الموضوع: هذي صور حادث الاكورد اللي طلبتوها ( نصائحكم وتوجيهاتكم تكفون )

الحمد لله على السلامة اولاً واخيراً ،،

ابعطيك المختصر المفيد ،،،

هذي صورة سيارتي السابقة بعد احد الحوادث



اول حادث لي الصدام + الكمبوت (( من باب الفشخرة والسيارة جديدة واول حادث وما اصلحها الا وكالة ومدري ايش وفي النهاية رحت ورشة وفاء : ورشة وفاء بأختصار شديد ، خذوا سمعة والحين رافعين اسعارهم على ايش ما تدري ، الشغل نفس الشغل عن باقي الورش وغيرهم افضل منهم ..

- يطولون في الشغل
- سمكرة + بوية كلف حول ٢٣٠٠ شغل يد !!
ـ ماعجبني الشغل لخطأ فاضح وواضح ورعت وسمكروة مرة ثانية + بوية ثانية على حسابهم
- بعد مرور كم شهر اضح ان البوية تختلف في الدرجة شي بسيط
^^ هذي ورشة وفاء اللي تعاملت معها شخصياً ^^


الحادث اللي بالصورة كلفني حول ٢٣،٠٠٠ القطع ومن ضمنها شغل اليد ٦٠٠٠ ريال .

وبعدها صار لي نفس الحادث ( صدام + رفرف ) كلف فقط ٣٠٠ ريال وشغل والله اطلق من الوفاء عند ورشة تعاملت معها مرة وحدة فقط ( هندي ) ومن بعدها قلت ( لا للفشخرة والنصب وزرف الفلوس دام فيه خيارات افضل ١٠٠٪ )

بالمختصر المفيد اذا التأمين وافقوا يعطونك ١٢،٠٠٠ ومشت القضية لصالحك بالتمام على الرغم من ان ذاك الطرف مفحط .. فأنها تكفي لأصلاح سيارتك بالقطع من التشليح ،،

شغل اليد :

عند ناس موسوسة ما يلمس سياراتهم الااتراك ، ولا يحلقون الا عند اتراك ، ولا يتابعون الا مسلسل تركي وكأن الاتراك هم اعرف ناس بشغلهم ..!!

مستعد اوديك ورشة فية اتراك يشتغلون وتشوف كيف شغلهم زي وجيههم ( والمشكلة علية زحمممة ).. شغل عااادي جداً ... وتدفع لهم مبلغ وقدرة <<< عشان لعب عليك بلسانة المعسول واتقانة للعربية <<< مشكلتنا شعب حبيب <<< خلني اقول بعد : شعب بعضة دلوخ بصريح العبارة .. ان جتة كلمتين حلوة خق ودفع ووثق ..!

الورشة اللي الحين متعامل معها وتعامل معها اكثر من ٥ اعضاء بالمنتدى يشهدون لة بالخبرة ورشيت سيارتي عندهم بالكامل ولا راح اقول لك جنسيتة .. لكنة خبير من ايام طفولتة بالسمكرة وشغلة لا يعلى علية ورخيص جداً وامين في عملة <<< بس كلامة كثير .

اذا بغيت اخدمك بكرة تراي فااااضي من ٦ الصباح لين الساعة ١١ افر واياك التشاليح اللي اعرفهم واللي طفشوا مني بعد ماشريت منهم نص اكورد ونمر الوكالة ونشوف الاسعار ونودي سيارتك الورشة ...

هذا رقمي دق علي // ٠٥٤٠٠١٢٥٦٠ مصعبـ [ ومالكـ الا اللي يسنعك ويمركـ لو انكـ ساكن بالخرج ] (( العرض فقط يوم الاثنين من ٦ الى ١١ الصباح - ظروف الدوام - )) واقرب موعد بعد ذلكـ هو يوم الخميس واحتمال ما تكون عندي سيارة لأني بدخلها نفس الورشة بخلية يسوي لي مفاجأة في سيارتي وبنزل عنها تقرير ان شاء الله .

^^^
ابعد عن ورشة الجنوب نصيحة لوجه الله
نصاابين وماوراهم الا الخسارة

وكلامي عن تجربه

_________
بالنسبة لسيارتك حاول تشوف لك سمكري يصلح الاجزاء الداخلية ويسحبها وبعدين غير

قشرة الرفرف الخارجي في الوكاله

اهم شي لايقولون لك لازم قص ..حاول مع اكثر من ورشة انهم يسمكرونها من الداخل

والله يعوض عليك

معذرة على التأخير حيث انني كتبت رداً العصر ، لكن تعرف حركات الويندوز المخيس فجأة علق متصفح النت واعاد تشغيل نفسة !! ( تباً لكـ يا ويندوز )

- كيف اقيم شغلهم ؟
تعاملت مع اربع ورش من الوفاء وكتبت تجربتي معاهم وتجربة الورشة ام ٣٠٠ ريال ، واللي صورة الحادث ٢٣.٠٠٠ ريال ، وآخر ورشة اللي هي انا فيها حالياً ويعتبرون الافضل آداءاً وسعراً وجودة ووقتاً من بين كل هالورش الاربع .
آخر شي سويتة سمكرت السيارة من الصدام للصدام + رش بوية كامل السيارة ، ومن بين الاتفاق عندي رفرف خلفي كلة معجون من شغل اليمنية ورجعة لي وكالة بنسبة ٩٦٪ .

-

لكن انا بروح للورشة واكيد انهم يعرفونك وبقول لهم جاي من طرفك ومن هالكلام

لا يجي في بالكـ انة بيخفض لكـ بالسعر ولا بيعطيك مميزات عن غيرك ، هو ادرى وابخص بشغلة بس يمكن يشتغل في قبل غيركـ .،، جو قبلك ٤ اعضاء ولا راعهم الا في الوقت .

- من ناحية ورشة الجنوب هي فعلا متخصصة بالهوندا ( ميكانيكياً فقط ) وفية افضل منهم بالميكانيكا وارخص بعد ، بس العالم انهم مع الخيل ياشقرا ، العالم كلهم على ورشة الجنوب يلللة معهم ... العالم كلهم مع وفاأ يللللة يعهم .

- سعر الرفرف الخلفي بالوكالة ( القشرة فقط ) ١٨٠٠ ريال تقريباً وتقدر تاخذة من موزع ويجيك ارخص بـ ٢٠٪ ، سعر بالتشليح حول ١٨٠٠ الرفرف كاملا مع داخليتة الحديدية<<< اذا تبي تقص ولا تبي سمكرة .. ، .. ومثل ماقال الملك اكورد حاول انهم يعدولون بدون قص وجب الرفرف من الوكالة <<< الورشة الاخيرة هوايتهم تعديل الحديد :d رجعوا رفرفي بحالة الوكالة بنسبة ٩٦٪

- سعر الباب كاملاً بالتشليح حدود ٢٥٠٠ وتلاقية الى ١٥٠٠ بعد ، ولا تفكر تاخذة جديد لأنك بتشترية + القزاز والسنتر لوك ومكينة القزاز والداخلية والربلات ، خذة من التشليح اوفر .

- باب الشنطة يتعدل ، واذا تبي تغيرة شف كم سعرة بالتشليح وكم سعرة بالوكالة وشف الارخص لكـ ( موب دايم التشليح ارخص ، وموب دايم يبيعونة لحالة ) .

- الجنط ... عندي جنط ١٥ حديد ( فداااكـ ) الا عندي جنطين بعد موب واحد وكلهم فداكـ .

- الاصطب الخلفي مع الخلايا بيكلف حول ١٠٠٠ تقريباً من الوكالة ...

- مشقبية الصدام الخلفي ٣٥ ريال من الوكالة .

- الصدام الخلفي مدري بس من ٤٠٠ الى ٦٠٠ بالوكالة .

- القزاز الخلفي مدري ، ونصيحة لا تاخذ الا اصلي اذا انك راعي راديو .

- ما ادري وش القطع المكيانيكة اللي تضررت عند منطقة الكفرات ، ولاتضررت مع الجهتين ولا جهة وحدة بس ولا تضررت المساعدات ٦٠٠ كل واحد تقريباً ، اليايات حول ٣٥٠ ، الاذرعة حول ٢٠٠ لكل ذاراع او اقل <<<< وتاخذ ذولي كهم من التشليح ارخص .

- بعد ما تصلح السيارة يمكن تصير فية حذفة ، الورشة يمكن ما عندهم خبير ميزان فوديها ميزان متخصص مثل العضيب او المجد ويرجعونها وكالة وتشوف وش القطع اللي يبون ، يمكن يطلع رمان خربان ولا ذراع معفوط ( ٧٠٠ ريال لكل الشغلة )

......