لا هنت وتقريير متعووب عليه
تحيااتي..

**متصفح** · 27-09-2009, 05:11 PM

AliAhmed
assassin_vip
بلال العلمي
ي ح ق السعودية 300
ملك مملكة جدة

مشكورين على المرور ياشباب لاهنتووا

**متصفح** · 27-09-2009, 05:34 PM

هل يا ترى كل الهوندات فيها نفس الفلتر الخارجي هذا ؟؟ خصوصا لهوندا السيفك 2008 ؟؟

هذا الفلتر موجود في سيارات هوندا خاصة الموديلات الجديدة لكن مو كلها طبعا لكن هذه المهمة ابيكم تساعدوني فيها وهي كل واحد معاه اي سياره غير المذكوره في الموضوع يشوف اذا فيها فلتر او لا ويوافينا بالخبر عشان الكل يستفيد وممكن بعدين نجمع معلومات الاعضاء ونسوي موضوع جديد نحدد فيه السيارات اللي فيها هذا الفلتر والموديلات

طيب اخوي ما عندك فكرة عن المسافة اللي المفروض اغيرها فيه ؟؟؟

اختلف العلماء على هذي النقطة :d
منهم من يقول لا تغيره مافي داعي (شركة هوندا)
البعض يقول يتغير كل 100 الف كيلو
البعض يقول 60 الف كيلو
البعض يقول يتغير في حالة وجود اختلاف في نقلات الجير
رأيي الشخصي اشوف يتغير مع تغيير زيت الجير يعني تقريبا كل 40 الف وسعر الفلتر مو غالي
ولكم الاختيار

اخوي AliAhmed وملك مملكة جدة

طريقة تغيير الفلتر مو صعبه كل السالفه مسمار مقاس 10 الي يثبت الفلتر عشان مايتحرك من مكانه ولو تلاحظ الاهواز مشبوكه في الفلتر بواسطة ( قفيز او مشقبيات او Clip ) هذي ترخيها وتبعدها عكس اتجاه الفلتر عشان تقدر تسحب الاهواز ويتحرر الفلتر
الموضوع نقدر نسميه سهل ممتنع ...لان مكان الفلتر ضيق صعب تاخذ راحتك في عملية التغيير

شوف الصورة الي فيها الفلتر لو تلاحظ لون المشقبيات متغير من اسود الى فضي لاني حاولت ارخيها مرات كثيره وماقدرت يعني اشتري راحتك وروح اقرب ورشه

**أبو روز** · 27-09-2009, 09:17 PM

شكراً لك متصفح مجهود رائع

بصراحه نفتقد اناس مثلك !

عساك على القوة .

**AliAhmed** · 28-09-2009, 03:36 AM

صح كلامك اخوي اياد ..

وخاصة ان العامل الي بيشتغل في سيارتك بتكون ايده قاسية شوي على السيارة .. عكس اذا انت اشتغلت في سيارتك ..

بانتظارك تقرير التغيير (حاول تعجل :d .. معتمد عليك )

**بريق الصحوة** · 28-09-2009, 06:15 AM

جزاك الله كل خير صراحه الكلمات تعجز عن شكرك وتقديرك على هذا المجهود صراحه ما قصرت تسلم تسلم وتسلم ونتتظر الجديد منك

**أغـار يا هـوندا** · 28-09-2009, 11:18 AM

جاري تغيير الفلتر
بس عندي سؤال ياليت تجاوبني إياه
كم تكلفة الفلتر؟؟
وهل اشتريته من وكالة عبدالله هاشم؟؟

**متصفح** · 28-09-2009, 05:31 PM

أبو روز
بريق الصحوة
جزيتم خيرا وشاكر مروركم على الموضوع

أغـار ياهـوندا
اشتريت الفلتر من الوكالة بـ 92 ريال وصورة الفاتورة موجوده بالموضوع

AliAhmed و ملك مملكة جدة
تم تعديل الموضوع واضافة صورتين لعيونكم

**classic_man_83** · 28-09-2009, 08:36 PM

اكثر من رائع ممتاز مشكور جدا على الموضوع وعندي استفسار
1- اداء الجير بعد تغيير الفلتر مختلف بشكل عالي ولا بنسبه بسيطه خصوصا بين التعشيقه الاولى والثانيه ؟

2- هل الرجه على ال d كانت موجوده عندك واختفت او خفت بشكل ملحوظ بعد تغيير الفلتر ؟

3- صوت السياره عند التعشيقات انعم من الاول ولا غير ملحوظ؟

اتمنى الافاده ومشكور على موضوعك الرائع

**AliAhmed** · 28-09-2009, 09:11 PM

بيض الله وجهك ..

الطريقة مو بس سهلة .. اسهل من السهلة ..

جاري التنفيذ

**اكورداوي وافتخر** · 28-09-2009, 09:27 PM

السلام عليكم ورحمه الله وبركاته وبعد التحيه انا مشترك جديد اتمنى تققبلون مشاركتي اما بعد شباب لو سمحتو عندي سؤال كم سعر الاكورد 2005 الفل اوبشن ووش مواصفاتها