اخوي فيصل .. والله هالمواقف اش كثرها .. وفي الدمام ياما يحدونك .. وتحدهم واحياناً بدون ماتشعر .. واغلبها عباطه !! وتصير حوادث أو بلاوي الله يبعدك عنها .. وانت الحمد لله ع السلامة وهينة مادام مافيك شي .. كلش يتعوض الا النفس .. والحمد لله انك بعافيتك .. وعن هالرجال .. راح اذكر لك قصة صارت لي قبل سنتين وبرمضان عام 29 هـ ....
أذكر كانت رايح للخبر ع الساعة 10 مساءّ تقريباّ ويوم رقيت على الكبري مقابل اسكان الدمام الا هذا اللي خاش علي بمساري ( انا أقصى اليسار ) وهو جا مدرعم علي من جهة اليمين وسيارته كانت كابرس قديم ( المصفح ) ! وسيارتي كانت لومينا 2005 وممشاي كان تقريباً 120 .. الزبدة وهذا يدخل علي بمساري فجاة كنه متذكر انه نسى البوك في البيت ويبي ياخذ يوتيرن بس وين يبوو الشارع هايوي وثلاث مسارات .. والفاصل بين الشارعين حاجز خرساني ارتفاع 80سم الى متر تقريباً بشكل هرمي .. ويضرب في الحاجز بقوة قدامي وبالوجه ويرجع علي وجه بوجه اذكر ان من قوة الضربه قزاز سيارتي الأمامي صار كله زيت وموية رديتر ماعاد اشوف شي ..... انزل من السيارة داااااايخ بقووووة .. وبعد ماهديت اشوي وشربت ماي كان معاي بالسيارة .. اشوف سيارتي الا الوجهية راحت ملح وسيارته ومن شدة الضربة في الرصيف ورجعته بعدها عليّ ( انعوج صدامه الحديد من جهة الركن الأيسر وصار يحك بالكفر مع عوجه بسيطة في الرفرف الأيسر أيضاً ونور واشياء بسيطة مثل لوحه وفيبر الوجه الأمامي ... ) أما اللومينا صارت كوريلا فاكه حلجها !! .. المهم اوقفت الناس وجو يتطمنون .. ومن كثرهم ما أدري وين اللي خش علي وصقعني !! .. وبعد فترة بسيطة اشوف هذا اللي جايب لوحة سيارته من بين الرصيفين واقابله وقوله سلامات اخوي فيك شي .. قال لا الحمد لله مافيني شي .. أقول له وش صارك لك أخوي بنشرت والا حذفت عليك السيارة والا وش فيك ؟؟؟ الا هذا اللي كني صفقته على وجهه قال ياخي انت اللي وش فيك صادمني من ورا وتقول وش فيني ؟!!!! اقول له يخوي انت بوعيك والا فيك شي ( المشكله انه لابس بدلة عسكرية .. أتضح لي فيما بعد انه في الطواري ) يقول انت اللي شكلك شارب والا ماكل لك شي رح عني بس الله يسامحك !!! .. قلت له ايه يخوي عندي كم حبه سمبوسة !! تبي لك وحده !!! ... المهم الرجال يكررها الله يسامحك بس .. الله يعين على تصليح سيارتي وانت الله يسامحك .. يالله تبي شي .. ويبي يعدل موتره ويمشي ... اقول له وين يبو والله ماتتحرك من هنا الا بعد ماتجي الدورية .. والا هذا اللي ينزل يقول صادمني وتهددني .... قلت ايه ( وتشب اشوي ) والناس اللي وقفوا وانزلوا يقربون اشوي .. واقول لهم هذا ياناس صدمني واعترضني بطريقي ويبي ينحاش .. اقول له خل الدورية تجي وهو رافض يبي يمشي ( اقل شي اذا مالي حق ابي ورقة اصلاح اشلون اخذها ومافي طرف ثاني ؟؟ ) الا كلللهم يقولون خلك يابو لا تروح لين تجي الدورية .. يقول لهم انا عندي دوام ومستلم وعيالي بالبيت لحالهم ومدري وشووووووو وانا سامحته ما بي منه شي !!! .. قلت له والله لو انك رايح للجبهة ماتروح .. لين تجي الدورية ... قال وش يعني تخوفني بالمرور وانت الغلطان .. قلت له ماعليه .. انا ابي ورقة اصلاح لسيارتي وبصلح لك سيارتك حرام تروح كذا بدون مااعطيك حق تصليح سيارتك هذا اقل شي !!!! ( الزبدة مسخرة وعبط وزعل وكلللللش ) .... ومع طول انتظاااار للدورية ( باقي مافي نجم وقتها ) واللي راح من الناس واللي بقى متعاطف معي .. جت الدورية أخيراً إلا هذا اللي ناقز بحلق العسكري يقول يخوي هالشباب ماخولنا بحالنا سرعة وتهور خذه معك بالدورية ووده الحجز لين يصلح سيارتي ويتأدب وياخذ جزاه .. وخذ لك من الحركات الاستفزازية ..... بس ماتمشي !! .. يبيني اقول لاااااا خلااااااص توبه ماعاد اتعودها !!!!!! .. اقول له يخوي بلا حكي فاضي الرجال يعرف عمله زين ويعرف منه الغلطان خله يخطط الحادث واذا سألك كيف صدمت الرصيف بوجه سيارتك ذيك الساعة اشرح له بالتفصيل الممل .. والله لو انها سيكل وانت قدامي بمساري بأقصى اليسار ماراح تعترض كذا وتصدم الرصيف بها الشكل ... المهم هجد خوينا اشوي .. وارح الرجال يخطط الحادث وحنا معاي اثنينا .. ويقول له العسكري يخوي انت جاي من المسار الثالث اقصى اليمين وهذي سحبة كفراتك .. وهذا بمساره الأيسر وهذا اثر البريك حقه عشان يتفاداك .. الا هذا اللي يرافس !! ويقول لا يخوي هذا متهور ومسرع ولو ماكن مسرع ماصدمني ( يبي يخطيني غصب ) يقوله راعي الدورية انت خاش عليه بمساره وما أمداه يتحاشاك ولا بملزم بعد يدخل وينحرف للمسار اللي بالنص ويصدم سيارة ثانية بعد ( الغلط عليك 100% ) جب استمارة سيارتك ورخصتك واثباتك وخلك قدامي لين تخرج من المخرج وصفط سيارتك واركب معاي الدورية .. وانت شف لك أحد يجيب لك سطحة وتعال المرور اللي بالخطوط الأربعة .. الا فيه شلة من العيال اتصلت عليهم من أول ( فزعة ) راح واحد منهم وجاب سطحة ووقف سيارتي بالحارة ( لكم ان تتخيلوا عيد بلا سيارة ) .... المهم مارحت للمرور رحت للبيت وقعدت مالي خلق .. الا وجوالي يرن رقم غريب .. ارد عليه الا هذا خوينا ( يخوي تعال المرور اش فيك ماجيت ) اقول له والله يخوي أنا بالبيت وماني بجاي الليلة احتمال بكره اجي والا السبت ان شاء الله ( كانت ليلة ثلاثاء يصبح الأربعاء ) الا هذا اللي يترجى ياخي تكفى تعال انا بالتوقيف واعيالي لحالهم يبون سحور ولا بلغت مرجعي ولا شي تكفى تعال خلنا نخلص وابشر باللي تبيه .......... اقول له يخوي مابي شي انت اللي تبيني اصلح لك سيارتك وماعندي فلوس الحين بدبرها واجيك ان شاء الله ( خذ عبط لأنه قهرني وهو يتفلت ويقول هذولي دشير متهورين ...... ) الزبدة قفلت منه والشور يقول ارقد وبكره رح لهم ( خله يخيس بالتوقيف هالليلة ) .. إلا نفسي تقول وش ذنب اهله ينامون بلا سحور .. واطفاله بدون ابوهم هالليلة ..ومن هالحكي العاطفي ...... لبست ثوبي وأخذت اثباتي ونزلت الشارع واركب لوموزين وعلى المرور .. الا هذا بوجهي تكفى وتكفى وتكفى .. اقول انزين خلاص وش تبي ( ابيك تسامحني ) اقوله بوشو قال من تصليح سيارتك اقوله والله يخوي ماني ولد افلان .. والا راعي دراهم اطق موتر ثاني .. قال ياخي طيب كم تبي .. قلت له ابي اللي يصلح موتري بس .. غير كذا ما أبي .. والعسكري المستلم يسمع .. قال يعني خلاص تبي ورقة تسعير .. قلت له ايه .. ويعطيني ورقة للمعارض عشان التسعير وورقة اصلاح على اني اختمهم الصباح .. ياعسكري خذ الرجال ووده الحجز لين يجيب له كفيل غااارم .. واطلع من المرور الا وانواع الأرقام ارد على هذا ويتصل ذاك .. هذا يقول ياخي ياخي فك الرجال خله يرح لهله وبيعطيك حقك .. والثاني قول قابلني المكان الفلاني عشان اشوف سيارتك كم تكلف ونعطيك حقك ...... وردي عليهم اقول ماراح اعرف سيارتي كم تكلف الا بعد مار اسعرها .. والرجال والله ما ودي يقعد لحظه وحده بالتوقيف .. لكن يجيب لهم كفيل على حسب طلباتهم هم .. وانا ماعاد لي اصلاً صلاحية اصلاً .. وافقل جوالي ...... واشغله ع السحور الا انواع الرسايل ( اللي تهديد واللي ترجي واللي واللي ) والله كأننا مو في السعودية .. الا هذا واحد يتصل .. ارد عليه يقول يخوي تعال للمرور الحين انا اعرف كم تكلف سيارتك وبنعطيك حقك واكثر .. وانطلع الرجال لأننا بصراحة مالقينا له كفيل حسب طلباتهم ( في شركة مرموقة أو برتبة عالية ) بعد تأنيب الضمير اتكلت على الله وواعدت الرجال عند سيارتي ورحت كعابي الا وهذا اللي مسفط عسكري في الأمن برتبة جندي او عريف والله ماني ذاكر بس عليه لوحة اسم ينتهي بنفس اسم عيالة خوينا .. نزل من سيارته .. سلمت عليه وهو بنفس خايسه يقول هذي سيارتك .. مافيها شي .. واسعار قطعها بعد رخيصه مرررررره .. وبعدين صدامها تجاري والكشافات تجارية بعد ماتبي الا رديتر حتى المراوح ماجاه شي .. والكبوت والرفارف رخيصة .. واصلاً عاااادي بتلقى تجاري بنفس جودة الأصلي ورخيص مررررة مايبي لك شي ولا راح يتعدى تصليحها الف ريال .. أفااااااا جتها صده من قبل ومغير كل شي تجاري ( واخليه ياخذ راحته كللللش ) .. وبعد ماقلب في السيارة ورفع ضغط أمي يقول يالله بنعطيك الف ريال ومازاد الله يسامحك فيه .. يالله يالغالي اركب معي خلنا نروح للمرور ونخلص كل شي من اهناك !!! بالحرف الواحد قلت له خلاص مهي بمشكله انت اسبقني وبجيك على سيارة اخوي .. ومصدق اخونا بالله راح ... واروح للبيت الا هذا اللي يتصل وينك يخوي انا بالمرور .. قلت له يالغالي اذا تلفيات سيارتي بيصّلحها الف ريال ماعاد ابيها خذها لك .. قال وش فيك انت شكلك تبي اكثر .. اقول له انا خصمي معروف ولا بيني وبينك شي .. يقول انا واصطة خير .. قلت له مانبي وسايط وواسطتي انا المرور وبكره بجي بعد الظهر .. وروح لهم يوم الأربعاء بعد الظهر ووقع الأوراق واسأل الرقيب اللي اهناك عن الرجال ( يقول هذا طلع بكفالة وقضيتك عن فلان الفلاني ) ياساتر تخيلوا عند من ( ابن عمه ) .. ماراح اعكيكم التفاصيل بالضبط وما دار ومع حبك وما جاني من ضغط غير طبيعي كي اتنازل عن دعواي وأقبل بالقليل رغم انها سيناريوهات لاتخلوا من التشويق ومن العبر المفيدة لكل من يقع مستقبلاً في نفس أو قريباً من ما وقع بي ......
مالكم بالطويلة ... بختصر لكم اشوي .. ولو اني مقدر !!! الحادث بالضبط وقع علي بمنتصف رمضان .. وأخذت حقي على داااااااير مليم بس متى ...... آخر شهر 10 .. تخيلوا الفترة بدون سيارة .. ومراجعات رمضان ( اروح للمرور يقول لي ماسك المعاملة والكروكي خصمك توه راح كان ينتضرك ومل ومشى ) اطلع من عندهم ( وروح اليوم الثاني بدري يقول والله مابعد جا لازم تنتظر لين يجي والا روح وتعال بعد الظهر ) ( أجيهم بعد الظهر واصف سرا لين اوصل عند هذا الموظف يقول يخوي توه راح من عندنا ويييييييينك انت ؟ ) وعاى هذا الحال .. جاء العيد .. وراح العيد .. ولا حتى بطاقة عيد !!! .. يفتح الدوام بشهر 10 واسبوع على هذا الحال لين اشتكيته بخطاب وضحت فيه كل شي عن الوضع من أول لتالي .. على ضابط الشعبة <<< ( رجال فيه خير شرواكم ) .. وأمر رقيبه بارسال خطاب لمرجع المطلوب بطلبه مخفوراً وعلى وجه السرعة .. وماهي الا فترة يومين بالكثير الا يتصلون المرور .. واجيهم الا هذا هو قدامي عند رقيب الشعبة .. يطلع الرقيب المعاملة والتسعيرات ويقوله انت عليه كذا وكذا للرجال بتدفعها الحين والا السجن قال لا هو غلطان علي وانا عندي اعتراض على تخطيط الحادث واطلب لجنة .. يسألني الرقيب وش رايك ؟؟ قلت بطيفه يبي لجنة يطلب اذا لي حق باخذه .. يوم شاف ردي كذا قال طيب انت كم تبي .. قلت ابي تسعيرة الأعطال والتصليح بس ما ابي غير .. يكفي اني عايش بدون سيارة للحين ( مايدري اني دخلتها ورشة من ثاني يوم بعد ما اطلعت الا بعد العيد .. وكل شي صلحته فيها تجاري بن تجاري .. ناوي ابيع خلاص جتني قناعة منها ( وبراسي هوندا ) المهم بعد تفكير عميق من هذا الرجل اصر على اللجنة .. كان يوم سبت وعدونا يوم الاثنين لأن لجان فض المنازعات والحوادث لهم على ما أعتقد يومين في الاسبوع اثنين وربوع ( ماني متأكد ) بس جيتهم يوم الاثنين الا وهو موجود ومعه عسكري بجنبه .. انتظرنا اشوي لين استدعونا لأن فيه قبلنا ناس متخاصمين دخلت انا واياه .. وقال الضابط من فيك فلان ( قلت أنا ياستاذ !! ) قال خلك وانت اطلع الزبدة عطاني ورقه وقلم وقال ارسم لي الحادث كيف سار والمسارات ومواقع سيارتكم قبل وبعد الحادث .. وارسم له كل شي حتى خشتي وهي طالعه مع القزاز ولمبات الشارع والاسكان ماخليت شي ( اش دعوة حصة فنية ) << يمزح .. رسمت له رسمه مقبولة ( فنان في الرسم ) وشرحت له الحادث وهو يتابع في الكروكي عنده .. وبعد ماخلصت يقول صحيح ميه ميه مثل ماهو بالكروكي ليه معترض خصمك .. اقول والله مدري القضية طووووويلة وماهو راضي يعترف ويعطيني حقي .. ويستدعيه ويعطيه ورقه وقلم مثلي ويطلب منه نف س الطلب .. وانا واقف ماقال لي الضابط اطلع .. الا الرجال يختبص يقول والله مالي بالرسم لكن الرجال هذا دفني من ورا واحنا بنفس المسار واختل توازن سيارتي وصفقت بالرصيف والرجال اللي جا يخطط الحادث مايدري عن شي .. يطالع فيه الضابط ويقول له انت وانت وانت وعليك الخطأ 100% ويحك على الكروكي دائة حمراء والله اذكرها للحين ويوقع عليه كرئيس لجنة ويعتمد النسبة .. ويقول له ياعسكري خذ الرجال هذا اللتوقيف ولا يطلع لين يدفع اللي عليه .. قال لا خلاص المبلغ معي ويدعي الله مدري اش يقول ( الرجال ملتحي وعليه هيئة الصلاح ) ويرد عليه الضابط وهو معصب يقول له انت المفروض انك تكون قدوه وانت بها الشكل ماتاكل حق الناس يكفي انك مسحب بها المسكين شهرين << وحط اصبعي بفمي !! وبنفسي اقول ينصر دينك .. ويطلع بوكه واخذ حقي منه .. واكتب على ضهر التقرير ووقع بانتهاء المطالبة واطلع .. ( ومايضيع حق وراه مطالب وان طالت المدة ) والسلام عليكم ورحمة الله وبركاته . <<< كلمة الصباح !!
حبيت اني اسرد لكم هذه القصة كرد على موضوع اخوي فيصل .. مع اني كنت احب اني احطها بموضوع مستقل .. لأخذ منها ما يفيد .. لكن يستاهل لأني متعاطف معاه للآااااخر .. والله ينصرك يالغالي على من ضلمك وياخذ حقك اليوم قبل باكر .. بس طلب ( لاتدعي على أهله مالهم ذنب ) .. واعذرونا على الأخطاء الاملائية .. والتقصير في سرد القصة بشكل أجمل .. تحياتي للجميع ،،،
رد مع اقتباس
المشاركة الأصلية كتبت بواسطة pink dream
^^^^
ضوابط المشاركة
مواقع النشر (المفضلة)