كل عام والجميع بألف خير وصحة عافية ..
اليوم رحت للصناعية على خط سيهات وشريت من عند النعماني صدام بـ 140 ريال تجاري صناعة تايوانية .. ورحت بعدها لأبو سمير عشان ارشه بوية ( اللون لؤلؤي ) .. واتفقنا ع السعر بـ 300 ريال بعد ماقال الزول بـ 350 ماعليه أهم شي عندي جودة الصبغ وتطابق اللون .. المهم تركت عندهم غطى التانكي وقال الزول تجي العصر تاخذ الغطى .. أما الصدام يوم السبت ان شاء الله جاهز ( لحد هنا طبيعي بالنسبة لي ) .

جيتهم العصر ع الساعة 4 تقريباً لأني بطلع للجبيل .. واقول للزول خلهم يركبون لي غطى التانكي بسرعة وراي مشوار .. إلا يقول دخل السيارة الوشة ع شان نركب لك الصدام !!!!!!!!!! قلت له خلص الصدام ؟؟! .. قال نعم جاهز .. قلت ماعليه انا مستعجل الحين باطلع للجبيل وجاي عشان غطى التانكي .. وبإذن الله بجيك يوم السبت اركبه ..... أوكيه .

اللي مستغربه ونفسي أعرفه من أهل الخبرة والتجربة : هل من المعقول صبغ صدام يخلص بنفس اليوم ؟؟ .. يعني ( يستلم الصدام الساعة 8.30 تقريباً والساعة 4 العصر جاهز للتركيب ) .. مش من المفروض ان مادة الأساس الشفافة ( اساس البلاستيك ) تترك مدة عشان تجف تمام وتمسك بالبلاستيك ؟ .. وبعدها ترش البوية على شكل وجهين تقريباً .. وبعد مايجف الصبغ يرش اللكر ؟؟؟؟؟ ماعندي ادنى شك في شغل ابو سمير وخاصة بالبوية .. لكن هالتسؤلات تدور براسي طول الخط لحد مادخلت الجبيل !!! وماراح القى لها حل الا من واقع خبرتكم وتجربتكم .. وفقكم الله جميعاً .