الموضوع: سيارتي ياشباب تحتاج لـ .. برمجه كمبيوتر او تغير كمبيوتر ..؟!

سلام عليكم ..

كيفكم شباب ان شاء الله بخير

سيارتي اكورد 2008 ذهبي وهي مثل بقيه السيارات بسيول جده ..

اتعرضت لـ دقات والصدامات طاحت والاسطبات الاربعه اتكسرت ..
ودقه في باب السواق ( يحتاج لـ تغير ) ودقه في الباب اللي خلف السواق ( سمكره فقط ورش ) ..

والكبوت اتضعج شوي ( سمكره ورش ) وانكسرت ماسكات الكبوت والبطانه الداخليه للكبوت تلفت ..
وفقدت اللوحه الاماميه والكشافات ( ضمن الصدام الامامي )
وشوي تغيرت وزنيه السياره ..

وداخل السياره اتعدمت شوي المقاعد والارضيه والدروج وداخل العداد دخل شوي طين ..
وداخل الكبوت الطين دخل شوي ووصل الين ثلاجه المكيف حسب كلام الكهربائي ..

ودخلت السياره لـ ورشه الخليج بالصناعيه بجده ~> ايش رايكم فيها ؟

ولهم فتره شغالين فيها وان شاء الله يرجعونها زي ماكانت .. :(
وباذن الله اسبوعين شي زي كذا وتخلص واطلعها من الورشه ..

وايضا قدمت على لوحه بدل فاقد اماميه ..
على اساس باذن الله لمن تتطلع السياره من الوكاله ..
تكون اللوحه جاهزه ان شاء الله ( لوحه طويله )..

ولحد الان قطع السياره كلفت 6 الاف ريال اللي هي :

( صدام امامي وخلفي - شمعتين اماميه - اسطبات خلفيه - كلبسات صدام - كلبسات شمعات اماميه - شبك صدام امامي مع العلامه والنيكل - باب سائق من التشليح )

وبالنسبه للكشافات تجاري بـ 160 ريال كامله ..
لقيتها بالوكاله بـ 1830 ريال قبل التخفيض وبعد التخفيض بـ 1330 ..

وبقي قطع بسيطه غير مكلفه مثل بطانه كبوت وماسكات كبوت وغيرها .....
وشغل يد الورشه السمكره والرش يكلف ( 5 الاف ريال ) رش كامل تقريبا ماعدا السقف ..

وبعدها عالوكاله عشان يشوفون ايش فيه كمبيوتر السياره ..


زبده الموضوع

جبت كهربائي للسياره قبل كم يوم وشافها قال :
المكينه سليمه ولكن الكمبيوتر ممكن يكون فيه شي .. :(

فـ حاب اسال اصحاب الخبره ..

كيف اعرف اذا الكمبيوتر يحتاج لـ اعاده برمجه او يحتاج لـ تغير .. ؟

حاليا احاول اشغل السياره ادخل المفتاح بالسويتش واشغل ماتشتغل ولا يطلع اي صوت .. !!
وهلا فعلا انو السياره فيها كمبيوترين ! .. واحتاج لتغير الاثنين ممكن ؟! ؟!

لانه الكمبيوتر جدا شاغل بالي وشايل همه والله ..

وداعوتكم لي الله لايوريكم مكروهـ ..
ويحمينا ويحميكم من العين ومن كل شر يارب ..

وان شاء الله اني اطلع السياره من الورشه ومن الوكاله ومن التلميع ..
وانبسط فيها يارب :( ..

والحمدلله على كل حال

عذرا على عدم توفر صور للسياره لاني ماحبيت اصورها بالجوال ..
عشان ماشوفها كل شوي واضيق خلقي .. :(


فقط صورتها صور فواتغرفيه لانها من ضمن طلبات مركز حصر اضرار السيول اللي هي :
( صور للسياره المتضرره - صوره الهويه والاستماره - صوره للتامين ان وجد - تعبئه استماره بيانات السياره والمالك )


وعذرا جدا جدا للاطاله ,
دمتم بصحه وعافيه