وهذه هي تجربتي .. تقرير ال 200000 كم
بسم الله الرحمن الرحيم
بعد الجدل و الخلاف الي صار في المنتدى في الفترة الماضيه والتشكيك في سمعة الأكورد سواءا من أعضاء النادي أو من الدخلاء مثل مايقولون .. فكرت وقررت اني استعرض لكم نبذه عن سيارتي خصوصا انها كملت حاليا 5 سنوات وزياده ومثل ماهو معروف عند الجميع ان هذا هو العمر الافتراضي للسياره .. أضف لذلك انها قطعت مسافة 200,000 كم ..
قبل ما أبدأ أحب اوضح ان السياره ما اشتريتها وكاله .. لأن الفتره الي كنت أبشتري فيها السياره كانت في نهاية عام 2005 وكانت السياره مخلصه من الوكاله بجميع فروعها ماعدا اللون الفضي ولا راح تجي الا دفعة 2006 وماكنت مقتنع في شكلها من الصور الي شفتها بصراحه .. فقررت اني ادور على سياره مستعمله وتكون شبه جديده ,,
الحمد لله توفقت وشريت سيارتي وكانت مستعمله لمدة شهرين لكن كان ممشاها عالي شوي (14000 كم ) واخذتها بحدود 77500 ريال مع العلم أن الوكاله كانت تبيع اللون الفضي جديده ب79000 ريال لكن اللون كان غير مقنع لي أبدا فالحمد لله اخذتها وانا مرتاح ومقتنع .
قطعت السياره أغلب ال 200.000 كم على خط الدمام – الأحساء أيام الدراسه بالجامعه لأني كنت أروح بداية الاسبوع للأحساء وارجع يوم الأربعاء ولمدة 4 سنوات من 2006 – 2010 ..
وقطعت السياره مسافه لابأس بها على خط الدمام – الرياض خلال فترة التقديم بعد التخرج ثم فترة التدريب في بداية الوظيفه ولمدة شهر كامل كنت اروح فيها اسبوعيا للرياض غير السفر للرياض بين فترة وفتره للتمشيه أو انجاز اعمال خاصه.
اما باقي المسافه فمشاويري العاديه بين الدمام – الخبر – الجبيل
سواقتي للسياره لاهي بالشاقه مثل مايقولون ولاهي بالهاديه .. وسط .. أخذ حفر .. مطبات .. عادي جدا فأنا سعودي لكن الحمد لله ماني براعي سرعه ومقاومات .
1- الشاشه اشتريتها من المشرف ميشو مثل ماتعرفون سابقا
رابط الموضوع
2- انوار اللوحات الخلفيه (اللكزس) اشتريتها من وكالة لكزس قبل سنتين تقريبا بحدود170 ريال وركبتها بنفسي بعد عملية صعبه جدا جدا اخذت مني أكثر من ساعه لكن في النهايه اكتشفت ان الشغله اسهل مماهي عليه . وهذا رابط موضوع الأخ محمد بن عبدالعزيز يوضح لكم الطريقه بالشرح المفصل
رابط الموضوع
3- انوار الزينون (4300 كلفن) صيني ومتوفر بكثره في السوق وتقريبا مثل الي يبيعه أخونا كاكاشي
4- التحكم بالصوت من الدريكسون (القطعه موجوده بالوكاله والتركيب عند أخونا محمد بن عبدالعزيز وتقدر لو عندك روح المغامره والتجربه تركبها بنفسك بس المشكله كل الشروحات الي بالمنتدى اختفت صورها)
5- وصلة الايبود ( تم شراءها من موقع ebay قبل 3 سنوات تقريبا بحدود 350 ريال وركبتها بنفسي بعد قراءة موضوع أخونا NEO FOX )
رابط الموضوع
هذي صوره للوصلات الي اشتريتها وتجي بالطريقه هذي
هذي صورة مخرج الايبود من خلف المسجل
6- مقابض النيكل (اشتريتها ب 100 ريال من العضو Ahmed_mokhtar )
7- الستائر (اشتريتها من العضو أكورداوي بس مسوي لي خصم خاص) :d
رابط الموضوع
8- عازل حراري (توب شيلد)
رابط الموضوع
1- في اول يوم استلمت فيه السياره ومع أول اختبار للدعسه .. تفاجأت ان السياره بدت تنتع وفجأه طفت علي ومن بعدها ما اشتغلت الا في وكالة عبدالله هاشم .. !! يعني تخيل اول يوم وتشيل سيارتك بسطحه !! وش شعورك وقتها ؟
وش السالفه ؟ طلعت من محطة البنزين الي عبيت فيها السياره لأول مره .. كانت المحطه شبه مهجوره وعلى ما اظن ان خزان البنزين كان على النهايه فدخلت كميه كبيره من الرمل في السياره وسدت البخاخات وقفلت قبل ماتوصل للماكينه وتمت عملية تنظيف التانكي والبخاخات في الوكاله واخذت مني اسبوع تقريبا بتكلفة 850 ريال تم تخفيضها الى 450 ريال .
2- بعد السنه الأولى تقريبا صار عداد البنزين يلعب .. مره على الفل ومره على ال E وكنت وقتها في ابها .. ورجعت الشرقيه ودخلتها الوكاله ولقوا عندي قاعدة طرمبة البنزين مكسوره وهي عباره ربله صغيره وقيمتها تقريبا 20 ريال وسعر التركيب 100 ريال وتم حل المشكله بحمد لله.
3- مشكلة السنتر لوك وهي مشكله معروفه في الأكورد بصفه عامه وتم تغييرها في سيارتي مرتين تقريبا للبابين الأماميه
4- أنوار السقف الأماميه وتم تغييرها بأفياش من التشليح ب 80 ريال
5- كراسي الماكينه كلها مع كرسي واحد من كراسي القير وتم شراءها ب 1200 ريال وتغييرها ب 350 ريال مع قيمة تغيير جلد المقصات .
6- جلد المقصات ولا اذكر سعرها بصراحه لكن في حدود 300 ريال
7- علبة الدريكسون وتم تغييرها في الوكاله ب 2350 ريال مع قيمة تغيير صوفة الماكينه الأماميه ( ما أذكر السعر المفصل )
8- لي الدريكسون وتم تغييرها على الضمان بحكم انه عيب مصنعي
9- القماشات الأماميه تم تغييرها 3 مرات (المعدل مره كل 66000 كم ) وأشوف انها منطقيه جدا .
10- القماشات الخلفيه غيرتها 5 مرات تقريبا (معدل عالي مقارنة بباقي السيارات الأخرى )
11- الهوبات الاماميه غيرتها مره وحده وانخرطت مرتين حتى الان.
12- البوري تم تغييره مره وحده ب 180 ريال ويتم تنظيفه بين فتره وفتره على حسب العج في الخط
13- حاليا عندي مشكلة تهريب بسيط في صوفة القير والى الآن ماصلحتها
14- أسنان تروس القير تآكلت من بدري بصراحه (30000 كم ) لكن مامنها ضرر غير ان صوت الحنه عالي شوي ..
15- مشكلة الثروتل بودي جننتني فترة زمن .. يعني كل ما أمسك خط أوصل ألاقي الضغط مرتفع بشكل يفشلك عند الاشاره وتصير السياره فيها قوة جامحه للإنطلاق .. وكانت تنحل بالتنظيف وبصراحه تعبتني وكلفتني كثير لأني مالقيت فني جيد يحلها لي .. وفي الأخير الحمد لله دخلتها ورشة الترس وانهى المشكله من أول مره .
16- مشكلة تعليقة النور العالي لكن الحمد لله انحلت مع تركيب الكتاوت ب 100 ريال شامل اجور اليد.
لم تتم عمل أي صيانه دوريه في الوكاله من صيانة ال 1000 كم حتى الآن .!!
لكن السر في كوني عارف متى احتاج أغير كل قطعه ..
-تغيير الزيت كل 5000 كم واحيانا اتجاوزها الى 8000 كم لكن محافظ على التغيير بالوكاله.
- تغيير زيت القير + البواجي كل 40000 كم وفي الوكاله ايضا.
- تغيير سير الماكينه الخارجي وصفاية البنزين وفلتر الهواء كل 100.000 كم ويتم تغييرها برى الوكاله
- تغيير الكفرات كل سنه أو كل سنه ونصف على حسب الاستخدام وغيرتها الى الآن 3 مرات كالتالي /
1- المره الأولى غيرتها في الوكاله بنوع ميشلان (قوة- ثبات – عمر اطول – ازعاج )
2- المره الثانيه ركبت تويو ( ثابت ويعطيك رساوه حلوه – هدوء – عمر سنه كحد أقصى )
3- المره الثالثه دنلوب ( غير مقنع بصراحه ولا انصح به )
1- حادث السرقه في عام 2006 وبالضبط في الساعه 12:20 مساء يوم السبت 22/9/1428
ولقيت السياره بعدها بأسبوعين تقريبا بعد فيلم من المطاردات والمراقبه ولقيتها على حال لابأس به لأنه اهون مماتخيلته لكن كلفتني تقريبا 15000 ريال تحملها التأمين بالكامل .
هذي بعض الصور للسياره من حوش شرطة الظهران
2- حادثة بسيطه صارت بسبب شركة نقليات شحنت عن طريقها السياره ونزلوها من السطحه بطريقة خاطئه وتسببت في اضرار بسيطه للصدام وربلة الحمايه السفلى وتحملتها شركة النقليات .
3- حادث بسيط جدا لكن كان في مقتل على ماقالوا .. كلف 7000 ريال على حساب التأمين
4- حكات بسيطه في الصدامات والابواب
1- سرعة ومرونة في الاستجابة في حالة حدوث أي موقف مفاجئ.
2- قوة تحمل وتماسك رهيبه ماشاء الله تبارك الله
3- جودة المواد الداخليه عاليه
4- تصميم داخلي رايق خصوصا لما تقارنها مع منافسيها في عام 2005
5- نعومة القير في التبديلات
6- نظام i-vtec المخفض لإستهلاك الوقود (600 كم على الخط – 450 كم داخل المدينه)
7- نظام ESB (توزيع الثقل على انحاء السياره على حسب الحاجه )
8- وجود انظمة الأمان الأساسيه مثل SRS – ABS ونظام حماية السياره من السرقه بعكس بعض المنافسين في عام 2005 الي كانت تفتقر لأتفه الأنظمه بينما في الأكورد حتى في اللستاندر متوفره
9- رساوة على الخط ممتازه
10- السياره ماتحتاج لفترة طويلة عشان تحمى يعني دقيقه بالصيف و3 دقايق بالشتاء تقريبا.
11- سعرها عالي عند البيع
1- صوت الماكينه عالي شوي وكذلك صوت القير.
2- عيوب مصنعيه مختلفه مثل علبة الزيت وليات الدريكسون وعلبة الفيوز وفيوزات طرمبة البنزين .
3- تنسيم الهواء عند السرعات العاليه.
4- التعقيد الميكانيكي والكهربائي في السياره .. يعني مو أي فني يعرف لها وهذي نقطه متعمده من الشركه لكن تضرنا احنا كمستهلكين .
5- قطع غيارها غاليه خصوصا في حالة الحوادث لاسمح الله اذا ماكنت مأمن على السياره.
من خلال العمر الي عشته مع السياره أقدر أقول أنها تستحق انها تكون السياره الأولى في فئتها من ناحية الاعتماديه .. سياره عمليه بمعنى الكلمه .. تحملتني بدون ماتشتكي .. وكل المشاكل الي ذكرتها أعتبرها عاديه جدا لو فكرتوا في ان السياره مستعمله من البدايه .. ثم انسرقت مني وتعرضت للتخريب والتفحيط والتطعيس .. لا ووصلت الى حد المطاردات لأن خويي شافها وصار فيلم بينهم انتهى لصالح الحرامي للأسف .. اضف لذلك ان السياره ماعرفت شي اسمه صيانه دوريه .. اضف لذلك انها ماهي على يدي بس .. يعني بالعربي صايره سبيل في البيت وبين أخوياي لكن مع ذلك صبرت ماشاء الله تبارك الله ..
الحين ماراح أستغرب أي خراب منها لأن عمرها الافتراضي انتهى وجاء وقت تغييرها لكن بسبب بعض الظروف فماراح أبيعها حاليا وراح تكمل معي بقية القصة ان شاء الله وعقبال ال 400,000 كم
يبقى كل ماكتب في التقرير المتواضع هو جهد بشري معرض للخطأ والنقصان .. وأكيد انه مايغطي فترة ال 5 سنوات الماضيه بالشكل الكافي .. وأكيد ان فيه أشياء لم تذكر لكن حاولت بقدر المستطاع اني اتذكر كل صغيره وكبيره مرت علي خلال هالفتره وقدرت أطلع بهذا التقرير الي أتمنى أني أكون وفقت في شرحه وتصويره وأتمنى انكم مازهقتوا من كثرة الهرج الي فيه لكن هي رغبه في توضيح سر من اسرار المقطوعه الموسيقيه ACCORD .
وهذي آخر صوره أختم بها
لاتنسى : ماشاء الله تبارك الله حتى لو ما أعجبتك السياره
ملاحظه : يوجد أخطاء في التنسيق والسبب مجهوللذلك لحد يدقق :d
رد مع اقتباس
المشاركة الأصلية كتبت بواسطة TOPSHIELD
مواقع النشر (المفضلة)