مكيف سيارتي جاب العيد -- الفزعة

**ياما نسيت** · 10-09-2010, 03:27 AM

السلام عليكم ورحمة الله وبركاته

اخواني الكرام كل عام وانتم بخير
وتقبل الله منا ومنكم صالح الاعمال

بعد ما اشتريت هدايا العيد للوالد والوالدة وبعثرت القروش يمين ويسار

احبت سيارتي العزيزة ان تعايدني بدورها

اليوم 30 رمضان وبعد صلاة العشاء ركبت السيارة وسخنتها مع ان الجو حار لكن مو مشكلة اهم شيء الاخلاق

شغلت المكيف لكن اشتغل ثانيتين ثم طفى الكمبروسر

طفيت المكيف وشغلته لكن لم اسمع صوت الكمبروسر يعمل

وقفت على جنب وطفيت السيارة ثم شغلتها بعدين شغلت المكيف اشتغل ثانيتين ثم طفى

رحت لأكثر من ورشة كلهم قالوا بعد العيد

يعني العيد عيدين مع اكوردتي العزيزة

تكفون يالنشامى وش تتوقعون المشكلة قدامي ثلاث ايام من المشاوير الليلية لأن النهار لايمكن اخرج في الحر

للمعلومية ..
السيارة اكورد 4 سلندر 2003
على يدي من يومها صغيرة
محافظ عليها كانها وحدة من بناتي
المكيف لايمكن اشغله وانا امشي اكثر من 30 كلم في الساعة
الزيوت اغيرها بانتظام والصيانات كل ماطلع صوت صلحته

انا في انتظار خبراتكم التي لا غنى لي عنها

اخوكم
عبدالله

**احمد 182** · 10-09-2010, 04:07 AM

وعليكم السلام ورحمة الله وبركاته ......
خذ مني العلم يالغالي عندك الكويل حق الكومبرسر خربان ولاتشيل هم موغالي سعره ب200 وعليها ولازم تعبي فريون مره ثانيه والله يوفقك .

**مجوودي كوول** · 10-09-2010, 04:12 AM

مثل ما قالك اخوي احمد182
اول شي شوف كويل الكمبروسر لانو هاذي صارت لاخوي وانتبه احد يقولك كمبروسر اذا غيرته راح ياخذونه و يبيعونه على انه مستعمل حول ال 2000 ريال

**mmm800** · 10-09-2010, 04:17 AM

أخوي الله يعينك مالك الا بعد العيد او انك تشوف التشليح ومثل ما قال اخوي احمد الكويل عندك خربان ..

**فـــيـــصـــل..607..** · 10-09-2010, 05:06 AM

اجل العيد صحراوي :d

الله يعينك ياحبيبي الله يعينك ويبرد عليك يارب

**ياما نسيت** · 10-09-2010, 09:30 PM

السلام عليكم ورحمة الله وبركاته

كل عام وانتم بخير مرة ثانية

والله يجزاكم خير
هونتوا علي المصيبة

أحمد 182
ياخي لو ان فيه زر حب خشوم كان ضغطت عليه كلمة شكرا ماتكفيك

الله يجزاك خير ويهون عليك كل مصايبك ويتقبل منا ومنك صالح اعمالنا

مجوودي كول
مليون شكر لك وجزاك الله خير

اشكرك مرة اخرى على النصيحة ياخي والله انكم سنايدية ماتوقعت احد بيفضالي في العيد من اهل المنتدى قلت كلهم مشغولين بالعيد

لكن ما للشدايد الا رجالها
والصديق وقت الضيق ومنتدى هوندا نعم الصديق بأعضائه وادارته

mmm300
مليار شكر لك اخي الكريم والله يتقبل منا ومنك
مادام الشغلة كويل ان شاء الله نصبر صبرت ثلاث سنين على ددسن بدون مكيف في حر الرياض اصبر ثلاث ايام الحين مو مشكلة

فيصل 607
انت شايف كيف العيد حلو لما تعيد زي اهل زمان بدون مكيفات
طعم العيد بدا يختفي عندي من الساعة الثامنه صباحا لكن اهم شيء عيدنا على الجماعة كلهم اليوم
وباقي الايام بيتك بيتك

الله يجزاك خير على الدعاء ويبرد عليك انت بعد مو بس في الدنيا
في الدنيا وفي القبر ويدخلك جنة عرضها السماوات والأرض وتتنعم في برادها انت ووالديك وكل عزيز عليك وجميع من رد من الشباب وجميع من مر من هنا وكل واحد كان وده يشارك بس ماعنده معرف او ماعنده خبرة في الموضوع

لجميع الاخوة اللي ردوا فوق كل واحد يشتري له جالكسي بالكراميل ويعتبره حلاوة العيد من عندي

اكرر شكري للجميع
انتم نعم الصديق

**GTR150** · 11-09-2010, 01:32 PM

السلام عليكم ورحمة الله وبركاته

انا عندي رأي في الموضوع

انك تشيك تهريب الفريون لان الكمبرسور اذا يشتغل ويفصل يعني ما في فريون ينضغط

خذ بجميع الاحتمالات

وكل عام وانتم بخير

**عشقي هنادي** · 11-09-2010, 04:20 PM

بسيطه ان شاء الله

ابد هذا بيكون ياطويل العمر الكتاوت ومكانها تحت الدرج قيمتها تقريبا 250 جديده والتشليح 150
توني مغيرها من فتره صارت لي نفس مشكلتك

**الشقاوي** · 11-09-2010, 06:57 PM

كل عام وانت بخير وهذا ثاني ايام العيد

وانا أقول زي مقالو الأخوان الكويل عندك خربان لأنه حصل معي

وأنصحك تعبي فريون أصلي بعد عن التجاري لأنه يلعب في الكومبرسر

والله يوفق

**ياما نسيت** · 16-09-2010, 09:02 PM

السلام عليكم ورحمة الله وبركاته

يا اخوان غيرت الكويل وعبيت فريون امريكي وماتغير شيء للحين

شيك الفني على جميع الفيوزات وماحصل شيء

يا اخوان المروحة المفروض تتطلع هوا مع دقة السلف الأولى بدون تشغيل السيارة لكن سيارتي المروحة ماتشتغل ( اقصد مروحة اللي داخل المكيف )

الكتاوت واحد من الكهربائيين فك الدرج وشيك عليها لكن قالي اترك السيارة الى يوم السبت وماتركتها عنده ما اضمنه توه باكستاني صغير العمر تقريبا 19 سنه قلت ماني تاركها يومين اجيبها السبت اذا كان في العمر بقية

يا اخوان اللي يعرف كهربائي فاهم في المدينة او ورشة محترمة يدلنا عليها الله يجزاكم خير

جاء الدوام وللحين ماصلحت المشكلة

اي احد عنده علم او خبرة يفيدنا الله يجزاكم خير

**King** · 16-09-2010, 10:12 PM

قصدك المروحة هذه ماتشتغل؟! << موقعها داخل الدرج مباشرة عند فلتر المكيف

لأن إذا كانت ماتشتغل محتمل وجود إلتماس او مشكلة بالكهرباء وانت جالس تصلح حاجة ثانيه مالها دخل بالمشكلة الأولى!

او انك تطلع الفلتر إذا كان موجود , وتشيك على المروحة نفسها من الداخل وحركها بيدك , بس لا تشغلها وتدخل يدك!

إحتمال ضعيف انه فصل السلك حقها او ان ماركب كويس , ارجع له خله يشوفها لك

او انك تشوف لك كهربائي ثاني وقله المشكلة من بدايتها وانك صلحت كذا وكذا , وإن شاء الله امورك تمام.

**عزووز203** · 17-09-2010, 12:00 AM

طيب اخوي ترى طبيعي الكمبرسر يشتغل ويطفي شوي يشتغل وشوي يطفي

اذا شغلت السياره وما سمعت صوت الكمبرسر اصبر شوي شف يشتغل ولا لا
وشكراَ

**ياما نسيت** · 17-09-2010, 12:42 AM

اخوي كنق

نعم المروحة هذه لاتعمل ابدا الهواء مايخرج من فتحات التكييف

الكمبروسر سليم ان شاء الله والفريون جديد

الفيوزات سليمة

ما صلحت اي شيء كهربائي في السيارة من شهر جمادى اول اي قبل اربع شهور

العادة ان المروحة ذي تشتغل حتى لو السيارة ماهي شغاله ( المفتاح على on) فقط
لكن الحين ماتدور

المشكلة ان المدينة ماني عارف فيها كهربائي يفهم في الأكورد
واحد منهم بعد مقربع السيارة من الى
يقول لي ياخي هذي ماهي زي الكرسيدا

بالله وش رايك ؟؟؟

تسلم والله ياكنق
اشكرك على اضافتك
لكن تخبر لي كهربائي كويس في المدينة

عزوز الكمبروسر يشتغل ثانيتين ثم يطفي الى الأبد <---- تحسه مقهور

ومايشتغل مره ثانيه الا لما اطفي السيارة واشغلها من جديد يشتغل ثانيتين ويطفي من جديد وهكذا دواليك وهلم جرا

الخلل اعتقد والله اعلم ماهو من الكمبروسر الخلل من مروحة المكيف الداخلية ماتدور

اشكرك على تواجدك

**King** · 17-09-2010, 03:00 AM

اكيد ماراح يشتغل الكمبرسور

حسب إعتقادي ان الكمبرسور يفصل لأن المروحة نفسها ماتدور! , كيف ينتج هواء والمروحة ماتشتغل.!

مثل مراوح التبريد الرديتور , إذا طفت ارتفعت الحرارة << شي طبيعي

والظاهر ان المشكلة تكمن بالمروحة الداخلية
واكيد الكمبرسور يفصل عشان مايتضرر (انه يبرد بدون مروحة!!)

لذلك اول خطوة تسويها تشوف حل للمروحة الداخلية ولو تلاحظ بالصورة الثانية المرفقة , ان القطعة كاملة فيها جهاز تشغيلي.

ولو تعطل بكل تأكيد راح يتعطل المكيف ككامل حتى مايتضرر شيء ثاني (كالأمان-حماية).

اعتقد المشكلة من هذه القطعة
"Heater and A/C Blower Motor"

او من نفس القلب حق الدينمو للمروحة نفسها , محد راح يحكم إلا الكهربائي لما يتأكد ان المشكلة منها!

لاحظ في هذه الصورة نفس طريقة عمل المروحة , وتحصلها بأكثر السيارة نفس الطريقة

الآن انت عندك خطوات تسويها حتى تتأكد من المشكلة ولابد من وجود كهربائي حتى يساعدك في إيجاد المشكلة

تشييك على الفيوزات للداخلية والخارجية.
التاكد من الأسلاك موصلة ومحكمة الأغلاق.
تغيير احد القطع الموضحة بالصورة بعد التأكد من ان المشكلة منها.
بعد كذا مااعتقد انك راح تواجه مشكلة بإذن لله.

*اعذرني على خربطة الرد.! :d

**Accord <3** · 17-09-2010, 02:43 PM

بسيط هذا كتاوت المكيف تلقاه عنده درج الراكب بـ 200 ريال اصلي غيره ويشتغل معك المكيف

**ياما نسيت** · 19-09-2010, 12:50 AM

السلام عليكم ورحمة الله وبركاته

اولا اشكر من اعماق قلبي كل من وضع بصمته في هذا الموضوع

وجزاكم الله خير الجزاء

تم تصليح السيارة والحمد لله

نصحني احد الزملاء اليوم بالذهاب الى كهربائي جيد
ويوم رحتله الصبح اول مانزل راسه تحت الدرج شبك سلك واشتغلت المروحة على اعلى سرعة

قال الفني ان اتوماتيك المروحة خربان وراح اصلحه ب 150 ريال الا اذا فيه اشياء ثانية

المهم اني تركت السيارة عنده ودق علي العصر وقال لي ان المنظم اللي في االفرار خربان ( التحكم ) وسعره في الوكالة غالي تقريبا 3000 ريال لكن بوديه لفني الكترونيات وبعد نص ساعة اتصل وقال انه يصلحه ب 250 ريال اذا صلح ولا الله يعينك على الجديد او التشليح

وبعد العشاء دق علي وقال السيارة جاهزة تعال استلمها

ودار معه نقاش حول الهوندا وقطعها
يقول انها متعبة جدا في التصليح جدا كهربتها فيها نوع من الصعوبة وصواميلها مشدودة بقوة وانه لولا اني مرسول له من طرف رجال ما حط يده فيها لأنها تاخذ عليه الوقت وهو ماصلح شيء فيها

والحمد لله على كل حال
كلفتني الاصلاح الفعلي 400 ريال
والتكلفة الاجمالية 900 ( لأني غيرت كويل الكمبرسور مع انه سليم وعبيت فريون جديد )
وعلى طاري الفريون
كيف اعرف انه عبى لي فريون اصلي امريكي

واكرر شكري لجميع الاخوان بلا استثناء

**أغـار يا هـوندا** · 19-09-2010, 03:41 AM

ألف مبروووووووووووووووووووووووووووك
أهم شيء إنها صلحت
عندي خراب بسيط في السيارة ودي أدفع 6000 ريال وانهم يعرفون شو
بس كل ما أروح الوكالة يروح الصوت
احمد ربك عرفت المشكلة وانحلت

تستاهل كل خير حبيبي

**King** · 20-09-2010, 03:33 AM

جزاك الله خير على المعلومات , كذا نقدر نستفيد ونفيد :d

تصدقون ودي افتح ورشة , واخلي الأصلاح مجانا ً. {او ممكن مبلغ رمزي:o}

بس اهم شيء استفيد والخبرة بحد ذاتها تكفي وتغني عن أي مبلغ!.