الموضوع: المقاومات

و عليكم السلام و رحمة الله و بركاته ....

بالنسبة للطريقة الصحيحة للمقاومات ... فهذي تحتمل حالتين .

طبعا قبل كل شي و بجميع الحالات لازم تفصل الـ VSA .

أولا : القومة ( ارض , صفر ) .
1- تحمّل فرامل و بنزين و تنزل السيارة لـ D1 لكن انتبه . أول شي تكون وضعية القير على الـ N و بعدها تنزل البريك و تعشق السيارة في D1 . هذا هو الصح و غيره غلط .
لأنك لو نزلت السيارة على D1 مرة وحدة و البريك مرفوع و انت داعس فرامل و بنزين راح تسمع صوت طقة قوية بالقير .
2- ترفع RPM حق 2 أو 2.5 بالكثير و ترفع رجلك من الفرامل و تدعس بنزين على الأخير بنفس الوقت . راح تلاقي السيارة تفز معاك بالقومة .
3- إنت طبعا اللحين ماشي بالأول و الـ RPM يوم يوصل قريب الـ 7 لازم ترفع القير إلى D2 و أعتقد الأكورد افضل وقت للتعشيق لها يكون عند 6800 RPM عبال ما تشبك النمرة إللي بعدها يكون وصل لحد الـ Red Line و هو أفضل وقت لرفع النمرة . و تكمل نفس الطريقة لـ D3 و D . لكن من D2 إلى D3 و من D3 إلى D أستنى السيارة توصل حد الـ Red Line و بعدها عشق لأن النمرة تكون ثقيلة شوية و على سرعة عالية فراح تشبك على طول و ما تتأخر .

ثانيا الدحدرة ( لا تدحدر غير 30 أو 40 لأن هذا عز العزم في الأكورد ) .
1- طبعا في الدحدرة راح تكون فاصل الـ VSA و حاشر السيارة في D1 و أنتبه من شي كثيرين يغفلوا عنه و يغلطوا فيه في الدحدرة .
الموضوع و مافيه إن الواحد يجيك على دعسته و مع البوري الثالث يكمل على الدعسة , و هذا غلط كبير و بيضيع عليك المقاومة كلها .
العبرة و الصح إنك مع البوري الثالث تفلت البنزين و ترجع تدعسه كله للأخر يعني ترفع رجلك و تدعس بسرعة مرة ثانية و طبعا لازم توقتها صح مع صوت البوري عشان لا يطير عنك منافسك و بعدها كأنك ماسويت شي و تروح عليك المقاومة .
2- طبعا تطبق نفس الخطوات الباقية زي ماهي بدون تغيير في رقم 3 السابق .

للمعلومية :
من أقوى النمر في الأكورد النمرة الثالثة D3 يعني صفيها لآخرها إلين تلمسها في الـ Red Line لأن هالنمرة طويلة و توصل للـ 180 أو أكثر حسب ما أذكر " ماني متأكد لأني من زمان ماسقت اكورد أوتوماتيك " .

طبعا للمقاومات اضرار على المكينة و منها إنها تنقص عمر المكينة " كثرتها فقط " أما قومة أو قومتين بالأسبوع اشوفها عادي .
و الحرق الزايد على السيارة يضعفها بعد فترة و بتضيع عليك أحصنة لأنك بتحملها فوق طاقتها .
الزيت يبدأ يحترق بسرعة طبعا و يفقد لزوجته في وقت أقصر .
كراسي المكينة و كراسي القير تبدأ تهترئ و تتلف على المدى الطويل .
البواجي تفقد فاعليتها على المدى الطويل .
و ايضا البلوف راح تحتاج وزن بعد مدة .

سيارات هوندا تتحمل المقاومات و الكرف و الدعس و أنا أكبر مثال عندكم , أكثر من 3 سنوات و نصف معايا السيارة و معدل عليها من يوم شريتها و مقاومات و قله حيا و ما اشتكيت إلا من القير بس . حتى ما وضبته بالعكس صار يطلع صوت كأني مركب كام و بنفس الوقت صارت السيارة تفز معاي لأن الفراغات فيه صارت أقصر و النمر صارت مشدودة .

السيارة تتحمل صح لكن لاتزودها معاها إلا إذا برمجتها .

اولا ابي اعرف فائده وحده للمقاومات

بالنسبة لي هي مجرد متعة فقط و أنا أقاوم و ياما طلعت على سيارات و يا ما سيارات نتفتني , ليست إثبات وجود أو إن سيارتي اقوى و أنا أسوق أحسن .... بالعكس مجرد متعة و هواية بالنسبة لي ما تجي كاهتمام أول عندي . و حاليا معاي ألتيما V6 و أقاوم فيها و أقضي مشاوري و حاجاتي .
و الحمد لله يعني الحمدلله سواقتي كلن بيشهدلها في جدة و الدليل قوماتي مع سيارات مستوياتها اقوى من سيارتي و طلعت عليهم .

أتمنى ما أكون طولت أو خرجت عن الموضوع
المقاومات عندي ليست كل ماخرجت من البيت أدور حرش , هي صح هواية اعشقها لكن مو كل الوقت أو حتى إني أهتم و أتكلم فيها .