ياشباب طار الضمان تكفون قولولي الحل الله يفرج همكم..!

**يادافع البلا** · 31-05-2010, 12:23 PM

السلام عليكم ورحمة الله ...مسااكم الله بالخير

انا من المتابعين بستمرار لهالمنتدى وجديد اعضاء هالقسم ... صارت لي مشكله وقلت اسجل هنا واقولها لكم يمكن تلاقون لي حل يالربع

السالفه ربي يحفظكم ... ان شرية اكورد 2009 قبل سنه ونص ...طبعا بنظام التاجير المنتهي بالتمليك ....

استلمت السياره وتوكلت ع ديرتي ...

قبل شهر تقريبا بديت احس ان السياره فيها اشياء لابد تصلح واصوات طقطقه....
رحت امس للصيانه ببريده ...قبل اقول له ايش المشاكل الي بالسياره قال لي السياره كم هي ماشيه قلت له 60 الف قال عملت صيانه قبل كذى قلت له لا لان اقرب مركز صيانه لي انتم وبيني وبينكم 400 كيلو ...قال لي بالفم المليان ضمانك ملغى اذا بتسوي المشاكل الي بالسياره تسويها ع حسابك....!!

تمشكلة معاه وشوي واقلبها مضاربه ...وماطلعت بنتيجه قال لي روح للمركز الرئيسي بالرياض او كلمهم مالك عندي هنا شي..

طبعا قبل ساعتين كلمت صيانة الرياض وقلت لهم كل شي وقلت ابي موعد اسوي صيانة الـ60 الف ...قالو كل شي ع حسابك الصيانه بس بتكلفك 620 ريال مايشملك الضمان ...والخرابات وتصليحها عليك

شسوي ياخوان تكفون عطوني حل والله ماتوقعت الوكيل بهالسؤ وعدم التفهم...لانها اول مره اشتري من شركة هوندا

علما بان الخرابات الي بالسياره كالتالي ...
اصوات طقطقه بالمراتب الخلفيه والابواب
تنسيم بباب السائق والراكب
نفضه بسيطه اثناء تشغيل المكيف
نفضه خفيفه والقير ع الوضعيه r او d
انوار المسجل ماتشتغل ...والمسجل نفسه اذا اشتغل ساعتين مستمره ينفطي فجأه ولايشتغل الا اذا طفيت السياره وشغلتها (هالمشكله بالتحديد اعاني منها من شريتها)
صوت مزعج في فتحت السقف اذا فتحتها او سكرتها..
ضغط المكينه بالعداد صاير ينزل من فتره بسيطه عن المستوى المعتاد..

يعني لو تلاحظون انها مشاكل كلها يشملها الضمان حرام انهم يلغونه ويكلفوني بقيمة اصلاحها لاني مانتظمت بالصيانه ...
ولا كنت فرحان من قبل اقول بيخلصوني ع طول لاني ماقد كلفت عليهم شي<تفكيره بريء دايم..:o

تكفون ياشباب الي عنده حل لمشكلتي يدلني او يعرف احد بالصيانه يقدر يساعدني ..انتظر ردودكم يالغالين

اخوكم عبدالرحمن..

**lonly style** · 31-05-2010, 12:50 PM

اركب لمدير الفرع وفهمه الموضوع قول له ترى الضمان بعيد وانا ما اقدر امشي 400 كيلو على شان ابدل زيت عند حضرتكم و ابدل بواجي وحاجات سخيفه وادا انتو عندكم ان لازم تسوي صيانه كل 5 الاف والله ينلغي الضمان ليش ما عطيتوني خبر وثانيا في زباين مثلي ماتقدر تسويها ليش ما فتحتو فروع زياده مو كل الزباين فاضيه تطير يومها في مشاوير الوكاله 400 و500 كيلو وهم ماعندهم غير يوم اجازه وانشالله بيتعاطف معاك

**lonly style** · 31-05-2010, 12:57 PM

قول له يعني تخيل الواحد عنده يوم اجازه يجي يضرب 400 كيلو وتظل السياره عندكم يومين يروح يستأجر له فندق ينام فيه وتكاسي وبعدين يجي يدفع قيمة الصيانه وياخد سيارته ويمشي ؟؟

**يادافع البلا** · 31-05-2010, 01:05 PM

هلافيك اخوي لونلي ...صدقني حاولت معاه بشتى الوسائل الي بصيانة بريده .. لما شاف اني سكرت كل الطرق بوجهه قام يتعذر قال اصلا مشكلة الابواب لازم بالرياض مانسويها وكذلك المسجل ...اجيه يمين يروح يسار

ولما قلت له ليش ماقلتو لي طيب اني لازم اواضب ع الصيانه ... قال لي مكتوب بدفتر الضمان ...وفعلا لقيته ...
لكن انا اذكر انهم يرجعونك ع الضمان في حالات زي كذى قد سمعت فيها ... لكن مادري صح او لا

والله مقهور منهم ياخوي..لكن الشكوى لله ... مافي مسؤل اقدر اكلمه واشتكي له بوكالة هوندا او بالصيانه..؟

**الـمـسـافـر** · 31-05-2010, 01:35 PM

انا مادخلت سيارتي اول صيانه الا على 40 الف وغيرت اشياء ع الضمان

والان ماشيه فوق الـ 100 الف وغيرت كراسي المكينه ع الضمان

شوف الموضوع هذا يفيدك وفيه رقم مسؤل بهوندا

http://www.hondaarabia.com/club/show...?t=35742:a045:

**يادافع البلا** · 31-05-2010, 09:00 PM

هلابك اخوي المسافر ....واتصلت عليه مايرد من العصر ادق عليه ...

الان الصيانه الدوريه يالغالين هي بفلوس او مجانيه من الشركه ... والله مادري شسوي

**meshoo** · 31-05-2010, 09:44 PM

الصيانات الدوريه بفلوس

على كل حال صيانة 60 الف مهمه قولهم انا بدخل السياره وبدفع قيمة الصيانه ولكن بشرط اصلاح المشاكل المصنعيه على الضمان

وقبلها اشرح لهم وضعك وبعدك عن اقرب مركز صيانه , واذا مانفعت الامور انزل للرياض ودخلها عادي وشوف وش بيصير معك