قدر الله علي حــادث , ومحتـــاج المشورة..."صور بالداخل"

**ابو عبدالرحمن** · 10-12-2009, 02:21 PM

السلام عليكم ورحمه الله وبركاته..

الحمد لله على كل حــال.. حصل لي حادث بسيط يوم الاثنين الماضي..
وحصل الحادث وأنا رايح للجامعة.. تخبرون الليموزينات ماتخلي أحد في حـاله.. أنا كنت ماشي تمام في طريقي وفجأة يطلع ذاك الليموزين فجأة .. والغريب أنه سعوودي ....
وانتظرنا نجــم ..وجاء والحمد لله الخطأ عليه 100%..

والحمد لله أن الحادث بسيط ..ومايحتاج أني اكبره أكبر من حجمه.. بس تخبرون أول مره يصير لي حــادث مع الأكورد بعد سنتين ولله الحمد.. وماعندي خبره.. وقلت لازم أستفيد منكم..

وهاذي الصور..

دققوا زييين ...

وهاذي صورة التكاية "استغربت وش لون تأثرت "..والمشكلة أني مادريت عنها الا بعد ماوصلت للبيت.. يعني ماتدخل في تعويض التأمين..:(
ولاحضوا الضغاط اللي يفتح التكاية غير موجوود .. طـــــــــار :d

وهــاذي صورة تقدير القطع المطلوبة وأسعارها من قطع الغيار.. ان شاء الله ماأحتاجها كلها..

وهل تنصحوني أروح للوكالة أو لا؟؟ أخـــاف تطول ..

وبعد الحــادث قالي واحد من أخوياي.. ان فيه ورشة للتعديل في المزاحمية ونصحني فيها .. هل تؤيدون أروح لهــا ؟؟
عــاد بعد التعديل أرشها.. ونصحني بواحد اسمه البسام في صناعية مخرج 17 فمارأيكم..!!

والشىء الأخير: وش تتوقعون الأشياء اللي أحتاجها من قطع الغيار..لأن فيه أشياء تعدل وخلاص..وايضا القيمة الاجمالية لاصلاح السيارة

وتقريبا قيمة تعويض التأمين 1500 شغل يد , و3800 قطع غيار.. تقريبا 5300 ريال ..وموعد المراجعة يوم الاثنين الجـــاي ...
ومثل ماقلت لكم يمكن أصلحها بأقل من هالسعر ..

وفي النهاية : اعذروني على الاطالة ..وشكراا

**abdelslam** · 10-12-2009, 02:38 PM

لآ حول ولآقوة إلى بالله

والحمد لله على السلامه , والله ياقطع الغيار غااااااااليه مررره :(

أخوي أنصحك إذآ بتصلحهآ بفلوس التأمين

صلحهآ بآلوكاله وخلهآ تكلف الي تكلف ولآ توديهآ لورشه

والله يأجرك في مصيبتك ولآيبتلينا ..

وبالتوفيق ..

**حبيب هنادي** · 10-12-2009, 02:48 PM

الحمد للهـــ على السلامهــــ :: ))

واللهــ يعوضكـــ خيررر :: ))

وقدر اللهـ وما شاء فعلـــ :: ))

المهمــ تساهل بكل شي الا الرفرفـ لا تسمكرهـ أشتري جديد ولا تشليحـ :: ))

**ghazi** · 10-12-2009, 02:58 PM

اول شي الحمدلله على السلامـــه
نصيحـــــه منـــي اذا بتصلح صلح في الوكالــه
اذا غير الوكاله انصحك بمركز الوفـــاء

**AbuJawad** · 10-12-2009, 02:59 PM

الحمدلله عالسلامة

اخوي الغلط الطرف الثاني 100 %
وبما ان نجم اللي جا مو المرور معناها الطرف الثاني مأمن
وجبت تسعيرة قطع الغيار من الوكالة
باقي تسعيرة من ورش معتمدة بقيمة الاصلااح
وتسلمهم لشركة التأمين وتعوضك بالمبلغ
وكذا تصلح السيارة وترجعها زي الحلاة
يعني امورك تمام التمام

واذا على التصليح انا انصحك بالوكالة
لان لون سيارتك مافي ولا ورشة رح تضبطه
حتى الوكالة بعد بس الوكالة تقدر تشتكيهم :d:d

والقطع رح تكون اصلية من الوكالة

تحياتي لك

**ابو عبدالرحمن** · 10-12-2009, 03:27 PM

المشاركة الأصلية كتبت بواسطة abujawad

الحمدلله عالسلامة

اخوي الغلط الطرف الثاني 100 %
وبما ان نجم اللي جا مو المرور معناها الطرف الثاني مأمن
وجبت تسعيرة قطع الغيار من الوكالة
باقي تسعيرة من ورش معتمدة بقيمة الاصلااح
وتسلمهم لشركة التأمين وتعوضك بالمبلغ
وكذا تصلح السيارة وترجعها زي الحلاة
يعني امورك تمام التمام

واذا على التصليح انا انصحك بالوكالة
لان لون سيارتك مافي ولا ورشة رح تضبطه
حتى الوكالة بعد بس الوكالة تقدر تشتكيهم :d:d

والقطع رح تكون اصلية من الوكالة

تحياتي لك

موجود التسعيرة اللي من الورش.. بس باقي لي أروح للتأمين يوم الاثنين الجاي ..وان شاء الله يعوضوني..
طيب بالنسبة للوكالة: كم بتقعد عندهم السيارة.. أخاف تطوول..؟؟

**المهاجر333** · 10-12-2009, 03:34 PM

الحمد لله على السلامة
أخوي أنصحك ورشة الوفاء
في صناعية الدائري
واحد مصري إسمه أبواسماء
شغلهم مرة ممتاز ويظبطون لك البوية
بس أتوقع صدمتك مايحتاج رفرف
بس صدام

**اكوردsky** · 10-12-2009, 03:58 PM

الحمدلله على السلامه وماتشوف مكروه ان شاءالله
انا انصحك بالوكاله اذا بتصلحها على التأمين .. وان شاءالله لو تكلف 10 الاف
المهم سوها بالوكاله وخل عنك الورش

تحياتي

**AbuJawad** · 10-12-2009, 04:00 PM

المشاركة الأصلية كتبت بواسطة ابو عبدالرحمن

طيب بالنسبة للوكالة: كم بتقعد عندهم السيارة.. أخاف تطوول..؟؟

لازم تسأل الوكالة كم يحتاجو وقت هم ادرى

الافضل انك تاخذ معاهم موعد مسبق وتضبط امورك على انك ما تتعطل

و حاول تقلل من قيمة التصليح
واسأجر سيارة بالفترة اللي حتبقى فيها سيارتك بالوكالة من فلوس التعويض

**ن ع ر السعودية 0005** · 10-12-2009, 04:02 PM

وعليكم السلام ورحمه الله وبركاته
الحمد الله على السلامة أخوي أبو عبدالرحمن وما تشوف شر
أشوف فيه قطع ما تحتاج تغيير مثل الرفرف يحتاج بس تعديل بسيط فقط وميزانيه شمعة النور أعتقد ما تحتاج تغيير وأحساها ما تظررت لانه مكانها يسار الشمعة وبعد قربة المساحات أشوف ما تحتاج تغيير إلا إذا هي متضررة غيرها والصدام أعتقد حقين الفيبر يصلحونه . وعلى ما أشوف أنه ما يحتاج إلا رش صدام بس والباقي تعديل رفرف وتركيب بعض القطع يعني ما أشوف له لزمه أنه تدخلها الوكالة لانهم غالين أو تعدل تركب القطع في أحد الورش وتخلي الوكالة يرشون الصدام بس حتى ما تأخذ وقت وأشوف أنها تأخذ أربع أيام يومين في الورشة ويومين في الوكالة لرش الصدام بس وبكذا كسبت الوقت وأول ما تدخلها الورشة خذ موعد من الوكالة لرش الصدام حتى تطلع موترك بأسرع وقت وأنصحك قبل ما تأخذ قطع الغيار تسعر عند النعماني وبعدها التشليح مع تسعير الوكالة وتشوف الفرق وتأخذه حتى توفر في أشياء يمكن تنقص وتحتاجها .

**ابو عبدالرحمن** · 10-12-2009, 04:18 PM

أشكر الجميع على تفاعلهم.. ولازلت انتظر المزيد..

المشاركة الأصلية كتبت بواسطة ن ع ر السعودية 0005

وعليكم السلام ورحمه الله وبركاته

الحمد الله على السلامة أخوي أبو عبدالرحمن وما تشوف شر

أشوف فيه قطع ما تحتاج تغيير مثل الرفرف يحتاج بس تعديل بسيط فقط وميزانيه شمعة النور أعتقد ما تحتاج تغيير وأحساها ما تظررت لانه مكانها يسار الشمعة وبعد قربة المساحات أشوف ما تحتاج تغيير إلا إذا هي متضررة غيرها والصدام أعتقد حقين الفيبر يصلحونه . وعلى ما أشوف أنه ما يحتاج إلا رش صدام بس والباقي تعديل رفرف وتركيب بعض القطع يعني ما أشوف له لزمه أنه تدخلها الوكالة لانهم غالين أو تعدل تركب القطع في أحد الورش وتخلي الوكالة يرشون الصدام بس حتى ما تأخذ وقت وأشوف أنها تأخذ أربع أيام يومين في الورشة ويومين في الوكالة لرش الصدام بس وبكذا كسبت الوقت وأول ما تدخلها الورشة خذ موعد من الوكالة لرش الصدام حتى تطلع موترك بأسرع وقت وأنصحك قبل ما تأخذ قطع الغيار تسعر عند النعماني وبعدها التشليح مع تسعير الوكالة وتشوف الفرق وتأخذه حتى توفر في أشياء يمكن تنقص وتحتاجها .

أشكرك على المعلومــات اللي ذكرتها..

وأنا مثل ماقلت في الموضوع..فيه أشياء كثيرة ماتحتاج أي تغيير.. مثل الميزانية و قربة المساحات ...

وياليت تعطوني معلومات عن ورشة التعديل اللي في المزاحمية..

**HaMmaM 2008** · 10-12-2009, 05:36 PM

لا يهمك الوقت اكثر ما أن سيارتك ترجع مثل ما كانت

أنصحك اخوي لا تصحلها الا في الوكاله ..!

وان شاء اذا ما كذبني ربي ما تأخذ أكثر من 5 ايام

انا دخلت سيارتي الوكاله تغير باب ونص رفرف معا الرش ما أخذت اكثر

اسبوع .

**فتى زهران** · 10-12-2009, 05:46 PM

والله ياغالي اولا الحمد لله على السلامه

وثاني شي ياغالي فيه ورشه في الصناعية القديمه في الرياض اسمها الوفاء

انا وديت عندهم من كم سنه فورد حق الوالد جاه حادث الله لا يوريك انا قلت مابيصلحوها

لكن يعلم الله انها طلعت تقول وكاااااااااااااااااله

والعذر منك ياغالي المزاحميه ما اعرف فيها ورش لكن الرياض ماهي بعيده عنك

اذا كنت من سكان المزاحمية

يالله الله يعوض عليك والحمد لله على السلامه

جايت بسيطه ياراجل اهم شي سلامة الركاب ماعليك في السواق ما احد قال له يسرع :d

لك وافر الود

**ابو عبدالرحمن** · 10-12-2009, 06:03 PM

للمعلومية أنا من سكان الريــاض.. ولكن واحد نصحني أوديها لهم.. بما أنها تحتاج تعديل فقط..وتغيير الصدام الأمامي..
وايضا ذكر لي أكثر من شخص عن ورشة التعديل هاذي..
فأستغرب أن مافيه ولاواحد يعرفهــا ..!!

**مجوووودي** · 10-12-2009, 06:58 PM

انا راح اسئل واحد اعرفه بالمزاحمية .. وان شاءالله يفيدني وافيدك ..

بس لو تقولي معلومات عنها اكثر عشان اقدر اسئله ..

الورش اتوقع بالمزاحمية كثيرهـ ..

بالنسبة للي يقولون ورشة وفاء ..

مدري عن شغلهم صراحه من ناحية السمركة والتعديل..

بس الرش جيتهم عشان ارش الفيبر اللي تحت البيبان الاسود .. قالي بـ800 ريال ..وهي ماتكلف 200 ريال ..