ضرووري جدا اصحاب الاكورد

[bdbd999]

الســــلام عليكم ورحمة الله وبركاته


يا اخوان انا عندي مشكله وان شاء الله تكون بسيطه او مرت على احد فيكم ويعرف لها حل

المشكله/

عندي الحراره ترتفع امس وصلت لحد {H}

المهم وديتها اليوم طلت المشكله من المروحه ما تشتغل.....

رحت لقطع الغيار قالي سعر الوكاله 900 ريال وسعر الياباني 300 ريال

المهم قلت اوديها لواحد ثاني اتأكد وديتها عند واحد يمني جاب حديده وطق المروحه واشتغلت!!!

بس برضو انا مو مرتاح مادري ليه احسها مو مثل اول !!!

بالعاده تشتغل اول ما تسخن المكينه الحين صارت تطول وبعدين تشتغل ... قلت بجربها اليوم وبشوف...



المشكله الثانيه /


عندي حراره مو طبيعيه اسفل السياره تشبه للحرارة الفورد من تحت

وديتها لنفس اليمني قالي بشيلك الفلتر الي ورى المكينه حق الشكمان اكيد انه مليان وسخ ومتسدده الفتحات تبعه ومايطلع الحراره

قلت وش بتسوي

قال بقص الفلتر من الجهتين وبركبلك فلتر ثاني وتكون فتحاته اكبر وراح يبرد ع المكينه ويريح السياره .... طبعا نوع الفلتر اماراتي

مادري وش الحل بالمشكلتين ؟؟؟

ارجو الافاده ضروري جدا جدا جدا لاهمية الموضوع


ولكم خالص حبي وتقديري ........

[ن ع ر السعودية 0005]

وعليكم السلام ورحمه الله وبركاته

بسيطة إن شاء الله

المشكلة الأولا هي من دينمو المروحة ويبغاله تغيير أنصحك تغيره بأسرع وقت حتى ما ترتفع الحرارة وأنت ما تدري وتروح المكينه وحله إذا ما تقدر على الجديد شف بالتشاليح نظيف و بسعر حلو أهم شيء يعطيك ضمان عليه حتى لو ما أشتغل ترجعه وأنا أشوف أنك تأخذه من الوكالة أضمن لك جديد ويعيش معك .

المشكله الثانية والله مدري عنها بس بنصحك أبعد عن شغل أبو يمن ما راح يحوس موترك غيره لأنه يسوي فاهم وهو من جنبه لا تعلم ولا حاجه يدخل روحه بكل شيء وهذا الحاصل وأسال الشباب هنا ومع أحترامي للشعب اليمني بس هذي الحقيقة والحقيقة ما ينزعل منها .

[bdbd999]

الدينمو سعره جديد ب 900 ريال غير شغل اليد :(

وبالنسبه للتشليح مادري ....

بالنسبه للشكمان ياخوي انا مثلك منيب احب ابو يمن يشتغل بالسياره بس انا اتكلم كفكره وعن المبداء

هل لو شلت الفلتر تبع الشكمان راح يضر السياره؟؟؟

هنا السؤال ؟؟

[ن ع ر السعودية 0005]

الدينمو سعره جديد ب 900 ريال غير شغل اليد :(

وبالنسبه للتشليح مادري ....

بالنسبه للشكمان ياخوي انا مثلك منيب احب ابو يمن يشتغل بالسياره بس انا اتكلم كفكره وعن المبداء

هل لو شلت الفلتر تبع الشكمان راح يضر السياره؟؟؟

هنا السؤال ؟؟

الدينمو سهل تركيبه أنت بنفسك تركبه وإذا ما عرفت خذ الدينمو ورح لمحل رديترات وقله يركبه لك ما يأخذ ربع ولا نص ساعة بالكثير وعطه 15 ولا عشرين ريال حق التركيب وبيدك القرار يا تأخذه جديد ولا من التشليح .

وبالنسبة للشكمان أنا أشوف لو تروح للوكالة وتستفسر منهم يكون أفضل لان هم إلي عندهم الخبرة بالموتر أكثر من غيرهم . وسؤالك هل فيه ضرر ولا لا أنا أقول أكيد فيه ضرر لأنه ما وضع إلا لسبب ولو ما فيه ضرر ما كان وضع في الأصل .

[احمد 182]

المشكله الثانيه زي ماقالك بويمن خله يقصها ويركب لك الفلتر بس
لأن سيارتك 2004 يعني 6 سنوات شكلها منسده انا سيارتي 2005 منسده وركبت فلتر وعلى فكره تراه يريح المكينه وانتبه اذا خلص شغله لاتخليه ياخذ الفلتر ماعليك منه اذذا قالك خربان وش تبي فيه قله ابغاه لانه ينباع وقله ببيعه لك 50 تبغاه اذا قالك لا في الف محل يشتريه واسف على الاطاله....

[البراك]

المراوح انا ما افتيك فيها

بس اذا تبغى تريح المكينة و تقلل الحرارة ... ابسطها :

1 - فك دبة الرصاص و مد بدالها ماصورة او ركب دبة رصاص رياضية علشان ما يطلع صوت عالي .
2 - بدل الكناديس بكناديس رياضية
3 - ركب هيدرز رياضي

هذه الطريقة الي نطبقها وقت ما نبغى نعدل السيارات .. و الفائده منها ان السيارة تبرد و المكينة صوتها يهدى و تفرق معاك بالخط و الدعس

انا اتكلم عن الطرق الرياضية الي تريح السيارة و تكك من الحرارة و تخرج و تفك لك الكتمة الي تسببها لك الكناديس و الدبات الي تحت السيارة

[البراك]

توني فهمت الموضوع :d

الحين الكابتن هذا يقصد انه يفك الفلتر الي ورا المكينة وهو واحد من 2 :

1 - الهيدرز : و هذا لو فكة لازم يبدله بهيدرز ثاني ولا بتسمع اصوات الين تبكي + ما ينفع تمشي السيارة بدونة
2 - دبة الرصاص : هذه يا استاذ قيمتها 3500 ريال في الوكالة ، و تاخذها من التشليح بـ 150 ريال اذا الي باعك هي مو فاهم شي ، و بعدين هذه تريح السيارة بشكل كبير و تعطيك اداء ممتاز للمكينة بس انصح لما تفكها غيرها بـ دبة رياضية ( تجي من امريكا حول 500 الي 700 ريال ) مخصصة للاكورد ( فك و ركب ) . لانك لو مديت ماصورة مكانها راح يكون صوتها عالي بس بهذه الدبة راح يقل الصوت بنسبة كبيرة .

انصحك فيها بس انتبه ياخذها منك مثل ما قلت لك قيمتها 3500 ريال من الشركة ، من التشليح بـ 150 ريال