يالاكورد غيابك حيل آلمني .. مشكلتي وابي شوركم ..

**سمو حبي** · 03-06-2010, 12:51 AM

السلام عليكم ,,

كيف حالكم حبايبي اتمنى الكل بصحه وعافيه ,,

مدري كيف ابدا بالموضوع ولكن خير الكلام ما قل ودل . انا اليوم بشكي لكم مشكلتي ,
البدايه كانت من 15/3/2008 مـ .
انا والوالد رحنا لمعرض لصاله عرض هوندا اللي بطريق خادم الحرمين الشريفين بالخبر ((حول الثقبه))

واستلمنا الموتر اكورد فل اوبشن 2008 لون ذهبي.. يا ربي ما تتصورون فرحتي هذاكـ اليوم.. :o

الزبده مالكم بالطويله .. بعد شهر ونص وانا راجع من الدوام قدر الله وصار لي حادث ,, والغلط على الطرف الثاني 100% . وللمعلوميه تأميني تأمين شامل .. لانو السيارة بنظام التأجير المنتهي بالتملك,
المهم بعد حوسه ودوسه مع الوكاله والتأمين والشركه اللي انا مستأجر السيارة منهم .. طلعت بما يلي :
1/ قيمه اصلاح السيارة بلغت 79 الف ريال سعودي ..

2/ اعتبار السيارة هلاك كلي .

3/ فسخوا العقد المبرم بيني وبين الشركه من دون اي تعويض لي مع العلم انو الغلط على الطرف الثاني وليس علي بنسبه 100%

* لدي ما يثبت صحه كلامي من اوراق رسميه من وكاله عبدالله هاشم.

* ولدي احد الاقارب حصل معه حادث و قدرت السيارة بهلاك كلي ولكن تم تعويضه بمبلغ وقدره 90 الف ريال .. مع العلم انو انا قريبي من نفس الشركه التأجير ونفس شركه التامين .

---------------------

هذي كم صورة للسيارة بعد الحادث :

-------------------------------------------

خلصنا من القصه الاولى ..

بعد ما شديت حيلي وقمت على رجولي وتعدلت ظروفي . رجعت وطلعت اكورد 2009 فل كامل لون عنابي ..
من نفس شركه التأجير للسيارة الاولى ((وهذا اكبر اخطائي ولكن هالشركه كانت افضل السيئين ))

وبعد 7 شهور وانا منتظم بالسداد حصل لي ظرف ولم استطع السداد لشهر واحد .. ووبالشهر اللي بعده رحت للشركه للسداد ولمن طلعت اتفاجئ والسيارة مو بالمواقف و ارجع لموظف الشركه اسئله قالي ما ادري عنك .. وانا اللي اختبص .. وانا امسك جوالي ابدق عاشرطه اببلغ بالسرقه .. الا ويلحقني واحد من الموظفين بالشركه يقولي انو التحصيل اخذوا السيارة للمستودع حتى اوفي بباقي الاقساط المتاخرة مع العلم انو قسطين اتيت لسداد احد الاقساط والقسط الثاني راح اسدده بعد 10 ايام لانو انا راتبي بالتاريخ الميلادي .. ((مع العلم انو تحدثت مع الشركه انو راتبي بالميلادي وانا راح اسدد بالميلادي لاتجون تطالبوني بالسداد في بالهجري وتعرفون الشركات يبغون زباين قالوا ما عليك احنا نتفهم الوضع وما راح يكون الا كل خير)) ,,.

المهم رجعت للموظف قلت له كيف تقولي السيارة مو معكم وخويك يقول انكم ساحبينها لاني ما سددت وانا الان جاي لكم برجولي عشان اسدد يعني هذي جزاتي اجي اسدد وتسحبون سيارتي .. قالي ما لي كلام معك الحين يا انك تسدد باقي القسط المتأخر او انك تسلم المفتاح . المهم سلمت المفتاح ومن بكرة رحت لمستودع الشركه عشان اخذ اغراضي .. وهنا كانت الصدمه ..

اتفاجئ انو السوداني يقول عجل بالسداد والا السيارة راح تباع قلت لك طيب كم تباع قالي والله ممكن تجيب 77 الف وربي حرام موتر توه جديد وكاله يباع بهالمبلغ ..
المهم رجعت البيت و جلست عالنت احفر ادور حل لمشكلتي تفاجئت انو فيه نظام صادر من وزير الداخليه مفاده انه يمنع سحب اي سيارة الا بوجود شرطي و وجود مندوب من الحقوق المدنيه .. :( والشركه سحب السيارة من دون توفر هذي الشروط . ومن بكرة وانا مصبحين انا والوالد عندهم وندخل على المدير .. ويناقشه الوالد بهالنقطه رد المدير بالحرف الواحد (( الشركه لها الحق بسحب السيارة بالطريقه اللي تراها مناسبه . قلنا له طيب وقرار وزير الداخليه قال كلمه بما معناها انو هالقرار ما راح يطبقه ولا هو مجبر بتطبيقه )) قلنا له زين يصير خير ..
وشهدنا عليه كم شخص وطلعنا ..

و الموضوع الان عند امارة المنطقه الشرقيه ..

والموضوع شكله مطول ..

وانا وربي قليبي يفركـ ويفز كلما شفت هنادي بالشارع .. وعلى قوله الشاعر :

آه يا موتر خلق مـن ولهـتي عـبـرات**في شوفته يدق الـقلب ويجف الوريـدي
يطربك شكله وقوته لها تحسب حسابات**على نتف المواتر والقومة تكيد كيدي
طاروا الناس وضاعوا وسط هالمتاهات**اكورد يامن عن درب الشمـوخ ماتحيدي
يعمر ويصبر على البـلاوي والمـشكلات**وسلامة من ركبها مضمونة بهيكل حديدي
المواتر كون وانتي مجـرة من مجـرات**محدن مثلك بالخـط في الراحـة يجيـدي
شفتها وضاعت الحروف وتاهت الكلمـات**ومايذمها الامن يعرف بالدلخ والبليدي

-----------

انا اسف عالاطاله بس وربي من قهر وحزتن بالقلب ..

محتاج دعواتكم و ياليت تنصحون بأي شي ممكن يفيدني بهالمشكله ..

اخوكم: ــعبدالله..

**الشمــــالـــي** · 03-06-2010, 01:03 AM

الله يعينك
وحقك ان ماخذته بالدنيا
بتاخذه بالآخرة

**abdelslam** · 03-06-2010, 01:27 AM

لا حول ولا قوة إلى بالله

الله يعينك ياخوي أنت ادع ربك وتوكل عليه وراح تشوف

وان شاء الله ترجعلك وتقر عينك والي رزقك أياها يرزقك أحسن منها أو مثلها يارب

بس صبرك ..

**اكورد 505** · 03-06-2010, 01:34 AM

الله يعينك وأصبر وبالعربي إذا عندك واصطه بألاماره راح يلصونك ويضبطون وضعك .

**D.H.o.O.o.M** · 03-06-2010, 01:35 AM

توكـ ماشفت شي كل هذا اعتبرهـ نقطة ببحر

اسالني انا عنهم نظام التاجير مع الوعد بالتمليك سواء عن طريق البنوك او الشركات

قمة الوسااااااااخة والنجاسة

الله يكون بعونكـ ويقويكـ اهم شي لاتسكت لهم وواصل مابديت فيه وربي بيساعدكـ

وياليت توافينا اول باول شو صار معكـ

**الشقاوي** · 03-06-2010, 01:47 AM

أقسم بالله أنك مسكين وما تعرف تاخذ حقك بكل الثنتين

**salamify** · 03-06-2010, 02:51 AM

الله يكون في عونك يا غالي وإن شاء الله تاخذ حقك من هالشركات النصابة اللي ما همها غير نهب جيبوب المواطنين المغلوب أمرهم وما تكفيهم النسب الخيالية اللي ياخذونها فوق قيمة كل سيارة بس أنصحك ما تسكت عن حقك أبدا..

**askyboy** · 03-06-2010, 03:04 AM

الله يكون في عونك القوانين موجوده بس علي الورق لو انت في اوربا او امريكا او حتي في الأمارات والله لاتسحبهم علي وجيههم هؤلاء النصابين ولكن كيف حالك؟؟؟

**برق** · 03-06-2010, 04:22 AM

اولآ الله يفرج همك ويساعدك على مصيبتك ولكن بحكم خبرتي و اقف كثيرآ على مثل هالمشاكل إللي أحب افيدك فيه بأن نفسك

قصير ونفسهم أطول ولهم الحق بسحب السيارة بناء على العقد النجس الذي أبرمته مع هذه الشركة وعليك مراجعته والتعمق بكل

بنوده وكثيرآ تسحب سيارات مستأجرين من أمام المنزل أو العمل و عنده خروجه فورآ يقوم بالتعميم على سيارته بأنها مسروقة

واكثر شركة تسوي هالحركات شركة عبد اللطيف جميل و شركة اليسر للبيع بالتقسيط و يبيعون السيارة خلال المدة المتفق عليها

ولا لك أي حق بالمطالبة لأنهم عارفين شغلهم صح ومره افادني أحد مندوبي تلك الشركات بأنهم يقومون بتأجير السيارة و عندما

يتأخر المستأجر بالسداد بالشهور الأولي يمهلونه و يتكلمون معه بكل أدب و إذا مر عام أو قام بدفع مبلغ 20% من قيمة السيارة

و تأخر شهر واحد بدون كلام يقومون بسرقة السيارة من أمام منزله ولا يحسبون أي حساب .. خلاصة الكلام حاول سداد المتأخرات

باسرع وقت قبل بيعها من قبلهم و الله يعينك على بلواك

**ابو موده** · 03-06-2010, 05:18 AM

تبغى النصيحه اسأل احد المشايخ عن التأجير المنتهي بالتمليك وهذا قال لك حرام فبعد عنه يمكن خيره من الله ان لاتقع في الحرام
وهذا رابط :
http://www.saaid.net/fatwa/f29.htm

**ع البال** · 03-06-2010, 12:50 PM

اول حاجه اخوي الله يعينك والحمدالله على سلامتك في الحادث الاولى

سياراتك نظام تاجير المنتهى بالتمليك اذا صار عليك حادث وتصليح السياره اكثر من قيمة التامين يعني سيارتك التامين الي عليه 90 الف ريال ياخذون اربعين بالميئه فقط للتصليح

واذا زاد عنه يحوله على الخساره الكوليه ومبلغ التامين يروح لشركة التاجير عشان يخلص العقد والباقي يعطونك ايه يعني اذا السياره 85 الف وانت دافع 20 الف يندفع المتبقي من قيمة الاقساط لشركة التاجير اتمنى فهمت قصدي

بس انت تقول الغلط مو عليك ولا عليك نسبه صح ؟

المفروض الشركه الثانيه هي الي تعوضك او تصلح سيارتك

لان اذا كان الطرف الثاني هو الغلطان شركة تامينه مجبوره تصلح السياره لو تكلف 1000000 (مليون ) ريال

بالنسبه لسحب السياره ماعندي خلفيه عنها

لان انا صار لي حادث في شهر محرم وكانت بتروح سيارتي خساره كوليه لو الله ثم واحد في مكتب التامين علمني وش اسوي عشان اخذ حقي واصلح سيارتي

ربي يعوض عليك ان شاءالله

**ghazi** · 03-06-2010, 01:04 PM

لاحول ولاقوة الا بالله

الله يعــينك ..؟

وانشاء الله تنحل مشكلـــتك..؟

**A N M A R** · 03-06-2010, 01:37 PM

حسبي الله ونعم الوكيل في شركات التاجير هدي

وحسبي الله ونعم الوكيل في كل شخص ظالم في قصتك

شي يقهر ان شاء الله خير ياخوي ياريت تراجعهم يوم السبت

**م ج رد حلم** · 03-06-2010, 01:50 PM

الله يفرج همك ياااارب

اخوي لاتسكت على حقك واااصل بالشكوى وحقك مارااح يضيع حتى لو ماعندك واسطه

ما ضاع حق وراءه مطالب

صحيح الموضوع بيطول بس حقك بيرجع لك باذن لله

**فواز الشمري** · 03-06-2010, 04:21 PM

.. بالنسبة لكلامك عن تعميم وزير الداخلية لكن لو تراجع العقد اللي وقعته تحصل بند انك متعهد
انك ما تضع بالسيارة اي مبالغ ماليه او اغراض شخصية و الباقي ما قصروا فيه الأخوان !

يعني حاشرينك من كل زاوية الله يعين الجميع !

**سمو حبي** · 05-06-2010, 01:00 AM

احب اشكر كل اخواني اللي ما بخلوا علي من دعواتهم ويارب اكتب لهم مثلها .. ويارب لا توريكم مكروه في حياتهم ..

وبالنسبه لك اخوي فواز : احب اقولك مدام الموضوع كذا اجل لو انا اطلبك مبلغ من المال اجي لين بيتك واخذ اي شي يوازي هالمبلغ وامشي .. و شي ثاني وهو مدام الموضوع زي ما تقول اجل وش قرار وزير الداخليه كلام فاضي يعني لا لا ما اظن انو كلامك صحيح يا اخوي ..

**فيرآندآمرآولة** · 05-06-2010, 02:55 PM

اول شي الحمدلله على السلامة
ثاني شي
انت قلت
[ هلاك كلي ]
الله يستر
انا اللي اشوفه بالصور ماهو كلي !!

والله يعينك على المطالبات

**سمو حبي** · 05-06-2010, 03:12 PM

المشاركة الأصلية كتبت بواسطة فيرآندآمرآولة

اول شي الحمدلله على السلامة

ثاني شي
انت قلت
[ هلاك كلي ]
الله يستر
انا اللي اشوفه بالصور ماهو كلي !!

والله يعينك على المطالبات

الله يسلمك من كل شر .. وانشالله ربي يبارك لك في موترك وما تشوف منه الا كل خير ..
و زي ما قلت لكم التأمين قالوا هلاك كلي لانو الايرباج طلع وما اتوقع انو الايرباج لو يطلع يعتبرون السيارة هلاك كلي لانو يقدرون يصلحونه . و الموتر ما يسوى هلاك كلي . بس وش نقول غير حسبي الله عليهم ..

ويارب تاخذ حقي منهم بالدنيا والاخرة ..

**شلهوب سدير** · 05-06-2010, 04:16 PM

لاحول ولاقوة الابالله
الحمد لله على سلامتك يالغالي
ومآعليك منهم انشب لهم وحقك مآيروح

**uo8** · 06-06-2010, 12:22 PM

اخوي خلني اكون صريح معاك ..

ياخوي اذا متاخر عليهم شهرين لاعاد توقف السيارة عند بيتكم
ولا تروح لهم بها وانتبه من التفتيشات اللي يدورون عن التفويض
والله معك