مسسسساعده .. وشوره ..
السلام عليكم ورحمة الله وبركاته ..
كيف الحال إن شاء الله طيبين ..
وكل عام وانتو بخير وصحة وسلامه بعد الزحمه هع ..
أنا قررت أشتري هوندا أكورد 2010 أبيها فل كامل 4 سلندر او 6 شورتكم هنا ضروريه بحكم راتبي وبحكم اني ابي اكشششخ ..
وأبغى اعرف بعض الاشياء واتمنى التجاوب لاني لي شهرين وانا حايس ما ادري وش اسوي ..
فـ الفزعه الفزعه الفزعه :(
_____________________________________
أبغى اعرف اول شي أقدر اطلع السياره بأسمي ؟
* راتبي الاساسي 3 الاف مع البدلات 3700 .
* عندي قسايم مروريه ماهي واجد يعني 1000 ريال .
* راتبي ينزل على صرافة الاهلي .
_____________________________________
معاي دفعه اولى 8000 ريال كم يطلع لي القسط تقريبا ؟
وهل لازم ادفع الرسوم الادرايه اللي غير الدفعه ؟
وبكم هي اصلا بالاقسسساط
_____________________________________
بعدين في ششششي مجنني الحين الاسطبات الخلفيه للهوندا اكورد انا دايم اشوف في اسطبات كأنها شرايح من وراء
واسطبات عاديه زي حقت اقل نوع هذا اهممممم شي عندي لازم اعرفه .
تكفون ابي اعرف كل شي
اسمعني خوويي طلع اكورد من الاهلي اقساد فل كامل 4سلندر 144 الف وانا الراجحي 116 الف ..
المهم الشرائح اتوقع لـ 6 سلندر لكن اذا اشتريت 4 سلندر يمديك تركبها بحدود 600-700 ..
واذا بتشتري سياره ترا الاكورد غاليه على غير سنع بقيمتها سوناتا او كامري وعن القسط مادري بس انا ماخذها دفعه اولى 31 الف وشهريا 1790 لثلاث سنوات ودفعه اخيره 24 الف ..
وحقت الاداريه ومدري وش اتوقع بتاكلها غصبن عنك ..
بالتوفيق > واذا بتشتري وملزم احلى لون العنابي > يعني عشان نفس لون سيارتك هههههه
على راتبك .. لا تقرب للأكورد
خذ لك سيارة على قدك الين ما يتحسن الراتب
مثل الكورولا ولا سيفيك و هيك
المشاركة الأصلية كتبت بواسطة حـسـآفـة بـآعـونـي
ع العموم يعطيك العافيه ع المرور لبى قلبك
ألله كريم يارجال وانا راتبي هذا الين التثبيت بس
يعني انا تحت التدريب لسنه ..
شكرا على مرورك بإنتظار باقي الردود ..
ابعد عن الاكورد
الين ما يحلو مشاكلها يمكن عام 2013
وعندك خيارات كثيره
اشتري ونيت غماره يعني
والله احترنا وش نشششتري هذي حاله والله
عرفت الاسطب اللي ابيه اسسسسسسمه led اسطب خلفي ما يجي شد بلد ذا ؟
أنت سألت عن الـ 4 سلندر و الـ 6 سلندر
أنا أنصحك بالـ 6 سلندر لأنها :-
المكينة أقوى و فيها نظام السندرات المتغير : بمعنى أنها داخل المدن و على السرعات الخفيفة تشغل 3 سلندرات فقط و فيه حال احتجت عزم وسرعه تشغل 6 سلندرات جميع و تشغل 4 سلندر أيضا و هذا يحسن من اقتصاد الصرف بالنسبة للبنزين
ثانيا : تجي معها خلفية الـ BM و كاله و أصلية
ثالثا : زنون للواطي مع ميزان اوتوماتيكي للنور
رابعا : النظام السمعي للـ 6 سلندر أفضل و أقوى من الـ 4 سلندر
خامسا : منظف للنور الأمامي ( رشاش ماء للإصطبات اللي يجي في الصدام الأمامي )
هذا مايحضرني حاليا و لكن تبي نصيحتي خذ لك 6 سلندر لأن السيارة ثقيله و الـ 6 سلندر يالله تكفي لها و لو أخذت 4 سلندر راح تشتكي من العزم و من ثقل السيارة
على العموم بالتوفيق و هذا اللي أقدر أفيدك فيه و بالنسبة للسعر و التقصيد ما أدري عنه والله وما عندي خلفية عنه ولكن نصيحه
رح للوكالة أول شيء و أسألهم عن الأقصاد و حسب كم تطلع عليك و رح للبنك وشوف لو تاخذ قرض بقيمة السيارة ( كاش ) تاخذ مثلا 125 ألف من البنك وتردها لهم أقساط و تاخذ السيارة كاش
هذي المواصفات للنوعين
الفل EX l4: -
مخمل/جلد – مسجل 6 سيديهات – فتحة سقف – جنوط 17 – مكيف الكتروني - ايرباق للسائق والراكب - مقاعد كهرباء للسائق فقط - 6سماعات - مقابض نيكل – كشافات – تخشيب ( فورمايكا ) – تسفيط الي للمرايا – تنجيد الطارة والقير بالجلد ( خياطة ) - ديكور القير ومسكة القير بلون فضي ( رياضي ) – المرايا الداخلية الوسطى تعمل على تخفيف إجهار الانوار – تلبيس تجويفة الشنطة العلوية بلباد .
-----------------------------------------------------------------------------------
الفل V6 EX 3.5: -
مخمل/جلد – مسجل 6 سيديهات – فتحة سقف – جنوط 17 – مقابض نيكل لفئة الجلد فقط – كشافات – مكيف الكتروني – تخشيب ( فورمايكا ) - مقاعد كهرباء للسائق ولفئة الجلد فقط– تسفيط الي للمرايا لفئة الجلد فقط – ديكور القير ومسكة القير بلون فضي ( رياضي ) –تنجيد الطارة والقير بالجلد ( خياطة ) لفئة الجلد فقط - المرايا الداخلية الوسطى تعمل على تخفيف إجهار الانوارلفئة الجلد فقط - تلبيس تجويفة الشنطة العلوية بلباد - نظام التحكم الصوتي للضجيج لفئة الجلد فقط - 7 سماعات لفئة الجلد فقط – رشاشات ماء للشمعات الأمامية – زنون بدرجة 4300K– ايربقات جانبية وامامية حماية متكامله لفئة الجلد فقط – مكيف خلفي – شكمانين خلفية - الابواب والدرج الاوسط والدركسون والقير جلد خياطة في فئة المخمل .
----------------------------------------------------------------------------------------
باختصار للفهم لا للتقليل من شان الفل V6
( الفل V6 هي الفل l4 بس اضافو لها 7 سماعات – رشاشات ماء للشمعات المامية – زنون – ايربقات جانبية وامامية – مكيف خلفي – شكمانين خلفية - واخيرا المكينه سته سلندر )
هذه صورة للخلفية :-
خلفية الـ 4 سلندر
و هذي خلفية الـ 6 سلندر
طبعا موديل 2010 أضافوا حساسات خلفية للفل كامل سواء الـ 4 سنلدر أو 6 سلندر
تحياتي لك
.
.
.
.
.
.
.
8
8
8
يعطيك العافيه لبى قلبك والله
الـ 6سلندر طيب الانوار اللي وراء led ؟
لالا
الاكورد بكامل انواعها تجي الاصطبات عادية لكن تروح للغرابي او اي محل زينه يركبونها لك وعليها ضمان ب600ريال وتطلع شكلها خقق
لكن نصيحتي خذلك سيارة اقل من الاكورد ترا راتبك ومصاريفك مايتناسب مع سعر الاكورد الغالي
نصيحه لوجه الله لا تشتري اكورد أقساط أبدا أبدا ابدا
لانها أساسن كاش غاليه وماتسوى على مواصفاتها النااااااااقصه
فمابالك بالاقساط؟
وبعدين ترى لها 3 موديلات ماتغيرت يعني لاجديد
نصيحه دور بدائل اخرى
وانا أرشحلك فورد تورس صدقني سياره رااائعه جدا
من حيث الراحه ترى الاكورد زيرو ماهي مريحه أبد بعكس التورس
والتقنيه عاديه والتسارع عادي جدا
بعكس التورس اللي بتحس إنك متميز لانها مو منتشره بحكم إنه أول موديل
وفيها مواصفات قريبه من اللكزس وتتعدى اللكزس بعد
(نظام شاشة ترفيه متطور جدا من تطوير شركة ميكروسوفت -رادار - قير تبتروانيك -تسخين وتبريد المقاعد-تشغيل السياره بالريموت-واشياء كثييره جدا لاتوجد ولن توجدبالأكورد)
الاكورد ميزتها الوحيده التماسك الجباار والرساوه والعمر الطويل غير كذا ماحولك احد
آسف عالإطاله بس والله وديلك بالخير
اخوي اذا تبي نصيحه اذا بتاخذ اقساط فخذ لك 4 سيلندر وفيه طريقه ذكرها الاخ Classic Design اللتي تاخذ قرض من البنك بنفس قيمة السياره وتروح تسددهم كاس منها تسلم فوائد التأمين منها السياره باسمك
واذا تقدر تمشي حالك وتشتري سياره وقت التدريب الى ان الله يوفقك وتترسم في الوظيفه فوقتها تبي تقعد على سيارتك او تبي تبيعها وتاخذ سياره بدفعه اولى محترمه.
والله الموفق
انصحك تاخذ السبشل
الفل غاليه ومافيه شي يفرق كثير الا اذا بتاخذ 6 سلندر
واتمنى من الشباب يجاوبون الرجال على قد سؤاله
هو عارف راتبه وكيف وضعه
اللي عقله في راسه يعرف خلاصه
ضوابط المشاركة
رد مع اقتباس
.jpg)
مواقع النشر (المفضلة)